ﻣﺮﺕ ﻋﺪﺓ ﺃﻳﺎﻡ ﻭ " ﻳﺎﺳﻤﻴﻦ " ﺳﻌﻴﺪﺓ ﺑﻌﻤﻠﻬﺎ ﻓﻰ ﺍﻟﻤﺰﺭﻋﺔ .. ﻭﺗﺤﺖ ﺍﺷﺮﺍﻑ ﺩﻛﺘﻮﺭ " ﺣﺴﻦ " ﻛﺎﻥ ﻣﺮﻳﺤﺎً ﻓﻰ ﺍﻟﺘﻌﺎﻣﻞ ﻭﻟﻢ ﺗﺤﺪﺙ ﻣﺸﺎﻛﻞ ﺑﻴﻨﻬﻤﺎ .. ﻛﺎﻧﺖ ﻣﺒﻬﻮﺭﺓ ﺑﻌﻠﻤﻪ ﻭﺑﻤﻬﺎﺭﺗﻪ ﻓﺘﺘﻌﻠﻢ ﻣﻨﻪ ﻛﻞ ﻳﻮﻡ ﺷﻴﺌﺎً ﺟﺪﻳﺪﺍً .. ﺃﻳﻀﺎً ﺩﻛﺘﻮﺭ " " ﺣﺴﻦ " ﺃﻋﺠﺐ ﻛﺜﻴﺮﺍً ﺑﺬﻛﺎﺋﻬﺎ ﻭﺣﻤﺎﺳﻬﺎ ﻭﻧﺸﺎﻃﻬﺎ ﻭﺳﺮﻋﺘﻬﺎ ﻓﻰ ﺍﻟﺘﻌﻠﻢ .. ﻓﻜﺎﻥ ﻳﻌﺘﺒﺮﻫﺎ ﺗﻠﻤﻴﺬﺗﻪ ﺍﻟﻨﺠﻴﺒﻪ ﻭﻳﺘﻨﺒﺄ ﻟﻬﺎ ﺑﻤﺴﺘﻘﺒﻞ ﺑﺎﻫﺮ ﻓﻰ ﻋﻤﻠﻬﺎ .. ﺷﻌﺮ ﺍﻷﺳﻰ ﻋﻠﻴﻬﺎ ﻋﻨﺪﻣﺎ ﻋﻠﻢ ﻣﻨﻬﺎ ﺑﻘﺼﺘﻬﺎ ﻭﺍﻟﺴﺒﺐ ﺍﻟﺬﻯ ﺩﻓﻌﻬﺎ ﻫﻰ ﻭﺃﻫﻠﻬﺎ ﻟﻠﻤﺠﺊ ﺍﻟﻰ ﺍﻟﻤﺰﺭﻋﺔ .. ﻃﻤﺌﻨﻬﺎ ﻭﺑﺚ ﺍﻷﻣﻞ ﻓﻴﻬﺎ ﺑﺄﻥ ﻓﺮﺝ ﺍﻟﻠﻪ ﻗﺮﻳﺐ .. ﻋﻠﻴﻬﺎ ﻓﻘﻂ ﺃﻥ ﺗﺘﺤﻠﻰ ﺑﺎﻟﺼﺒﺮ ﻭﺳﻴﺨﺮﺟﻬﺎ ﺍﻟﻠﻪ ﻣﻦ ﻣﺤﻨﺘﻬﺎ ..
ﻓﻰ ﺫﺍﺕ ﻳﻮﻡ ﻗﺪﻡ ﺍﻟﻰ ﺍﻟﻤﺰﺭﻋﺔ ﺭﺟﻞ ﻓﻰ ﺍﻟﻌﻘﺪ ﺍﻟﺴﺎﺩﺱ ﻣﻦ ﻋﻤﺮﻩ .. ﺃﺗﻰ ﺑﺴﻴﺎﺭﺗﻪ ﺍﻟﻔﺎﺭﻫﻪ ﻭﺑﺪﻟﺘﻪ ﺍﻷﻧﻴﻘﺔ ﺍﺳﺘﻘﺒﻠﻪ " ﻋﻤﺮ " ﺑﻌﺪﻣﺎ ﻧﺰﻝ ﻣﻦ ﺳﻴﺎﺭﺗﻪ ﺃﻣﺎﻡ ﺑﻴﺖ ﺍﻟﻤﺰﺭﻋﺔ :
- ﺃﻫﻼ ﺑﻴﻚ ﻳﺎ ﺃﺳﺘﺎﺫ " ﺷﺎﻛﺮ "
ﺳﻠﻢ ﻋﻠﻴﻪ ﺍﻟﺮﺟﻞ ﻗﺎﺋﻼ :
- ﺃﻫﻼ ﺑﻴﻚ ﺍﻧﺖ ﻳﺎ ﺑﺸﻤﻬﻨﺪﺱ . ﺃﻧﺎ ﻣﺘﺸﻜﺮ ﺍﻧﻚ ﻫﺘﺪﻳﻨﻲ ﺷﻮﻳﺔ ﻣﻦ ﻭﻗﺘﻚ
- ﻻ ﺃﺑﺪﺍ ﺍﺯﺍﻯ ﺣﻀﺮﺗﻚ ﺗﻘﻮﻟﻰ ﻛﺪﻩ .. ﺍﺗﻔﻀﻞ
ﺃﺩﺧﻞ " ﻋﻤﺮ " ﺍﻟﺮﺟﻞ ﺍﻟﻰ ﺑﻴﺖ ﺍﻟﻤﺰﺭﻋﺔ .. ﻛﺎﻥ ﺍﻟﺮﺟﻞ ﻫﻮ ﻋﻤﻴﻞ ﻣﻦ ﻋﻤﻼﺀ " ﻋﻤﺮ " ﺍﻟﺬﻳﻦ ﻳﺸﺘﺮﻭﻥ ﻣﺎ ﺗﻨﺘﺠﻪ ﺍﻟﻤﺰﺭﻋﺔ ﻣﻦ ﺃﻟﺒﺎﻥ .. ﺭﺣﺐ " ﻋﻤﺮ " ﺑﺎﻟﺮﺟﻞ ﻭﻗﺪﻣﺖ ﻟﻬﻢ ﺍﻟﺨﺎﺩﻣﺔ ﺃﻗﺪﺍﺡ ﺍﻟﺸﺎﻯ ﺍﻟﺴﺎﺧﻦ .. ﺗﺤﺪﺙ ﺍﻟﺮﺟﻞ ﻗﺎﺋﻼ :
- ﺑﺼﺮﺣﺔ ﺃﻧﺎ ﻛﻨﺖ ﻋﺎﻳﺰ ﻣﻨﻚ ﺧﺪﻣﺔ ﻳﺎ ﺑﺸﻤﻬﻨﺪﺱ ﻭﺍﺗﻤﻨﻰ ﺍﻧﻚ ﻣﺘﺨﺬﻟﻨﻴﺶ
ﺃﺳﺮﻉ " ﻋﻤﺮ " ﻗﺎﺋﻼ :
- ﻃﺒﻌﺎ ﻳﺎ ﺃﺳﺘﺎﺫ " ﺷﺎﻛﺮ " ﺍﺗﻔﻀﻞ
- ﺃﻧﺎ ﺍﺑﻨﻰ ﺍﻟﺼﻐﻴﺮ ﻓﻰ ﺁﺧﺮ ﺳﻨﺔ ﻟﻪ ﻓﻰ ﻛﻠﻴﺔ ﺍﻟﻄﺐ ﺍﻟﺒﻴﻄﺮﻯ .. ﻭﺍﻧﺖ ﻋﺎﺭﻑ ﺍﻥ ﺃﻯ ﺷﻐﻞ ﺑﻴﺘﻄﻠﺐ ﺧﺒﺮﻩ .. ﺍﻟﻮﻟﺪ ﻣﻌﻨﺪﻭﺵ ﺃﻯ ﻓﻜﺮﻩ ﻋﻦ ﺃﻯ ﺷﺊ .. ﺍﻧﺖ ﻋﺎﺭﻑ ﺍﻥ ﻓﻰ ﻣﺼﺮ ﻟﻸﺳﻒ ﺑﻨﺪﺭﺱ ﻓﻰ ﺍﻟﺠﺎﻣﻌﻪ ﺣﺎﺟﺔ ﻭﺍﻟﺸﻐﻞ ﺍﻟﻌﻤﻠﻰ ﺑﻴﻜﻮﻥ ﺣﺎﺟﻪ ﺗﺎﻧﻴﺔ ﺧﺎﻟﺺ .. ﻓﺄﻧﺎ ﻛﻨﺖ ﺣﺎﺑﺐ ﺑﻤﺎ ﺍﻧﻪ ﻓﻰ ﺁﺧﺮ ﺳﻨﺔ ﺍﻧﻪ ﻳﻴﺠﻲ ﻳﺘﺪﺭﺏ ﻋﻨﺪﻙ ﻫﻨﺎ ﻓﻰ ﺍﻟﻤﺰﺭﻋﺔ .. ﺃﻧﺎ ﻋﺎﺭﻑ ﺍﻥ ﻋﻨﺪﻙ ﺩﻛﺎﺗﺮﺓ ﻣﻤﺘﺎﺯﻳﻦ ﺟﺪﺍ ﻭﺍﻧﻚ ﻣﺶ ﺑﺘﺸﻐﻞ ﻋﻨﺪﻙ ﺍﻻ ﻧﺎﺱ ﻛﻔﺎﺋﺘﻬﺎ ﻋﺎﻟﻴﻪ .. ﺃﻧﺎ ﺑﺲ ﻋﺎﻳﺰﻩ ﻳﻜﻮﻥ ﺗﺤﺖ ﺍﻳﺪﻳﻬﻢ .. ﻭﻛﻤﺎﻥ ﺩﻩ ﻫﻴﻔﻴﺪﻩ ﻓﻰ ﺍﻣﺘﺤﺎﻧﺎﺗﻪ ﺍﻟﺴﻨﺔ ﺩﻯ ﻻﻥ ﻋﻨﺪﻫﻢ ﺟﺰﺀ ﻛﺒﻴﺮ ﻋﻤﻠﻰ .. ﻭﻫﻮ ﺯﻯ ﻣﺎ ﻗﻮﻟﺖ ﻣﻴﺢ ﺧﺎﻟﺺ
ﺃﺳﺮﻉ " ﻋﻤﺮ " ﻗﺎﺋﻼ :
- ﻃﺒﻌﺎ ﻳﺎ ﺃﺳﺘﺎﺫ " ﺷﺎﻛﺮ " .. ﻳﺸﺮﻓﻨﺎ ﻭﺟﻮﺩﻩ ﻓﻰ ﺍﻟﻤﺰﺭﻋﺔ ﻭﻫﻨﺎ ﻋﻨﺪﻧﺎ ﺩﻛﺎﺗﺮﺓ ﻣﻤﺘﺎﺯﻳﻦ ﻭﺍﻥ ﺷﺎﺀ ﺍﻟﻠﻪ ﻳﺴﺘﻔﺎﺩ ﻣﻨﻬﻢ
- ﻣﺘﺸﻜﺮ ﺟﺪﺍ ﻳﺎ ﺑﺸﻤﻬﻨﺪﺱ ﻭﻫﻮ ﺩﻩ ﻛﺎﻥ ﺍﻟﻌﺸﻢ
ﺍﻧﺘﻬﺖ ﺍﻟﻤﻘﺎﺑﻠﺔ ﻭﺍﻧﺼﺮﻑ " ﺷﺎﻛﺮ ... " ﺣﺎﻥ ﻣﻌﺎﺩ ﺍﺳﺘﺮﺍﺣﺔ ﺍﻟﻐﺪﺍﺀ ﻋﻨﺪﻣﺎ ﺗﺮﻛﺖ " ﻳﺎﺳﻤﻴﻦ " ﻣﺎ ﺑﻴﺪﻫﺎ ﻟﺘﺬﻫﺐ ﻟﺘﺘﻨﺎﻭﻝ ﻃﻌﺎﻣﻬﺎ .. ﻟﻤﺤﺖ ﻋﻨﺪ ﺍﻟﺒﻮﺍﺑﺔ ﻓﻼﺣﻪ ﺑﺴﻴﻄﺔ ﻛﺒﻴﺮﺓ ﻓﻰ ﺍﻟﺴﻦ ﺗﺘﺤﺪﺙ ﻣﻊ ﺍﻟﺮﺟﻞ ﺍﻟﻮﺍﻗﻒ ﻋﻠﻰ ﺍﻟﺒﻮﺍﺑﺔ ﻭﺍﻟﺮﺟﻞ ﻳﺤﺎﻭﻝ ﺍﺧﺮﺍﺟﻬﺎ ﻭﻫﻰ ﺗﺄﺑﻲ ﺃﻥ ﺗﺨﺮﺝ .. ﻟﻔﺖ ﺍﻟﻤﺸﻬﺪ ﻧﻈﺮ " ﻳﺎﺳﻤﻴﻦ " ﺧﺎﺻﺔ ﻭﺃﻥ ﺍﻟﺮﺟﻞ ﻛﺎﻥ ﻳﺘﻌﺎﻣﻞ ﻣﻊ ﺍﻟﺴﻴﺪﺓ ﺍﻟﻜﺒﻴﺮﺓ ﺑﻐﻠﻈﺔ ﻭﺧﺸﻮﻧﺔ .. ﺍﻗﺘﺮﺑﺖ ﻣﻦ ﺍﻟﺒﻮﺍﺑﺔ ﻓﺴﻤﻌﺖ ﺗﻠﻚ ﺍﻟﺴﻴﺪﺓ ﺗﻘﻮﻝ :
- ﺃﺑﻮﺱ ﺍﻳﺪﻙ ﻳﺎ ﺍﺑﻨﻰ ﺩﺧﻠﻨﻰ .. ﺃﻧﺎ ﺯﻯ ﺃﻣﻚ
ﺭﺩ ﻋﻠﻴﻬﺎ ﺍﻟﺮﺟﻞ ﻭﻫﻮ ﻳﺪﻓﻌﻪ ﻟﺘﺨﺮﺝ ﺧﺎﺭﺝ ﺍﻟﻤﺰﺭﻋﺔ :
- ﻻ ﺃﻣﻰ ﻭﻻ ﺃﺑﻮﻳﺎ .. ﻣﻤﻨﻮﻉ ﻳﺎﻣﻪ ﻣﺤﺪﺵ ﺑﻴﺪﺧﻞ ﻫﻨﺎ ﻏﻴﺮ ﺍﻟﻠﻰ ﺑﻴﺸﺘﻐﻠﻮﺍ ﺑﺲ
- ﻳﺎ ﺍﺑﻨﻰ ﻣﺎ ﺍﻧﺎ ﻛﻨﺖ ﺑﺸﺘﻐﻞ ﻫﻨﺎ .. ﺃﺑﻮﺱ ﺍﻳﺪﻙ ﺩﺧﻠﻨﻰ
- ﻳﺎ ﺳﺖ ﺍﻣﺸﻰ ﺑﺄﻩ ﺍﻟﻠﻪ ﻳﺴﻬﻠﻚ
ﺗﻘﺪﻣﺖ " ﻳﺎﺳﻤﻴﻦ " ﻣﻨﻬﻤﺎ ﻗﺎﺋﻠﻪ :
- ﺧﻴﺮ ﻓﻰ ﺍﻳﻪ ؟
ﻗﺎﻟﺖ ﺍﻟﺴﻴﺪﺓ ﺑﺴﺮﻋﺔ ﻭﻛﺄﻧﻬﺎ ﺗﺴﺘﻨﺠﺪ ﺑـ " ﻳﺎﺳﻤﻴﻦ " :
- ﺍﻟﻬﻰ ﻳﻜﺮﻣﻚ ﻳﺎ ﺑﻨﺘﻰ ﺧﻠﻴﻪ ﻳﺪﺧﻠﻨﻰ .. ﺃﻧﺎ ﻭﺭﺍﻳﺎ ﻋﻴﺎﻝ ﺍﻋﻤﻞ ﺍﻳﻪ ﺑﺲ ﻳﺎ ﺭﺑﻲ
ﻭﺟﻬﺖ " ﻳﺎﺳﻤﻴﻦ " ﻛﻼﻣﻬﺎ ﺍﻟﻰ ﺍﻟﺮﺟﻞ ﻗﺎﺋﻠﻪ :
- ﺣﻀﺮﺗﻚ ﻣﺶ ﻋﺎﻳﺰ ﺗﺪﺧﻠﻬﺎ ﻟﻴﻪ
- ﻋﺸﺎﻥ ﻣﻤﻨﻮﻉ ﺣﺪ ﻳﺪﺧﻞ ﺍﻻ ﺍﺫﺍ ﻛﺎﻥ ﺑﻴﺸﺘﻐﻞ ﻓﻰ ﺍﻟﻤﺰﺭﻋﺔ ﻭﺩﻯ ﻣﺒﺘﺸﺘﻐﻠﺶ ﻓﻴﻬﺎ
ﺍﻧﻔﺠﺮﺕ ﺍﻟﺴﻴﺪﺓ ﺑﺎﻛﻴﺔ ﻭﻗﺎﻟﺖ :
- ﻃﻴﺐ ﺃﻋﻤﻞ ﺍﻳﻪ ﺑﺲ ﻳﺎ ﺭﺑﻲ ..
ﺭﻕ ﻗﻠﺐ " ﻳﺎﺳﻤﻴﻦ " ﻟﺤﺎﻝ ﺗﻠﻚ ﺍﻟﺴﻴﺪﺓ ﻭﺃﺧﺬﺗﻬﺎ ﻭﺧﺮﺟﺖ ﻣﻦ ﺍﻟﺒﻮﺍﺑﺔ ﻟﺘﺘﺤﺪﺙ ﻣﻌﻬﺎ .. ﺭﺑﺘﺖ ﺑﻜﻔﻬﺎ ﻋﻠﻰ ﻛﺘﻒ ﺍﻟﺴﻴﺪﺓ ﻗﺎﺋﻠﻪ :
- ﺧﻴﺮ ﻳﺎ ﺣﺠﻪ ﻣﺎﻟﻚ ﻓﻰ ﺍﻳﻪ
ﻗﺎﻟﺖ ﺍﻟﺴﻴﺪﺓ ﻭﻫﻰ ﻣﺎﺯﺍﻟﺖ ﺗﺒﻜﻰ :
- ﺃﻧﺎ ﻳﺎ ﺑﻨﺘﻰ ﻛﻨﺖ ﺑﺸﺘﻐﻞ ﻫﻨﺎ .. ﺑﺲ ﻋﻨﺪﻯ ﻋﻴﻞ ﺗﻌﺐ ﻭﻛﻨﺖ ﻋﺪﻩ ﺟﻤﺒﻪ ﻓﻰ ﺍﻟﻤﺴﺘﺸﻔﻰ .. ﺑﻌﻴﺪ ﻋﻨﻚ ﻭﻋﻦ ﺍﻟﺴﻤﻌﻴﻴﻦ ﺟﺎﻟﻪ ﺍﻟﺘﻬﺎﺏ ﺟﺎﻣﺪ ﻓﻰ ﺍﻟﺮﺋﻪ ﻭﻛﺎﻥ ﻳﺎ ﺣﺒﺖ ﻋﻴﻨﻲ ﺑﻴﺘﻮﺟﻊ ﺃﻭﻯ .. ﺩﺧﻠﺖ ﺑﻴﻪ ﺍﻟﻤﺴﺘﺸﻔﻰ ﻭﻏﺒﺖ ﻓﺘﺮﺓ .. ﺭﺟﻌﺖ ﻟﻘﻴﺘﻬﻢ ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ﻓﻴﻬﻢ ﻃﺮﺩﻭﻧﻰ ﻣﻦ ﺍﻟﺸﻐﻞ ﻋﺸﺎﻥ ﻏﺒﺖ ﻓﺘﺮﺓ ﻃﻮﻳﻠﻪ
- ﻃﻴﺐ ﻭﻟﻴﻪ ﻣﺸﺮﺣﺘﻠﻬﻤﺶ ﻇﺮﻭﻓﻚ
- ﻫﻤﺎ ﻳﺎ ﺑﻨﺘﻰ ﻣﺪﻳﻨﻰ ﻓﺮﺻﺔ ﺃﺷﺮﺡ ﺣﺎﺟﻪ .. ﺃﻧﺎ ﻭﺭﺍﻳﺎ ﻛﻮﻡ ﻟﺤﻢ ﺃﻋﻤﻞ ﺍﻳﻪ ﻓﻴﻬﻢ ﺑﺲ ﻳﺎ ﺭﺑﻲ
ﻭﺍﻧﻔﺠﺮﺕ ﻣﺮﺓ ﺃﺧﺮﻯ ﻓﻰ ﺍﻟﺒﻜﺎﺀ .. ﻭﺃﻣﺴﻜﺖ ﻳﺪ " ﻳﺎﺳﻤﻴﻦ " ﻗﺎﺋﻠﻪ :
- ﺍﻧﺸﺎﻟﻪ ﻳﻨﺠﻴﻜﻰ ﻭﻳﻜﻔﻴﻜﻲ ﺷﺮ ﺍﻟﻤﺮﺽ ﺳﺎﻋﺪﻳﻨﻲ ﺃﺩﺧﻞ ﺃﺗﻜﻠﻢ ﻣﻊ ﺭﺋﻴﺲ ﺍﻟﻌﻤﺎﻝ ﻳﻤﻜﻦ ﻳﺮﺿﻰ ﻳﺮﺟﻌﻨﻰ ﺗﺎﻧﻰ
ﻛﺎﺩ ﻗﻠﺐ " ﻳﺎﺳﻤﻴﻦ " ﺃﻥ ﻳﻨﻔﻄﺮ ﻟﺤﺎﻝ ﺗﻠﻚ ﺍﻟﺴﻴﺪﺓ ﺍﻟﻤﺴﻜﻴﻨﺔ ﻭﻗﺮﺭﺕ ﺃﻥ ﺗﺴﺎﻋﺪﻫﺎ .. ﻓﻘﺎﻟﺖ ﻟﻬﺎ :
- ﻃﻴﺐ ﺃﻧﺎ ﻫﺴﺎﻋﺪﻙ ﻳﺎ ﺣﺠﻪ ﻭﻫﺸﺮﺣﻠﻬﻢ ﻇﺮﻭﻓﻚ .. ﺗﻌﺎﻟﻰ ﺑﻜﺮﺓ ﻓﻰ ﻧﻔﺲ ﺍﻟﻤﻌﺎﺩ ﻭﺃﻧﺎ ﺃﻗﻮﻟﻚ ﻋﻤﻠﺖ ﺍﻳﻪ
ﺣﺎﻭﻟﺖ ﺍﻟﺴﻴﺪﺓ ﺗﻘﺒﻴﻞ ﻳﺪﻫﺎ ﻓﺴﺤﺒﺘﻬﺎ " ﻳﺎﺳﻤﻴﻦ " ﺑﺴﺮﻋﺔ .. ﻗﺎﻟﺖ ﻟﻬﺎ :
- ﺭﺑﻨﺎ ﻳﺒﺎﺭﻛﻠﻚ ﻳﺎ ﺑﻨﺘﻰ ﻭﻳﻜﻔﻴﻜﻲ ﺷﺮ ﻃﺮﻳﻘﻚ .. ﺃﻧﺎ ﻛﻞ ﻳﻮﻡ ﺑﺎﺟﻰ ﻫﻨﺎ .. ﻫﺎﺟﻰ ﺑﻜﺮﺓ ﻭﻳﺎﺭﺏ ﺃﺳﻤﻊ ﺧﺒﺮ ﺣﻠﻮ
ﺍﺑﺘﺴﻤﺖ ﻟﻬﺎ " ﻳﺎﺳﻤﻴﻦ " ﻓﻰ ﺣﻨﻮ ﻭﺭﺑﺘﺖ ﻋﻠﻰ ﻛﺘﻔﻬﺎ ﻗﺎﺋﻠﻪ :
- ﺍﺩﻋﻰ ﺭﺑﻨﺎ ﻭﺍﻥ ﺷﺎﺀ ﺍﻟﻠﻪ ﻳﺮﺟﻌﻮﻛﻰ ﺍﻟﺸﻐﻞ ﺗﺎﻧﻰ
ﺗﺮﻛﺘﻬﺎ " ﻳﺎﺳﻤﻴﻦ " ﻭﺩﺧﻠﺖ ﻭﻫﻰ ﻣﺘﺄﺛﺮﻩ ﺑﺸﺪﺓ .. ﻛﻴﻒ ﻳﻄﺮﺩﻭﻥ ﺳﻴﺪﺓ ﻣﺜﻠﻬﺎ ﻭﻫﻰ ﻓﻰ ﺃﻣﺲ ﺍﻟﺤﺎﺟﺔ ﻟﻠﻤﺎﻝ .. ﺗﻮﺟﻬﺖ ﺍﻟﻰ ﺍﻟﻤﺒﻨﻰ ﺍﻹﺩﺍﺭﻯ ﺣﻴﺚ ﻣﻜﺘﺐ " ﻋﻤﺮ " .. ﻃﺮﻗﺘﻪ ﻃﺮﻗﺎﺕ ﺧﻔﻴﻔﺔ .. ﺳﻤﻌﺖ ﺻﻮﺕ ﻣﻦ ﺍﻟﺪﺍﺧﻞ :
- ﺍﺗﻔﻀﻞ
ﺩﺧﻠﺖ .. ﺭﻓﻊ " ﻋﻤﺮ " ﺭﺃﺳﻪ ﻟﻴﺠﺪﻫﺎ ﺃﻣﺎﻣﻪ .. ﻫﺰ ﺭﺃﺳﻪ ﻟﺘﺘﻘﺪﻡ .. ﺗﺮﻛﺖ ﺍﻟﺒﺎﺏ ﻣﻔﺘﻮﺣﺎً ﻛﻤﺎ ﺍﻟﻤﺮﺓ ﺍﻟﻤﺎﺿﻴﺔ ﻭﺩﺧﻠﺖ ﻭﻗﻔﺖ ﺃﻣﺎﻡ ﺍﻟﻤﻜﺘﺐ ﻗﺎﺋﻠﻪ :
- ﺻﺒﺎﺡ ﺍﻟﺨﻴﺮ ﻳﺎ ﺑﺸﻤﻬﻨﺪﺱ
ﺭﺩ " ﻋﻤﺮ : "
- ﺻﺒﺎﺡ ﺍﻟﻨﻮﺭ
ﻧﻈﺮ " ﻋﻤﺮ " ﺍﻟﻰ ﺍﻟﺒﺎﺏ ﺍﻟﻤﻔﺘﻮﺡ .. ﺛﻢ ﻧﻈﺮ ﺍﻟﻴﻬﺎ ﻗﺎﺋﻼ :
- ﻫﻮ ﻣﻴﻨﻔﻌﺶ ﺍﻟﺒﺎﺏ ﻳﺘﻘﻔﻞ .. ﻻﺯﻡ ﺍﻟﻠﻰ ﺭﺍﻳﺢ ﻭﺍﻟﻠﻰ ﺟﺎﻯ ﻳﺘﻔﺮﺝ ﻋﻠﻴﻨﺎ
ﺍﺭﺗﺒﻜﺖ " ﻳﺎﺳﻤﻴﻦ " ﻧﻈﺮﺕ ﺍﻟﻰ ﺍﻟﺒﺎﺏ ﺛﻢ ﺍﻟﻴﻪ .. ﻛﺎﻥ ﻳﺮﻗﺐ ﺭﺩﻭﺩ ﺃﻓﻌﺎﻟﻬﺎ .. ﻗﺎﻟﺖ ﺑﺘﻮﺗﺮ :
- ﺁﺳﻔﻪ ﻣﺶ ﻫﻴﻨﻔﻊ ﺃﻗﻔﻠﻪ
ﻫﻤﺖ ﺑﺎﻹﻧﺼﺮﺍﻑ ﺛﻢ ﻗﺎﻟﺖ :
- ﺧﻼﺹ ﻣﻔﻴﺶ ﻣﺸﻜﻠﺔ ﺷﻜﺮﺍً
ﺃﻭﻗﻔﻬﺎ " ﻋﻤﺮ " ﻗﺎﺋﻼً :
- ﺍﺳﺘﻨﻰ
ﺍﻟﻔﺘﺖ ﺍﻟﻴﻪ ﻓﻨﻈﺮ ﺍﻟﻴﻬﺎ ﻗﺎﺋﻼً :
- ﺍﻧﺘﻰ ﻋﻠﻰ ﻃﻮﻝ ﻣﺘﺴﺮﻋﺔ ﻛﺪﺓ
ﺻﻤﺘﺖ ﻭﻟﻢ ﺗﺠﺐ .. ﺃﺷﺎﺭ ﺑﺮﺃﺳﻪ ﺍﻟﻰ ﺍﻟﻜﺮﺳﻲ ﺃﻣﺎﻡ ﺍﻟﻤﻜﺘﺐ ﻗﺎﺋﻼ ﺑﺼﺮﺍﻣﺔ :
- ﺍﻋﺪﻯ
ﺗﻘﺪﻣﺖ " ﻳﺎﺳﻤﻴﻦ " ﻭﺟﻠﺴﺖ .. ﻧﻈﺮ ﺍﻟﻴﻬﺎ .. ﻛﺎﻧﺖ ﺗﺤﺎﻭﻝ ﺍﺳﺘﺠﻤﺎﻉ ﻗﻮﺍﻫﺎ ﻭﺗﺮﺗﻴﺐ ﺃﻓﻜﺮﻫﺎ .. ﺻﻤﺘﺖ ﻟﺤﻈﺎﺕ ﺛﻢ ﺍﻟﺘﻔﺘﺖ ﺍﻟﻴﻪ ﺗﻨﻈﺮ ﺍﻟﻴﻪ ﻗﺎﺋﻠﻪ :
- ﻓﻰ ﻭﺍﺣﺪﺓ ﻛﺎﻧﺖ ﺑﺘﺸﺘﻐﻞ ﻫﻨﺎ ﻓﻰ ﺍﻟﺤﻠﺐ .. ﻫﻰ ﺳﺖ ﻛﺒﻴﺮﺓ ﻓﻰ ﺍﻟﺴﻦ .. ﻭﺷﻜﻠﻬﺎ ﻋﻠﻰ ﺃﺩ ﺣﺎﻟﻬﺎ .. ﻛﺎﻧﺖ ﻭﺍﻗﻔﺔ ﻋﻠﻰ ﺍﻟﺒﻮﺍﺑﺔ ﺍﻟﺮﺍﺟﻞ ﻣﺶ ﺭﺍﺿﻰ ﻳﺪﺧﻠﻬﺎ .. ﺍﺗﻜﻠﻤﺖ ﻣﻌﺎﻫﺎ .. ﻃﺮﺩﻭﻫﺎ ﻣﻦ ﺍﻟﺸﻐﻞ ﻋﺸﺎﻥ ﻛﺎﻧﺖ ﺑﺘﻐﻴﺐ ﻛﺘﻴﺮ .. ﺑﺲ ﻫﻰ ﻣﻌﺬﻭﺭﻩ ﺍﺑﻨﻬﺎ ﻛﺎﻥ ﺗﻌﺒﺎﻥ ﻓﻰ ﺍﻟﻤﺴﺘﺸﻔﻰ ﻭﻫﻰ ﻛﻨﺖ ﺃﻋﺪﻩ ﺟﻤﺒﻪ
ﻛﺎﻥ " ﻋﻤﺮ " ﻳﺮﺍﻗﺒﻬﺎ ﻭﻫﻰ ﺗﺘﺤﺪﺙ ﻭﻋﻠﻰ ﻭﺟﻬﻬﺎ ﻣﻼﻣﺢ ﺍﻟﺘﺄﺛﺮ ﻟﺤﺎﻝ ﺗﻠﻚ ﺍﻟﺴﻴﺪﺓ .. ﺑﻠﻌﺖ ﺭﻳﻘﻬﺎ ﺛﻢ ﺍﺳﺘﻄﺮﺩﺕ ﻗﺎﺋﻠﻪ :
- ﻫﻰ ﻏﻠﺒﺎﻧﻪ ﺃﻭﻯ .. ﻭﻣﻠﻬﺎﺵ ﺷﻐﻞ ﺗﺎﻧﻰ ﺗﺼﺮﻑ ﻣﻨﻪ ﻋﻠﻰ ﻭﻻﺩﻫﺎ .. ﻳﻌﻨﻲ ﻟﻮ ﻳﻨﻔﻊ .. ﻳﻌﻨﻲ .. ﺣﻀﺮﺗﻚ ..
ﻗﺎﻃﻌﻬﺎ ﻗﺎﺋﻼ :
- ﺑﺘﺘﻮﺳﻄﻴﻠﻬﺎ ﻋﻨﺪﻯ ﻳﻌﻨﻲ ؟
ﺑﻠﻠﺖ ﺷﻔﻴﻬﺎ ﺑﻠﺴﺎﻧﻬﺎ ﻭﻗﺪ ﺷﻌﺮﺕ ﺃﻥ ﺣﻠﻘﻬﺎ ﺟﺎﻑ ﻣﻦ ﺍﻟﺘﻮﺗﺮ .. ﻗﺎﻟﺖ :
- ﻟﻮ ﻳﻨﻔﻊ ﺣﻀﺮﺗﻚ ﺗﺮﺟﻌﻬﺎ ﺍﻟﺸﻐﻞ ﺗﺎﻧﻰ ﻳﺒﻘﻰ ﺧﺪﺕ ﻓﻴﻬﺎ ﺛﻮﺍﺏ .. ﻷﻥ ﻓﻌﻼ ﺷﻜﻠﻬﺎ ﻣﺤﺘﺎﺟﺔ ﻟﻠﺸﻐﻞ ﺃﻭﻯ
ﺻﻤﺖ " ﻋﻤﺮ " ﻟﺤﻈﺎﺕ ﺛﻢ ﻧﻈﺮ ﺍﻟﻴﻬﺎ ﻗﺎﺋﻼ :
- ﻟﻮ ﻓﻌﻼ ﻣﺸﻮﻫﺎ ﻟﻠﺴﺒﺐ ﺩﻩ ﻳﻌﻨﻲ ﺑﺴﺒﺐ ﻏﻴﺎﺑﻬﺎ .. ﻓﺄﻧﺎ ﻫﻘﻮﻝ ﻟﺮﺋﻴﺲ ﺍﻟﻌﻤﺎﻝ ﻳﺮﺟﻌﻬﺎ ﺗﺎﻧﻰ
ﻟﻢ ﺗﺼﺪﻕ " ﻳﺎﺳﻤﻴﻦ " ﻣﺎ ﺳﻤﻌﺖ .. ﺷﻌﺮﺕ ﺑﻔﺮﺣﺔ ﻋﺎﺭﻣﺔ ﺃﻥ ﺍﺳﺘﻄﺎﻋﺖ ﻣﺴﺎﻋﺪﺓ ﺗﻠﻚ ﺍﻟﺴﻴﺪﺓ ﺍﻟﻔﻘﻴﺮﺓ .. ﻧﻈﺮﺕ ﺍﻟﻰ " ﻋﻤﺮ " ﻭﻫﺘﻔﺖ ﻭﺍﻻﺑﺘﺴﺎﻣﻪ ﺗﻌﻠﻮ ﺷﻔﺘﻴﻬﺎ :
- ﺑﺠﺪ ؟ .. ﻳﻌﻨﻲ ﻫﺘﺮﺟﻌﻮﻫﺎ ﺍﻟﺸﻐﻞ ؟
ﺭﺍﻗﺐ " ﻋﻤﺮ " ﺍﺑﺘﺴﺎﻣﺘﻬﺎ ﻭﺍﻟﻔﺮﺣﺔ ﺍﻟﺘﻰ ﺗﻌﻠﻮ ﻭﺟﻬﻬﺎ ﻣﻦ ﺃﺟﻞ ﺳﻴﺪﺓ ﻻ ﺗﻌﺮﻓﻬﺎ ﻭﻟﻢ ﺗﻠﺘﻘﻰ ﺑﻬﺎ ﻣﻦ ﻗﺒﻞ .. ﺳﺎﺩ ﺍﻟﺼﻤﺖ .. ﻻﺣﻈﺖ " ﻳﺎﺳﻤﻴﻦ " ﺗﻔﺮﺳﻪ ﻓﻴﻬﺎ .. ﻓﺸﻌﺮﺕ ﺑﺤﻤﺮﺓ ﺍﻟﺨﺠﻞ ﻭﻫﻰ ﺗﺘﺼﺎﻋﺪ ﺍﻟﻰ ﻭﺟﻨﺘﻴﻬﺎ ﻓﺨﻔﻀﺖ ﺑﺼﺮﻫﺎ .. ﻗﺎﻝ ﺑﻌﺪ ﺑﺮﻫﻪ :
- ﺃﻳﻮﺓ .. ﻟﻮ ﻛﺎﻥ ﺯﻯ ﻣﺎ ﻗﺎﻟﺖ ﻫﻮ ﺩﻩ ﺍﻟﺴﺒﺐ ﺍﻟﻠﻰ ﻃﺮﺩﻭﻫﺎ ﻋﺸﺎﻧﻪ .. ﻳﻌﻨﻲ ﻣﺘﻜﻨﺶ ﻋﻤﻠﺖ ﺣﺎﺟﻪ ﻏﻠﻂ ﺳﺮﻗﺖ ﻣﺜﻼ ﺃﻭ ﺳﺒﺒﺖ ﺗﻠﻔﻴﺎﺕ
ﺷﻜﺮﺗﻪ " ﻳﺎﺳﻤﻴﻦ " ﻗﺎﺋﻼ :
- ﺷﻜﺮﺍُ ﻟﺤﻀﺮﺗﻚ .. ﻭﻫﻰ ﻋﺎﻣﺔ ﺑﺘﻴﺠﻲ ﺗﻘﻒ ﻛﻞ ﻳﻮﻡ ﺃﺩﺍﻡ ﺍﻟﺒﻮﺍﺑﺔ .. ﻭﻫﻰ ﻫﺘﻴﺠﻲ ﺑﻜﺮﺓ ﻋﺸﺎﻥ ﺗﻌﺮﻑ ﺍﺫﺍ ﻛﺎﻧﺖ ﻫﺘﺮﺟﻊ ﺍﻟﺸﻐﻞ ﻭﻻ ﻷ
ﻫﺰ " ﻋﻤﺮ " ﺭﺃﺳﻪ .. ﻓﻨﻬﻀﺖ " ﻳﺎﺳﻤﻴﻦ " ﻭﻧﻈﺮﺕ ﺍﻟﻴﻪ ﻗﺎﺋﻠﻪ :
- ﻣﺘﺸﻜﺮﻩ ﻣﺮﺓ ﺗﺎﻧﻴﺔ
ﺛﻢ ﺧﺮﺟﺖ ﻭﺃﻏﻠﻘﺖ ﺍﻟﺒﺎﺏ ﻭﺭﺍﺀﻫﺎ .. ﻇﻞ " ﻋﻤﺮ " ﻳﻨﻈﺮ ﺍﻟﻰ ﺍﻟﺒﺎﺏ ﺍﻟﻤﻐﻠﻖ ﻭ ﻫﻮ ﻳﻔﻜﺮ ﻓﻰ ﺭﻗﺔ ﻗﻠﺐ ﺗﻠﻚ ﺍﻟﻔﺘﺎﺓ .. ﺍﻟﺘﻰ ﺷﻌﺮﺕ ﺍﻟﻔﺮﺡ ﺍﻟﺬﻯ ﺃﻧﺎﺭ ﻭﺟﻬﻬﺎ ﻣﻦ ﺃﺟﻞ ﺗﻠﻚ ﺍﻟﺴﻴﺪﺓ ﺍﻟﻔﻘﻴﺮﺓ .. ﻛﻢ ﻫﻰ ﺭﻗﻴﻘﻪ .. ﺗﺤﺐ ﺍﻟﺨﻴﺮ ﻟﻶﺧﺮﻳﻦ .. ﻛﺎﻥ ﻣﺴﺘﻐﺮﻗﺎً ﻓﻰ ﺗﻔﻜﻴﺮﻩ ﻋﻨﺪﻣﺎ ﻃﺮﻕ " ﺃﻳﻤﻦ " ﺍﻟﺒﺎﺏ ﻭﺩﺧﻞ ﻗﺎﺋﻼً ﺑﺒﺸﺎﺷﺔ :
- ﺍﺯﻳﻚ ﻳﺎ " ﻋﻤﺮ "
ﺍﺑﺘﺴﻢ ﻟﻪ " ﻋﻤﺮ " ﻗﺎﺋﻼ :
- ﺗﻤﺎﻡ ﺍﻟﺤﻤﺪ ﻟﻠﻪ
ﺟﻠﺲ " ﺃﻳﻤﻦ " ﻋﻠﻰ ﺍﻟﻤﻘﻌﺪ ﺍﻟﺘﻰ ﻛﺎﻧﺖ ﺗﺠﻠﺲ ﻓﻴﻪ " ﻳﺎﺳﻤﻴﻦ " ﻣﻨﺬ ﻗﻠﻴﻞ .. ﺗﻔﺮﺱ ﻓﻰ ﺻﺪﻳﻘﻪ ﺍﻟﺸﺎﺭﺩ ﺍﻟﺬﻫﻦ ﻗﺎﺋﻼ :
- ﺍﻳﻪ ﻣﺎﻟﻚ ﻓﻰ ﺍﻳﻪ
ﺍﺑﺘﺴﻢ " ﻋﻤﺮ " ﻗﺎﺋﻼ :
- ﻻ ﺃﺑﺪﺍً ﻣﻔﻴﺶ ﺣﺎﺟﻪ
ﻗﺎﻝ " ﺃﻳﻤﻦ " ﻟﺼﺪﻳﻘﻪ ﻭﻫﻮ ﻳﺸﻴﺮ ﺍﻟﻰ ﺫﺭﺍﻋﻪ ﺍﻟﻴﺴﺮﻯ ﺍﻟﻤﻮﺿﻮﻋﻪ ﻋﻠﻰ ﺍﻟﻤﻜﺘﺐ :
- ﺃﺧﺒﺎﺭ ﺩﺭﺍﻋﻚ ﺍﻳﻪ ﺩﻟﻮﻗﺘﻰ
ﺭﻓﻊ " ﻋﻤﺮ " ﺫﺭﺍﻋﻪ ﻭﻧﻈﺮ ﺍﻟﻴﻪ ﻗﺎﺋﻼ :
- ﺍﻟﺤﻤﺪ ﻟﻠﻪ ﺃﺣﺴﻦ ﻛﺘﻴﺮ .. ﻣﻦ ﺳﺎﻋﺔ ﻣﺎ ﻓﻜﻴﺖ ﺍﻟﺠﺒﺲ ﻭﺃﻧﺎ ﻣﻮﺍﻇﺐ ﻋﻠﻰ ﺍﻟﻌﻼﺝ ﺍﻟﻄﺒﻴﻌﻲ ﻭﺣﺎﺳﺲ ﺑﺘﺤﺴﻦ .. ﺍﻟﻤﺸﻜﻠﺔ ﺑﺲ ﺍﻧﻰ ﻛﻞ ﻓﺘﺮﺓ ﺑﺤﺲ ﻓﻴﻬﺎ ﺑﺘﻨﻤﻴﻞ ﺷﺪﻳﺪ ﻭﻣﺒﻜﻨﺶ ﻗﺎﺩﺭ ﺍﺣﺮﻛﻬﺎ
ﻗﺎﻝ " ﺃﻳﻤﻦ " ﺑﻘﻠﻖ :
- ﻣﺎ ﻗﻮﻟﺘﺶ ﻟﻠﺪﻛﺘﻮﺭ ﺍﻟﻠﻰ ﻣﺘﺎﺑﻊ ﻣﻌﺎﻙ ﺍﻟﻜﻼﻡ ﺩﻩ ﻟﻴﻪ ؟
ﺗﻨﻬﺪ " ﻋﻤﺮ " ﻗﺎﺋﻼ :
- ﻗﻮﻟﺘﻠﻪ ﻭﻗﺎﻟﻰ ﻃﺒﻴﻌﻲ .. ﺩﻩ ﻧﺘﻴﺠﻪ ﻟﻀﻌﻒ ﺍﻷﻋﺼﺎﺏ ﻓﻰ ﺩﺭﺍﻋﻰ ﺑﻌﺪ ﺍﻟﺤﺎﺩﺛﺔ .. ﻭﺍﻥ ﺍﻟﻌﻼﺝ ﺍﻟﻄﺒﻴﻌﻲ ﻫﻴﻘﻮﻯ ﺍﻷﻋﺼﺎﺏ ﻭﻫﺘﺮﺟﻊ ﺍﻳﺪﻱ ﺗﺎﻧﻰ ﺯﻯ ﺍﻷﻭﻝ
ﺣﺚ " ﺃﻳﻤﻦ " ﺻﺪﻳﻘﻪ ﻗﺎﺋﻼ :
- ﻳﺒﺄﻩ ﺭﻛﺰ ﻓﻰ ﻣﻮﺿﻮﻉ ﺍﻟﻌﻼﺝ ﺩﻩ ﻭﻣﺘﻬﻤﻠﻮﺵ ﻳﺎ " ﻋﻤﺮ "
ﺍﺑﺘﺴﻢ ﻟﻪ " ﻋﻤﺮ " ﻓﻰ ﺻﻤﺖ .. ﺛﻢ ﺍﺳﺘﺄﺫﻥ " ﺃﻳﻤﻦ " ﻓﻰ ﺍﻹﻧﺼﺮﺍﻑ ﺍﻟﻰ ﻋﻤﻠﻪ .
*****************************
ﺩﺧﻠﺖ " ﻳﺎﺳﻤﻴﻦ " ﻏﺮﻓﺘﻬﺎ ﻟﺘﺠﺪ " ﺭﻳﻬﺎﻡ " ﺟﺎﻟﺴﻪ ﻋﻠﻰ ﻓﺮﺍﺷﻬﺎ .. ﻫﺒﺖ ﻭﺍﻗﻔﻪ ﺑﻤﺠﺮﺩ ﺃﻥ ﺭﺃﺗﻬﺎ ﻭﻗﺎﻟﺖ :
- ﺃﺧﻴﺮﺍ ﺷﺮﻓﺘﻰ ﺳﻴﺎﺩﺗﻚ
ﻗﺎﻟﺖ " ﻳﺎﺳﻤﻴﻦ " ﻭﻫﻰ ﺗﻐﻴﺮ ﻣﻼﺑﺴﻬﺎ :
- ﻣﻌﻠﺶ ﻳﺎ " ﺭﻳﻬﺎﻡ " ﺍﻟﻨﻬﺎﺭﺩﺓ ﻛﻦ ﻳﻮﻡ ﻣﺘﻌﺐ ﺟﺪﺍ ﻭﺍﺗﺄﺧﺮﻧﺎ ﺷﻮﻳﺔ
ﻗﺎﻟﺖ " ﺭﻳﻬﺎﻡ " ﺑﺘﺒﺮﻡ :
- ﻋﻠﻰ ﻃﻮﻝ ﺍﻧﺘﻰ ﻣﺸﻐﻮﻟﺔ ﻭﺑﺎﺑﺎ ﻛﻤﺎﻥ ﻣﺸﻐﻮﻝ ﻓﻰ ﺍﻟﺸﻐﻞ ﺍﻟﺠﺪﻳﺪ ﺍﻟﻠﻰ ﺷﺎﻓﻬﻮﻟﻪ ﺍﻟﺒﺸﻤﻬﻨﺪﺱ " ﻋﻤﺮ " .. ﻭﺃﻧﺎ ﺃﻋﺪﻩ ﻟﻮﺣﺪﻯ ﻃﻮﻝ ﺍﻟﻨﻬﺎﺭ
ﻧﻈﺮﺕ ﺍﻟﻬﻴﺎ " ﻳﺎﺳﻤﻴﻦ " ﻗﺎﺋﻠﻪ :
- ﻣﺎ ﺍﻧﺘﻰ ﺑﺘﺬﺍﻛﺮﻯ ﻳﺎ " ﺭﻳﻬﺎﻡ " ﻋﺸﺎﻥ ﺧﻼﺹ ﺍﻟﺘﺮﻡ ﻗﺮﺏ ﻳﺨﻠﺺ
ﻗﺎﻟﺖ ﺑﺰﻫﻖ :
- ﺍﺗﺨﻨﻘﺖ ﺧﻼﺹ .. ﻃﻮﻝ ﺍﻟﻨﻬﺎﺭ ﻣﺬﺍﻛﺮﻩ ﻣﺬﺍﻛﺮﻩ .. ﺑﺠﺪ ﺍﺗﺨﻨﻘﺖ ﻧﻔﺴﻲ ﻧﻄﻠﻊ ﺃﻧﺎ ﻭﺍﻧﺘﻰ ﻧﺘﻔﺴﺢ ﺷﻮﻳﺔ .. ﻧﺸﻮﻑ ﻧﺎﺱ ﻧﻌﺪ ﺃﻋﺪﻩ ﺣﻠﻮﺓ
ﺍﺑﺘﺴﻤﺖ ﻟﻬﺎ " ﻳﺎﺳﻤﻴﻦ " ﻗﺎﺋﻠﻪ :
- ﺧﻼﺹ ﺍﺗﻔﻘﻨﺎ .. ﺑﻌﺪ ﺑﻜﺮﺓ ﺍﻟﺠﻤﻌﺔ ﺍﻥ ﺷﺎﺀ ﺍﻟﻠﻪ .. ﺗﻌﺎﻟﻰ ﻧﻄﻠﻊ ﻧﺘﻔﺴﺢ ﻓﻰ ﺃﻯ ﻣﻜﺎﻥ ﻭﻧﻐﻴﺮ ﺟﻮ
ﻫﺘﻔﺖ " ﺭﻳﻬﺎﻡ " ﺑﻔﺮﺣﻪ :
- ﺑﺠﺪ ﻳﺎ " ﻳﺎﺳﻤﻴﻦ " ؟ ... ﻫﻴﻴﻴﻴﻴﻴﻴﻴﻴﻪ
ﻗﺎﻟﺖ " ﻳﺎﺳﻤﻴﻦ " ﺑﻔﺮﺣﺔ :
- ﺍﻳﻪ ﺭﺃﻳﻚ ﻛﻤﺎﻥ ﺃﻛﻠﻢ " ﺳﻤﺎﺡ " ﻭﺍﻫﻰ ﺗﻐﻴﺮ ﺟﻮ ﻣﻌﺎﻧﺎ ﻫﻰ ﻛﻤﺎﻥ
ﺍﺑﺘﺴﻤﺖ " ﺭﻳﻬﺎﻡ " ﻗﺎﺋﻠﻪ :
- ﻃﺒﻌﺎ ﻓﻜﺮﺓ ﺣﻠﻮﺓ ﺟﺪﺍ ﻛﻠﻤﻴﻬﺎ ﺩﻟﻮﻗﺘﻰ ﻋﺸﺎﻥ ﺗﻌﻤﻞ ﺣﺴﺎﺑﻬﺎ
ﻫﺎﺗﻔﺖ " ﻳﺎﺳﻤﻴﻦ " ﺻﺪﻳﻘﺘﻬﺎ ﻭﺍﻗﺘﺮﺣﺖ ﻋﻠﻴﻬﺎ ﺍﻟﺨﺮﻭﺝ ﻣﻌﺎً ﻳﻮﻡ ﺍﻟﺠﻤﻌﺔ .. ﻓﻘﺎﻟﺖ ﻟﻬﺎ " ﺳﻤﺎﺡ " :
- ﻣﻮﺍﻓﻘﺔ ﻃﺒﻌﺎ .. ﺃﻧﺎ ﻛﻤﺎﻥ ﻣﺨﻨﻮﻗﺔ ﺟﺪﺍ .. ﻭﻟﺴﻪ ﻛﻨﺖ ﺑﻘﻮﻝ ﻟـ " ﺃﻳﻤﻦ " ﻛﺪﺓ .. ﺧﻼﺹ ﻫﺴﺘﺄﺫﻧﻪ ﻭﺃﺭﺩ ﻋﻠﻴﻜﻲ ﻳﺎ " ﻳﺎﺳﻤﻴﻦ "
- ﺧﻼﺹ ﻭﺃﻧﺎ ﻣﻨﺘﻈﺮﺓ ﺍﺗﺼﺎﻟﻚ ﺍﻥ ﺷﺎﺀ ﺍﻟﻠﻪ
ﺑﻌﺪﻣﺎ ﻋﺎﺩ " ﺃﻳﻤﻦ " ﻣﻦ ﺍﻟﻌﻤﻞ ﺍﻟﺘﻒ ﺍﻹﺛﻨﺎﻥ ﺣﻮﻝ ﻃﺎﻭﻟﺔ ﺍﻟﻄﺎﻋﻢ ﻭﺃﺧﺒﺮﺗﻪ " ﺳﻤﺎﺡ " ﺑﺮﻏﺒﺘﻬﺎ ﻓﻰ ﺍﻟﺘﻨﺰﻩ ﻣﻊ " ﻳﺎﺳﻤﻴﻦ " ﻭ " ﺭﻳﻬﺎﻡ " ﻗﺎﺋﻠﻪ :
- ﺑﺼﺮﺍﺣﺔ ﻧﻔﺴﻲ ﺃﺧﺮﺝ ﻳﺎ " ﺃﻳﻤﻦ " ﺃﻧﺎ ﻋﻠﻰ ﻃﻮﻝ ﻣﺤﺒﻮﺳﻪ ﻓﻰ ﺍﻟﺒﻴﺖ
ﻣﺴﺢ " ﺃﻳﻤﻦ " ﺑﻜﻔﻪ ﻋﻠﻰ ﺷﻌﺮﻫﺎ ﻗﺎﺋﻼ :
- ﻣﻌﻠﺶ ﻳﺎ ﺣﺒﻴﺒﺘﻰ .. ﻋﺎﺭﻑ ﺍﻧﻰ ﺑﺴﻴﺒﻚ ﻟﻮﺣﺪﻙ ﻛﺘﻴﺮ
ﺃﺧﺬﺕ ﻳﺪﻩ ﺍﻟﻤﻮﺿﻮﻋﻪ ﻋﻠﻰ ﺷﻌﺮﻫﺎ ﻭﻗﺒﻠﺘﻬﺎ ﻗﺎﺋﻠﻪ :
- ﺭﺑﻨﺎ ﻳﻌﻴﻨﻚ ﻳﺎ ﺣﺒﻴﺒﺘﻰ ﺃﻧﺎ ﻋﺎﺭﻓﻪ ﺍﻧﺖ ﺑﺘﺘﻌﺐ ﺃﺩ ﺍﻳﻪ .. ﻋﺎﺭﻑ ﻧﻔﺴﻲ ﻧﺨﺮﺝ ﺳﻮﺍ ﺑﺲ ﺍﻧﺖ ﺑﺘﻜﻮﻥ ﻣﺸﻐﻮﻝ ﺣﺘﻰ ﻳﻮﻡ ﺍﻟﺠﻤﻌﺔ
ﺍﺑﺘﺴﻢ ﻟﻬﺎ " ﺃﻳﻤﻦ " ﻗﺎﺋﻼ :
- ﺃﻧﺎ ﺃﻓﻀﻰ ﻧﻔﺴﻲ ﻋﺸﺎﻧﻚ ﻳﺎ ﺣﺒﻴﺒﺘﻰ
ﻫﺘﻔﺖ ﺑﺴﻌﺎﺩﺓ ﻗﺎﺋﻠﻪ :
- ﺑﺠﺪ ﻳﺎ " ﺃﻳﻤﻦ " ؟ .. ﻳﻌﻨﻲ ﻫﻨﺨﺮﺝ ﺳﻮﺍ ﻳﻮﻡ ﺍﻟﺠﻤﻌﺔ ؟
ﻗﻠﺒﻬﺎ ﻗﺎﺋﻼ :
- ﻃﺎﻟﻤﺎ ﺣﺒﻴﺒﺘﻰ ﻋﺎﻳﺰﻩ ﺗﺨﺮﺝ ﺗﺘﻔﺴﺢ .. ﻳﺒﻘﻰ ﻻﺯﻡ ﻧﻔﺴﺤﻬﺎ
ﻣﺎ ﻟﺒﺜﺖ ﺃﻥ ﺗﻼﺷﺖ ﺍﺑﺘﺴﺎﻣﺔ " ﺳﻤﺎﺡ " ﻗﺎﺋﻠﻪ :
- ﻃﺐ ﻭ " ﻳﺎﺳﻤﻴﻦ .. " ﻳﺎ ﺭﺑﻲ .. ﺧﺎﻳﻔﻪ ﺗﺰﻋﻞ ﻣﻨﻰ
ﻓﻜﺮ " ﺃﻳﻤﻦ " ﻗﻠﻴﻼ ﺛﻢ ﻗﺎﻝ :
- ﻃﻴﺐ ﺃﻧﺎ ﻋﻨﺪﻯ ﺍﻗﺘﺮﺍﺡ ﺣﻠﻮ
ﻧﻈﺮﺕ ﺍﻟﻴﻪ " ﺳﻤﺎﺡ " ﺑﻠﻬﻔﻪ ﻗﺎﺋﻠﻪ :
- ﺍﻳﻪ ﻫﻮ ؟
- ﺍﻳﻪ ﺭﺃﻳﻚ ﻧﻄﻠﻊ ﺃﻧﺎ ﻭﺍﻧﺘﻰ ﻭ " ﻳﺎﺳﻤﻴﻦ " ﻭ " ﺭﻳﻬﺎﻡ " ﻭﻋﻢ " ﻋﺒﺪ ﺍﻟﺤﻤﻴﺪ " ﻭﻧﻘﻀﻰ ﻳﻮﻡ ﻓﻰ ﺭﺍﺱ ﺍﻟﺒﺮ
- ﺑﺠﺪ ﻳﺎ " ﺃﻳﻤﻦ " ؟
- ﺃﻳﻮﺓ ﺑﺠﺪ ﻫﻴﻜﻮﻥ ﻳﻮﻡ ﺣﻠﻮ ﻭﺗﻐﻴﻴﺮ ﺟﻮ .. ﻭﻛﻤﺎﻥ ﺍﻟﻔﺘﺮﺓ ﺩﻯ ﺍﻟﺒﻠﺪ ﺑﺘﻜﻮﻥ ﻓﺎﺿﻴﺔ ﻳﻌﻨﻲ ﻫﻨﻜﻮﻥ ﻋﻠﻰ ﺭﺍﺣﺘﻨﺎ .. ﻭﺍﻧﺘﻰ ﺗﻐﻴﺮﻱ ﺟﻮ ﻭﻛﻤﺎﻥ ﺗﺘﻔﺴﺤﻰ ﻣﻊ ﺻﺤﺒﺘﻚ
ﻗﺎﻣﺖ " ﺳﻤﺎﺡ " ﻣﻌﺎﻧﻘﻪ ﺍﻳﺎﻩ ﻗﺎﺋﻠﻪ :
- ﺍﻧﺖ ﺃﺣﺴﻦ ﺯﻭﺝ ﻓﻰ ﺍﻟﺪﻧﻴﺎ ﺩﻯ ﻛﻠﻬﺎ
ﺃﻣﺴﻚ ﺭﺃﺳﻬﺎ ﺑﻴﻦ ﻛﻔﻴﻪ ﻭﻗﺒﻠﻬﺎ ﻗﺎﺋﻼ :
- ﻭﺍﻧﺘﻰ ﺃﺭﻭﻉ ﺯﻭﺟﺔ ﻓﻰ ﺍﻟﺪﻧﻴﺎ ﺩﻯ ﻛﻠﻬﺎ
*************************
- ﺻﺒﺎﺡ ﺍﻟﺨﻴﺮ ﻳﺎ ﺩﻛﺘﻮﺭﺓ " ﻳﺎﺳﻤﻴﻦ "
ﻛﺎﻧﺖ " ﻳﺎﺳﻤﻴﻦ " ﺗﺴﺘﻌﺪ ﻟﺒﺪﺀ ﻋﻤﻠﻬﺎ .. ﻋﻨﺪﻣﺎ ﺩﺧﻞ ﺩﻛﺘﻮﺭ " ﺣﺴﻦ " ﻭﺃﻟﻘﻰ ﻋﻠﻴﻬﺎ ﺗﻠﻚ ﺍﻟﻌﺒﺎﺭﺓ .. ﺍﻟﺘﻔﺘﺖ ﺍﻟﻴﻪ ﻗﺎﺋﻠﻪ :
- ﺻﺒﺎﺡ ﺍﻟﺨﻴﺮ ﻳﺎ ﺩﻛﺘﻮﺭ " ﺣﺴﻦ "
ﺳﺄﻟﻬﺎ ﺩﻛﺘﻮﺭ " ﺣﺴﻦ " ﻭﻫﻮ ﻳﺴﺘﻌﺪ ﺑﺈﺭﺗﺪﺍﺀ ﺍﻟﺒﺎﻟﻄﻮ :
- ﺍﻳﻪ ﺃﺧﺒﺎﺭ ﺣﺎﻟﺔ ﺍﻟـ mastitis ﺑﺘﺎﻋﺔ ﺍﻣﺒﺎﺭﺡ
- ﻛﻠﻪ ﺗﻤﺎﻡ ﻳﺎ ﺩﻛﺘﻮﺭ .. ﺍﺩﻳﺘﻠﻬﺎ ﺟﺮﻋﺔ ﺍﻟـ antibiotic ﺑﻌﺪ ﻣﺎ ﺣﻀﺮﺗﻚ ﻣﺸﻴﺖ .. ﻭﺍﻥ ﺷﺎﺀ ﺍﻟﻠﻪ ﻫﻤﺮ ﻋﻠﻴﻬﺎ ﺩﻟﻮﻗﺘﻰ
ﺗﻮﺟﻬﺖ ﺍﻟﻰ ﺑﺎﺏ ﺍﻟﻤﻜﺘﺐ ﻟﺘﻬﻢ ﺑﺎﻟﺨﺮﻭﺝ ﻋﻨﺪﻣﺎ ﺍﺳﺘﻮﻗﻔﻬﺎ ﻗﺎﺋﻼً :
- ﺩﻛﺘﻮﺭﺓ " ﻳﺎﺳﻤﻴﻦ "
ﺍﻟﺘﻔﺘﺖ ﺍﻟﻴﻪ ﻗﺎﺋﻠﻪ :
- ﺃﻳﻮﺓ ﻳﺎ ﺩﻛﺘﻮﺭ
- ﻓﻰ ﻃﺎﻟﺐ ﻫﻴﻴﺠﻰ ﻳﺘﺪﺭﺏ ﻋﻨﺪﻧﺎ ﻫﻨﺎ .. ﻫﻮ ﺍﺑﻦ ﻟﻌﻤﻴﻞ ﻣﻬﻢ ﻣﻦ ﻋﻤﻼﺀ ﺍﻟﻤﺰﺭﻋﺔ .. ﺍﻟﺒﺸﻤﻬﻨﺪﺱ " ﻋﻤﺮ " ﻭﺻﺎﻧﻲ ﻋﻠﻴﻪ .. ﻫﻮ ﻃﺎﻟﺐ ﻓﻰ ﺍﻟﺒﻜﺎﻟﻮﺭﻳﻮﺱ
ﻛﺎﻧﺖ " ﻳﺎﺳﻤﻴﻦ " ﺗﺴﺘﻤﻊ ﺍﻟﻴﻪ ﻓﻰ ﺍﻫﺘﻤﺎﻡ .. ﻓﺄﻛﻤﻞ ﻗﺎﺋﻼ :
- ﺍﻧﺘﻰ ﺍﻟﻠﻰ ﻫﺘﺘﻮﻟﻰ ﺗﺪﺭﻳﺒﻪ
ﻗﺎﻟﺖ ﺑﺪﻫﺸﺔ :
- ﺃﻧﺎ ﻳﺎ ﺩﻛﺘﻮﺭ
- ﺍﻳﻮﺓ ﺍﻧﺘﻰ
ﻗﺎﻟﺖ ﺑﺈﺳﺘﻐﺮﺍﺏ :
- ﺑﺲ ﻳﺎ ﺩﻛﺘﻮﺭ ﺃﻧﺎ ﻧﻔﺴﻲ ﻟﺴﻪ ﺑﺘﺪﺭﺏ
- ﻭﻋﺸﺎﻥ ﻛﺪﺓ ﻋﺎﻳﺰﻙ ﺗﺪﺭﺑﻴﻪ .. ﺷﻮﻓﻰ ﻳﺎ ﺩﻛﺘﻮﺭﺓ .. ﺃﺣﺴﻦ ﻃﺮﻳﻘﺔ ﻟﺘﺜﺒﻴﺖ ﺍﻟﻤﻌﻠﻮﻣﺔ ﻻ ﺑﻜﺘﺎﺑﺘﻬﺎ ﻭﻻ ﺑﺤﻔﻈﻬﺎ .. ﺑﻤﻤﺎﺭﺳﺘﻬﺎ .. ﻛﻮﻥ ﺍﻥ ﻳﺒﻘﻰ ﻓﻰ ﻃﺎﻟﺐ ﻋﻨﺪﻙ ﻭﺍﻧﺘﻰ ﺑﺘﺸﺮﺣﻴﻠﻪ ﻛﻞ ﺍﻟﻤﻌﻠﻮﻣﺎﺕ ﺍﻟﻠﻰ ﻋﺎﺭﻓﺎﻫﺎ ﻋﻦ ﺍﻟﺤﺎﻟﺔ ﺍﻟﻠﻲ ﺃﺩﺍﻣﻚ ﺩﻩ ﻳﺜﺒﺖ ﺍﻟﻤﻌﻠﻮﻣﺔ ﺃﻛﺘﺮ .. ﻭﻣﺶ ﺑﺲ ﻛﺪﻩ ﺩﻩ ﺑﻴﺪﻳﻜﻰ ﺛﻘﻪ ﻓﻰ ﻧﻔﺴﻚ ﻛﻤﺎﻥ
ﺍﺑﺘﺴﻤﺖ ﻗﺎﺋﻠﻪ :
- ﻓﻌﻼ ﻳﺎ ﺩﻛﺘﻮﺭ .. ﺃﻳﺎﻡ ﺍﻟﻜﻠﻴﺔ ﻣﻜﻨﺘﺶ ﺑﻌﺮﻑ ﺃﺣﻔﻆ ﺃﺳﻤﺎﺀ ﺍﻟـ Nerve ﻭﺍﻟـ Muscles ﺇﻻ ﻭﺃﻧﺎ ﺑﺸﺮﺣﻬﺎ ﻟﺼﺤﺎﺑﻲ
ﺍﺑﺘﺴﻢ ﻟﻬﺎ ﻗﺎﺋﻼ :
- ﻭﻋﺸﺎﻥ ﻛﺪﻩ ﻋﺎﻳﺰﻙ ﺍﻧﺘﻰ ﺍﻟﻠﻰ ﺗﺪﺭﺑﻴﻪ
ﺍﺑﺘﺴﻤﺖ ﻟﻪ ﻗﺎﺋﻠﻪ :
- ﻣﺘﺸﻜﺮﺓ ﻋﻠﻰ ﺍﻟﺜﻘﻪ ﺩﻯ ﻳﺎ ﺩﻛﺘﻮﺭ .. ﺑﻌﺪ ﺍﺫﻧﻚ
- ﺍﺗﻔﻀﻠﻰ
ﻛﺎﻧﺖ " ﻳﺎﺳﻤﻴﻦ " ﺗﻘﻮﻡ ﺑﻌﻤﻠﻬﺎ ﻋﻨﺪﻣﺎ ﺃﺗﺎﻫﺎ ﺍﺗﺼﺎﻝ ﻣﻦ " ﺳﻤﺎﺡ .. " ﺃﺧﺒﺮﺗﻬﺎ ﺻﺪﻳﻘﺘﻬﺎ ﺑﻔﻜﺮﺓ " ﺃﻳﻤﻦ .. " ﺭﺣﺒﺖ " ﻳﺎﺳﻤﻴﻦ " ﺑﺎﻟﻔﻜﺮﺓ ﻷﻧﻬﺎ ﻟﻢ ﺗﻜﻦ ﻟﺘﺤﺐ ﺗﺮﻙ ﻭﺍﻟﺪﻫﺎ ﻓﻰ ﺍﻟﻤﺰﺭﻋﺔ ﺑﻤﻔﺮﺩﻩ .. ﺍﺗﻔﻘﺎ ﻋﻠﻰ ﺍﻟﺴﻔﺮ ﺑﻌﺪ ﺻﻼﺓ ﺍﻟﻔﺠﺮ ﻳﻮﻡ ﺍﻟﺠﻤﻌﺔ ﺍﻥ ﺷﺎﺀ ﺍﻟﻠﻪ .. ﻓﻰ ﻓﺘﺮﺓ ﺍﻟﻐﺪﺍﺀ ﺃﺗﺖ " ﺷﻴﻤﺎﺀ " ﻟﺘﺠﻠﺲ ﻣﻊ " ﻳﺎﺳﻤﻴﻦ " ﻋﻠﻰ ﺍﻟﻄﺎﻭﻟﺔ .. ﺍﺳﺘﻘﺒﻠﺘﻬﺎ " ﻳﺎﺳﻤﻴﻦ " ﺑﺎﻹﺑﺘﺴﺎﻣﻪ .. ﻗﺎﻟﺖ " ﺷﻴﻤﺎﺀ " :
- ﺍﺯﻳﻚ ﻳﺎ " ﺳﻤﺴﻢ " ﺃﺧﺒﺎﺭﻙ ﺍﻳﻪ
- ﺗﻤﺎﻡ ﻳﺎ " ﺷﻴﻤﺎﺀ " ﺍﻟﺤﻤﺪ ﻟﻠﻪ
- ﻓﻴﻨﻚ ﺑﻘﺎﻟﻚ ﻛﺎﻡ ﻳﻮﻡ ﻣﺶ ﺑﺸﻮﻓﻚ ﻓﻰ ﻓﺘﺮﺓ ﺍﻟﻐﺪﺍ
- ﺃﻫﺎﺍ ﺍﻟﺸﻐﻞ ﻛﺘﻴﺮ ﺃﻭﻯ ﺍﻟﻴﻮﻣﻴﻦ ﺩﻭﻝ ﻓﺒﺎﻛﻞ ﺃﻯ ﺣﺎﺟﻪ ﻭﺃﻧﺎ ﺑﺸﺘﻐﻞ
- ﻫﺘﻘﻮﻟﻴﻠﻰ .. ﺩﻛﺘﻮﺭ " ﺣﺴﻦ " ﻣﺒﻴﺮﺣﻤﺶ ﻧﻔﺴﻪ ﺃﺑﺪﺍً ﻭﻻ ﺑﻴﺮﺣﻢ ﺍﻟﻠﻰ ﻣﻌﺎﻩ
ﺩﺍﻓﻌﺖ " ﻳﺎﺳﻤﻴﻦ " ﻋﻨﻪ ﻗﺎﺋﻠﻪ :
- ﺩﻩ ﻷﻧﻪ ﻋﻨﺪﻩ ﺿﻤﻴﺮ ﻓﻰ ﺍﻟﺸﻐﻞ .. ﻭﻓﻌﻼ ﺑﺴﺘﻔﺎﺩ ﻣﻨﻪ ﺟﺪﺍً
ﺍﻧﺘﻬﺖ ﺍﻟﻔﺘﺎﺗﺎﻥ ﺍﻟﺘﻬﺎﻡ ﻃﻌﺎﻣﻬﻤﺎ ﻭﺗﻮﺟﻬﺘﺎ ﺍﻟﻰ ﺍﻟﺨﺎﺭﺝ .. ﻋﻨﺪﻫﺎ ﻗﺎﻟﺖ " ﺷﻴﻤﺎﺀ " ﻟـ " ﻳﺎﺳﻤﻴﻦ : "
- ﻭﺃﻧﺎ ﺃﻗﻮﻝ ﻣﺠﺘﺶ ﺗﺘﻐﺪﻯ ﻟﻴﻪ ﻣﺶ ﻋﻮﺍﻳﺪﻫﺎ ﺃﺗﺎﺭﻳﻬﺎ ﻭﺍﻗﻔﻪ ﻣﻊ ﺍﻟﺪﻭﻥ ﺟﻮﺍﻥ
ﻧﻈﺮﺕ " ﻳﺎﺳﻤﻴﻦ " ﺍﻟﻰ ﺣﻴﺚ ﺗﺸﻴﺮ " ﺷﻴﻤﺎﺀ " .. ﻟﺘﺠﺪ " ﻣﻬﺎ " ﻭﺍﻗﻔﻪ ﺗﺘﺤﺪﺙ ﺍﻟﻰ " ﻋﻤﺮ .. " ﻭﻋﻠﻰ ﻭﺟﻬﻬﺎ ﺍﺑﺘﺴﺎﻣﻪ ﻛﺒﻴﺮﺓ ﻭﺗﻨﻈﺮ ﻓﻰ ﻋﻴﻨﻴﻪ ﺑﺠﺮﺃﺓ .. ﺣﺎﻧﺖ ﻣﻦ " ﻋﻤﺮ " ﺍﻟﺘﻔﺎﺗﻪ ﺍﺗﺠﺎﻩ " ﻳﺎﺳﻤﻴﻦ " ﻓﺘﻈﺎﻫﺮﺕ " ﻳﺎﺳﻤﻴﻦ " ﺑﺎﻟﻨﻈﺮ ﺍﻟﻰ ﺷﺊ ﺁﺧﺮ .. ﺛﻢ ﺍﻟﺘﻔﺘﺖ ﺍﻟﻰ " ﺷﻴﻤﺎﺀ " ﻗﺎﺋﻠﻪ :
- ﻫﺮﻭﺡ ﺃﻛﻤﻞ ﺷﻐﻠﻰ
ﺍﻧﺼﺮﻓﺖ ﺍﻟﻰ ﻋﻤﻠﻬﺎ ﻭﻫﻰ ﺗﺘﺴﺎﺀﻝ ﻓﻰ ﻧﻔﺴﻬﺎ ﻋﻦ ﻃﺒﻴﻌﺔ ﺍﻟﻌﻼﻗﺔ ﺑﻴﻦ " ﻋﻤﺮ " ﻭ " ﻣﻬﺎ "
ﺍﺳﺘﻮﻗﻒ " ﻋﻤﺮ " ﺃﺛﻨﺎﺀ ﺍﻧﺼﺮﺍﻓﻪ ﺃﺣﺪ ﺍﻟﻌﻤﺎﻝ ﻗﺎﺋﻼ :
- ﻳﺎ ﺑﺎﺷﻤﻬﻨﺪﺱ " ﻋﻤﺮ " ﺧﻼﺹ ﻟﻘﻴﻨﺎ ﻏﻔﻴﺮ ﻛﻮﻳﺲ ﻭﺍﺑﻦ ﺣﻼﻝ ﻭﺳﺎﻛﻦ ﻓﻰ ﺍﻟﺒﻠﺪ ﺩﻯ
- ﺳﺄﻟﺘﻮﺍ ﻋﻨﻪ ﻛﻮﻳﺲ
- ﺃﻳﻮﺓ ﻭﺍﺩ ﻏﻠﺒﺎﻥ ﻣﻘﻄﻮﻉ ﻣﻦ ﺷﺠﺮﻩ ﻭﺑﻴﺠﺮﻯ ﻋﻠﻰ ﺃﻛﻞ ﻋﻴﺸﻪ
- ﻃﻴﺐ ﺗﻤﺎﻡ ﺧﻠﻴﻪ ﻳﻴﺠﻲ ﺑﻜﺮﺓ ﻟﺮﺋﻴﺲ ﺍﻟﻌﻤﺎﻝ ﻋﺸﺎﻥ ﻳﺒﺪﺃ ﺷﻐﻞ ﻣﻦ ﺑﻜﺮﺓ ﺍﻥ ﺷﺎﺀ ﺍﻟﻠﻪ
ﺗﻨﺤﻨﺢ ﺍﻟﺮﺟﻞ ﻗﻠﻴﻼ ﻭﺑﺪﺍ ﻋﻠﻴﻪ ﺍﻟﺘﺮﺩﺩ ﻓﺴﺄﻟﻪ " ﻋﻤﺮ " :
- ﺧﻴﺮ ﻓﻰ ﺣﺎﺟﻪ ؟
- ﻳﻌﻨﻲ ﻳﺎ ﺑﺸﻤﻬﻨﺪﺱ " ﻋﻤﺮ " ﻣﺘﺎﺧﺬﻧﻴﺶ ﻓﻰ ﺍﻟﻜﻼﻡ ﻳﻌﻨﻲ .. ﺑﺲ ﻳﻌﻨﻲ ﻫﻮ ﻓﻴﻦ " ﻋﻮﻳﺲ " ﻭﺍﻟﺠﻤﺎﻋﻪ ﺑﺘﻮﻋﻪ ؟
ﻗﺎﻝ " ﻋﻤﺮ " ﺑﺒﺮﻭﺩ :
- ﻣﺸﻰ
- ﺃﻳﻮﺓ ﻳﻌﻨﻲ ﻣﺸﻰ ﻓﺠﺄﺓ ﻛﺪﺓ ﻭﻣﻦ ﻳﻮﻡ ﻭﻟﻴﻠﺔ .. ﺩﻩ ﺣﺘﻰ ﻫﺪﻭﻣﻪ ﻭﻫﺪﻭﻡ ﺟﻤﺎﻋﺘﻪ ﻟﺴﻪ ﻓﻰ ﺍﻷﻭﺿﺔ .. ﻭﻣﻘﺎﻟﺶ ﻟﺠﻨﺲ ﻣﺨﻠﻮﻕ ﺍﻧﻪ ﻫﻴﺴﻴﺐ ﺍﻟﺸﻐﻞ
ﻗﺎﻝ " ﻋﻤﺮ " ﺑﻨﻔﺎﺫ ﺻﺒﺮ :
- ﺩﻩ ﺷﺊ ﻣﻴﺨﺼﻨﻴﺶ .. ﻳﻼ ﻋﻠﻰ ﺷﻐﻠﻚ
**********************
ﻓﻰ ﺻﺒﺎﺡ ﻳﻮﻡ ﺍﻟﺠﻤﻌﺔ ﻭﺑﻌﺪ ﺻﻼﺓ ﺍﻟﻔﺠﺮ ﺍﺳﺘﻌﺪﺕ " ﻳﺎﺳﻤﻴﻦ " ﻭ " ﺭﻳﻬﺎﻡ " ﻭﻭﺍﻟﺪﻫﻤﺎ .. ﺍﺗﺼﻠﺖ " ﺳﻤﺎﺡ " ﻟﻴﺨﺒﺮﻫﺎ ﺃﻧﻬﺎ ﺗﻨﺘﻈﺮﻫﻢ ﻣﻊ " ﺃﻳﻤﻦ " ﺃﻣﺎﻡ ﺑﻮﺍﺑﺔ ﺍﻟﻤﺰﺭﻋﺔ .. ﻛﺎﻧﺖ " ﻳﺎﺳﻤﻴﻦ " ﻓﺮﺣﻪ ﻟﻠﻐﺎﻳﺔ ﻭﺃﻋﺪﺕ ﺍﻟﻜﺜﻴﺮ ﻣﻦ ﺍﻟﺴﻨﺪﻭﺗﺸﺎﺕ ﻭﺍﻟﻌﺼﻴﺮ .. ﻭ " ﺭﻳﻬﺎﻡ " ﺃﻳﻀﺎً ﻛﺎﻧﺖ ﻣﺘﻠﻬﻔﺔ ﻋﻠﻰ ﺗﻠﻚ ﺍﻟﻨﺰﻫﻪ .. ﺳﺒﻘﻬﻤﺎ ﻭﺍﻟﺪﻫﻤﺎ .. ﻭﺣﻤﻠﺖ ﺍﻟﻔﺘﺎﺗﺎﻥ ﺣﻘﻴﺒﺔ ﺍﻟﻄﻌﺎﻡ ﻭﺃﺳﺮﻋﺎ ﺍﻟﺨﻄﻰ .. ﻋﻨﺪﻫﺎ ﻗﺎﻟﺖ " ﺭﻳﻬﺎﻡ " ﻓﺠﺄﺓ :
- ﺍﻳﻪ ﺩﻩ ﻫﻮ ﺍﻟﻤﺰ ﺟﺎﻯ ﻫﻮ ﻛﻤﺎﻥ ﻭﻻ ﺍﻳﻪ
ﻧﻈﺮﺕ " ﻳﺎﺳﻤﻴﻦ " ﺍﻟﻰ ﺣﻴﺚ ﺗﻨﻈﺮ ﺃﺧﺘﻬﺎ ﻟﺘﺠﺪ " ﻋﻤﺮ " ﻭﻗﺪ ﺃﻭﻗﻒ ﺳﻴﺎﺭﺗﻪ ﺧﻠﻒ ﺳﻴﺎﺭﺓ " ﺃﻳﻤﻦ .. " ﺧﻔﻖ ﻗﻠﺒﻬﺎ ﺑﺸﺪﺓ ﻭﻗﺎﻟﺖ ﻟـ " ﺭﻳﻬﺎﻡ " :
- ﺃﻛﻴﺪ ﻷ .. ﺍﻳﻪ ﺍﻟﻠﻰ ﻫﻴﺠﻴﺒﻪ ﻣﻌﺎﻧﺎ
- ﻷ ﺃﻧﺎ ﺣﺎﺳﻪ ﺍﻧﻪ ﺟﺎﻯ ﻣﻌﺎﻧﺎ
ﻋﻨﺪﻣﺎ ﻭﺻﻠﺖ ﺍﻟﻔﺘﺎﺗﺎﻥ ﻧﺰﻟﺖ " ﺳﻤﺎﺡ " ﻟﺘﺮﺣﺐ ﺑﻬﻤﺎ .. ﻭﺑﻌﺪ ﺗﺒﺎﺩﻝ ﻋﺒﺎﺭﺍﺕ ﺍﻟﻤﺠﺎﻣﻠﺔ .. ﺍﻧﻄﻠﻘﺖ ﺳﻴﺎﺭﺓ " ﺃﻳﻤﻦ " ﻭ " ﺳﻤﺎﺡ " ﺗﺠﻠﺲ ﺑﺠﻮﺍﺭﻩ .. ﺃﻣﺎ " ﻳﺎﺳﻤﻴﻦ " ﻭ " ﺭﻳﻬﺎﻡ " ﻭﻭﺍﻟﺪﻫﻤﺎ ﻳﺠﻠﺴﻮﻥ ﻓﻰ ﺍﻟﺨﻠﻒ .. ﺑﻌﺪ ﻓﺘﺮﺓ ﺣﺎﻧﺖ ﻣﻦ " ﺭﻳﻬﺎﻡ " ﺍﻟﺘﻔﺎﺗﻪ ﻟﻠﺨﻠﻒ ﺛﻢ ﻣﺎﻟﺖ ﻋﻠﻰ ﺃﺫﻥ " ﻳﺎﺳﻤﻴﻦ " ﻗﺎﺋﻠﻪ :
- ﻣﺶ ﻗﻮﻟﺘﻠﻚ ﺍﻟﻤﺰ ﺟﺎﻯ ﻣﻌﺎﻧﺎ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻓﺄﺷﺎﺭﺕ " ﺭﻳﻬﺎﻡ " ﺍﻟﻰ ﺍﻟﺨﻠﻒ .. ﺍﻟﺘﻔﺘﺖ " ﻳﺎﺳﻤﻴﻦ " ﻟﺘﻨﻈﺮ ﻋﺒﺮ ﺍﻟﺰﺟﺎﺝ ﺍﻟﺨﻠﻔﻰ ﻟﻠﺴﻴﺎﺭﺓ ﻓﺘﻼﻗﺖ ﻧﻈﺮﺍﺗﻬﺎ ﻣﻊ ﻧﻈﺮﺍﺕ " ﻋﻤﺮ " ﻓﺄﺳﺮﻋﺖ ﺑﺈﻋﺎﺩﺓ ﺭﺃﺳﻬﺎ ﺍﻟﻰ ﺍﻷﻣﺎﻡ .. ﻭﻗﻠﺒﻬﺎ ﻳﺨﻔﻖ ﺑﺸﺪﺓ .. ﻭﻫﻰ ﺗﺘﺴﺎﺀﻝ ﻟﻤﺎﺫﺍ ﻟﻢ ﺗﺨﺒﺮﻫﺎ " ﺳﻤﺎﺡ " ﺑﻤﺮﺍﻓﻘﺔ " ﻋﻤﺮ " ﻟﻬﻢ .. ﻭﺻﻠﻮﺍ ﺟﻤﻴﻌﺎً ﺍﻟﻰ ﺍﻟﺸﻂ .. ﺍﻟﺘﻬﻰ ﺍﻟﺮﺟﺎﻝ ﺍﻟﺜﻼﺛﺔ ﻣﻌﺎً ﻓﻰ ﺍﻟﻤﺰﺍﺡ ﻭﺍﻟﻀﺤﻚ ﻭﻟﻌﺐ ﺍﻟﺪﻭﻣﻴﻨﻮ .. ﺃﻣﺎ ﺍﻟﻔﺘﻴﺎﺕ ﺍﻟﺜﻼﺛﺔ ﻓﺄﺧﺬﻥ ﻳﺘﻤﺸﻴﻦ ﻋﻠﻰ ﺍﻟﺸﺎﻃﻰ ﻭﻳﺴﺘﻌﺪﻥ ﺫﻛﺮﻳﺎﺕ ﺍﻟﻄﻔﻮﻟﻪ ﻭﺍﻟﺠﺎﻣﻌﺔ .. ﻛﺎﻧﺖ " ﻳﺎﺳﻤﻴﻦ " ﻓﺮﺣﻪ ﻟﻠﻐﺎﻳﺔ .. ﻭﺗﺸﻌﺮ ﺑﺄﻧﻬﺎ ﺧﻔﻴﻔﻪ ﻛﺎﻟﺮﻳﺸﻪ .. ﻛﺎﻧﺖ ﺗﻨﻈﺮ ﺍﻟﻰ ﺍﻟﺒﺤﺮ ﻭﺗﻤﻠﻰ ﻧﻈﺮﻫﺎ ﺑﺠﻤﺎﻝ ﺳﺤﺮﻩ ﻭﺭﻭﻋﺘﻪ .. ﻓﻰ ﺍﻟﻐﺪﺍﺀ ﺗﻨﺎﻭﻝ ﺍﻟﺠﻤﻴﻊ ﺍﻟﺴﻨﺪﻭﺗﺸﺎﺕ ﺍﻟﺘﻰ ﺃﻋﺪﺗﻬﺎ " ﻳﺎﺳﻤﻴﻦ " ﻭ " ﺳﻤﺎﺡ " .. ﻛﺎﻧﺖ " ﺳﻤﺎﺡ " ﻣﻨﺪﻣﺠﺔ ﻓﻰ ﺍﻟﺤﺪﻳﺚ ﻣﻊ " ﺭﻳﻬﺎﻡ " ﻓﺘﺮﻛﺘﻬﻤﺎ " ﻳﺎﺳﻤﻴﻦ " ﻭﺗﻤﺸﺖ ﻋﻠﻰ ﺍﻟﺸﺎﻃﺊ ﺑﻼ ﻫﺪﻑ .. ﺭﺁﻫﺎ " ﻋﻤﺮ " ﻭﻫﻰ ﺗﻨﺤﻨﻰ ﻟﺘﻠﺘﻘﻂ ﺷﺊ ﻣﻦ ﺍﻷﺭﺽ ﺛﻢ ﺗﺘﺤﺴﺴﻪ ﺑﻴﺪﻫﺎ ﻭﺗﻨﺤﻨﻰ ﻟﺘﻠﺘﻘﻂ ﺷﻴﺌﺎً ﺁﺧﺮ .. ﻓﻰ ﻧﻬﺎﻳﺔ ﺍﻟﻴﻮﻡ ﻛﺎﻥ ﺍﻟﺠﻤﻴﻊ ﻓﺮﺣﺎً ﻭﺳﻌﻴﺪﺍً ﻭﺍﻧﺪﻣﺞ " ﻋﺒﺪ ﺍﻟﺤﻤﻴﺪ " ﻣﻊ ﺍﻟﺸﺎﺑﻴﻦ ﺟﺪﺍ ﻭﺃﺣﺒﺎ ﺻﺤﺒﺘﻪ ﺃﺧﺬ ﻳﻘﺺ ﻋﻠﻴﻬﻢ ﺫﻛﺮﻳﺎﺗﻪ ﺍﻟﻰ ﻳﺨﺘﺰﻧﻬﺎ ﻓﻰ ﺯﻭﺍﻳﺎ ﻋﻘﻠﻪ .. ﻛﺎﻧﻮﺍ ﻳﺴﺘﻤﻌﻮﻥ ﻟﻪ ﻭﺍﻻﺑﺘﺴﺎﻧﻪ ﺗﻌﻠﻮ ﺷﻔﺘﻴﻬﻤﺎ .. ﻭﺻﻠﺖ " ﻳﺎﺳﻤﻴﻦ " ﻭ " ﺭﻳﻬﺎﻡ " ﺍﻟﻰ ﺳﻴﺎﺭﺓ " ﺃﻳﻤﻦ " ﻭﻭﻗﻔﻮﺍ ﺑﺠﻮﺍﺭﻫﺎ .. ﺃﻗﺒﻞ " ﻋﻤﺮ " ﻭﻭﻗﻒ ﻋﻠﻰ ﻣﻘﺮﺑﻪ ﻣﻨﻬﻤﺎ ﻓﻰ ﺍﻧﺘﻈﺎﺭ ﺍﻟﺒﺎﻗﻴﻴﻦ .. ﺍﻟﺘﻔﺖ " ﻋﻤﺮ " ﺍﻟﻰ " ﻳﺎﺳﻤﻴﻦ " ﻓﻮﺟﺪﻫﺎ ﺗﻤﺴﻚ ﺷﺊ ﺑﻴﺪﻫﺎ ﻭﺗﻌﺒﺚ ﺑﻪ .. ﻓﻨﻈﺮ ﺍﻟﻰ ﻣﺎ ﺗﺤﻤﻠﻪ ﻗﺎﺋﻼ :
- ﺍﻳﻪ ﺍﻟﻠﻰ ﻓﻰ ﺍﻳﺪﻙ ﺩﻩ ؟
ﺭﻓﻌﺖ " ﻳﺎﺳﻤﻴﻦ " ﺭﺃﺳﻬﺎ ﺗﻨﻈﺮ ﺍﻟﻴﻪ ﻭﻗﺪ ﺃﺩﻫﺸﻬﺎ ﺳﺆﺍﻟﻪ .. ﻇﻠﺖ ﺻﺎﻣﺘﻪ ﻟﻠﺤﻈﺎﺕ ﺛﻢ ﻗﺎﻟﺖ :
- ﺃﺣﺠﺎﺭ ﺻﻐﻴﺮﺓ
ﺍﺑﺘﺴﻢ ﺍﺑﺘﺴﺎﻣﻪ ﺟﺬﺍﺑﻪ ﻗﺎﺋﻼً :
- ﺍﻳﻮﺓ ﺃﻧﺎ ﻋﺎﺭﻑ .. ﺑﺲ ﺑﺘﻌﻤﻠﻰ ﺑﻴﻬﻢ ﺍﻳﻪ
ﺍﺣﺘﺎﺭﺕ " ﻳﺎﺳﻤﻴﻦ " ﻓﻴﻤﺎ ﺗﻘﻮﻝ .. ﺳﺎﺩ ﺍﻟﺼﻤﺖ ﺑﺮﻫﻪ ﺛﻢ ﻗﺎﻟﺖ :
- ﺑﺤﺐ ﺃﺟﻤﻌﻬﻢ ﻣﻦ ﻋﻠﻰ ﺍﻟﺸﻂ
ﺍﺗﺴﻌﺖ ﺍﺑﺘﺴﺎﻣﺔ " ﻋﻤﺮ " ﻭﻟﻤﻌﺖ ﻋﻴﻨﺎﻩ ﻗﺎﺋﻼ :
- ﺃﺧﻴﺮﺍ ﻟﻘﻴﺖ ﺣﺪ ﻳﺸﺎﺭﻛﻨﻰ ﻫﻮﺍﻳﺘﻲ ﺍﻟﻐﺮﻳﺒﺔ
ﺗﺼﺎﻋﺪﺕ ﺣﻤﺮﺓ ﺍﻟﺨﺠﻞ ﻋﻠﻰ ﻭﺟﻨﺘﻴﻬﺎ ﺑﺴﺒﺐ ﻧﻈﺮﺗﻪ ﺍﻟﻌﻤﻴﻘﺔ ﺍﻟﺘﻰ ﺗﺮﺑﻜﻬﺎ ﻭﺍﺑﺘﺴﺎﻣﺘﻪ ﺍﻟﺘﻰ ﺗﺨﻄﻒ ﺍﻷﻟﺒﺎﺏ .. ﺃﻛﻤﻞ ﺑﻨﻔﺲ ﺍﻻﺑﺘﺴﺎﻣﻪ :
- ﺃﻧﺎ ﻛﻤﺎﻥ ﺑﺤﺐ ﺃﺟﻤﻊ ﺍﻟﺼﺨﻮﺭ ﺍﻟﺼﻐﻴﺮﺓ ﻣﻦ ﻋﻠﻰ ﺍﻟﺸﻂ .. ﺑﺲ ﻣﺶ ﺃﻯ ﺻﺨﻮﺭ .. ﺑﺤﺘﻔﻆ ﺑﺎﻟﻠﻰ ﺗﻠﻔﺖ ﺍﻧﺘﺒﺎﻫﻰ ﺑﺲ
ﻟﻢ ﺗﺒﺎﺩﻟﻪ " ﻳﺎﺳﻤﻴﻦ " ﺍﻹﺑﺘﺴﺎﻡ .. ﺑﻞ ﺗﺠﺎﻫﻠﺖ ﺗﻤﺎﻣﺎ ﻛﻼﻣﻪ ﻭﺍﻟﻨﻈﺮ ﺍﻟﻴﻪ .. ﺣﻀﺮ ﺍﻟﺠﻤﻴﻊ ﻭﺭﻛﺒﻮﺍ ﻭﺍﻧﻄﻠﻮﺍ ﻓﻰ ﻃﺮﻳﻖ ﺍﻟﻌﻮﺩﺓ
ﺗﻮﺟﻬﺖ " ﺭﻳﻬﺎﻡ " ﺍﻟﻰ ﻓﺮﺍﺷﻬﺎ .. ﻋﻨﺪﻣﺎ ﻛﺎﻧﺖ " ﻳﺎﺳﻤﻴﻦ " ﺗﻘﻮﻡ ﺑﻄﻲ ﻣﻼﺑﺴﻬﺎ ﻟﺘﻀﻌﻬﺎ ﻓﻰ ﺍﻟﺪﻭﻻﺏ .. ﻧﻈﺮﺕ ﺍﻟﻴﻬﺎ " ﺭﻳﻬﺎﻡ " ﻭﻗﺎﻟﺖ ﺑﺨﺒﺚ ﻭﻫﻰ ﺗﻌﺒﺚ ﺑﺸﻌﺮﻫﺎ :
- ( ﺃﺧﻴﺮﺍ ﻟﻘﻴﺖ ﺣﺪ ﻳﺸﺎﺭﻛﻨﻰ ﻫﻮﺍﻳﺘﻲ ﺍﻟﻐﺮﻳﺒﺔ )
ﺍﻟﺘﻔﺘﺖ ﺍﻟﻴﻬﺎ " ﻳﺎﺳﻤﻴﻦ " ﻣﺴﺘﻔﻬﻤﺔ .. ﻗﺎﻟﺖ ﻟﻬﺎ :
- ﺍﻳﻪ ؟ ﺑﺘﻘﻮﻟﻰ ﺍﻳﻪ ؟
ﻗﺎﻟﺖ ﻟﻬﺎ " ﺭﻳﻬﺎﻡ " :
- ﻣﻔﻴﺶ ﻫﻮ ﺣﺪ ﻛﻠﻤﻚ
ﺃﻛﻤﻠﺖ " ﺭﻳﻬﺎﻡ " ﺑﻨﻔﺲ ﺍﻟﺨﺒﺚ :
- ( ﺑﺤﺘﻔﻆ ﺑﺎﻟﻠﻰ ﺗﻠﻔﺖ ﺍﻧﺘﺒﺎﻫﻰ ﺑﺲ )
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻗﺎﺋﻠﻪ :
- ﺑﺘﻜﻠﻤﻰ ﻧﻔﺴﻚ .. ﺑﺮﺍﻓﻮ
ﻗﺎﻟﺖ " ﻳﺎﺳﻤﻴﻦ " ﺫﻟﻚ ﻭﺃﻃﻔﺄﺕ ﺍﻟﻨﻮﺭ ﻭﺗﻮﺩﻫﺖ ﺍﻟﻰ ﻓﺮﺍﺷﻬﺎ ﻭ ﺗﺪﺛﺮﺕ .. ﺣﺎﻭﻟﺖ ﺍﻟﺘﻔﻜﻴﺮ ﻓﻰ ﺃﺣﺪﺍﺙ ﺍﻟﻴﻮﻡ ﻟﻜﻦ ﺍﻟﺘﻌﺐ ﻛﺎﻥ ﻗﺪ ﺑﻠﻎ ﻣﻨﻬﺎ ﻣﺒﻠﻐﻪ ﻓﻐﻄﺖ ﻓﻰ ﺳﺒﺎﺕ ﻋﻤﻴﻖ
ﻓﻰ ﺍﻟﻴﻮﻡ ﺍﻟﺘﺎﻟﻰ ﺃﻧﻬﺖ " ﻳﺎﺳﻤﻴﻦ " ﻋﻤﻠﻬﺎ ﻭﺗﻮﺟﻬﺖ ﺍﻟﻰ ﺷﺠﺮﺗﻬﺎ .. ﻛﺎﻧﺖ ﺗﺤﺐ ﺍﻹﺧﺘﻼﺀ ﻭﺍﻟﺠﻠﻮﺱ ﻓﻰ ﻫﺬﻩ ﺍﻟﺒﻘﻌﺔ ﺍﻟﺘﻰ ﺗﻔﺼﻠﻬﺎ ﻋﻦ ﺍﻟﻌﺎﻟﻢ .. ﺷﺮﺩﺕ ﻗﻠﻴﻼ ﻓﻲ ﺭﺣﻠﺔ ﻳﻮﻡ ﺃﻣﺲ .. ﻭﻓﻰ ﻛﻠﻤﺎﺕ " ﻋﻤﺮ " ﻭﺟﺪﺕ ﺍﻹﺑﺘﺴﺎﻣﻪ ﺗﺘﺴﻠﻞ ﺑﺒﻂﺀ ﺍﻟﻰ ﺷﻔﺘﻴﻬﺎ .. ﺛﻢ ﻋﺎﺩﺕ ﻟﺘﺘﺬﻛﺮ ﺍﻟﻜﻼﻡ ﺍﻟﺬﻯ ﺳﻤﻌﺘﻪ ﻣﻦ " ﺷﻴﻤﺎﺀ " ﻋﻨﻪ .. ﻭﻋﻼﻗﺘﻪ ﺑـ " ﻣﻬﺎ " ﻭﻏﻴﺮ " ﻣﻬﺎ .. " ﺗﻨﻬﺪﺕ ﻭﺣﻮﻟﺖ ﺻﺮﻑ ﺗﻔﻜﻴﺮﻫﺎ ﻋﻨﻪ .. ﺳﻤﻌﺖ ﺻﻮﺕ ﻫﺎﺗﻔﻬﺎ .. ﻭﺟﺪﺕ ﺭﻗﻤﺎً ﻏﺮﻳﺒﺎً ﺭﺩﺕ ﻗﺎﺋﻠﻪ :
- ﺍﻟﺴﻼﻡ ﻋﻠﻴﻜﻢ
ﺃﺗﺎﻫﺎ ﺻﻮﺕ ﻳﻘﻮﻝ ﻓﻰ ﻗﺴﻮﺓ :
- ﻭﺍﻟﻠﻪ ﻟﻮ ﺭﻭﺣﺘﻰ ﻵﺧﺮ ﺑﻼﺩ ﺍﻟﻤﺴﻠﻤﻴﻦ ﻟﻬﻮﺻﻠﻚ ﻳﺎ " ﻳﺎﺳﻤﻴﻦ " ﻭﺳﺎﻋﺘﻬﺎ ﻣﺶ ﻫﻌﺘﻘﻚ ﺃﺑﺪﺍً
ﻗﻔﺰ ﻗﻠﺐ " ﻳﺎﺳﻤﻴﻦ " ﻣﻦ ﻣﻜﺎﻧﻪ .. ﻭﺷﻌﺮﺕ ﺑﺎﻟﺮﻋﺐ ﻟﻤﺠﺮﺩ ﺳﻤﺎﻋﻬﺎ ﻟﺼﻮﺕ " ﻣﺼﻄﻔﻰ " ﺃﻏﻠﻘﺖ ﻫﺎﺗﻔﻬﺎ ﺗﻤﺎﻣﺎ .. ﻭﻭﻗﻔﺖ ﺗﺘﻠﻔﺖ ﺣﻮﻟﻬﺎ ﻭﻫﻰ ﻻ ﺗﺪﺭﻯ ﻣﺎﺫﺍ ﺗﻔﻌﻞ .. ﻛﺎﻧﺖ ﺗﺨﺎﻑ ﻣﻨﻪ ﺧﻮﻓﺎً ﺷﺪﻳﺪﺍً .. ﺧﺸﺖ ﺃﻥ ﻳﻌﺮﻑ ﻃﺮﻳﻘﻬﺎ ﻭﻳﺤﺎﻭﻝ ﺧﻄﻔﻬﺎ ﻣﺮﺓ ﺃﺧﺮﻯ ﺃﻭ ﻳﻔﻌﻞ ﺑﻬﺎ ﻣﺎ ﻫﻮ ﺃﺳﻮﺃ .. ﻣﺸﺖ ﻣﺴﺮﻋﺔ ﻋﺎﺋﺪﺓ ﺍﻟﻰ ﻏﺮﻓﺘﻬﺎ .. ﻛﺎﻧﺖ ﻻ ﺗﺮﻯ ﺃﻣﺎﻣﻬﺎ .. ﺗﺸﻌﺮ ﺑﺘﻮﺗﺮ ﺑﺎﻟﻎ .. ﺍﺭﺗﻄﻤﺖ ﻓﻰ ﻃﺮﻳﻘﻬﺎ ﺑـ " ﻋﻤﺮ " ﺍﻟﺬﻯ ﻛﺎﻥ ﻣﺘﻮﺟﻬﺎ ﺍﻟﻰ ﺑﻴﺖ ﺍﻟﻤﺰﺭﻋﺔ .. ﻭﻗﻔﺖ ﺗﻨﻈﺮ ﺍﻟﻴﻪ ﻭﻫﻰ ﻻ ﺗﺮﺍﻩ .. ﻛﺎﻧﺖ ﻋﻼﻣﺎﺕ ﺍﻟﺮﻋﺐ ﺑﺎﺩﻳﻪ ﻋﻠﻰ ﻭﺟﻬﻬﺎ .. ﻧﻈﺮ ﺍﻟﻴﻬﺎ " ﻋﻤﺮ " ﻗﺎﺋﻼً ﺑﻠﻬﻔﻪ :
- ﺍﻳﻪ ﻣﺎﻟﻚ ﻓﻰ ﺍﻳﻪ ؟
ﺷﻌﺮﺕ ﺑﺄﻥ ﺍﻟﻜﻠﻤﺎﺕ ﺗﻬﺮﺏ ﻣﻨﻬﺎ ﺍﻧﺤﺪﺭﺕ ﺩﻣﻌﺔ ﺣﺎﺋﺮﺓ ﻣﻦ ﻋﻴﻨﻴﻬﺎ .. ﻭﺃﺧﺬﺕ ﺗﺘﻌﺎﻟﻰ ﺃﺻﻮﺍﺕ ﻗﻠﺒﻬﺎ ﻭﺗﺰﺩﺍﺩ ﺳﺮﻋﺔ ﺗﻨﻔﺴﻬﺎ .. ﻫﺘﻒ " ﻋﻤﺮ " ﺑﻠﻮﻋﻪ :
" - ﻳﺎﺳﻤﻴﻦ " ﻣﺎﻟﻚ ﺍﻳﻪ ﺍﻟﻠﻰ ﺣﺼﻞ
ﻧﻈﺮ ﺍﻟﻰ ﺍﻟﻄﺮﻳﻖ ﺍﻟﺬﻯ ﺃﺗﺖ ﻣﻨﻪ ﻟﻌﻠﻪ ﻳﺘﺒﻴﻦ ﺳﺒﺐ ﻓﺰﻋﻬﺎ .. ﺍﺳﺘﺠﻤﻌﺖ ﻗﻮﺍﻫﺎ ﻭﻗﺎﻟﺖ ﺑﺼﻮﺕ ﻣﺮﺗﺠﻒ ﻭﻫﻰ ﺗﻤﺪ ﻳﺪﻫﺎ ﺑﻬﺎﺗﻔﻬﺎ ﻗﺎﺋﻠﻪ :
" - ﻣﺼﻄﻔﻰ "
ﻧﻈﺮ ﺍﻟﻴﻬﺎ ﻗﺎﺋﻼ :
" - ﻣﺼﻄﻔﻰ " ﻣﻴﻦ .. ﻣﻴﻦ " ﻣﺼﻄﻔﻰ " ؟
- ﺭﺩﺩﺕ ﻗﺎﺋﻠﻪ :
" - ﻣﺼﻄﻔﻰ " ﻛﻠﻤﻨﻰ
ﺧﻤﻦ " ﻋﻤﺮ " ﺑﺄﻧﻬﺎ ﺗﻘﺼﺪ ﺯﻭﺟﻬﺎ .. ﻟﻢ ﺗﻘﻮﻯ ﺃﻋﺼﺎﺑﻬﺎ ﻋﻠﻰ ﺍﻟﺘﺤﻤﻞ ﻛﺎﻧﺖ ﺧﺎﺋﻔﺔ ﺑﺸﺪﺓ ﻭﺗﺮﺗﺠﻒ ﺃﺣﺎﻃﺖ ﻧﻔﺴﻬﺎ ﺑﺬﺭﺍﻋﻴﻬﺎ ﻭﻗﺎﻟﺖ ﻭﻋﻴﻨﻴﻬﺎ ﺗﺪﻭﺭﺍﻥ ﻓﻰ ﺍﻟﻤﻜﺎﻥ ﺑﺨﻮﻑ :
- ﺃﻧﺎ ﺧﺎﻳﻔﺔ ﺃﻭﻯ
ﻧﻈﺮ ﺍﻟﻴﻬﺎ " ﻋﻤﺮ " ﻭﻃﻤﺄﻧﻬﺎ ﻗﺎﺋﻼ :
- ﻣﺘﺨﻔﻴﺶ ﻣﺤﺪﺵ ﻳﻘﺪﺭ ﻳﺄﺫﻳﻜﻲ ﻃﻮﻝ ﻣﺎ ﺍﻧﺘﻰ ﻫﻨﺎ
ﻧﻈﺮﺕ ﺍﻟﻴﻪ ﻗﺎﺋﻠﻪ ﻭﻫﻰ ﺗﺒﻜﻰ :
- ﻗﺎﻟﻰ ﻫﻌﺮﻑ ﻃﺮﻳﻘﻚ ﻭﻣﺶ ﻫﻌﺘﻘﻚ
ﺷﻌﺮ " ﻋﻤﺮ " ﺑﺎﻟﻐﻀﺐ ﻟﺬﻟﻚ ﺍﻟﻤﻨﻌﺪﻡ ﺍﻟﺮﺟﻮﻟﻪ ﺍﻟﺬﻯ ﻳﻬﺪﺩ ﺍﻣﺮﺃﺓ ﻭﻳﺮﻋﺒﻬﺎ ﺑﻬﺬﺍ ﺍﻟﺸﻜﻞ .. ﻛﺎﻧﺖ ﺍﻟﻌﺒﺮﺍﺕ ﺗﻨﺰﻝ ﻣﻦ ﻋﻴﻨﻴﻬﺎ ﻓﻰ ﺻﻤﺖ .. ﺷﻌﺮ ﺑﺎﻷﻟﻢ ﻳﻐﺰﻭ ﻗﻠﺒﻪ ﻣﺪ ﻳﺪﻩ ﻭﺃﻣﺴﻚ ﺫﺭﺍﻋﻬﺎ ﺃﺭﺍﺩ ﺃﻥ ﻳﻄﻤﺌﻨﻬﺎ ﻭﻳﻮﻗﻒ ﺍﺭﺗﺠﺎﻓﻪ ﺟﺴﺪﻫﺎ .. ﺍﻧﺘﻔﻀﺖ " ﻳﺎﺳﻤﻴﻦ " ﻟﻠﻤﺴﺘﻪ ﻭﺃﺑﻌﺪﺕ ﻧﻔﺴﻬﺎ ﻋﻨﻪ .. ﻭﻗﻔﺖ ﺗﻨﻈﺮ ﺍﻟﻴﻪ ﺑﺪﻫﺸﺔ ﻣﻤﺰﻭﺟﺔ ﺑﺎﻟﻐﻀﺐ .. ﺃﺩﺭﻙ " ﻋﻤﺮ " ﺃﻧﻪ ﺃﻏﻀﺒﻬﺎ .. ﻓﺄﺳﺮﻉ ﻳﺸﺮﺡ ﻗﺎﺋﻼ :
- ﺃﻧﺎ ﻣﻘﺼﺪﺗﺶ ﺣﺎﺟﻪ ... ﻛﻨﺖ ﺑﺲ ﻋﺎﻳﺰ .......
ﻟﻢ ﺗﺪﻋﻪ ﻳﻜﻤﻞ ﻛﻼﻣﻪ ﻭﺍﻧﺼﺮﻓﺖ ﻋﺎﺋﺪﻩ ﺍﻟﻰ ﻏﺮﻓﺘﻬﺎ .. ﺷﻌﺮ " ﻋﻤﺮ " ﺑﺎﻟﻀﻴﻖ ﻷﻧﻪ ﺃﻏﻀﺒﻬﺎ .. ﺻﻌﺪﺕ " ﻳﺎﺳﻤﻴﻦ " ﺍﻟﻰ ﻏﺮﻓﺘﻬﺎ ﻭﻫﻰ ﺗﻔﻜﺮ ﻏﺎﺿﺒﺔ ﻛﻴﻒ ﻳﺠﺮﺅ ﻋﻠﻰ ﻟﻤﺴﻬﺎ ﺑﻬﺬﺍ ﺍﻟﺸﻜﻞ .. ﺃﻳﻈﻨﻬﺎ ﻓﺘﺎﺓ ﺳﻬﻠﻪ ﻛﻔﺘﻴﺎﺗﻪ ﺍﻟﻼﺗﻰ ﻳﻌﺮﻓﻬﻦ .. ﻭﺍﻟﻼﺗﻰ ﻳﺘﻬﺎﻓﺘﻦ ﻋﻠﻴﻪ ﻣﺤﺎﻭﻻﺕ ﺟﺬﺑﻪ ﻭﺍﺳﺘﻤﺎﻟﺘﻪ .. ﺃﻳﻈﻨﻬﺎ ﻭﺍﺣﺪﺓ ﻣﻨﻬﻦ .. ﺷﻌﺮﺕ ﺑﺎﻟﺤﻨﻖ ﻭﺍﻟﻀﻴﻖ ﻣﻦ ﻛﻠﻴﻬﻤﺎ " .. ﻋﻤﺮ " ﻭ " ﻣﺼﻄﻔﻰ "
*************************
ﻓﻰ ﺍﻟﻴﻮﻡ ﺍﻟﺘﺎﻟﻰ ﻛﺎﻧﺖ ﻭﺍﻗﻔﺔ ﺗﺘﻔﺤﺺ ﺍﺣﺪﻯ ﺍﻷﺑﻘﺎﺭ ﻋﻨﺪﻣﺎ ﻭﺟﺪﺕ ﺷﺎﺏ ﺗﺮﺍﻩ ﻷﻭﻝ ﻣﺮﺓ .. ﻛﺎﻥ ﺷﺎﺑﺎ ﻳﺎﻓﻌﺎً ﻳﺒﺪﻭ ﻭﻛﺄﻧﻪ ﺿﻞ ﻃﺮﻳﻘﻪ .. ﺧﻤﻨﺖ " ﻳﺎﺳﻤﻴﻦ " ﺑﺄﻥ ﻫﺬﺍ ﻫﻮ ﺗﻠﻤﻴﺬﻫﺎ ﺍﻟﺬﻯ ﺗﺤﺪﺙ ﺩﻛﺘﻮﺭ " ﺣﺴﻦ " ﻋﻨﻪ .. ﺍﻗﺘﺮﺏ ﻣﻨﻬﺎ ﺍﻟﺸﺒﺎﺏ ﻭﺍﺑﺘﺴﻢ ﻗﺎﺋﻼ :
- ﺍﻟﺴﻼﻡ ﻋﻠﻴﻜﻢ
ﺭﺩﺕ " ﻳﺎﺳﻤﻴﻦ " :
- ﻭﻋﻠﻴﻜﻢ ﺍﻟﺴﻼﻡ .. ﺃﻫﻼ ﺑﺤﻀﺮﺗﻚ ﺃﻧﺎ ﺩﻛﺘﻮﺭﺓ " ﻳﺎﺳﻤﻴﻦ "
ﻗﺎﻝ ﺍﻟﺸﺎﺏ :
- ﺃﻫﻼ ﺑﻴﻜﻲ ﺃﻧﺎ " ﻫﺎﻧﻰ "
ﺛﻢ ﺍﺳﺘﻄﺮﺩ ﻗﺎﺋﻼ :
- ﺃﻧﺎ " ﻫﺎﻧﻰ ﺷﺎﻛﺮ "
ﻗﺎﻝ ﺫﻟﻚ ﺛﻢ ﺍﻧﻔﺠﺮ ﺿﺎﺣﻜﺎً .. ﻧﻈﺮﺕ " ﻳﺎﺳﻤﻴﻦ " ﺍﻟﻴﻪ ﺑﺪﻫﺸﺔ ﺛﻢ ﻟﻢ ﺗﺘﻤﺎﻟﻚ ﻧﻔﺴﻬﺎ ﻓﻀﺤﻜﺖ ﺿﺤﻜﺔ ﺧﺎﻓﺘﻪ ﺣﺎﻭﻟﺖ ﻛﺘﻤﻬﺎ .. ﻟﻢ ﺗﻀﺤﻚ ﻟﻠﻔﻜﺎﻫﻪ ﻓﻰ ﺍﺳﻤﻪ .. ﺑﻞ ﺿﺤﻜﺖ ﻟﻄﺮﻳﻘﺔ ﺿﺤﻚ ﺍﻟﺸﺎﺏ ﻓﻘﺪ ﺃﺭﺟﻊ ﺭﺃﺳﻪ ﺍﻟﻰ ﺍﻟﻮﺭﺍﺀ ﻭﺿﺤﻚ ﺿﺤﻜﻪ ﺻﺎﺧﺒﻪ ﺑﻄﺮﻳﻘﺔ ﺃﺿﺤﻜﺘﻬﺎ .. ﻛﺎﻥ " ﻋﻤﺮ " ﻳﺴﻴﺮ ﻣﻊ ﺃﺣﺪ ﺍﻟﻌﻤﺎﻝ ﻳﻌﻄﻴﻪ ﺑﻌﺾ ﺍﻟﺘﻌﻠﻴﻤﺎﺕ .. ﻋﻨﺪﻣﺎ ﻟﻔﺖ ﺍﻧﺘﺒﺎﻫﻪ ﺻﻮﺕ ﺍﻟﻀﺤﻚ ﺍﻟﺼﺎﺧﺐ ﻓﺎﻟﺘﻔﺖ ﻟﻴﺠﺪ " ﻳﺎﺳﻤﻴﻦ " ﺗﻘﻒ ﻣﻊ " ﻫﺎﻧﻰ " ﺍﺑﻦ ﺍﻟﻌﻤﻴﻞ ﺍﻟﺬﻯ ﺃﺗﻰ ﺍﻟﻴﻪ ﻣﻨﺬ ﺃﻳﺎﻡ .. ﺭﺁﻯ ﺍﺑﺘﺴﺎﻣﺘﻬﺎ ﻭﺿﺤﻜﺘﻬﺎ ﺍﻟﺘﻰ ﺗﺤﺎﻭﻝ ﻛﺒﺤﻬﺎ .. ﺷﻌﺮ ﺑﺎﻟﺤﻨﻖ ﻓﺼﺮﻑ ﺍﻟﻌﺎﻣﻞ ﻭﺳﺎﺭ ﻧﺤﻮﻫﻤﺎ ... ﻓﻰ ﻫﺬﻩ ﺍﻷﺛﻨﺎﺀ ﻗﺎﻟﺖ " ﻳﺎﺳﻤﻴﻦ " ﻟـ " ﻫﺎﻧﻰ " :
- ﺍﺩﺧﻞ ﺍﺗﻌﺮﻑ ﻋﻠﻰ ﺍﻟﻤﻜﺎﻥ ﻋﻠﻰ ﻣﺎ ﺃﺭﺟﻊ
ﺗﺮﻛﺘﻪ ﻭﺍﻧﺼﺮﻓﺖ ﻟﺘﺠﺪ " ﻋﻤﺮ " ﻳﻌﺘﺮﺽ ﻃﺮﻳﻘﻬﺎ .. ﻧﻈﺮ " ﻋﻤﺮ " ﺍﻟﻰ ﺍﻟﻔﺘﻰ ﺍﻟﺬﻯ ﻳﺴﻴﺮ ﻟﻠﺪﺍﺧﻞ ﺛﻢ ﺃﻋﺎﺩ ﻧﻈﺮﻩ ﺍﻟﻰ " ﻳﺎﺳﻤﻴﻦ " ﻗﺎﺋﻼ ﺑﺒﺮﻭﺩ :
- ﻣﺶ ﻧﺸﻮﻑ ﺷﻐﻠﻨﺎ ﺃﺣﺴﻦ
ﻧﻈﺮﺕ " ﻳﺎﺳﻤﻴﻦ " ﺍﻟﻴﻪ ﺑﺤﻴﺮﻩ ﻗﺎﺋﻠﻪ :
- ﻣﺶ ﻓﺎﻫﻤﺔ ﻗﺼﺪ ﺣﻀﺮﺗﻚ ﺍﻳﻪ
ﻏﻴﺮ " ﻋﻤﺮ " ﺍﻟﻤﻮﺿﻮﻉ ﻗﺎﺋﻼ :
- ﺍﻟﺴﺖ ﺍﻟﻠﻰ ﻛﻠﻤﺘﻴﻨﻲ ﻋﻨﻬﺎ .. ﺃﺣﺐ ﺃﺑﺸﺮﻙ ﺍﻧﻬﺎ ﺭﺟﻌﺖ ﺍﻟﺸﻐﻞ ﺍﻟﻨﻬﺎﺭﺩﺓ
ﺳﻌﺪﺕ " ﻳﺎﺳﻤﻴﻦ " ﻛﺜﻴﺮﺍً ﻟﻬﺬﺍ ﺍﻟﺨﺒﺮ ﻓﻘﺪ ﻛﺎﻧﺖ ﺑﺎﻟﻔﻌﻞ ﺗﺸﻔﻖ ﻋﻠﻰ ﺗﻠﻚ ﺍﻟﺴﻴﺪﺓ ﻭﺃﻭﻻﺩﻫﺎ .. ﺭﺩﺩﺕ ﻗﺎﺋﻠﻪ :
- ﺍﻟﺤﻤﺪ ﻟﻠﻪ
ﺭﻓﻌﺖ ﻧﻈﺮﻫﺎ ﻟﺘﺠﺪ ﻧﻈﺮﺍﺕ " ﻋﻤﺮ " ﺍﻟﻤﺼﻮﺑﺔ ﺗﺠﺎﻫﻬﺎ .. ﻓﻘﺎﻟﺖ ﺑﺴﺮﻋﺔ :
- ﺑﻌﺪ ﺍﺫﻥ ﺣﻀﺮﺗﻚ
ﺛﻢ ﺗﺮﻛﺘﻪ ﻭﺍﻧﺼﺮﻓﺖ
