سـعـد الـبـايـرات

|21|

💜سـعـد الـبـايـرات💜
بقلم #رباب نجمة وَ إكرام#
الحلقة السابعة:
عنوان الحلقة: جيبوليا ولد عمي.
الجزء 21:

صبح الصباح عند رباب والقلب ما مرتاح كتفكر وتعاود فولد عمها لي عاد بان.... كبر وزيان او رجع للدوار....  تفكرات ايام الصغر معاه وكيف كانت متعلقة بيه رغم أنها كانت كتحشم منو....كان دايرليها الخاطر ومقطرة ليه من العين.... تقلبات على جنبها وهي تغوت بحر الألم..

رباب: آح آي أمي وأش بغيتي عندي كنت محروقة من رجل دبا وليت معطوبة حتى فجنابي...

تفوهات وهي كتحك عينيها السود ....حتى دخلات عندها ياقوت متحسرة على حالتها وفيديها الفطور وبجنبها إكرام لي مستحيل يدوز النهار وماتكونش فجنب صاحبتها... إكرام ورباب صداقتهم قوية و متينة وخا الإختلاف لي بيناتهم إلا وكيتشابهو فشي حوايج.... رباب كتحمد الله حيت لاقاها بناس طيبين بحال ياقوت وإكرام... وكذلك إكرام كتحمد الله حيت عائلة رباب عمرو الفراغ لي عندها من جيهة الأم لي ديما مسافرة وقليل فين كتبان قدامها... حيت مها قايدة فقبيلة باها...

إكرام: صباح الخير أزينة البنات كيف صبحتي..
رباب: كيف غانصبح ها حالتي توريك...
ياقوت: كلشي مني ألالة أنا السباب فما جراليك...
رباب: لا ماتقوليش هكا أ ياقوت هادشي مكتاب وهذا درس نتعلموه فهاد الحياة..
إكرام(شافت فياقوت): صافي نتي جمعي عليا خناينك وحطي للبنت تاكل وأنا غانتكلف نشوفليها الحرقة..
رباب: خصني نقولكم واحد الحاجة..
إكرام: أما هي؟؟
رباب: أنا البارح شفت ولد عمي عدنان لي كان مشا يكمل قرايتو فالميريكان..

ابتاسمات ياقوت ونطقات..
ياقوت: معذور سيد الحاج جا عندي فالصباح وقالي ديري بحساب الضياف..
إكرام: وااقيلة وقيلة وإلا كان عقلي ينفعني سعدك غا يزهرليك آ البايرة...
رباب: إوا حشاك.. البايرة هي حناك..
إكرام: وحنا لاش راها شبعات موت مسكينة....
رباب: ولكن أنا كنت كنحشم من عدنان فالصغر مانقدرش نحط عليه العين..
إكرام: واا داكشي كان فالصغُر أما دبا شي آخُر..
رباب: هي نتوكل على الله وندير زبايلي كيف العادة..
إكرام(غمزاتها): غير توكلي على مولانا وماتنساينيش..
رباب: كوني هانية..
ياقوت(قبحات سيفتها): عندي ليك ألالة خبار خايبة..
رباب: ياك لاباس الله يسمعنا خير..
ياقوت: اليوم ترجمات بنت عيسى مول المعصرة ديال زيتون يلاه كملات 17 العام..المرحومة بقاو عليها بالحجر الكبير حتا قتلوها مسيكينة..
رباب: وهادشي بخبار با؟..
ياقوت: نتي عارفة سيد الحاج مايقدرش يوقف فطريق الأعراف واش بغيتي أهل القبيلة ينوضوا الفتنة..
رباب: وماكفاتهمش هاد الفتنة لي داروا..
إكرام: ناري شبغاو عندها مسكينة لهاد الدرجة الناس مافيهمش الإنسانية..
رباب: لالا خصنا نلقاو الحل وفأقرب وقت..
إكرام(بحماس): ياااي مغامرة جديدة..
ياقوت: شي نهار تسكتوليا القلب..
رباب: ههه عطيني ناكل راه غانموت بالجوع...
إكرام: كنقوليك مهاوشة هه..
رباب: المهاوشة هي حناك..
إكرام: كنقوليك حنا فرقيها عليك..
رباب(سدات فمها): هاهي ساكتة..

#يتبع.. فنظركم شنو غايوقع مع ولد عم رباب واش فعلا غايطيح فالشبكة... ؟ وشنو جا يدير فالدوار ؟
أو واش غاتقدر إكرام ورباب يغيروا هاد العرف غير الإنساني ؟❤💜
#سعد_البايرات.