سـعـد الـبـايـرات

|12|

💜سـعـد الـبـايـرات💜
بقلم #رباب نجمة وَ إكرام#
الحلقة الرابعة:
عنوان الحلقة: حكيم القبيلة.
الجزء12:

رجعات إكرام نظرها ليهم كتشوف المسرحية لي قدامها....كتفرج وتضحك بحال الهبيلة وتمضغ المسكة بحال الشيخة لي المذاق واللون مشا منها بقوة المضيغ..

الطبيب: واش نتي بخير؟ باش كتحسي؟ شنو كيضرك ؟
رباب(بصوت رقيق كتلحن فالكلام): كيضرني قلبي أدكتووور..
كانت المساعدة وإكرام غير كيتفرجوا.. المساعدة كترمق رباب بنظرات كلها دهشة واستفهام أما إكرام عايقة بصاحبتها وشنو كيضور ليها فداك الراس.. كتمضغ وتقول فبالها "يا ربي حتا أنا شي عريس بحال هذا"..
تكلم الطبيب بصوت رخيم..
الطبيب: ممكن تجلسي فوق هاد السرير..
رباب: معلوم..
جلسات رباب....وإكرام قربات حداها باش تراقب عن قرب..
قرب الطبيب أكثر من رباب...والسيدة ذايبة فيه تقول عمرها شافت الزين... وفين غاتشوفو أصلا!!
مد يدو لفستانها الحريري وبالظبط جيهة صدرها.. هنا انتافضات بذعر راجعة للوراء.. ومبعدة يدو من ناحيتها..
الطبيب: مالكي ؟
رباب(بخدود موردة): أويلي حشومة خلي بعدا حتا نتزوجوا (بغمزة) وديك الساعة نبرعك..
الطبيب: نتي شكاتقولي واش حمقة؟
رباب(بإبتسامة): إلا كنت أنا حمقة عندك أدكتور نداوا..

ضحكات إكرام ضحكة مسموعة بحال ديال الشيخات وغمزات رباب بمعنى راكي غادا مزيان..
الطبيب: خليني ندير خدمتي أ آنسة الله يخليك راه مزال بزاف دالناس لي كيتسناو..
رباب: وخا صافي..

قرب منها مرة أخرى باغي يحيد ليها الفستان لي لابسة حتا رجعات مرة أخرى للوراء هاربة منو..
رباب: أويلي نت شباغي دير ؟
المساعدة: لالا نتي أكيد حمقة نتي وهاد الخليقة لي معاك..
الطبيب: واش مغاتخلينيش ندير خدمتي.. ياكما حسابليك غير نتي لي كاينة راه مزال بزاف دالناس من وراك.. يا خليني نقلبك يا خرجي عليا برا....
إكرام(بالغوات): شنااااهوااا واش عارف راسك معامن داوي ولا غاداوي خاوي لي قدامك بنت الحاكم وبنت شيخ القبيلة وأجرك على الله نشريوك نت وهاد عود سبسي لي حداك واش فهمتي أعشيري... هاكاوا قالك خرجي عليا...
المساعدة: همجيات..
إكرام: الهمجية هي مك ألقردة الماسخة..
رباب(موجهة كلامها للمساعدة): يااااا والله وماكنت حشمت من هاد الزين لي حداك يا حتى نضربهاليك بشي نتفة عالمية نخليك ضحكة وشفايا لناس القبيلة..
المساعدة: جاهلة..
الطبيب: خرجوا عليا من هنا واش نتوما ماعندكم مايدار... خرجوا برااا...
رباب: صافي أزين بلاما تقلق هاحنا خارجين(غمزاتو) ولكن مزال نطلاقاو..
الطبيب: خرجي عليا يا هاد الموصيبة ماعرفتك منين تسلطتي عليا..

خرجات رباب وإكرام والمساعدة كتغددهم وتقليلهم السم ولكن هما أكيد مغايدوزوهاش ليها بالساهل.. كلشي بوقتو زين..

إكرام(كتنفخ وتسوط): كون خليتيني نضربها ليها بشي نتفة..
رباب: غير ماتقلقيش والله مانخليها فيها..
إكرام: وشنو ناوية ديري...

ابتاسمات رباب بخبث وكذلك إكرام ابتاسمات..أكيد شي مغامرة جديدة..

#يتبع...