نعيمي وجحيمها

اقتباس

- انا برضوا اللي بطيئة يامقصوفة الرقبة ولا انتي اللي شعرك دا مابيخلصش من طوله.
- كبري في قلبك ياستي، هو انتِ هاتحسديني ولا إيه؟ دا انا حتى غلبانة وماملكش غيره والنبي.
شهقت رقية بصوت اثار ضحك حفيدتها بهسترية وهي تردف بانفعال:
- احسدك دا ايه يابت، لهو انتِ فاكرة ان شعرك احسن من شعري، اشحال ان ماكنتِ ورثاه عن امك، اللي هي في الأصل بنتي وورثاه عني انا ياقليلة الأصل انتِ .
قهقهت زهرة صامتة مستمتعة بمناكفة جدتها والتي تابعت بغيظ:
- دا بدل ماتحمدي ربنا انك ورثتي حاجة مني، بدل ما كنتِ ورثتي شعر المنيل ابوكي.
- شعر ابويا مين ياستي بس؟ دا طار من زمان ومافضلش فيهم غير شوية على الجانبين فوق ودانه، دا اتبهدل خالص يعيني.
وصل اليها صوت جدتها وهي تردف باستمتاع :
- ايوة ياختي ماانا واخدة بالي، دا فرق راسه بقى وسع رصيف العربيات ومع ذلك برضوا مش نضيفة ولا بتلمع، فاضلين فيهم ياعينى كام شعرة متنتورين كدة في النص، واكنهم زرع شيطاني في صحرا فاضية هههههه.

دا الاقتباس الأول من الرواية انتظروا الاقتباس  التاني وبعده الفصل على العيد بإذن الله