ငါကလူသားတစ်ယောက်မဟုတ်ဘူး(ကုဟွိုက်)

Chapter 37
September 10, 2023
Chapter 37

ကလေးအရွယ်ပုံစံအား နောက်ဆုံးနမ်းခဲ့သည့်အချိန်က အလ်ဗ်သည် ထွက်သွားရန် အာကာသပြောင်းရွေ့မှုကိုအသုံးပြုခဲ့သည်။ ကုဟွိုက်၏လက်ချောင်းများကို မနမ်းခင် အရိပ်ထဲတွင် ပုန်းကွယ်ကာ ကုဟွိုက်အိပ်ပျော်သည်အထိ စောင့်နေခဲ့သည်။

ကုဟွိုက်ပြောခဲ့သည့် ‘ရှက်ရွံခြင်း’ ဆိုသည်ကလွဲ၍ ထိုသို့လျှို့ဝှက်ဆန်စွာလုပ်ရသည့် အကြောင်းပြချက်မှာ အလ်ဗ်က သူ့ကိုယ်သူ သတိမူမိသောကြောင့်ဖြစ်သည်။ သူသည် အမြဲလိုလို သူ့ကိုယ်သူထိန်းချုပ်နိုင်စွမ်း လျော့နည်းလုလုနီးနီးဖြစ်ခဲ့သည်။ ဇက်များအကြားတွင်ပင် သူသည် ထူးဆန်းနေခဲ့၏။ သူက အန္တရာယ်မရှိသည့် ကလေးပုံစံဖြစ်နေသည့်အတွက် အလ်ဗ်က ကုဟွိုက်က သူ့ကို နမ်းချင်နေခဲ့သည်ဟုထင်ခဲ့သည်။

အနမ်းအား အရွယ်ရောက်နေသည့်ပုံစံဖြင့် တုံ့ပြန်ခဲ့လျှင် အလ်ဗ်က သူ၏အထိအတွေ့များမှာ မုန်းတီးခြင်းခံရပြီး ငြင်းဆန်ခံရမည်ဟု ခံစားမိသည်။ ထို့ကြောင့် ကုဟွိုက်နိုးနေစဉ်အတွင်းမှာ သူဘာမှမလုပ်ခဲ့။ ထိုအနမ်းက ရိုးသားသည့်အနမ်းမဟုတ်သည့်အတွက် ကုဟွိုက်၏လက်ချောင်းလေးများကိုသာ ခပ်ဖွဖွနမ်းရုံမျှသာ နမ်းခဲ့သည်။

သူသည် သူ၏ဆင်ခြင်တုံတရားကို အချိန်မရွေးဆုံးရှုံးသွားနိုင်သောသူတစ်ယောက်ဖြစ်သည်။ တစ်ဖက်လူအနားသို့မသွားမိအောင် သတိရှိရှိဖြင့် အဝေးတွင်နေသင့်သော်လည်း အလ်ဗ်က အမြဲတစေ ကုဟွိုက်၏ဆွဲငင်မှုကိုခံခဲ့ရသည်။ သူ့မျက်လုံးများက တမင်တကာ ကုဟွိုက်၏လက်ချောင်းများဆီသို့ လိုက်ရှာနေတတ်ပြီး သူ့ခန္ဓာကိုယ်ကပင် ထိန်းချုပ်ခြင်းမရှိဘဲ လိုက်ပါနေတတ်သည်။

ကုဟွိုက်က သူ့အမြီးကို ညင်သာစွာနမ်းလိုက်သည့် အခိုက်အတန့်တွင် အလ်ဗ်က သူ၏တုံ့ပြန်မှုများကို ထိန်းချုပ်ရန် အခက်တွေ့ခဲ့သည်။ ရုတ်တရက်ဆိုသလိုပင် သူ့နှလုံးသားက သူကိုယ်တိုင်ပင် နားမလည်နိုင်သည့် စိတ်ခံစားချက်များနှင့် ပြည့်နှက်သွားခဲ့သည်။ သူ့နှလုံးသားမှာ နွေးထွေးစွာ ခုန်ပေါက်နေခဲ့သည်။ လူငယ်လေး၏ပါးပြင်ကို ချက်ချင်းမနမ်းမိလျှင် ပြည့်လျှံနေသည့် ထူးဆန်းသောခံစားချက်များကြောင့် အလ်ဗ်မှာ နာကျင်မှုကိုပင် ခံစားရစေနိုင်၏။