زين إذا هسه اقشمر على روحي واصدك بكلامك بس كلبي شلون أقنعه،،،كارصني وروحي تلوج هجست أكو شي مو زين صاير لجهالي لو لأهلي.
هسه هو تخبل عليه ورمه عليه يمين الطلاك شعنده مكابلني وكاعد وينادي الدكتور ويجيب الممرضه وكلساع وكال - هاااا ما تحسين نفسج شويه أحسن
أني صديت وجهي جزت روحي من عنده
المغرب ويجوني عزوتي وخميتي وفياي أبوي واخوتي وذيب ويونس
أبوي من عاين ثائر موجود يمي بالردهه وعمتي ومرت حماي هم موجودات تقدم عليه يرجف من أعصابه زنكة من ياخته - ورب العزة لزوعك دم انطيتك مرأة ما انطيتك عبده وتمد ايدك عليها
ناده أبوي على الدكتور يونس حجه وياه كتبلي علاج جديد واخذوا باقي حاجاتي الطبيه من الردهه وطلعت وياهم لدار أبوي
عمتي وكعت وذره من لسانها وهي تعتذر وتحجي ويه أبوي....وحماي يسولف ويه اخواني
أني لمحت ذيب دغ ثائر واكف باب الردهه بس ما سمعت شكاله - بس ذيب متخبل واتوقع هدده.
