Adventure of Demon Lord [ VILLAIN GOD SYSTEM ]

Arc_3.12

ယိုယွင်းနေသောအဆောက်အအုံတစ်ခုအရှေ့တွင် ရဲကားသုံးစီးနှင့် အနက်ရောင်ကားတစ်စီးတို့ ရပ်လိုက်ကြသည်။ ထိုကားတွေဟာ အခုနလေးတင် ဒန်နီရယ်မြင်လိုက်သော ရဲကားများဖြစ်ကြသည်။ သူတို့ဒီကိုလာရသည့်အကြောင်းရင်းကတော့ မိန်းကလေးတစ်ယောက်အသတ်ခံရသည်ဟူသော ဖုန်းcallတစ်ခုရလာတာကြောင့်ပင်။ ဖုန်းဆက်လာသူကတော့ သေဆုံးသူ၏အစ်ကိုရင်းဖြစ်သူဟုဆိုသည်။

ဒါကြောင့် အော်ဒရေးနှင့် လက်ထောက်နှစ်ယောက်အပါအဝင်၊ ရဲဌာနမှ ရဲသားတစ်ချို့ကိုပါခေါ်လာခဲ့လိုက်သည်။ အရမ်းကြီးခေါ်ချင်နေလို့တော့မဟုတ်။ အော်ဒရေး၏အထက်အရာရှိက ပူးပေါင်းဆောင်ရွက်ရန်တာဝန်ပေးလာတာကြောင့်ပင်။ မဟုတ်လျှင်တော့ အော်ဒရေးဟာ ဒီရဲတွေကိုလှည့်ကြည့်မှာတောင်မဟုတ်။ အဘယ်ကြောင့်ဆိုသော် အော်ဒရေးတစ်ယောက် ရဲသားများနှင့် ကွိုင်တက်ခဲ့ဖူးတာကြောင့်ပင်။ ထိုပြဿနာကြောင့် အော်ဒရေးဟာ စုံထောက်ရာထူးပြုတ်ခါနီးဖြစ်သွားသလို၊ အဲ့ဒီ့ရဲဌာနလည်း ပိတ်ရမလိုတောင်ဖြစ်ခဲ့သည်။
အဲ့ဒီ့အချိန်မှစ၍ အော်ဒရေးဟာ ရဲတွေနှင့် လိုတာထက်စကားပိုမပြောတော့ပါချေ။

အော်ဒရေး ကားပေါ်ကနေဆင်းလိုက်သည်။ သူကားထဲကထွက်လာသည်နှင့် သူ့အရှေ့ရှိကားထဲကနေ ပုကွကွလူတစ်ယောက်နှင့်အကြည့်ချင်းဆုံသွားသည်။ အော်ဒရေးတစ်ယောက် တံခါးကိုဆောင့်ပိတ်လိုက်ကာ ထိုလူ့ကိုကျော်ပြီးသွားမလို့လုပ်သည်။
"ဝေါင်း...ကြီးမြတ်တဲ့စုံထောက်ကြီးက ကျုပ်လိုရဲအရာရှိလေးကို အဖတ်တောင်မလုပ်ချင်တော့ဘူးထင်တယ်။"

ထိုလူ၏ရိသဲ့သဲ့စကားကြောင့် အော်ဒရေးခြေလှမ်းများရပ်သွားကာ နောက်လှည့်မကြည့်ပဲနှင့် ခပ်မာမာပြောလိုက်သည်။
"အမှန်ပဲ။ အထူးသဖြင့် ခင်ဗျားလို လာဘ်စားတတ်တဲ့သူမျိုးဆိုရင်ပေါ့။"
ထိုသို့အနိုင်ပိုင်းကာ အော်ဒရေးသည် သူ့လက်ထောက်နှစ်ယောက်နှင့်အတူ အဆောက်အအုံပေါ်ကိုတက်လာခဲ့လိုက်သည်။ လှည့်မကြည့်လိုက်သော်ငြား အဲ့လူရှူးရှူးရှဲရှဲဖြစ်ကာ ကျန်ခဲ့မည်ကို အတပ်သိနေပါသည်။

ထိုလူဟာ အသက်၅၀ရှိပြီး ရဲအရာရှိတစ်ယောက်ဖြစ်သည့်အပြင် အော်ဒရေးကြည့်မရသည့် ရဲဌာမှလူတွေအနက်မှ တစ်​ယောက်အပါအဝင်ဖြစ်သည်။  အရင်ကဖြစ်ပျက်ခဲ့တဲ့ပရိပက္ခထဲ၌ ထိုလူလည်းပါဝင်ခဲ့သည်။