قوقعه الجمر

تكملة - ٢٦ -

#فراقد

#قوقعة-جمر

#تكملة ح - ٢٦ -

********************

گلبتهم جني اگلب راحتي
مالگيت اليفك بيهم عازتي
عشت ما مرتاح انه بهالحياة
وتعبتني لأن حگ حجايتي
++++++++++++++++++++

شوقية....

كلشي ما أكدر أحجي
ولا أكدر أعبر بكل كلام الدنيا عن الصار ويايه
بس أكول ويه ياس خضر
(((غلطة مرت و انتهت
شمعة العشرة انطفت
و الذنب هو ذنبهم))))

بعد سمعتوا قصة حبي الباتت بالخراب ويه حمزه
من خواتي.

وهي الماعدها حظ من أول عود تحلم يصيرلها حظ من تالي

وبس أكول بصلاتي وبكل ركوع وسجود
وبكل قيام وبكل قعود
وبكل شهكة نفس
الحمد لله على كل حال

والحمد لله ألف مره من هدالي جدي
ولملم السالفه وسترني وستر سمعتنا كلنا

بس الصدك انكسرت بعين روحي
كبل لا إنكسر بعيون أهلي

يجوز صوجي ويمكن ما عرفت أتصرف

ويمكن الفرق بين مشاعر حب المرأه
ومشاعر حب الرجل لعبت دور ويه حظي

يعني عادي عد أهلنا ومجتمعنا اذا سمعوا
فلان عنده علاقه حب
بس يتخبلون اذا سمعوا فلانه عدها علاقه
ورب العزة يدفنوها بالحياة

مو هل عمي شبيب شمر نفسه بحلك الموت
لخاطر باجي جوهره..
وبالاخير لوه ذراع الكل وأخذها

ذيب مجنون فرحة

يونس مجنون ذكرى

هارون مجنون بسمة بس هي ماتريده

مشاعر ألحب عدنه وراثه بالعايلة
ويمكن تمتاز بشي حلو
واحدنه من يحب بعد يوفي للمحبوب
لو يوصل للموت ما يكدر يتقبل غيره

وهاي غيده خير مثال كبالنا،،،حبت المرحوم رضوان
وكل أهلنا جانوا يدرون تربطهم علاقه حب
بس محد قيدهم...لو حاسبوها
و وراه الله يرحمه قفلت باب قلبها
ورفضت أي قسمة تجيها.

مو هل بهجت تحب يونس
وكل أهلنا يدرون بيها عاشكته
بس يمكن مطمئنين من يمها لان حبها من طرف واحد...لحد مقيدها ولا واحد محاسبها