ومن جهه ثانيه انقهر واكول لا مو حكها تراقبني تعرفني أني شنو... وتعرفني ما اطخ راسي ومو أني الي امشي بشور كلبي
وكل ما أنقهر وانهضم روحي تتخربط وضعي مو طبيعي اشتكيت مره وثنين وثلاثه عاد اخذني ذيب وأمي للطبيب شخص حالتي تهيج بالقالون وكالي - لا تشبعين ولا تجوعين ولا تنغثين ترى قالونج يهيج وتنكلب معدتج
وشلون ما انغث واني يوم على يوم اجبر كلبي ينسه بشر أسمه يونس لان جبان بشخصيته وجبان بمشاعره
وهم مرات المحه يعاين صوبي واهجس نظراته مو راحه
شو جان كبل ما يعاين بوجهي هسه كام يصفن عليه...؟؟؟
بس اني ادوس على كلبي واقسي على روحي وأبددد ما أبين اهتمام مشاعري تجاهه
بس شنو الفايده كل أهلنا كشفوني وعرفوا سري من عيوني هن الفضحني
بس أبددد ما اعترفت ولا انطيت جواب واضح من يسألوني علية
وأني صفنت ويه روحي وقنعت نفسي يونس مستحيل بيوم من الايام اصير من نصيبه لان يحب هاي الدكتوره الوياه قابل أني اليحبني أني بيش الكيلو والصدك هم متراهمين بالشهاده والتفكير وشكد يسولف بطاريها.
