سـعـد الـبـايـرات

|19|

💜سـعـد الـبـايـرات💜
بقلم #رباب نجمة وَ إكرام#
الحلقة السادسة:
عنوان الحلقة: قلة عقلي دارتها ليا.
الجزء 19:

رباب(كتوجع): آي آي رجلي سكتي يسكتليك الحس...
إكرام(بقلق): تي مالكي واش كتحرقك بزاف....
رباب: غير جبدتيلي مي والحريق جهاد عليا...
إكرام(كتقبح فوجها): واش نعيطليك للحكيم أمسخوطة مها...
رباب(بألم): عيطي على الحكيم يداويني... وداخلي معاه حيت بايلي مزال غانرجع لهنا..
إكرام(بعدم فهم): وعلاش أختي الله ينجيك..
رباب: حيت أكيد مي غاتفوت فيا شي ضربة موگضة..
إكرام(ضرباتها على راسها): بحرا توگضك من هاد الخوزعبيلات لي سايرة ديري فيهم... ياك أنا قلتليك آ صاحبتي الشوافة بلاش.. ولكن ياقوت كلاتليك دماغك اوا هانتي جبتيها فعظامك..
رباب(بعبوس): مانويتها ماجات لبال.. قلت هاد الشوافة غاتفك العكس والنحس لي تابعني..
إكرام(شدات وجه رباب بين كفوفها): يا الحبيبة ديالي كون كان الخوخ يداوي كون داوا راسو... كون كانت ديك الشوافة فيديها البركة كون عاشت فالخير وكون الناس يعاودو فيها المزيانة أما هي عايشة فوسط الوسخ وقلبها باين كحل و موسخ كظل نهار وماطال كتحسب فالريالات وتهرف على فلوس عباد الله.. كدير تاحرايميات تسحر وتعكس سعد عباد الله واش هاديك يتيقو فيها الناس..
رباب: عندك الحق أحبيبتي مانعوادش.. أبدا وتگول واش نبقا نصدق بهاد الخرافات..
إكرام: إوا هادي دير ليك العقل هكاك نبغيك..
رباب اكتافات بابتسامة..
إكرام: دازك الحريق شوية ولا مزال محتاجة الطبيب..
رباب: لالا بلاش دبا مزيانة...
إكرام: إوا هادي هي الوقيتة خصنا نمشيو..
رباب: واش مكاتشوفيش حالتي راه رجلي مزال مريضة مانقدرش نزيد عليها..
أكرام: إوا أش بالك ندير الحمال ونركبك على ظهري...وا نوضي تگعدي قبل ماباك يجيب الخبار..
رباب: وخا صافي أجي عاونيني تفو مالي على حالتي..
إكرام: واقوليها لمخك..

خرجوا البنات من الخيمة ورباب مسندة على إكرام مقادراش تمشي على رجليها... بانليها الطبيب المعلوم واقف كيكتب فشي دفتر...غير هز راسو ورباب خرجات عينيها..
رباب: عدنان...
إكرام: تي شكون عدنان؟
رباب: ولد عمي..
إكرام(جراتها): تي زيدي قدامي گالاك ولد عمي..
رباب: آي رجلي واغا بلاتي يعطيك الهم..

~في مكان آخر•
بالظبط في قصر الحاكم..

جالس سيد الحاكم وبجنبو ولدو مولاي يوسف بسلهامو لي مازايدو غير هيبة.. كيتحدث مع باه بهدوء وثبات كيبين على مدى رزانتو وحكمتو...
الحاكم: إوا أولدي إمتى ناوي تكمل دينك وتجيب لي تعاونك على هاد الزمان الغدار..
مولاي يوسف: مزال ماكتاب أ الواليد..
الحاكم: شحال قدني نساين المكتوب أولدي نت كبرتي وأنا عاد مزايد فالكبر بغيت نشوف حفايدي قبل مايدي مول الأمانة أمانتو.. ختك غا هبيلة ومزال ربي ماسهل عليها ولايني نت راجل والمخيرة فبنات الدوار تكون ديالك نت غير حط العين وأنا نتكلف بالباقي... 
مولاي يوسف: يكون خير أ الواليد..
الحاكم: ايه يكون خير..

بعد صمت..
الحاكم: إوا زعما نت ماعاجباك تا بنت..ما معمر عينيك بحتى شي وحدة..
مولاي يوسف: احم بصراحة..
الحاكم: تكلم أولدي ماتحشمش..
مولاي يوسف: بنت....

دخلات الياقوت بعجاجتها مقاطعة حديثهم..
الحاكم: مالك أ الياقوت على هاد الخفة داخلة كيف العجاج الله يحضر السلامة.. ماعارفاش بلي أنا وولدي كنتحدثو بجوج ومانبغي تا حد يقاطع كلامنا..
ياقوت: غير سمحليا أسيد الحاج ولكن بغيت نقوليك بلي لالة خيتي جات..
الحاكم: الباتول جات؟
ياقوت: أه جات عاد دابا وجيت بالزربة نعلمك..
الحاكم: وخا وفين هي رباب..
ياقوت جميع الألوان دازوا فوجها وبدات تدخل وتخرج فالهضرة..
الحاكم: سيري كلميها بالزربة ووجدي شي غدا معتبر للالة الباتول..
ياقوت: هي لي ماتعاودش أسيد الحاج..

#يتبع..