မည်သို့ပင်ဆိုစေ၊ ခေါင်းဆောင်လင်က ကျွမ်းကျင်သိုင်းပညာရှင်တစ်ဦးဖြစ်၍ သေရေးရှင်ရေးအခြေအနေတွင် လျင်မြန်စွာတုံ့ပြန်နိုင်သည်။ သူက ဓားကို လက်နှစ်ချောင်းဖြင့်ညှပ်၍ ထိန်းချုပ်လိုက်ရာ ဓားဦးက ရင်ဘတ်ကို စိုက်ဝင်သွားသော်လည်း လျိုရိမည်မျှအားသုံးပါစေ၊ တစ်လက်မတောင် မတိုးနိုင်တော့ပေ။
ထိုစဥ် သွမ့်လင်က ကိုယ်ဖော့၍ အနားသို့ရောက်လာပြီး လျိုရိ၏ဂုပ်ပိုးကို လက်ဝါးစောင်းဖြင့် ရိုက်ချလိုက်သည်။
လျိုရိက အစနဂိုတည်းကပင် သိုင်းပညာအဆင့်မြင့်လွန်းသူမဟုတ်ပေ။ ထို့ကြောင့် တောင့်ခံနိုင်စွမ်းမရှိဘဲ တစ်ချက်ညည်းညူကာ လဲကျသွားတော့သည်။ နံဘေးတွင်ရှိနေသော သူ့ဆရာသခင်က အမြန်ပြေးလာပြီး ထိန်းပွေ့ထားလိုက်၏။
သွမ့်လင်က ခေါင်းဆောင်လင်၏ဒဏ်ရာကို စစ်ဆေးကြည့်လိုက်သည်။ ခေါင်းဆောင်လင်၏ မျက်နှာသည်ကား ပျက်ယွင်းနေပြီဖြစ်၏။ ရင်ဘတ်မှဒဏ်ရာက သွေးများစွာယိုစိမ့်ထွက်နေပြီး ဓားရှည်က သူ့ရင်အုံကို ထိုးဖောက်ဝင်ရောက်နှင့်နေသည်။
သူ့ဒဏ်ရာက ပြင်းထန်ကြောင်းတွေ့သောအခါ သွမ့်လင်လည်း ဓားကိုအလျင်စလိုဆွဲမထုတ်ရဲပေ။ ရင်ဘတ်ရှိအကြောများကို အရင်ပိတ်လိုက်ပြီးမှ သတိကြီးကြီးထား၍ဓားကို ဆွဲထုတ်ကာ မေးလိုက်၏။
"ခေါင်းဆောင်လင်၊ ဘယ်လိုနေသေးလဲ။"
ခေါင်းဆောင်လင်က ကိုယ်နေဟန်ထားကို ပြင်လိုက်ပြီး အားလျော့စွာ ပြန်ဖြေသည်။
"ကိစ္စမရှိပါဘူး။ အသက်အန္တရာယ်နီးမယ့်နေရာကို မထိသွားဘူး။"
သွမ့်လင်က ဆောင်ယူလာသော ရွှေဆေးမှုန့်ကိုထုတ်ကာ ဒဏ်ရာပေါ်တွင် ဖြူးပေးလိုက်သည်။ ဒဏ်ရာမှာ အတော်ပြင်းထန်လှပြီး ဓားသွားက အနည်းငယ်ထပ်နစ်သွားခဲ့ပါလျှင် ခေါင်းဆောင်လင် အသက်ဆုံးရှုံးရနိုင်သည်။ သူ၏ကျွမ်းကျင်မှုကြောင့် အသက်ဘေးမှရှောင်တိမ်းနိုင်ခဲ့သော်လည်း အချိန်အနည်းငယ်အနားယူရန်လိုမည်ဖြစ်ရာ ချက်ချင်းတိုက်ခိုက်နိုင်လိမ့်မည်မဟုတ်ပေ။
YOU ARE READING
ကျိုးပဲ့သစ်ကိုင်းငယ်
Historical Fictionဆယ်နှစ်အကြာမှာ ရန်သူဟောင်းဟာ သွမ့်လင်ရဲ့ လက်ထဲကို ကျရောက်လာခဲ့တယ်။ သို့ပေမဲ့လည်း ....... ဆယ္ႏွစ္အၾကာမွာ ရန္သူေဟာင္းဟာ သြမ့္လင္ရဲ႕ လက္ထဲကို က်ေရာက္လာခဲ့တယ္။ သို႔ေပမဲ့လည္း ....... 𝑪𝒉𝒂𝒑𝒕𝒆𝒓𝒔 : 𝟐𝟎 + 𝟒 𝑬𝒙𝒕𝒓𝒂𝒔 𝑮𝒆𝒏𝒓𝒆 : 𝑩𝑳, 𝑨𝒏𝒈𝒔𝒕...