سـعـد الـبـايـرات

|31|

💜سـعـد الـبـايـرات💜
بقلم #رباب نجمة وَ إكرام#
الحلقة العاشرة:
عنوان الحلقة: العرف.
الجزء 31:

💜أصبحنا وأصبح الملك لله💜

كيف كل يوم من أيام الله البايرات مزال يقلبوا على سعدهم وأملهم في الزواج كيزيد يوم بعد يوم.. باغيات يسدوا الفام.....والأهم يبدلوا العرف اللا إنساني...

كانت رباب وإكرام جالسات فالصالة الكبيرة بين مجمع رجال الحاكم الموجودة في القصر جلستهم الأنثوية والرقيقة.. مخنزرات تقول الابتسامة كيخلصوا عليها لابسات قفاطن من الحرير الحر وتيجان مذهبين زايدينهم جمال على جمال...

تكلم أب رباب بصفتو هو حاكم القبيلة..
الحاكم: تكلموا ألبنات أش كاين تما ولاش طلبتو تشوفونا ؟
رباب: مكاين مايتخبا أبا جيلنا عاق وفاق وعرف الحق من الباطل و بلي الأعراف لي ماشيا بيها قبيلتنا ماهي من المعقول ولا من الصواب..
إكرام: اه كلامها صحيح وجينا نتكلموا على رجم بنات القبيلة لي ماداروا حتى شي حاجة خايبة يستاهلوا عليها هاد الغبينة..
شيخ القبيلة(بغضب): أش كتقولي أديك البنت !!
الحاكم: تهدن أسيد الشيخ..
(رجع شافيهم)
إوا وشنو المطلوب منا ؟
رباب: قصدناكم حيت عارفينكم ناس حقانيين وماتبغيوش التعدو... بغينا هاد العرف ينصاهر ويبطل..

تهزات القاعة بالوشوشة حتى واحد ماعاجبوا الحال حتى تكلم واحد من مجمع الرجال..
الرجل: أش هاد الكلام واش باغيات تفتنوا بناتنا وعيالاتنا ماشي حيت مكانتكم كبيرة غادي تجيو و ضربوا علينا الرأي وشنو خص يدار...
تكلم رجل آخر..
الرجل: إييه أش جابكم لشغل الرجال كتبقاو غير نسا ذليلات..

تكلم الحاكم بصوتو القوي خلا الرجال يسكتوا ويتبثوا..
الحاكم: أش هادشي كنسمع ماحتارمتوني ما وقرتوا بناتي...

وقفات رباب وبجنبها إكرام..
رباب: عندكم الحق حنا ذليلات لي جايين لشغل الرجال... الرجال لي طغاو وتعداو الحدود ولاو باغيين يحرموا النسا حتى من نعمة الحياة لي الله رزقهم بيها... واش نتوما عارفين بلي النفس عزيزة عند الله...وكيف ما الله وصا على الراجل وصى على المرأة.... هاد العرف لازم يتبطل وإلا النسا غادي يطغاو ويبهدلوكم بين القبايل (هزات حاجبها) أش بان ليكم أ الرجال..
إكرام: الفتنة غادي تنوض إلا مابطلتوش هاد العرف لي أدى بموت شلى بنات بريئات ماداروها لابيديهم لا برجليهم...غير حيت ماتزوجوش بغيتوا تقتلوهم.. الزواج ماشي مهم في سنهم... البنات خصهم يقراو... بلاصتهم حدى واليديهم ماشي تزوجوهم لراجل يتكرفص هو ومو عليهم...
رباب: كلامنا قلناه ونتوما شرفونا بكلامكم...

خرجوا من القاعة كيغليو بالأعصاب وقلوبهم قريبة تسكت...
إكرام: أش غادي نديروا إلا ماداروش بكلامنا..
رباب(كتحك جبهتها): ماعرفتش..
إكرام: ودبا شنو غادي نديروا ؟
رباب: تبعيني..
إكرام: ها !!  فين ثاني ؟

#يتبع..