سـعـد الـبـايـرات

|20|

💜سـعـد الـبـايـرات💜
بقلم #رباب نجمة وَ إكرام#
الحلقة السادسة:
عنوان الحلقة: قلة عقلي دارتها ليا.
الجزء 20:

خرجات ياقوت بزربة من الصالة كترمي الخطاوي هنا ولهيه.. دخلات للكوزينة وقلبها كيضرب حلات واحد الباب تما كيخرج للجردة من الجيهة اللورانية.. تنهدات فاش شافت إكرام وبجنبها رباب جايين باتجاهها...

ياقوت: كيف بقات رجلك ألالة..
إكرام: وااا تبقا فيك إن شاء الله نتي سباب هاد البلاوي يا العديمة..
رباب: سكتي نتي وهنينا..
ياقوت: غا سمحيلي ألالة والله ما قصدت نآذيك بالعكس نتي عزيزة عليا وكنت باغا غير نعاونك..
رباب: عارفة لي كاين أ الياقوت ولكن قلة عقلي هي لي دارتها ليا..
ياقوت: عندي ليك واحد الخبر ألالة..
رباب: شنو هو ثاني الله يسمعنا خبار الخير..
ياقوت: لالة الباتول جات هاد الصباح..
رباب و إكرام(بخوف): أويلي..

في غرفة رباب كانت جالسة رباب وإكرام بجنب بعضياتهم والقلق باين على ملامحهم ولالة الباتول واقفة على راسهم أكيد كتوبخهم..
لالة باتول: خليتيني تا مشيت ودرتي ما عليك أدوي..
رباب: والله أماما ماكان يسحابني غايطرا هادشي كامل..
لالة باتول: سكتي يسكتليك الحس فاش نكون كندوي مانسمعش صوتك..
إكرام(بصوت خافت): ياك عاد قالتليك دوي..
رباب(بهمس مشابه): واش حنا غانديو على هادي راكي عارفاها حمقة..
إكرام: شبهتي فمك أ مسخوطة مها..
رباب: إوا هاحنا ولينا فالملاغة..
إكرام: غير ضحكت معاك..
لالة الباتول: سكتونا أدوك الجوج.. من صغرك ونتي كطيري من المقلة مامشيتي تا جبتيها فعظامك كون دبا وقعاتليك شي حاجة كثر من هادشي الله يحضر السلامة فين غانوليو..
رباب و إكرام: الله يحضر السلامة..
لالة الباتول: البنت هي لي تكون موگضة ومكتخطي الخطوة حتى كتكون ضاربة ليها ألف حساب وحساب.. ماشي كطير من المقلة بحالك نتي وهاد البعلوكة لي حداك..
رباب: والا أماما ماتعايرليش صاحبتي..
لالة الباتول: ضرباتك النفس عليها..راه نتوما بجوج عجينة يديا غير هبيلات ومسخر فيهم الله... أخر مرة يتكرر هادشي أ رباب ولا غانعرف حسابي معاك..
رباب: وراه قلة عقلي هي لي دارتها ليا أماما وكون عرفت غايوقعلي هادشي والله مانعتب دار الشوافة... ولكن حتى لإمتى غانبقا بلا زواج..
لالة الباتول: حتى يكتب الله براكة من القفوزية وأجيو نتغداو...

دخلوا البنات للصالة يتغداو ورباب مخبية رجليها على باها لايشوفها.. أما إكرام مهبطة راسها وحشمانة من يوسف...
لالة الباتول: اوا أ إكرام أش كتعاودي مع الوقت من غير هاد الزبايل لي كديري مع بنتي..
إكرام: أش غانعاود أخالتي من غير الخير..
لالة الباتول: امم مابالي خير...
رباب: واصافي أماما ماتحكريش..
لالة الباتول: سكتي نتي..

سلاو الغدا وتحدثو كيف أي عائلة عاد باش ناض كل واحد للمهام ديالو.. دخلات لالة الباتول لبيتها ومشات نيشان للصندوق الكبير تحط فيه شي ذهب...حتى غوتات مخلوعة.. وجات ياقوت كطير عندها..

ياقوت: ياك لاباس ألالة علاش غوتي...
لالة الباتول: فين هو القفطان أ الياقوت..
ياقوت(بخوف كدور فعينيها): أشمن قفطان ألالة...
لالة الباتول: قفطان مي أ الياقوت بلاما تبوهلي عليا..
ياقوت: أنا ممم ءء..
لالة الباتول: دوي نطقي فين مشا القفطان..
ياقوت: تحرق هئ هئ..
لالة الباتول(وسعات عينيها وطلعاتليها القردة للراس): أويلي على تحرق أربي قفطاني مشا قفطان مي مشا... الله ياربي وفين كان مخبيلي هادشي... واااهيا العالي شوف من حالي.. شكون حرقو أ العديمة... القفطان كان مخبي شكون هاد قليل النية لي هزو ليا..
ياقوت: رباب هئ هئ بالحق والله مادارتها بالعاني كانت باغا غير تلبسو وتفرح براسها... مامكتبلوش الله يبقا معنا...
لالة الباتول(بالغوات): واتبقا فيك إن شاء الله.....ربااااااااب..

تسمعات التعييطة فالقصر هزات قلب رباب ونطقات بعبوس وخيبة..
رباب: قلة عقلي دارتها ليا إوا فكيها دبا يا من وحلتيها..

#يتبع..
تفاعلكم ناقص بزاف إذا مارجعش كيف كان تيقنوا بلي القصة غاتوقف..
تهلاو فراسكم 💕