سـعـد الـبـايـرات

|14|

💜سـعـد الـبـايـرات💜
بقلم #رباب نجمة وَ إكرام#
الحلقة الرابعة:
عنوان الحلقة: حكيم القبيلة.
الجزء14:

رجعات إكرام للقصر ومشات نيشان لغرفة رباب فين كانت الأخيرة كتفكر...
إكرام: شفتك مزالة جالسة هنا تي عيطي لياقوت تجيبلينا مانحنجرو راه العقل مكيخدمش إلا الكرش ماشبعاتش..
رباب: عندك الحق النهار كامل ماطاحت النعمة فكرشنا دبا نعيط لياقوت ونكملوا شغلنا..
كلاو البنات وبدلوا حوايجهم...كان طاح الظلام والإنارة فالقصر تطفات بقات غير غرفة رباب لي الضو فيها شاعل..
إكرام: تي فين دايرة داك البراد..
رباب: تي شمن براد..
إكرام: فين ساكن داك الجن...
رباب(قلبات عينيها): سميتو فانوس أديك الجاهلة يخليك بالخلا..
إكرام: إوا بحال بحال مالو مكيشبهش للبراد... دبا بغيت غي نفهم داك الجن قد البغل وساكن فداك البريريد الصغيور..
رباب: زعما الأفكار لي كيطيحو عليك ماعرفتش منين كيجيوك.. مرة كنقول البنت ذكية وفاهمة وبدات تخدم العقل لي عندها.. وشي مرات كنقول البنت واكلة فصغرها صندالة...
إكرام: هنينا من كثرة الكلام وجبدي داك البراد..
جبدات رباب البراد...بغيت نقول الفانوس.. وحكات عليه وهما متحمسين خرجليهم الجن وتكلم..
الجن الأزرق: شبيك لبيك الجن الأزرق بين يديك..
رباب: هادي غير أنا..
إكرام(بحماس): سلام هه...
الجن الأزرق: شكون هاد الزوينة لي معاك..
رباب: ونت مالك هاء..
الجن الأزرق: أش بغيتي وكان..
رباب: بغيتك تهنيني من واحد الجيفة...
الجن الأزرق: وعلاش أنا ماقاد على ذنوب ماشي حيت لقيتيني غاتولي تآمريني كيف بغيتي..
إكرام(بصوت رنان خلات قلب الجن يضرب بالجهد): عفاك لاما عاونا..
الجن الأزرق: هي اللولة أزين..
رباب(قبحات ملامحها): طلعتي عنيبة أجنيْن ماصدقتيش..
الجن الأزرق: ديها فراسك وقولولي أش بغيتوني ندير..
هضروا معاه البنات وطلبوا منو لي بغاو.. نعسوا فوق السرير براحة بحال شي ملائكة وهما الشياطين كيتبراو منهم..
صبح الصباح والياقوت مصبحة عليهم بالغوات..
ياقوت: لالة رباب فيقي...
رباب(كتحك عينيها): ياك لاباس أش كاين على الصباح ؟
ياقوت: الحكيم ألالة لي جا لقبيلتنا... المساعدة ديالو لقات اللفاعي ففراشها ليلة البارح كون ماحفظها الله وفطنات بيهم علم الله شكان وقعليها مسكينة.. ودبا الحكيم رفع قضية على سيدي الحاكم..
رباب: وعلاش ؟
ياقوت: حيت الدار فين سكن الحكيم والمساعدين لي معاه ديال باك ألالة اوا وقالك الدار مامأمناش.... نطلبوا الله مايوقع لسيدي تاشي مشكل..
شافت رباب فإكرام لي صابحة معمشة ومشعككة ونطقوا فنفس الوقت...
رباب وإكرام: المنحوس منحوس ولو يعلقوا فرقبتو فانوس🤷🏻‍♀️.

#يتبع..