ﺟﻠﺲ " ﻋﻤﺮ " ﻓﻰ ﻣﻜﺘﺒﻪ ﻭﺍﺟﻤﺎً ﻳﻔﻜﺮ ﻓﻰ ﺍﻟﻌﺎﺻﻔﺔ ﺍﻟﺘﻰ ﺛﺎﺭﺕ ﻓﻰ ﻣﻨﺰﻟﻪ ﺍﻟﻠﻴﻠﺔ ﺍﻟﻤﺎﺿﻴﺔ .. ﻟﻢ ﻳﻜﻦ ﻟﺪﻳﻪ ﺃﺩﻧﻰ ﺍﺳﺘﻌﺪﺍﺩ ﻟﻠﺘﻨﺎﺯﻝ ﻋﻦ " ﻳﺎﺳﻤﻴﻦ " .. ﻟﻜﻨﻪ ﺃﻳﻀﺎً ﻳﺮﻳﺪ ﻣﻦ ﻋﺎﺋﻠﺘﻪ ﺃﻥ ﺗﺘﻘﺒﻞ ﺯﻭﺍﺟﻪ ﻣﻨﻬﺎ .. ﻭﺃﻥ ﻳﺒﺎﺭﻛﻮﻥ ﻫﺬﺍ ﺍﻟﺰﻭﺍﺝ .. ﻛﺎﻥ ﺷﺎﺭﺩﺍً .. ﻋﻨﺪﻣﺎ ﻃﺮﻕ " ﻛﺮﻡ " ﺍﻟﺒﺎﺏ ﻭﺩﺧﻞ ﻭﺟﻠﺲ ﺃﻣﺎﻡ " ﻋﻤﺮ ﻋﻠﻰ ﺍﻟﻤﻜﺘﺐ .. ﻧﻈﺮ ﺍﻟﻴﻪ ﻗﺎﺋﻼً :
- ﻣﺘﻀﺎﻳﻘﺶ ﻧﻔﺴﻚ .. ﺃﺻﻼً ﺃﻧﺎ ﻛﻨﺖ ﻣﺘﻮﻗﻊ ﺣﺎﺟﻪ ﺯﻯ ﻛﺪﻩ
ﺳﺄﻟﻪ " ﻋﻤﺮ " ﻗﺎﺋﻠﻪ :
- ﻟﻴﻪ ﺗﻮﻗﻌﺖ ﻛﺪﻩ ؟
- ﻳﻌﻨﻲ ﺃﻛﻴﺪ ﺃﻫﻠﻚ ﻋﺎﻳﺰﻳﻨﻠﻚ ﺑﻨﺖ ﻣﺘﻜﻨﺶ ﺍﺗﺠﻮﺯﺕ ﻗﺒﻞ ﻛﺪﺓ ﻭﻳﻜﻮﻥ ﻣﺴﺘﻮﺍﻛﻢ ﻣﺘﻘﺎﺭﺏ
ﺻﺎﺡ " ﻋﻤﺮ " ﺑﺤﺪﻩ :
- ﻣﺎ ﺃﻧﺎ ﻛﻨﺖ ﺧﺎﻃﺐ ﺍﻟﻠﻰ ﻣﺘﺠﻮﺯﺗﺶ ﻗﺒﻞ ﻛﺪﻩ .. ﻭﺍﻟﻠﻰ ﻛﺎﻧﺖ ﻣﻦ ﻧﻔﺲ ﻣﺴﺘﻮﺍﻳﺎ .. ﺧﺪﺕ ﻣﻨﻬﺎ ﺍﻳﻪ ﻏﻴﺮ ﻗﻠﺔ ﺍﻷﺩﺏ ﻭﺍﻟﺨﻴﺎﻧﺔ ﻭﺍﻟﻄﻤﻊ ﻭﺍﻹﺳﺘﻐﻼﻝ
ﻫﺪﺀﻩ " ﻛﺮﻡ " ﻗﺎﺋﻼً :
" - ﻋﻤﺮ " ﺃﻧﺎ ﻓﺎﻫﻢ ﻛﻞ ﺍﻟﻠﻰ ﺍﻧﺖ ﺑﺘﻘﻮﻟﻪ ﺩﻩ .. ﺃﻧﺎ ﺑﻜﻠﻤﻚ ﻋﻦ ﻭﺟﻬﺔ ﻧﻈﺮﻫﻢ ﻫﻤﺎ
ﻗﺎﻝ " ﻋﻤﺮ " ﺑﺤﺰﻡ :
- ﻻﺯﻡ ﺗﺘﻐﻴﺮ .. ﻭﺟﻬﺔ ﻧﻈﺮﻫﻢ ﺩﻯ ﻻﺯﻡ ﺗﺘﻐﻴﺮ
- ﻭﻫﺘﻐﻴﺮﻫﺎ ﺍﺯﺍﻯ ؟
ﺯﻓﺮ ﻓﻰ ﺿﻴﻖ ﻗﺎﺋﻼً :
- ﻣﻌﺮﻓﺶ ﺑﺲ ﻻﺯﻡ ﺗﺘﻐﻴﺮ .. ﺃﻧﺎ ﻗﻮﻟﺖ ﻷﻣﻰ ﺍﻣﺒﺎﺭﺡ ﺃﻧﺎ ﻣﺶ ﻫﻌﻤﻞ ﺣﺎﺟﻪ ﻏﻴﺮ ﺑﺮﺿﺎﻛﻰ .. ﺑﺲ ﻟﻮ ﻣﺘﺠﻮﺯﺗﺶ " ﻳﺎﺳﻤﻴﻦ " ﻣﺶ ﻫﺘﺠﻮﺯ ﺃﺑﺪﺍً ..
ﻗﺎﻝ " ﻛﺮﻡ " :
- ﺍﻟﻠﻪ ﻳﻨﻮﺭ ﻋﻠﻴﻚ .. ﻫﻮ ﺩﻩ ﺍﻟﻜﻼﻡ ﺍﻟﻠﻰ ﻫﻴﺠﻴﺐ ﻣﻊ ﺃﻣﻚ .. ﺑﺲ ﺍﻟﻤﺸﻜﻠﺔ ﻓﻰ ﺍﻟﺮﺍﺳﻴﻦ ﺍﻟﻜﺒﺎﺭ .. ﺃﺑﻮﻙ ﻭﻋﻤﺘﻚ
- ﻷ ﺑﺎﺑﺎ ﻣﻌﻨﺪﻭﺵ ﺍﻋﺘﺮﺍﺽ .. ﻫﻮ ﻃﻮﻝ ﻋﻤﺮﻩ ﻣﺒﻴﺮﺿﺎﺵ ﻳﺠﺒﺮﻧﻰ ﻋﻠﻰ ﺣﺎﺟﻪ .. ﻭﺑﻴﺜﻖ ﻓﻰ ﻗﺮﺍﺭﺍﺗﻰ
ﺻﺎﺡ " ﻛﺮﻡ " ﻓﻰ ﻣﺮﺡ :
- ﻛﺪﻩ ﻓﻞ ﺃﻭﻯ .. ﺑﺎﻗﻰ ﺑﺄﻩ ﻋﻤﺘﻚ
ﻗﺎﻝ " ﻋﻤﺮ " ﺑﻀﻴﻖ :
- ﺃﻧﺎ ﻣﺶ ﻫﺎﻣﻤﻨﻰ ﺗﻮﺍﻓﻖ ﻭﻻ ﻣﺘﻮﺍﻓﻘﺶ .. ﻫﻰ ﻣﺒﺘﻔﻜﺮﺵ ﻏﻴﺮ ﻓﻰ ﺍﺳﻢ ﻋﻴﻠﺘﻬﺎ ﺑﺲ .. ﻻ ﺑﺘﻔﻜﺮ ﻓﻴﺎ ﻭﻻ ﻓﻰ ﺍﻟﻠﻰ ﻳﺮﻳﺤﻨﻰ .. ﻫﻰ ﻋﻠﻰ ﻃﻮﻝ ﻣﻨﺎﺧﻴﺮﻫﺎ ﻓﻰ ﺍﻟﺴﻤﺎ .. ﺣﺘﻰ ﻓﻰ ﺗﻌﺎﻣﻼﺗﻬﺎ ﻭﺻﺪﺍﻗﺎﺗﻬﺎ ﺍﻟﻌﺎﺩﻳﺔ ﻣﺒﺘﺮﺿﺎﺵ ﺗﺘﻌﺎﻣﻞ ﺇﻻ ﻣﻊ ﻧﺎﺱ ﻣﻦ ﻧﻔﺲ ﻣﺴﺘﻮﺍﻫﺎ .. ﻋﺎﺭﻑ ﻋﺼﺮ ﺍﻟﺒﺸﻮﺍﺕ ﻭﺍﻟﺒﻜﻮﺍﺕ .. ﺃﻧﺎ ﺣﺎﺳﺲ ﺍﻥ ﻋﻤﺘﻮ ﻟﺴﻪ ﻋﺎﻳﺸﻪ ﻓﻴﻪ ﻟﺤﺪ ﺩﻟﻮﻗﺘﻰ
- ﻃﻴﺐ ﺗﻤﺎﻡ ﻃﺎﻟﻤﺎ ﻣﺶ ﻫﻤﻚ ﺭﺃﻳﻬﺎ ... ﻛﺒﺮ ﻳﺎ ﺑﺎﺷﺎ
- ﺃﻧﺎ ﻛﺎﻥ ﻧﻔﺴﻲ ﻃﺒﻌﺎ ﺍﻧﻬﺎ ﺗﻜﻮﻥ ﻣﺮﺣﺒﺔ ﺑـ " ﻳﺎﺳﻤﻴﻦ " .. ﻟﻜﻦ ﻃﺎﻟﻤﺎ ﻫﻰ ﺷﺎﻳﻔﻪ ﺍﻥ ﺟﻮﺍﺯﻯ ﻣﻨﻬﺎ ﻣﻬﺰﻟﺔ .. ﺧﻼﺹ ﻫﻰ ﺣﺮﻩ
ﺍﺑﺘﺴﻢ " ﻛﺮﻡ " ﻗﺎﺋﻼً :
- ﻫﻰ ﺃﺻﻼ ﻃﻮﻝ ﻋﻤﺮﻫﺎ ﻣﻨﻤﺮﻩ ﻋﻠﻴﻚ ﻟﺒﻨﺘﻬﺎ
ﻗﺎﻝ " ﻋﻤﺮ " ﻣﺘﺤﻜﻤﺎً :
- ﺃﻫﻮ ﺑﻨﺘﻬﺎ ﺩﻯ ﻧﺴﺨﻪ ﻣﺼﻐﺮﻩ ﻣﻨﻬﺎ .. ﻟﻮ ﻓﺎﻛﺮﺍﻧﻰ ﻓﻰ ﻳﻮﻡ ﻫﻔﻜﺮ ﻓﻴﻬﺎ ﺗﺒﻘﻰ ﺑﺘﺤﻠﻢ ﻭﻫﺘﻔﻮﻕ ﻋﻠﻰ ﻛﺎﺑﻮﺱ .. ﻣﺎ ﻛﺎﻧﺖ ﺃﺩﺍﻣﻰ ﻗﺒﻞ " ﻧﺎﻧﺴﻲ " ﻣﺨﻄﺒﺘﻬﺎﺵ ﻟﻴﻪ .. ﻣﺶ ﻫﺎﺟﻰ ﺩﻟﻮﻗﺘﻰ ﻭﺃﺭﻣﻰ ﻧﻔﺴﻲ ﺍﻟﺮﻣﻴﺔ ﺍﻟﺴﻮﺩﺓ ﺩﻯ .. ﻭﺑﻌﺪﻳﻦ ﺃﻧﺎ ﺑﻌﺘﺒﺮ " ﺍﻳﻨﺎﺱ " ﺩﻯ ﺍﺧﺘﻰ .. ﻋﺎﺭﻑ ﻳﻌﻨﻲ ﺍﻳﻪ ﺍﺧﺘﻰ .. ﻳﻌﻨﻲ ﻣﺴﺘﺤﻴﻞ ﺍﻓﻜﺮ ﻓﻴﻬﺎ ﺑﺸﻜﻞ ﺗﺎﻧﻰ
ﻫﻨﺎ ﻃﺮﻕ " ﺃﻳﻤﻦ " ﺍﻟﺒﺎﺏ ﻭﺩﺧﻞ ... ﻋﻠﻢ ﻣﻦ " ﻋﻤﺮ " ﻣﺎ ﺣﺪﺙ ﻟﻴﻠﺔ ﺃﻣﺲ .. ﻓﻘﺎﻝ :
- ﺍﻧﺖ ﻏﻠﻄﺎﻥ ﻳﺎ " ﻋﻤﺮ " ﻣﻜﻨﺶ ﻻﺯﻡ ﺗﻜﻠﻢ ﺃﺑﻮﻫﺎ ﺍﻻ ﺑﻌﺪ ﻣﺎ ﺗﻜﻠﻢ ﺃﻫﻠﻚ ﺍﻷﻭﻝ
ﻗﺎﻝ " ﻋﻤﺮ " ﺑﺤﺪﺓ :
" - ﺃﻳﻤﻦ " .. ﺃﻧﺎ ﻫﺘﺠﻮﺯ " ﻳﺎﺳﻤﻴﻦ .. " ﺑﺎﺑﺎ ﻭﻣﻮﺍﻓﻖ .. ﻭﺃﻣﻰ ﺃﻧﺎ ﻫﻌﺮﻑ ﺃﻗﻨﻌﻬﺎ ﺍﺯﺍﻯ .. ﻭﻣﻴﻬﻤﻨﻴﺶ ﺭﺃﻯ ﺃﻯ ﺣﺪ ﺗﺎﻧﻰ
ﻧﻈﺮ ﺍﻟﻴﻪ " ﺃﻳﻤﻦ " ﻗﺎﺋﻼً :
- ﺑﺲ ﻋﻤﺘﻚ ﻣﻤﻜﻦ ﺗﺴﺒﺒﻠﻚ ﻣﺸﺎﻛﻞ ﻣﻊ ﻋﻴﻠﺔ " ﻳﺎﺳﻤﻴﻦ " ﺧﺎﺻﺔ ﺍﻧﺖ ﻧﺎﻭﻯ ﺗﺠﻤﻌﻬﻢ ﻣﻊ ﺑﻌﺾ ﻭﺗﻌﺮﻓﻬﻢ ﺑﺒﻌﺾ
ﺯﻓﺮ " ﻋﻤﺮ " ﺑﻀﻴﻖ ﻗﺎﺋﻼً :
- ﻭﻫﻮ ﺩﻩ ﺍﻟﻠﻰ ﺃﻧﺎ ﺧﺎﻳﻒ ﻣﻨﻪ " .. ﻳﺎﺳﻤﻴﻦ " ﺣﺴﺎﺳﻪ ﺃﻭﻯ .. ﻭﻣﻌﺘﺰﺓ ﺑﻜﺮﺍﻣﺘﻬﺎ ﺃﻭﻯ .. ﻭﺧﺎﻳﻒ ﻋﻤﺘﻮ ﺗﻘﻮﻝ ﻛﻠﻤﺔ ﺗﻀﺎﻳﻘﻬﺎ
ﻗﺎﻝ " ﺃﻳﻤﻦ " :
- ﺧﻼﺹ ﻳﺒﻘﻰ ﺃﺟﻞ ﺍﻟﻤﻘﺎﺑﻠﻪ ﺩﻯ ﺩﻟﻮﻗﺘﻰ ﻟﺤﺪ ﻣﺎ ﺍﻟﻮﺿﻊ ﻋﻨﺪﻙ ﻳﻬﺪﻯ .. ﻷﻥ ﻟﻮ ﺍﻟﻌﻴﻠﺘﻴﻦ ﺍﻟﺘﻘﺎﺑﻠﻮﺍ ﻓﻰ ﻇﻞ ﺍﻟﺘﻮﺗﺮ ﺩﻩ .. ﻫﺘﻜﻮﻥ ﺍﻟﻨﺘﻴﺠﺔ ﻣﺆﺳﻔﻪ
ﺃﻭﻣﺄ " ﻋﻤﺮ " ﺑﺮﺃﺳﻪ ﻗﺎﺋﻼً :
- ﻣﻌﺎﻙ ﺣﻖ .. ﻫﺄﺟﻞ ﺍﻟﻤﻘﺎﺑﻠﻪ ﺩﻯ ﻟﺤﺪ ﻣﺎ ﺍﻟﺠﻮ ﻳﻬﺪﻯ ﺷﻮﻳﻪ .. ﻭﺭﺑﻨﺎ ﻳﻬﺪﻳﻬﻢ ﻭﻳﻮﺍﻓﻘﻮﺍ .. ﻋﺸﺎﻥ ﻣﺘﺤﺼﻠﺶ ﻣﺸﺎﻛﻞ .. ﻻﻥ ﺍﻟﻠﻰ ﻫﻴﺠﺮﺡ " ﻳﺎﺳﻤﻴﻦ " ﺑﻜﻠﻤﺔ ﺃﻧﺎ ﻣﺶ ﻫﺴﻜﺘﻠﻪ
ﺍﺑﺘﺴﻢ " ﺃﻳﻤﻦ " ﻗﺎﺋﻼً :
- ﺷﻜﻠﻚ ﺑﺘﺤﺒﻬﺎ ﺃﻭﻯ
ﻧﻈﺮ ﺍﻟﻴﻪ " ﻋﻤﺮ " ﻗﺎﺋﻼً ﻭﺍﻻﺑﺘﺴﺎﻣﻪ ﻋﻠﻰ ﺷﻔﺘﻴﻪ :
- ﺑﺤﺒﻬﺎ ﺑﺠﺪ
ﻗﺎﻝ " ﺃﻳﻤﻦ " :
- ﻭﻫﻰ ﺑﻨﺖ ﺣﻼﻝ ﻭﺃﻧﺎ ﻭﺍﺛﻖ ﺍﻧﻚ ﻣﺶ ﻫﺘﻼﻗﻰ ﺃﺣﺴﻦ ﻣﻨﻬﺎ ..
ﻧﻈﺮ " ﺃﻳﻤﻦ " ﺑﻨﻈﺮﺓ ﺫﺍﺕ ﻣﻌﻨﻰ ﺍﻟﻰ " ﻛﺮﻡ " ﻗﺎﺋﻼً :
- ﻫﻰ ﻭﺃﺧﺘﻬﺎ ﺑﺼﺮﺍﺣﺔ ﺑﻨﺘﻴﻦ ﻣﻴﺘﺴﺎﺑﻮﺵ
ﺻﺎﺡ " ﻛﺮﻡ " :
- ﻻ ﻛﻠﻪ ﻛﻮﻡ ﻭﺃﺧﺘﻬﺎ ﺩﻯ ﻛﻮﻡ ﺗﺎﻧﻰ ﺧﺎﻟﺺ .. ﺩﻩ ﺃﻧﺎ ﻻ ﺷﻮﻓﺖ ﺯﻳﻬﺎ ﻭﻻ ﻫﺸﻮﻑ
ﻗﺎﻝ ﻟﻪ " ﺃﻳﻤﻦ " ﺑﺘﺤﺪﻯ :
- ﺗﻨﻜﺮ ﺍﻧﻬﺎ ﺑﻨﺖ ﺟﺪﻋﺔ ﻭﻣﺤﺘﺮﻣﺔ ﻭﻣﺆﺩﺑﺔ ﻭﺷﺨﺼﻴﺘﻬﺎ ﻗﻮﻱ
ﺍﺑﺘﺴﻢ " ﻛﺮﻡ " ﻗﺎﺋﻼً :
- ﺑﺼﺮﺍﺣﺔ ﻣﻨﻜﺮﺵ .. ﻭﻣﻨﻜﺮﺵ ﻛﻤﺎﻥ ﺍﻥ ﺷﺨﺼﻴﺘﻬﺎ ﻋﺠﺒﺎﻧﻰ .. ﻣﺠﻨﻨﺎﻧﻰ ﺑﺲ ﻋﺠﺒﺎﻧﻰ
ﺭﻓﻊ " ﻋﻤﺮ " ﺍﺣﺪﻯ ﺣﺎﺟﺒﻴﻪ ﻗﺎﺋﻼً ﺑﺈﺑﺘﺴﺎﻣﻪ :
- ﻭﺍﻟﻠﻪ
ﻧﻬﺾ " ﻛﺮﻡ " ﻭﺻﺎﺡ ﻭﻫﻮ ﻳﻐﺎﺩﺭ ﺍﻟﻐﺮﻓﺔ :
- ﺍﻳﻪ ﻓﻰ ﺍﻳﻪ .. ﺑﻘﻮﻝ ﺷﺨﺼﻴﺘﻬﺎ ﻋﺠﺒﺎﻧﻰ .. ﻣﺶ ﻫﻰ ﻋﺠﺒﺎﻧﻰ
*******************
ﻛﺎﻥ ﻫﺬﺍ ﺍﻟﺼﺒﺎﺡ ﺃﻳﻀﺎً ﻣﺨﺘﻠﻔﺎً ﺑﺎﻟﻨﺴﺒﺔ ﺍﻟﻰ " ﻳﺎﺳﻤﻴﻦ .. " ﻛﺎﻧﺖ ﺗﺸﻌﺮ ﺑﺄﻧﻬﺎ ﻓﻰ ﺣﻠﻢ ﺟﻤﻴﻞ .. ﺗﺨﺸﻰ ﺃﻥ ﺗﺴﺘﻴﻘﻆ ﻣﻨﻪ .. ﻣﺎﺯﺍﻟﺖ ﻻ ﺗﺼﺪﻕ ﻣﺎ ﺃﺧﺒﺮﻫﺎ ﺑﻪ ﻭﺍﻟﺪﻫﺎ ﻣﻨﺬ ﻳﻮﻣﻴﻦ .. ﻣﻨﺬ ﻳﻮﻣﻴﻦ ﻭﻫﻰ ﺗﺮﻓﺮﻑ ﺑﺠﻨﺎﺣﻴﻬﺎ ﻓﻰ ﺳﻤﺎﺀ ﺍﻟﺴﻌﺎﺩﺓ .. ﺷﻌﺮﺕ ﺑﺄﻥ ﺃﻳﺎﻡ ﺑﺆﺳﻬﺎ ﻭﻟﺖ ﻣﺪﺑﺮﻩ .. ﻭﺃﻳﺎﻡ ﻓﺮﺣﻬﺎ ﺃﺗﺖ ﻣﺴﺘﺒﺸﺮﻩ .. ﻛﺎﻧﺖ ﺷﺎﺭﺩﻩ ﻋﻨﺪﻣﺎ ﻧﺎﺩﺍﻫﺎ ﺩﻛﺘﻮﺭ " ﺣﺴﻦ " ﻗﺎﺋﻼً :
- ﺩﻛﺘﻮﺭﺓ " ﻳﺎﺳﻤﻴﻦ "
ﺫﻫﺒﺖ ﺍﻟﻴﻪ ﻣﺴﺮﻋﻪ ﻗﺎﺋﻠﻪ :
- ﺃﻓﻨﺪﻡ ﻳﺎ ﺩﻛﺘﻮﺭ
ﺃﻋﻄﺎﻫﺎ ﻣﻠﻔﺎً ﻭﻗﺎﻝ ﻟﻬﺎ :
- ﻣﻤﻜﻦ ﻟﻮ ﺳﻤﺤﺘﻰ ﺗﺪﻯ ﺗﻘﺮﻳﺮ ﺁﺧﺮ ﺍﻻﺳﺒﻮﻉ ﻟﻠﺒﺸﻤﻬﻨﺪﺱ " ﻋﻤﺮ " ﻓﻰ ﻣﻜﺘﺒﻪ .. ﻭﻋﺮﻓﻴﻪ ﺍﻟﻨﻮﺍﻗﺺ ﺍﻟﻠﻰ ﺍﺗﻜﻠﻤﻨﺎ ﻓﻴﻬﺎ ﻣﻊ ﺑﻌﺾ ﺍﻣﺒﺎﺭﺡ .. ﻻﻧﻨﺎ ﻣﺤﺘﺎﺟﻴﻨﻬﺎ ﺿﺮﻭﺭﻯ
ﺃﺧﺬﺕ ﺍﻟﻤﻠﻒ ﻗﺎﺋﻠﻪ :
- ﺣﺎﺿﺮ ﻳﺎ ﺩﻛﺘﻮﺭ
ﺫﻫﺒﺖ ﻭﻫﻰ ﺗﻘﺪﻡ ﻗﺪﻣﺎً ﻭﺗﺆﺧﺮ ﺍﻷﺧﺮﻯ .. ﻛﺎﻧﺖ ﻣﺘﻠﻬﻔﻪ ﻋﻠﻰ ﺭﺅﻳﺘﻪ .. ﻟﻜﻨﻬﺎ ﻣﺘﻮﺗﺮﻩ ﻟﻠﻐﺎﻳﻪ .. ﺗﺨﺸﻰ ﺃﻥ ﻳﺼﺪﺭ ﻣﻨﻪ ﻣﺎ ﻳﻀﺎﻳﻘﻬﺎ .. ﻟﻜﻦ ﻟﻬﻔﺘﻬﺎ ﻏﻠﺒﺖ ﺧﻮﻓﻬﺎ .. ﻃﺮﻗﺖ ﺍﻟﺒﺎﺏ ﺛﻢ ﻓﺘﺤﺘﻪ ﻭﺩﺧﻠﺖ .. ﻛﺎﻥ " ﻋﻤﺮ " ﺟﺎﻟﺴﺎً ﻣﻊ " ﺃﻳﻤﻦ .. " ﻓﺤﻤﺪﺕ ﺍﻟﻠﻪ ﻋﻠﻰ ﺫﻟﻚ .. ﺗﻘﺪﻣﺖ ﻗﺎﺋﻠﻪ :
- ﺩﻩ ﺍﻟﺘﻘﺮﻳﺮ ﺍﻻﺳﺒﻮﻋﻰ ﻳﺎ ﺑﺸﻤﻬﻨﺪﺱ
ﺍﺑﺘﺴﻢ ﻟﻬﺎ " ﻋﻤﺮ " ﻭﻧﻈﺮ ﺍﻟﻴﻬﺎ ﺑﺈﻋﺠﺎﺏ ﻟﻢ ﻳﺤﺎﻭﻝ ﺣﺘﻰ ﺃﻥ ﻳﺨﻔﻴﻪ .. ﺃﺧﺬﻩ " ﻋﻤﺮ " ﻗﺎﺋﻼً :
- ﻣﺘﺸﻜﺮ
ﻟﻢ ﺗﺠﺪ ﺻﻮﺗﺎُ ﺗﺨﺒﺮﻩ ﺑﻪ ﺑﺎﻟﻨﻮﺍﻗﺺ ﻛﻤﺎ ﻃﻠﺐ ﻣﻨﻬﺎ ﺩﻛﺘﻮﺭ " ﺣﺴﻦ " ﻭﺩﺕ ﻟﻮ ﻫﺮﺑﺖ ﻣﻦ ﺃﻣﺎﻣﻪ ﻓﻰ ﺍﻟﺘﻮ ﻭﺍﻟﻠﺤﻈﺔ .. ﻛﺎﻧﺖ ﺣﻤﺮﺓ ﺍﻟﺨﺠﻞ ﺗﺰﻳﻦ ﻭﺟﻨﺘﻴﻬﺎ .. ﺗﺄﻣﻠﻬﺎ " ﻋﻤﺮ " ﻓﻰ ﺍﻋﺠﺎﺏ ﻟﻠﺤﻈﺔ ﻗﺒﻞ ﺃﻥ ﺗﺴﺘﺄﺫﻥ ﻟﺘﻨﺼﺮﻑ .. ﻇﻞ " ﻋﻤﺮ " ﻣﺤﺘﻔﻈﺎً ﺑﺈﺑﺘﺴﺎﻣﺘﻪ ﺣﺘﻰ ﺑﻌﺪ ﺍﻧﺼﺮﺍﻓﻬﺎ .. ﻗﺎﻝ ﻟﻪ " ﺃﻳﻤﻦ " ﻣﺎﺯﺣﺎً :
- ﺍﻳﻪ ﻳﺎ ﻋﻢ ﺭﻭﺣﺖ ﻓﻴﻦ
ﺳﺄﻟﻪ " ﻋﻤﺮ " ﺑﻨﻔﺲ ﺍﻻﺑﺘﺴﺎﻣﻪ :
- ﺗﻔﺘﻜﺮ ﻣﻤﻜﻦ ﺗﺮﺿﻰ ﺑﻜﺘﺐ ﺍﻟﻜﺘﺎﺏ ﻣﻊ ﺍﻟﺨﻄﻮﺑﺔ .. ﻭﻻ ﻫﺘﺨﺎﻑ ؟
ﻗﺎﻝ " ﺃﻳﻤﻦ " ﻣﻄﻤﺌﻨﺎً ﺍﻳﺎﻩ :
- ﺍﻃﻤﻦ ﺣﺘﻰ ﻟﻮ ﻣﻮﻓﻘﺘﺶ .. ﻣﻌﺘﻘﺪﺵ ﺍﻟﺨﻄﻮﺑﺔ ﻣﻤﻜﻦ ﺗﻄﻮﻝ .. ﺑﺼﺮﺍﺣﺔ ﺃﻧﺎ ﺷﺎﻳﻔﻜﻮﺍ ﻻﻳﻘﻴﻦ ﻟﺒﻌﺾ ﺃﻭﻯ
ﻗﺎﻝ " ﻋﻤﺮ " ﺑﻤﺮﺡ ﻭﻫﻮ ﻳﻔﺘﺢ ﺍﻟﺘﻘﺮﻳﺮ ﺍﻟﺬﻯ ﺃﻣﺎﻣﻪ :
- ﻃﻴﺐ ﻳﻼ ﻋﻠﻰ ﻣﻜﺘﺒﻚ ﻳﺎ " ﺑﺎﺷﻤﻬﻨﺪﺱ " ﺧﻠﻴﻨﻲ ﺃﺷﻮﻑ ﺷﻐﻠﻰ
ﻗﺎﻝ " ﺃﻳﻤﻦ " ﻣﺒﺘﺴﻤﺎً :
- ﺩﻟﻮﻗﺘﻰ ﻧﻔﺴﻚ ﺍﺗﻔﺘﺤﺖ ﻟﻠﺸﻐﻞ .. ﻣﺎﺷﻰ ﺭﺑﻨﺎ ﻳﻬﻨﻴﻚ ﻳﺎ ﺳﻴﺪﻯ
********************
ﻋﻜﻔﺖ " ﻳﺎﺳﻤﻴﻦ " ﻣﻊ ﺯﻣﻴﻠﺘﻬﺎ " ﻭﻻﺀ " ﻋﻠﻰ ﺍﻧﻬﺎﺀ ﺍﻟﺘﻘﺎﺭﻳﺮ ﺍﻟﻴﻮﻣﻴﺔ .. ﻛﺎﻧﺖ " ﻭﻻﺀ " ﺗﻌﻤﻞ ﻣﻨﺬ ﺳﻨﻮﺍﺕ ﻓﻰ ﺍﻟﻤﺰﺭﻋﺔ .. ﻓﻰ ﻧﻔﺲ ﺍﻟﻘﺴﻢ ﺍﻟﺬﻯ ﺗﻌﻤﻞ ﺑﻪ " ﻳﺎﺳﻤﻴﻦ .. " ﺍﻗﺘﺼﺮﺕ ﻋﻼﻗﺘﻬﻤﺎ ﻃﻮﺍﻝ ﺍﻟﻔﺘﺮﺓ ﺍﻟﻤﺎﺿﻴﺔ ﻋﻠﻰ ﺍﻟﺘﻌﺎﻭﻥ ﻓﻰ ﺃﺩﺍﺀ ﻋﻤﻠﻬﻤﺎ .. ﻟﻢ ﺗﺴﺒﺐ ﻟﻬﺎ " ﻭﻻﺀ " ﺃﻯ ﻣﺸﺎﻛﻞ .. ﻭﻟﻢ ﻳﻜﻦ ﺃﻯ ﻣﻼﺣﻈﺎﺕ ﺳﻠﺒﻴﻪ ﻋﻠﻴﻬﺎ .. ﻛﺎﻧﺖ ﻓﺘﺎﺓ ﺑﺴﻴﻄﺔ ﻣﺜﻠﻬﺎ .. ﺗﻌﻴﺶ ﻓﻰ ﻧﻔﺲ ﺍﻟﻘﺮﻳﺔ ﺍﻟﻤﻮﺟﻮﺩ ﺑﻬﺎ ﺍﻟﻤﺰﺭﻋﺔ .. ﺍﺑﺘﺴﻤﺖ " ﻳﺎﺳﻤﻴﻦ " ﻗﺎﺋﻠﻪ :
- ﻭﺃﺧﻴﺮﺍً ﺧﻠﺼﻨﺎ
ﺗﻤﻄﻌﺖ " ﻭﻻﺀ " ﻟﺘﺮﻳﺢ ﺁﻻﻡ ﻇﻬﺮﻫﺎ ﻣﻦ ﻃﻮﻝ ﺍﻟﺠﻠﻮﺱ ﻗﺎﺋﻠﻪ ﺑﺘﻌﺐ :
- ﻳﺎﻩ .. ﺍﻟﻨﻬﺎﺭﺩﺓ ﻛﺎﻥ ﻳﻮﻡ ﻣﺘﻌﺐ ﺟﺪﺍ
- ﻣﻌﻠﺶ .. ﺃﺩﻳﻨﺎ ﺧﻠﺼﻨﺎ
ﻗﺎﻟﺖ " ﻭﻻﺀ " ﺑﺘﺄﻓﻒ :
- ﻛﺘﺎﺑﺔ ﺍﻟﺘﻘﺎﺭﻳﺮ ﻛﻞ ﻳﻮﻡ ﺣﺎﺟﻪ ﻣﻤﻠﺔ ﺟﺪﺍً
ﻗﺎﻟﺖ " ﻳﺎﺳﻤﻴﻦ " ﻭﻫﻰ ﺗﻨﻬﺾ ﻟﺘﺤﻀﺮ ﺣﻘﻴﺒﺘﻬﺎ :
- ﻣﻌﻠﺶ ﺑﺲ ﻻﺯﻡ ﻧﻜﺘﺒﻬﻢ ﻛﻞ ﻳﻮﻡ .. ﺃﺣﺴﻦ ﻣﺎ ﻧﺮﺍﻛﻤﻬﻢ ﻵﺧﺮ ﺍﻻﺳﺒﻮﻉ .. ﻳﻼ ﺳﻼﻡ ﺃﺷﻮﻓﻚ ﺑﻜﺮﺓ
ﺃﻭﻗﻔﺘﻬﺎ " ﻭﻻﺀ " ﻗﺎﺋﻠﻪ :
- ﺍﺳﺘﻨﻰ ﻳﺎ " ﻳﺎﺳﻤﻴﻦ " ﻋﺎﻳﺰﺍﻛﻰ
ﺍﻟﺘﻔﺘﺖ ﺍﻟﻴﻬﺎ " ﻳﺎﺳﻤﻴﻦ " ﺗﻨﻈﺮ ﺍﻟﻴﻬﺎ ﻗﺎﺋﻠﻪ :
- ﺧﻴﺮ ؟
ﺑﺪﺕ " ﻭﻻﺀ " ﻣﺘﺮﺩﺩﻩ ﻗﻠﻴﻼ .. ﺛﻢ ﻋﺰﻣﺖ ﺃﻣﺮﻫﺎ ﻭﻗﺎﻟﺖ :
- ﻣﻤﻜﻦ ﻧﻌﺪ ﻧﺘﻜﻠﻢ ﻣﻊ ﺑﻌﺾ ﺷﻮﻳﺔ
ﻗﺎﻟﺖ " ﻳﺎﺳﻤﻴﻦ " ﺑﺈﺳﺘﻐﺮﺍﺏ :
- ﺁﻩ ﻃﺒﻌﺎ
ﺟﺬﺑﺖ " ﻳﺎﺳﻤﻴﻦ " ﻛﺮﺳﻲ ﻭﺟﻠﺴﺖ ﺑﺠﻮﺍﺭﻫﺎ .. ﺳﺎﺩ ﺍﻟﺼﻤﺖ ﻟﺒﺮﻫﻪ .. ﺑﺪﺕ ﻭﻛﺄﻥ " ﻭﻻﺀ " ﺗﺤﺎﻭﻝ ﺍﺳﺘﺠﻤﺎﻉ ﺃﻓﻜﺎﺭﻫﺎ .. ﻓﺤﺜﺘﻬﺎ " ﻳﺎﺳﻤﻴﻦ " ﻗﺎﺋﻠﻪ :
- ﺧﻴﺮ ﻳﺎ " ﻭﻻﺀ .. " ﻓﻰ ﺣﺎﺟﻪ ﺧﺎﺻﻪ ﺑﺎﻟﺸﻐﻞ
- ﻷ ﻣﺶ ﺧﺎﺻﻪ ﺑﺎﻟﺸﻐﻞ
- ﺃﻣﺎﻝ ﺧﺎﺻﻪ ﺑﺎﻳﻪ
ﻧﻈﺮﺕ ﺍﻟﻴﻬﺎ " ﻭﻻﺀ " ﻭﻗﺎﻟﺖ ﺑﻬﺪﻭﺀ :
- ﺧﺎﺻﻪ ﺑﻴﻜﻲ ﺍﻧﺘﻰ
ﻗﺎﻟﺖ " ﻳﺎﺳﻤﻴﻦ " ﺑﺪﻫﺸﺔ :
- ﺑﻴﺎ ﺃﻧﺎ
- ﺃﻳﻮﺓ
- ﻃﻴﺐ .. ﻗﻮﻟﻰ
ﻧﻈﺮﺕ " ﻭﻻﺀ " ﺍﻟﻴﻬﺎ ﻗﺎﺋﻠﻪ :
- ﻫﺘﻜﻠﻢ ﻣﻌﺎﻛﻰ ﺑﺲ ﻣﺶ ﻋﺎﻳﺰﺍﻛﻰ ﺗﻘﺎﻃﻌﻴﻨﻲ ﻏﻴﺮ ﻟﻤﺎ ﺍﺧﻠﺺ ﻛﻼﻣﻰ .. ﺍﺗﻔﻘﻨﺎ ؟
ﺃﻭﻣﺄﺕ " ﻳﺎﺳﻤﻴﻦ " ﺑﺮﺃﺳﻬﺎ ﻭﻫﻰ ﺗﻮﻟﻴﻬﺎ ﻛﻞ ﺍﻧﺘﺒﺎﻫﻬﺎ .. ﺗﺤﺪﺛﺖ " ﻭﻻﺀ " ﺑﻬﺪﻭﺀ ﻗﺎﺋﻠﻪ :
- ﺃﻧﺎ ﺷﻐﺎﻟﻪ ﻫﻨﺎ ﻓﻰ ﺍﻟﻤﺰﺭﻋﺔ ﻣﻦ 3 ﺳﻨﻴﻦ .. ﻳﻌﻨﻲ ﻋﺎﺭﻓﻪ ﺍﻟﻨﺎﺱ ﺍﻟﻠﻰ ﻫﻨﺎ ﻛﻮﻳﺲ .. ﻭﺃﻭﻟﻬﻢ ... " ﻋﻤﺮ "
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﺑﺪﻫﺸﺔ .. ﻟﻜﻨﻬﺎ ﻟﻢ ﺗﻘﺎﻃﻌﻬﺎ .. ﻓﺄﻛﻤﻠﺖ " ﻭﻻﺀ " ﻗﺎﺋﻠﻪ :
- ﺯﻳﻲ ﺯﻱ ﺑﻨﺎﺕ ﻛﺘﻴﺮ ﻫﻨﺎ .. ﻃﺒﻌﺎ " ﻋﻤﺮ " ﺭﺍﺟﻞ ﺑﻨﺎﺕ ﻛﺘﻴﺮ ﻳﺘﻤﻨﻮﻩ .. ﺑﺲ ﺍﻟﻤﻮﺿﻮﻉ ﻛﺎﻥ ﺗﻄﻮﺭ ﻣﻌﺎﻳﺎ ﺃﻭﻯ .. ﻣﺒﻘﺎﺵ ﺍﻋﺠﺎﺏ ﺃﻭ ﺣﻠﻢ ﺑﺸﺨﺺ ... ﺃﻧﺎ ﺣﺒﻴﺘﻪ ﺑﺠﺪ
ﻗﺎﻟﺖ ﺟﻤﻠﺘﻬﺎ ﺍﻵﺧﻴﺮﺓ ﻭﻫﻰ ﺗﻨﻈﺮ ﻓﻰ ﺍﻷﺭﺽ ﻭﻛﺄﻧﻬﺎ ﺗﺨﺠﻞ ﻣﻦ ﻫﺬﺍ ﺍﻹﻋﺘﺮﺍﻑ .. ﺛﻢ ﺃﻛﻤﻠﺖ ﻗﺎﺋﻠﻪ :
- ﻫﻮ ﻃﺒﻌﺎ ﻣﻜﻨﺶ ﺣﺎﺳﺲ ﺑﻴﺎ .. ﻭﻻ ﻛﺎﻥ ﺷﺎﻳﻔﻨﻰ ﺃﺻﻼً .. ﻻﻧﻰ ﻃﺒﻌﺎً ﻣﺶ ﻣﻦ ﺍﻟﺒﻨﺎﺕ ﺍﻟﻠﻰ ﻳﺠﺬﺑﻮﺍ ﺍﻧﺘﺒﺎﻩ ﻭﺍﺣﺪ ﺯﻯ ﺩﻩ .. ﻭﺃﻧﺎ ﻣﺶ ﻣﻦ ﺍﻟﺒﻨﺎﺕ ﺍﻟﻠﻰ ﺗﺤﺎﻭﻝ ﺗﺠﺬﺏ ﺍﻧﺘﺒﺎﻩ ﺭﺍﺟﻞ ﻟﻴﻬﺎ .. ﺣﺘﻰ ﻟﻮ ﻛﻨﺖ ﺑﺤﺒﻪ ﻭﺑﻤﻮﺕ ﻓﻴﻪ .. ﻭﻋﺸﺎﻥ ﻛﺪﻩ ﺣﺒﻲ ﻓﻀﻞ ﻣﺤﺒﻮﺱ ﻓﻰ ﻗﻠﺒﻲ ﻣﺤﺪﺵ ﻳﻌﺮﻑ ﻋﻨﻪ ﺣﺎﺟﻪ .. ﻣﺒﺘﺪﺗﺶ ﺃﻓﻮﻕ ﻣﻦ ﺍﻟﻮﻫﻢ ﺍﻟﻠﻰ ﻛﻨﺖ ﻣﻌﻴﺸﻪ ﻧﻔﺴﻲ ﻓﻴﻪ ﺇﻻ ﻟﻤﺎ ﻋﺮﻓﺖ ﺍﻧﻪ ﺧﻄﺐ .. ﻣﺎ ﺃﻗﻮﻟﻜﻴﺶ ﺍﻟﺪﻧﻴﺎ ﺍﺳﻮﺩﺕ ﻓﻰ ﻋﻨﻴﺎ ﺍﺯﺍﻯ .. ﺑﺲ ﺣﻤﺪﺕ ﺭﺑﻨﺎ .. ﻻﻥ ﺩﻩ ﺻﺤﺎﻧﻰ ﻭﻓﻮﻗﻨﻰ .. ﻭﺣﺴﺴﻨﻰ ﺍﻧﻰ ﺑﻀﻴﻊ ﻋﻤﺮﻯ ﻭﺃﺣﻠﻰ ﺃﻳﺎﻣﻰ ﻓﻰ ﺣﺐ ﻣﻦ ﻃﺮﻑ ﻭﺍﺣﺪ .. ﺣﺐ ﻣﻠﻮﺵ ﺃﻯ ﻣﺴﺘﻘﺒﻞ .. ﺣﺐ ﺃﻧﺎ ﺍﻟﻮﺣﻴﺪﺓ ﺍﻟﻠﻰ ﺑﺪﻭﻕ ﻋﺬﺍﺑﻪ .. ﺑﺲ ﻛﺎﻥ ﻓﻰ ﻓﻀﻮﻝ ﺟﻮﺍﻳﺎ ﺍﻧﻰ ﺃﺷﻮﻑ ﺧﻄﻴﺒﺘﻪ .. ﻭﻓﻀﻠﺖ ﺃﺳﺄﻝ ﻧﻔﺴﻲ ﻳﺎ ﺗﺮﻯ ﺷﻜﻠﻬﺎ ﺍﻳﻪ .. ﻳﺎ ﺗﺮﻯ ﻟﺒﺴﻬﺎ ﺍﺯﺍﻯ .. ﻳﺎ ﺗﺮﻯ ﻳﺎ ﺗﺮﻯ .. ﻭﺑﻌﺪ ﻓﺘﺮﺓ ﻣﻦ ﺧﻄﻮﺑﺘﻪ ﺟﺎﺏ ﺧﻄﻴﺒﺘﻪ ﻫﻨﺎ ﺍﻟﻤﺰﺭﻋﺔ ﺗﻘﻀﻰ ﻛﺎﻡ ﻳﻮﻡ ﻫﻰ ﻭﺃﻫﻠﻬﺎ .. ﻟﻤﺎ ﺷﻮﻓﺘﻬﺎ ﻋﺮﻓﺖ ﺍﻥ ﺣﺒﻲ ﻟﻴﻪ ﻣﻜﻨﺶ ﻣﺴﺘﺤﻴﻞ ﺑﺲ .. ﻻ ﺩﻩ ﻛﺎﻥ ﻣﻦ ﺭﺍﺑﻊ ﺍﻟﻤﺴﺘﺤﻴﻼﺕ
ﺻﻤﺘﺖ ﻓﺴﺄﻟﻬﺎ " ﻳﺎﺳﻤﻴﻦ " ﻗﺎﺋﻠﻪ :
- ﻟﻴﻪ ؟
ﺃﻛﻤﻠﺖ " ﻭﻻﺀ " ﺑﻨﻔﺲ ﺍﻟﻬﺪﻭﺀ ﻭﻫﻰ ﺗﻨﻈﺮ ﺍﻟﻰ " ﻳﺎﺳﻤﻴﻦ " :
- ﺑﺼﺮﺍﺣﺔ ﻣﺶ ﻻﻗﻴﻪ ﻭﺻﻒ ﻣﻨﺎﺳﺐ ﻟﻴﻬﺎ ﺇﻻ ﻭﺻﻒ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ( ﻧﺴﺎﺀ ﻛﺎﺳﻴﺎﺕ ﻋﺎﺭﻳﺎﺕ ) .. ﻋﻠﻰ ﺃﺩ ﻣﺎ ﻛﻨﺖ ﺑﺤﺒﻪ ﻋﻠﻰ ﺃﺩ ﻣﺎ ﺍﺣﺘﻘﺮﺗﻪ ﺃﻭﻯ .. ﻣﺶ ﻏﻴﺮﻩ ﻣﻨﻰ ﻋﺸﺎﻥ ﺧﻄﺐ ﻏﻴﺮﻱ .. ﻷ .. ﻋﺸﺎﻥ ﺧﻄﺐ ﺩﻯ ﺑﺎﻟﺬﺍﺕ ﻭﺍﺧﺘﺎﺭ ﺩﻯ ﺑﺎﻟﺬﺍﺕ .. ﻫﻰ ﺩﻯ ﺍﻟﻠﻰ ﺷﻔﻬﺎ ﺍﻧﻬﺎ ﺯﻭﺟﻪ ﻣﻨﺎﺳﺒﻪ ﻟﻪ .. ﺍﺗﺼﺪﻣﺖ ﻓﻴﻪ ﺑﺠﺪ .. ﻛﻨﺖ ﻓﺎﻛﺮﺍﻩ ﺍﻧﺴﺎﻥ ﻋﺎﻗﻞ ﻭﻧﺎﺿﺞ .. ﻃﻠﻊ ﺯﻯ ﺭﺟﺎﻟﻪ ﻛﺘﻴﺮ ﺃﻭﻯ ﻣﺎ ﺑﻴﺠﺮﻭﺵ ﺍﻻ ﻭﺭﺍ ﺭﻏﺒﺎﺗﻬﻢ ﻭﺑﺲ .. ﻋﺎﻳﺰ ﺍﻟﺒﻨﺖ ﺍﻟﺼﺎﺭﺧﺔ ﺍﻟﺠﻤﺎﻝ ﺍﻟﻠﻰ ﻳﺘﺒﺎﻫﻰ ﺑﻴﻬﺎ ﻭﺳﻂ ﺍﻟﻨﺎﺱ .. ﻳﻌﻨﻲ ﻭﺍﺣﺪ ﻣﻌﻨﺪﻭﺵ ﺃﻯ ﻧﺨﻮﺓ .. ﻭﻣﺶ ﻻﻗﻴﻪ ﻭﺻﻒ ﻣﻨﺎﺳﺐ ﻟﻴﻪ ﺍﻻ ﻭﺻﻒ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ : ( ﺩﻳﻮﺙ ) ..
ﺍﺭﺗﺠﻒ ﻗﻠﺐ " ﻳﺎﺳﻤﻴﻦ " ﻣﻦ ﻫﻮﻝ ﺍﻟﻜﻠﻤﺔ .. ﺃﻛﻤﻠﺖ " ﻭﻻﺀ " ﺑﺴﺨﺮﻳﻪ :
- ﻃﺒﻌﺎ ﻫﻮ ﻛﺎﻥ ﻣﺎﺷﻰ ﻣﻌﺎﻫﺎ ﻭﻓﺮﺣﺎﻥ ﺑﻴﻬﺎ .. ﺑﺸﻜﻠﻬﺎ ﻭﺑﻠﺒﺴﻬﺎ ﺍﻟﻠﻰ ﻫﻴﺘﻘﻄﻊ ﻣﻦ ﻛﺘﺮ ﻣﺎ ﻫﻮ ﺿﻴﻖ ﻋﻠﻴﻬﺎ .. ﻭﻣﺎﺷﻰ ﻣﻌﺎﻫﺎ ﻓﻰ ﺍﻟﻤﺰﺭﻋﺔ ﻳﻔﺮﺝ ﺍﻟﻨﺎﺱ ﻋﻠﻴﻬﺎ ﻭﻛﺄﻧﻪ ﺑﻴﻘﻮﻟﻬﻢ ﺍﻟﻤﺰﺓ ﺩﻯ ﺧﻄﻴﺒﺘﻰ
ﺻﻤﺘﺖ ﻗﻠﻴﻼ ﺛﻢ ﻗﺎﻟﺖ :
- ﻋﺎﺭﻓﻪ .. ﻟﻤﺎ ﺷﻮﻓﺘﻬﻢ ﻣﻊ ﺑﻌﺾ .. ﺣﻤﺪﺕ ﺭﺑﻨﺎ ﺍﻧﻪ ﻛﺸﻔﻪ ﺃﺩﺍﻣﻰ .. ﻭﺷﻮﻓﺖ ﺍﻟﻠﻰ ﺟﻮﺍﻩ .. ﻻﻧﻰ ﻛﻨﺖ ﻣﺨﺪﻭﻋﻪ ﺑﺎﻟﻈﺎﻫﺮ .. ﺭﺍﺟﻞ .. ﻭﺟﺪﻉ .. ﻭﻣﺴﺘﻮﻯ .. ﻭﺍﺑﻦ ﻧﺎﺱ .. ﻭﻣﺘﻌﻠﻢ .. ﻭﻳﻌﺘﻤﺪ ﻋﻠﻴﻪ .. ﻭﻭﺍﺛﻖ ﻓﻰ ﻧﻔﺴﻪ .. ﻭﺷﺨﺼﻴﺔ ﺟﺒﺎﺭﻩ .. ﺑﺲ ﻋﺎﺭﻓﻪ .. ﻋﻠﻰ ﺍﻟﺮﻏﻢ ﻣﻦ ﻛﻞ ﺩﻩ .. ﺍﻻ ﺍﻧﻪ ﺍﻧﺴﺎﻥ ﺳﻄﺤﻰ ﺃﻭﻯ .. ﺑﻴﻬﺘﻢ ﺑﺎﻟﻤﻈﺎﻫﺮ ﻭﺑﺲ .. ﻭﺍﻟﺠﻮﺍﺯ ﺑﺎﻟﻨﺴﺒﻪ ﻟﻪ ﻭﺍﺣﺪﻩ ﺣﻠﻮﺓ ﺗﻜﻮﻥ ﻋﻠﻰ ﺍﻟﻔﺮﺍﺯﻩ ﻋﺸﺎﻥ ﻣﺰﺍﺟﻪ ﻭﺑﺲ .. ﻻﻥ ﺩﻩ ﻟﻮ ﺑﻴﻔﻜﺮ ﻓﻰ ﺑﻴﺖ ﻭﺃﺳﺮﺓ ﻭﻋﺸﺮﺓ ﻭﺃﻭﻻﺩ ﻭﺗﺮﺑﻴﺔ ﻭﻣﺴﺆﻟﻴﻪ ﻭﺭﺑﻨﺎ ﻭﺣﺴﺎﺏ ﻭ ﺟﻨﻪ ﻭﻧﺎﺭ ﻣﻜﻨﺶ ﺍﺧﺘﺎﺭ ﻭﺍﺣﺪﻩ ﺯﻯ ﺩﻯ ﻭﺍﺗﺒﺴﻄﺖ ﻣﻦ ﺍﻟﻠﻰ ﻫﻰ ﻋﻤﻼﻩ ﻓﻰ ﻧﻔﺴﻬﺎ .. ﺣﻤﺪﺕ ﺭﺑﻨﺎ ﺍﻧﻪ ﻓﻮﻗﻨﻰ ﻣﻦ ﺍﻟﻮﻫﻢ ﺩﻩ ..
ﻛﺎﻧﺖ " ﻳﺎﺳﻤﻴﻦ " ﺗﺴﺘﻤﻊ ﺍﻟﻴﻬﺎ ﻓﻰ ﻭﺟﻮﻡ .. ﻧﻈﺮﺕ ﺍﻟﻴﻬﺎ " ﻭﻻﺀ " ﻭﺃﻛﻤﻠﺖ ﻗﺎﺋﻠﻪ :
- ﻋﺎﺭﻓﻪ ﺃﻧﺎ ﻋﻤﺮﻯ ﻣﺎ ﺧﺮﺟﺖ ﺍﻟﻠﻰ ﻓﻰ ﻗﻠﺒﻲ ﻭﻻ ﻗﻮﻟﺖ ﺍﻟﻜﻼﻡ ﺩﻩ ﻟﺤﺪ .. ﺑﺲ ﻋﺎﺭﻑ ﻗﻮﻟﺘﻠﻚ ﺍﻧﺘﻰ ﺑﺎﻟﺬﺍﺕ ﻟﻴﻪ ؟
ﻧﻈﺮﺕ " ﻳﺎﺳﻤﻴﻦ " ﺍﻟﻴﻬﺎ ﻣﺴﺘﻔﻬﻤﻪ .. ﻓﺄﻛﻤﻠﺖ ﻗﺎﺋﻠﻪ :
- ﻻﻧﻰ ﺣﺴﺎﻛﻰ ﻣﺎﺷﻴﻪ ﻓﻰ ﻧﻔﺲ ﺍﻟﻄﺮﻳﻖ ﺍﻟﻠﻰ ﻛﻨﺖ ﻣﺎﺷﻴﻪ ﻓﻴﻪ .. ﺻﺤﻴﺢ ﺗﺼﺮﻓﺎﺗﻚ ﻣﺤﺘﺮﻣﻪ ﻭﺍﻟﺸﻬﺎﺩﻩ ﻟﻠﻪ ﻣﺎ ﺷﻮﻓﺘﺶ ﺃﻯ ﺗﺼﺮﻑ ﺃﻭ ﻛﻠﻤﺔ ﻏﻠﻂ ﺻﺪﺭﺕ ﻣﻨﻚ .. ﺑﺲ ﺑﻴﺒﻘﻰ ﻭﺍﺿﺢ ﺃﻭﻯ ﻋﻠﻰ ﻭﺷﻚ ﻟﻤﺎ ﺑﺘﺸﻮﻓﻴﻪ ﺍﻧﻚ ﺣﺴﻪ ﺑﺤﺎﺟﻪ ﻧﺤﻴﺘﻪ
ﺃﻃﺮﻗﺖ " ﻳﺎﺳﻤﻴﻦ " ﺭﺃﺳﻬﺎ ﻓﻰ ﺧﺠﻞ .. ﻓﺄﻛﻤﻠﺖ " ﻭﻻﺀ " ﻗﺎﺋﻠﻪ :
- ﺃﻧﺎ ﻛﻨﺖ ﻣﻮﺟﻮﺩﺓ ﻓﻰ ﺍﻻﺳﺘﺮﺍﺣﻪ ﻳﻮﻡ ﻣﺎ ﺍﻟﺪﻛﺘﻮﺭﺓ " ﻣﻬﺎ " ﻋﻤﻠﺖ ﻓﻴﻜﻲ ﺍﻟﻔﺼﻞ ﺍﻟﺒﺎﻳﺦ ﺩﻩ .. ﺑﺼﺮﺍﺣﺔ " ﻣﻬﺎ " ﺩﻯ ﻣﺒﺤﺒﻬﺎﺵ .. ﻭﺍﺣﺘﻘﺮﺗﻬﺎ ﺃﻛﺘﺮ ﻣﻦ ﺍﻟﻠﻰ ﻋﻤﻠﺘﻪ ﻓﻴﻜﻲ .. ﺍﺑﻌﺪﻯ ﻋﻨﻬﺎ ﺃﺣﺴﻦ ﻳﺎ " ﻳﺎﺳﻤﻴﻦ " .. ﻭﻛﻤﺎﻥ " ﺷﻴﻤﺎﺀ " ﻣﺘﺜﻘﻴﺶ ﻓﻴﻬﺎ .. ﻫﻰ ﺁﻩ ﻣﺶ ﺯﻯ " ﻣﻬﺎ " ﺑﺲ ﻣﻦ ﺍﻟﻨﻮﻉ ﺍﻟﻠﻰ ﻣﺎ ﺑﺘﻨﺼﻔﺶ ﺣﺪ .. ﻳﻌﻨﻲ ﻣﻌﺎﻛﻮﺍ ﻣﻌﺎﻛﻮﺍ ﻋﻠﻴﻜﻮﺍ ﻋﻠﻴﻜﻮﺍ
ﺻﻤﺘﺖ " ﻳﺎﺳﻤﻴﻦ " ﻟﻠﺤﻈﺎﺕ ﺛﻢ ﺳﺄﻟﺘﻬﺎ ﻗﺎﺋﻠﻪ :
- ﺗﻌﺮﻓﻰ ﻟﻴﻪ ﺧﻄﻮﺑﺘﻬﻢ ﺍﺗﻔﺴﺨﺖ ؟
ﺗﻨﻬﺪﺕ " ﻭﻻﺀ " ﻗﺎﺋﻠﻪ :
- ﺑﺼﺮﺍﺣﺔ ﻷ .. ﺑﺲ ﺍﺧﺮ ﻳﻮﻡ ﻛﺎﻧﻮﺍ ﻓﻴﻪ ﻓﻰ ﺍﻟﻤﺰﺭﻋﺔ ﻛﺎﻥ ﺑﺎﻳﻦ ﻋﻠﻴﻬﻢ ﺍﻧﻬﻢ ﻣﺘﺨﺎﻧﻘﻴﻦ .. ﻭ " ﻋﻤﺮ " ﻛﺎﻥ ﻣﻀﺎﻳﻖ ﺟﺪﺍ .. ﻭﻫﻰ ﻛﻤﺎﻥ .. ﻣﻜﻨﺘﺶ ﺭﺍﺿﻴﺔ ﺗﺮﻛﺐ ﺟﻤﻴﻪ ﻭﺷﻮﻓﺖ ﻣﺎﻣﺘﻬﺎ ﺑﺘﺰﻗﻬﺎ ﻋﺸﺎﻥ ﺗﺮﻛﺐ ﺃﺩﺍﻡ .. ﻭﺍﺿﺢ ﺍﻥ ﻓﻰ ﻣﺸﻜﻠﺔ ﻛﺒﻴﺮﺓ ﺣﺼﻠﺖ ﺑﻴﻨﻬﻢ .. ﻟﻜﻦ ﺍﻳﻪ ﻫﻰ ﺍﻟﻠﻪ ﺃﻋﻠﻢ
ﺻﻤﺘﺖ ﻗﻠﻴﻼ ﺛﻢ ﻗﺎﻟﺖ :
- ﻓﻰ ﻧﻔﺲ ﺍﻟﻴﻮﻡ " ﻋﻤﺮ " ﻋﻤﻞ ﺣﺎﺩﺛﺔ ﺑﺎﻟﻌﺮﺑﻴﺔ ﻭﻫﻤﺎ ﺭﺍﺟﻌﻴﻦ ﺍﻟﻘﺎﻫﺮﺓ
ﻫﺘﻔﺖ " ﻳﺎﺳﻤﻴﻦ " ﺑﺪﻫﺸﺔ :
- ﺣﺎﺩﺛﻪ ؟
- ﺃﻳﻮﺓ .. ﻭﻓﻰ ﺍﻟﺤﺎﺩﺛﺔ ﺩﻯ ﺑﺎﺑﺎﻫﺎ ﺍﺗﻮﻓﻰ .. ﻭﺑﻌﺪﻫﺎ ﺑﻔﺘﺮﺓ ﻋﺮﻓﻨﺎ ﺍﻥ ﺍﻟﺨﻄﻮﺑﺔ ﺍﺗﻔﺴﺨﺖ .. ﺑﺲ ﻟﺤﺪ ﺩﻟﻮﻗﺘﻰ ﻣﻨﻌﺮﻓﺶ ﺍﺗﻔﺴﺨﺖ ﻟﻴﻪ .. ﺑﺲ ﺍﻟﻠﻰ ﻋﺮﻓﺘﻪ ﺍﻥ ﺑﺎﺑﺎﻫﺎ ﻃﻠﻊ ﻣﺪﻳﻮﻥ .. ﻭﻛﻞ ﺃﻣﻼﻛﻬﻢ ﺍﻟﺒﻨﻚ ﺣﺠﺰ ﻋﻠﻴﻬﺎ .. ﺣﺘﻰ ﺍﻟﺠﺮﺍﻳﺪ ﻛﺘﺒﺖ ﻋﻦ ﺍﻟﻤﻮﺿﻮﻉ ﺩﻩ ﻻﻧﻪ ﻛﺎﻥ ﺭﺟﻞ ﺃﻋﻤﺎﻝ ﻛﺒﻴﺮ
ﺷﺮﺩﺕ " ﻳﺎﺳﻤﻴﻦ " ﻓﻰ ﻛﻼﻡ " ﻭﻻﺀ .. " ﻓﺄﺧﺮﺟﺘﻬﺎ " ﻭﻻﺀ " ﻣﻦ ﺷﺮﻭﺩﻫﺎ ﻗﺎﺋﻠﻪ :
- ﻭﻓﻰ ﺣﺎﺟﻪ ﻛﻤﺎﻥ ﺣﺎﺑﻪ ﺃﻗﻮﻟﻬﺎﻟﻚ ﻋﺸﺎﻥ ﺃﺑﻘﻰ ﺧﻠﺼﺖ ﺿﻤﻴﺮﻱ ﺃﺩﺍﻡ ﺭﺑﻨﺎ
ﻗﺎﻟﺖ " ﻳﺎﺳﻤﻴﻦ " ﺑﻮﻫﻦ :
- ﺍﺗﻔﻀﻠﻰ
ﺃﻛﻤﻠﺖ " ﻭﻻﺀ " ﻗﺎﺋﻠﻪ :
- ﺑﻌﺪ ﺍﻟﺤﺎﺩﺛﺔ ﻭﺑﻌﺪ ﻣﺎ ﺍﻟﺨﻄﻮﺑﺔ ﺍﺗﻔﺴﺨﺖ " .. ﻋﻤﺮ " ﺟﻪ ﻭﺍﺳﺘﻘﺮ ﻫﻨﺎ .. ﻭﺑﻌﺪ ﻓﺘﺮﺓ ﺳﻤﻌﻨﺎ ﺍﺷﺎﻋﺎﺕ ﻋﻨﻪ
ﻗﺎﻟﺖ " ﻳﺎﺳﻤﻴﻦ " ﺑﺈﺳﺘﻐﺮﺍﺏ :
- ﺍﺷﺎﻋﺎﺕ ﺍﻳﻪ ؟
ﻗﺎﻟﺖ " ﻭﻻﺀ " :
- ﻛﺎﻥ ﻓﻰ ﻫﻨﺎ ﻏﻔﻴﺮ ﺍﺳﻤﻪ " ﻋﻮﻳﺲ .. " ﻭﻛﺎﻧﺖ ﻣﺮﺍﺗﻪ " ﺻﻔﻴﺔ " ﺑﺘﺸﺘﻐﻞ ﻓﻰ ﺑﻴﺖ ﺍﻟﻤﺰﺭﻋﺔ .. ﻓﺠﺄﺓ ﺍﺧﺘﻔﻮﺍ ﻫﻤﺎ ﺍﻻﺗﻨﻴﻦ ﻭﻣﺤﺪﺵ ﻳﻌﺮﻑ ﻃﺮﻳﻘﻬﻢ
ﺻﻤﺘﺖ ﻗﻠﻴﻼً ﺛﻢ ﻗﺎﻟﺖ ﺑﺸﺊ ﻣﻦ ﺍﻟﺘﺮﺩﺩ :
- ﺳﻤﻌﻨﺎ ﺍﻥ " ﻋﻤﺮ " ﻛﺎﻥ ﻋﻠﻰ ﻋﻼﻗﺔ ﺑـ " ﺻﻔﻴﺔ .." ﻭ " ﻋﻮﻳﺲ " ﺍﻛﺘﺸﻒ ﺍﻟﻤﻮﺿﻮﻉ ﻭﺧﺪ ﻣﺮﺍﺗﻪ ﻭﻣﺸﻰ ﻣﻦ ﺍﻟﻤﺰﺭﻋﺔ .. ﻣﻌﺮﻓﺶ ﻣﺸﻮﺍ ﺑﻨﻔﺴﻬﻢ ﻭﻻ " ﻋﻤﺮ " ﻃﺮﺩﻫﻢ .. ﻭﻣﻌﺮﻓﺶ ﺃﺻﻼ ﺍﻟﻘﺼﺔ ﺩﻯ ﺻﺢ ﻭﻻ ﻷ ﺃﻧﺎ ﻣﺸﻮﻓﺘﺶ ﺣﺎﺟﻪ ﺑﻨﻔﺴﻲ .. ﺑﺲ ﻓﻰ ﻛﻼﻡ ﻛﺘﻴﺮ ﻓﻰ ﺍﻟﻤﻮﺿﻮﻉ ﺩﻩ .. ﺍﺣﻨﺎ ﻫﻨﺎ ﻓﻰ ﺑﻠﺪ ﺃﺭﻳﺎﻑ ﻭﺃﻧﺎ ﻋﺎﻳﺸﺔ ﻓﻰ ﺍﻟﺒﻠﺪ ﺩﻯ ﻭﺍﻟﺒﻠﺪ ﺻﻐﻴﺮﻩ ﻭﺍﻟﻜﻞ ﻋﺎﺭﻑ ﺑﻌﻀﻪ .. ﻋﺸﺎﻥ ﻛﺪﻩ ﻣﻔﻴﺶ ﺣﺎﺟﻪ ﺑﺘﺴﺘﺨﺒﻰ
ﻛﺎﻧﺖ " ﻳﺎﺳﻤﻴﻦ " ﺗﺴﺘﻤﻊ ﺍﻟﻴﻬﺎ ﻭﻋﻠﻰ ﻭﺟﻬﻬﺎ ﻋﻼﻣﺎﺕ ﺩﻫﺸﺔ ﻣﻤﺰﻭﺟﺔ ﺑﺎﻷﻟﻢ
ﻧﻈﺮﺕ ﺍﻟﻴﻬﺎ " ﻭﻻﺀ " ﻓﻰ ﺣﻨﻮ ﻗﺎﺋﻠﻪ :
- ﺍﻟﻠﻰ ﺃﻧﺎ ﺷﻴﻔﺎﻩ ﻋﻠﻰ ﻭﺷﻚ ﺩﻟﻮﻗﺘﻰ ﺑﻴﺪﻝ ﻋﻠﻰ ﺍﻧﻰ ﻛﺎﻥ ﻋﻨﺪﻯ ﺣﻖ .. ﻭﺍﻧﻚ ﻓﻌﻼ ﺣﺴﻪ ﺑﺤﺎﺟﻪ ﻧﺤﻴﺘﻪ ﻭﺍﻻ ﻣﻜﻨﺶ ﻛﻼﻣﻰ ﺯﻋﻠﻚ ﻛﺪﻩ .. ﺭﺑﻨﺎ ﻳﻌﻠﻢ ﺍﻧﻰ ﻣﺎﻗﻮﻟﺘﺶ ﺍﻟﻜﻼﻡ ﺩﻩ ﺍﻻ ﻋﺸﺎﻥ ﻣﺶ ﻋﻴﺰﺍﻛﻰ ﺗﺘﺠﺮﺣﻰ .. ﺃﻭ ﻳﺘﻠﻌﺐ ﺑﻴﻜﻰ .. ﺧﺎﺻﺔ ﻭﺍﻧﻰ ﻭﺍﺧﺪﻩ ﺑﺎﻟﻰ ﺍﻥ " ﻋﻤﺮ " ﻣﻬﺘﻢ ﺑﻴﻜﻲ .. ﻭﻭﺍﺧﺪﻩ ﺑﺎﻟﻰ ﻣﻦ ﻧﻈﺮﺍﺗﻪ ﻧﺤﻴﺘﻚ .. ﺃﻧﺎ ﻣﻜﻨﺶ ﻓﻰ ﺧﻮﻑ ﻋﻠﻴﺎ .. ﻻﻧﻪ ﻣﻜﻨﺶ ﺣﺎﺳﺲ ﺑﻴﺎ ﺃﺻﻼً .. ﻟﻜﻨﻰ ﻟﻤﺎ ﺣﺴﻴﺖ ﺍﻧﻪ ﺑﻴﺤﺎﻭﻝ ﻳﻘﺮﺑﻠﻚ .. ﺧﻔﺖ ﻋﻠﻴﻜﻲ .. ﻗﻮﻟﺖ ﻻﺯﻡ ﺃﻧﺒﻬﻚ ..
ﻗﺎﻣﺖ ﻭﺣﻤﻠﺖ ﺣﻘﻴﺒﺘﻬﺎ ﻗﺎﺋﻠﻪ :
- ﺃﻧﺎ ﻣﻀﻄﺮﺓ ﺃﻣﺸﻰ ﺩﻟﻮﻗﺘﻰ ﻋﺸﺎﻥ ﺍﺗﺄﺧﺮﺕ .. ﺃﺷﻮﻓﻚ ﺑﻜﺮﺓ ﺍﻥ ﺷﺎﺀ ﺍﻟﻠﻪ
ﻗﺎﻟﺖ ﺫﻟﻚ ﻭﻏﺎﺩﺭﺕ .. ﻭﻇﻠﺖ " ﻳﺎﺳﻤﻴﻦ " ﻣﻜﺎﻧﻬﺎ ﺷﺎﺭﺩﺓ ﻭﺍﺟﻤﻪ .
***********************
ﺍﻟﺘﻒ ﺍﻟﺠﻤﻴﻊ ﺣﻮﻝ ﻃﺎﻭﻟﺔ ﺍﻟﻌﺸﺎﺀ ﻓﻰ ﺑﻴﺖ ﺍﻟﻤﺰﺭﻋﺔ .. ﺳﺎﺩ ﺍﻟﺼﻤﺖ ﻃﻮﻳﻼً .. ﻇﻠﺖ " ﻛﺮﻳﻤﺔ " ﺗﺮﻣﻖ ﺍﺑﻨﻬﺎ ﺍﻟﺠﺎﻟﺲ ﺃﻣﺎﻣﻬﺎ ﺑﻨﻈﺮﺍﺗﻬﺎ ﺑﻴﻦ ﺍﻟﺤﻴﻦ ﻭﺍﻵﺧﺮ .. ﻗﻄﻌﺖ ﺃﻣﻪ ﻫﺬﺍ ﺍﻟﺼﻤﺖ ﻗﺎﺋﻠﻪ :
- ﻧﺴﻴﺖ ﺃﺳﺄﻟﻚ ﺍﻳﻪ ﺍﻟﺤﺮﻕ ﺍﻟﻠﻰ ﻓﻰ ﺍﻳﺪﻙ ﺩﻩ ﻳﺎ ﻋﻤﺮ
ﺃﻟﻘﻰ " ﻋﻤﺮ " ﻧﻈﺮﺓ ﻋﻠﻰ ﺍﻟﺤﺮﻕ ﻓﻰ ﻳﺪﻩ ﻭﺗﺤﺴﺴﻪ ﻗﺎﺋﻼً :
- ﻋﻘﺎﺏ
ﻗﺎﻟﺖ ﺑﺪﻫﺸﺔ :
- ﻋﻘﺎﺏ
ﻗﺎﻝ ﺑﻤﺮﺍﺭﻩ ﻭﻗﺪ ﺷﺮﺩ ﻗﻠﻴﻞ :
- ﺃﻳﻮﺓ ﻋﻘﺎﺏ .. ﻋﻘﺎﺏ ﻣﻦ ﺭﺑﻨﺎ
ﻗﺎﻃﻌﺖ ﻣﺪﺍﻡ " ﺛﺮﻳﺎ " ﺣﺪﻳﺜﻬﻢ ﻗﺎﺋﻠﻪ :
" - ﺍﻳﻨﺎﺱ " ﺟﺎﻳﻪ ﺑﻜﺮﺓ
ﺍﻟﺘﻔﺘﺖ " ﻛﺮﻳﻤﺔ " ﺍﻟﻴﻬﺎ ﻗﺎﺋﻠﻪ ﺑﺈﺑﺘﺴﺎﻣﻪ :
- ﻛﻮﻳﺲ
ﻗﺎﻟﺖ ﻣﺪﺍﻡ " ﺛﺮﻳﺎ " ﺑﻠﻬﺠﺔ ﻗﻮﻳﺔ :
- ﻛﺎﻧﺖ ﺟﺎﻳﻪ ﺃﺻﻼً ﻋﺸﺎﻥ ﺗﺘﻌﺮﻑ ﻋﻠﻰ ﻋﺮﻭﺳﺔ " ﻋﻤﺮ " .. ﺑﺲ ﺑﻤﺎ ﺍﻥ ﺍﻟﻤﻮﺿﻮﻉ ﺍﺗﻘﻔﻞ .. ﻫﺘﻴﺠﻲ ﺗﻌﺪ ﻳﻮﻣﻴﻦ ﻭﻧﺮﺟﻊ ﺳﻮﺍ
ﺗﺮﻙ " ﻋﻤﺮ " ﺍﻟﻤﻠﻌﻘﺔ ﻣﻦ ﻳﺪﻩ ﺑﺤﺪﻩ ﻭﻧﻈﺮ ﺍﻟﻰ ﻋﻤﺘﻪ ﻗﺎﺋﻼً :
- ﺃﻧﺎ ﻣﺎ ﻗﻮﻟﺘﺶ ﺍﻥ ﺍﻟﻤﻮﺿﻮﻉ ﺍﺗﻘﻔﻞ
ﺗﻮﺗﺮ ﺍﻟﺠﻮ .. ﻗﺎﻟﺖ ﻣﺪﺍﻡ " ﺛﺮﻳﺎ " ﺑﺤﺪﻩ :
- ﻳﻌﻨﻲ ﺍﻳﻪ ؟
ﻧﻈﺮ ﺍﻟﻴﻬﺎ " ﻋﻤﺮ " ﺑﺤﺰﻡ ﻗﺎﺋﻼً :
- ﻳﻌﻨﻲ ﺃﻧﺎ ﻫﺘﺠﻮﺯ " ﻳﺎﺳﻤﻴﻦ .. " ﺍﻟﻤﻮﺿﻮﻉ ﻣﺘﻘﻔﻠﺶ
ﺛﻢ ﻧﻈﺮ ﺍﻟﻰ ﻭﺍﻟﺪﺗﻪ ﻧﻈﺮﻩ ﺫﺍﺕ ﻣﻌﻨﻰ ﻗﺎﺋﻼً :
- ﻳﺎ ﻫﻰ .. ﻳﺎ ﻣﻔﻴﺶ ﺟﻮﺍﺯ
ﺻﺎﺣﺖ ﻋﻤﺘﻪ ﻏﺎﺿﺒﺔ :
- ﺃﻧﺎ ﻣﺶ ﻓﺎﻫﻤﺔ ﺍﻧﺖ ﻟﻴﻪ ﻣﺼﺮ ﻋﻠﻴﻬﺎ .. ﻫﻮ ﺍﻟﻠﻰ ﺧﻠﻘﻬﺎ ﻣﺨﻠﻘﺶ ﻏﻴﺮﻫﺎ
ﺣﺎﻭﻝ " ﻋﻤﺮ " ﺗﻤﺎﻟﻚ ﺃﻋﺼﺎﺑﻪ .. ﻟﻜﻦ ﻛﻠﻤﺎﺕ ﺧﺮﺟﺖ ﺑﺤﺪﻩ ﺷﺪﻳﺪﺓ :
- ﺃﻧﺎ ﻣﺶ ﻓﺎﻫﻢ ﺍﻧﺘﻮﺍ ﻟﻴﻪ ﺣﻜﻤﺘﻮﺍ ﻋﻠﻴﻬﺎ ﻣﻦ ﻗﺒﻞ ﻣﺎ ﺗﺸﻮﻓﻮﻫﺎ .. ﻣﺶ ﺗﺸﻮﻓﻮﻫﺎ ﺍﻷﻭﻝ ﻭﺗﻌﺪﻭﺍ ﻣﻌﺎﻫﺎ ﻭﺑﻌﺪﻳﻦ ﺗﻘﺮﺭﻭﺍ ﻫﻰ ﻣﻨﺎﺳﺒﻪ ﻭﻻ ﻣﺶ ﻣﻨﺎﺳﺒﻪ .. ﺭﻏﻢ ﺍﻥ ﺍﻟﻘﺮﺍﺭ ﻟﻴﺎ ﺑﺲ ﺑﺮﺩﻩ ﺍﻧﺘﻮﺍ ﻋﻴﻠﺘﻰ ﻭﻳﻬﻤﻨﻰ ﺍﻥ ﺍﻟﻌﻼﻗﻪ ﺑﻴﻨﻜﻮﺍ ﻭﺑﻴﻦ ﺍﻻﻧﺴﺎﻧﻪ ﺍﻟﻠﻰ ﺍﺧﺘﺮﻫﺎ ﺗﻜﻮﻥ ﻛﻮﻳﺴﻪ
ﻗﺎﻟﺖ ﺃﻣﻪ ﺑﺒﺮﻭﺩ :
- ﻧﺸﻮﻓﻬﺎ ﺃﻭ ﻣﻨﺸﻮﻓﻬﺎﺵ ﺩﻩ ﻣﺶ ﻫﻴﻐﻴﺮ ﻭﺍﻗﻊ ﺍﻧﻬﺎ ﻣﻄﻠﻘﻪ
ﺃﺿﺎﻓﺖ ﻋﻤﺘﻪ ﻓﻰ ﻋﺼﺒﻴﻪ :
- ﻭﺑﻨﺖ ﻣﻮﻇﻒ ﻋﻠﻰ ﺍﻟﻤﻌﺎﺵ ﻳﻌﻨﻲ ﻻ ﻟﻴﻬﺎ ﺃﺻﻞ ﻭﻻ ﻓﺼﻞ
ﻗﺎﻡ " ﻋﻤﺮ " ﻣﻦ ﻓﻮﺭﻩ ﻏﺎﺿﺒﺎً ﻭﺃﺯﺍﺡ ﻛﺮﺳﻴﻪ ﻭﻗﺎﻝ :
- ﻛﻔﺎﻳﺔ ﻟﺤﺪ ﻛﺪﺓ ﺳﻤﻌﺖ ﺑﻤﺎ ﻓﻴﻪ ﺍﻟﻜﻔﺎﻳﺔ
ﺧﺮﺝ ﻏﺎﺿﺒﺎً ﻣﻦ ﺍﻟﺒﻴﺖ ﻭﺗﻮﺟﻪ ﺍﻟﻰ ﺳﻴﺎﺭﺗﻪ .. ﺭﻛﺐ ﺑﻌﺼﺒﻴﻪ ﺛﻢ ﺍﻧﻄﻠﻖ ﺧﺎﺭﺝ ﺍﻟﻤﺰﺭﻋﺔ
ﺳﺎﺩ ﺍﻟﺼﻤﺖ ﻓﻰ ﺣﺠﺮﺓ ﺍﻟﻄﻌﺎﻡ ﻭﺗﻮﻗﻒ ﺍﻟﺠﻤﻴﻊ ﻋﻦ ﺗﻨﺎﻭﻝ ﻃﻌﺎﻣﻬﻢ .. ﻗﺎﻝ " ﻧﻮﺭ ﺍﻟﺪﻳﻦ " ﻣﻮﺟﻬﺎً ﺣﺪﻳﺜﻪ ﻟﺰﻭﺟﺘﻪ ﻭﺃﺧﺘﻪ :
- ﺍﻧﺘﻮﺍ ﻟﻴﻪ ﻣﺼﺮﻳﻴﻦ ﺗﺨﺴﺮﻭﻩ ؟
ﻧﻈﺮﺕ ﺍﻟﻴﻪ ﺃﺧﺘﻪ ﺑﺤﺪﻩ ﻗﺎﺋﻠﻪ :
- ﻳﻌﻨﻲ ﺍﻧﺖ ﻋﺎﺟﺒﻚ ﺍﻟﻠﻲ ﺍﺑﻨﻚ ﻋﺎﻳﺰ ﻳﻌﻤﻠﻪ ﺩﻩ
ﻗﺎﻝ ﺑﺤﺪﻩ ﻣﻤﺎﺛﻠﻪ :
- ﻭﻫﻮ ﻋﺎﻳﺰ ﻳﻌﻤﻞ ﺍﻳﻪ .. ﻳﺘﺠﻮﺯ ﻋﻠﻰ ﺳﻨﺔ ﺍﻟﻠﻪ ﻭﺭﺳﻮﻟﻪ .. ﺍﻳﻪ ﺍﻟﻤﺸﻜﻠﺔ ﻓﻰ ﻛﺪﻩ
ﻇﻬﺮﺕ ﻋﻼﻣﺎﺕ ﺍﻟﻐﻀﺐ ﻋﻠﻰ ﻭﺟﻪ " ﻛﺮﻳﻤﻪ " ﻭﻗﺎﻟﺖ :
- ﻋﺎﻳﺰ ﻳﺘﺠﻮﺯ ﻭﺍﺣﺪﻩ ﻣﻄﻠﻘﻪ
- ﻭﺍﻳﻪ ﺍﻟﻤﺸﻜﻠﻪ ﻳﻌﻨﻲ ؟ .. ﻃﺎﻟﻤﺎ ﺷﺎﻳﻒ ﺍﻧﻬﺎ ﻣﻨﺎﺳﺒﻪ ﻟﻴﻪ .. ﻭﻃﺎﻟﻤﺎ ﺍﻥ ﺟﻮﺍﺯﺗﻬﺎ ﺍﻷﻭﻟﻰ ﻛﺎﻥ ﺍﻟﻐﻠﻂ ﻣﻦ ﺟﻮﺯﻫﺎ ﻣﺶ ﻣﻨﻬﺎ .. ﻭﻛﻤﺎﻥ ﺟﻮﺍﺯﻫﺎ ﻛﺎﻥ ﺷﻬﺮ ﻭﺍﺣﺪ ﺯﻯ ﻣﺎ ﻗﺎﻟﻨﺎ
ﻗﺎﻟﺖ " ﻛﺮﻳﻤﻪ " ﺑﺈﺳﺘﻐﺮﺍﺏ :
- ﻳﻌﻨﻲ ﺍﻧﺖ ﻣﻮﺍﻓﻖ ؟ .. ﻣﻮﺍﻓﻖ ﺍﻥ ﺍﺑﻨﻚ ﺍﻟﻮﺣﻴﺪ ﻳﺘﺠﻮﺯ ﻭﺍﺣﺪﻩ ﻛﺎﻧﺖ ﻣﺘﺠﻮﺯﻩ ﻗﺒﻞ ﻛﺪﻩ
ﻗﺎﻝ ﺑﺤﺰﻡ :
- ﺃﻳﻮﺓ ﻣﻮﺍﻓﻘﻪ .. ﻻﻥ ﺩﻯ ﺣﺎﺟﻪ ﺗﺨﺼﻪ ﻫﻮ ﻟﻮﺣﺪﻩ ﻣﻠﻨﺎﺵ ﺍﻧﻨﺎ ﻧﺘﺪﺧﻞ ﻓﻴﻬﺎ .. ﻭﺍﺑﻨﻚ ﺭﺍﺟﻞ ﻣﺶ ﻋﻴﻞ ﺻﻐﻴﺮ .. ﺑﻴﺪﻳﺮ ﻣﺠﻤﻮﻋﺔ ﺷﺮﻛﺎﺕ ﻛﺒﻴﺮﺓ ﻓﻰ ﻣﺼﺮ .. ﻣﺶ ﻫﻴﻘﺪﺭ ﻳﺪﻳﺮ ﺣﻴﺎﺗﻪ ؟
ﻗﺎﻟﺖ " ﻛﻮﺛﺮ " ﻓﻰ ﻏﻀﺐ ﻣﻜﺘﻮﻡ :
- ﺍﻧﺘﻮﺍ ﺣﺮﻳﻴﻦ ﻭﺍﻓﻘﻮﺍ ﺯﻯ ﻣﺎ ﺍﻧﺘﻮﺍ ﻋﺎﻳﺰﻳﻦ .. ﺃﻣﺎ ﺃﻧﺎ ﻓﻤﺶ ﻣﻤﻜﻦ ﺃﺑﺎﺭﻙ ﺍﻟﺠﻮﺍﺯﻩ ﺩﻯ .. ﻋﻨﺪﻩ ﻣﻠﻴﻮﻥ ﺑﻨﺖ ﻣﺶ ﻻﻗﻰ ﺍﻻ ﺩﻯ ﻭﻳﺨﺘﺎﺭﻫﺎ .. ﻟﻴﻪ ﻣﻦ ﻗﻠﺖ ﺍﻟﺒﻨﺎﺕ ﻓﻰ ﺍﻟﺒﻠﺪ .. ﻭﺍﺣﺪﺓ ﺯﻳﻬﺎ ﺗﻴﺠﻲ ﺍﻳﻪ ﺟﻤﺐ ﺑﻨﺘﻰ " ﺍﻳﻨﺎﺱ " ﻋﺸﺎﻥ ﻳﺴﻴﺒﻬﺎ ﻭﻳﺒﺺ ﻟﺒﺮﻩ " .. ﺍﻳﻨﺎﺱ " ﻣﺶ ﻋﺠﺒﺎﻩ .. ﻭﺍﻟﺴﺖ ﺍﻟﻠﻰ ﺳﺒﻖ ﻟﻬﺎ ﺍﻟﺠﻮﺍﺯ ﻫﻰ ﺍﻟﻠﻰ ﻋﺠﺒﺎﻩ
ﻧﻈﺮ ﺍﻟﻴﻬﺎ " ﻧﻮﺭ ﺍﻟﺪﻳﻦ " ﻗﺎﺋﻼً ﺑﺒﺮﻭﺩ :
- ﻫﻮ ﺣﺮ .. ﻳﺨﺘﺎﺭ ﺍﻟﺒﻨﺖ ﺍﻟﻠﻰ ﻋﻠﻰ ﻣﺰﺍﺟﻪ .. ﺍﺫﺍ ﻛﺎﻧﺖ ﺍﻟﺒﻨﺖ ﺩﻟﻮﻗﺘﻰ ﻣﺒﺘﺘﻐﺼﺒﺶ ﻋﻠﻰ ﺍﻟﺠﻮﺍﺯ .. ﻫﻨﻴﺠﻰ ﻧﻐﺼﺐ ﺍﻟﻮﻟﺪ
ﻗﺎﻟﺖ " ﺛﺮﻳﺎ " ﺑﺘﻌﺎﻟﻰ :
- ﻭﻳﺘﻐﺼﺐ ﻟﻴﻪ .. ﻫﻰ " ﺍﻳﻨﺎﺱ " ﺩﻯ ﻓﻰ ﺯﻳﻬﺎ .. ﺑﻨﺖ ﻋﻴﻠﻪ ﻭﺃﺩﺏ ﻭﺃﺧﻼﻕ ﻭﺟﻤﺎﻝ ﻭﻣﺎﻝ ﻭﺣﺴﺐ ﻭﻧﺴﺐ .. ﻳﻌﻨﻲ ﻟﻘﻄﺔ ﺃﻯ ﺷﺎﺏ ﻳﺘﻤﻨﺎﻫﺎ
ﻗﺎﻟﺖ " ﻛﺮﻳﻤﺔ " ﻣﺒﺘﺴﻤﻪ ﺗﺤﺎﻭﻝ ﺗﻠﻄﻴﻒ ﺍﻟﺠﻮ :
- ﻃﺒﻌﺎ ﺩﻯ " ﺍﻳﻨﺎﺱ " ﺩﻯ ﺳﺖ ﺍﻟﺒﻨﺎﺕ
ﻗﺎﻟﺖ ﻟﻬﺎ " ﺛﺮﻳﺎ " ﺑﺘﻬﻜﻢ :
- ﻗﻮﻟﻰ ﻻﺑﻨﻚ .. ﺑﺪﻝ ﻣﺎ ﻳﺒﺺ ﺑﺮﻩ ﺍﻟﻌﻴﻠﻪ .. ﺍﺣﻨﺎ ﺃﻭﻟﻰ ﺑﻠﺤﻤﻨﺎ
ﻗﺎﻟﺖ ﺫﻟﻚ ﺛﻢ ﺍﻧﺼﺮﻓﺖ ﻏﺎﺿﺒﻪ ﺍﻟﻰ ﻏﺮﻓﺘﻬﺎ
ﺩﺧﻞ " ﺃﻳﻤﻦ " ﺍﻷﻧﺘﺮﻳﻪ ﻭﻗﺪﻡ ﺍﻟﻰ " ﻋﻤﺮ " ﺻﻨﻴﻪ ﻣﻮﺿﻮﻉ ﻋﻠﻴﻬﺎ ﺷﺎﻯ ﻭﻃﺒﻖ ﻣﻦ ﺍﻟﻜﻴﻚ .. ﻭﻧﻈﺮ ﺍﻟﻰ ﺻﺤﺒﻪ ﻗﺎﺋﻼً :
- ﺩﻭﻕ ﺑﺄﻩ ﺍﻟﻜﻴﻚ ﺩﻩ .. ﺣﺎﺟﻪ ﻛﺪﻩ ﻋﻤﺮﻙ ﻣﺎ ﺩﻭﻗﺖ ﺯﻳﻬﺎ ﻓﻰ ﺣﻴﺎﺗﻚ
ﺗﻨﺎﻭﻝ " ﻋﻤﺮ " ﺭﺷﻔﻪ ﻣﻦ ﻓﻨﺠﺎﻧﻪ ﻭﻇﻞ ﺻﺎﻣﺘﺎً .. ﻧﻈﺮ ﺍﻟﻴﻪ " ﺃﻳﻤﻦ " ﻗﺎﺋﻼً :
- ﺃﻧﺎ ﻛﻨﺖ ﻣﺘﻮﻗﻊ ﻛﺪﻩ
ﻧﻈﺮ ﺍﻟﻴﻪ " ﻋﻤﺮ " ﻗﺎﺋﻼً :
- ﺍﻧﺖ ﻫﺘﻘﻮﻟﻰ ﺯﻯ " ﻛﺮﻡ .. " ﻫﻮ ﻛﻤﺎﻥ ﻛﺎﻥ ﻣﺘﻮﻗﻊ ﻛﺪﻩ .. ﺍﺷﻤﻌﻨﻰ ﺃﻧﺎ ﺍﻟﻮﺣﻴﺪ ﺍﻟﻠﻰ ﻣﺘﻮﻗﻌﺘﺶ ﻛﺪﻩ
ﺃﺧﺬ " ﺃﻳﻤﻦ " ﻓﻨﺠﺎﻧﻪ ﻭﺭﺟﻊ ﺍﻟﻰ ﺍﻟﻮﺭﺍﺀ ﻗﺎﺋﻼً :
- ﻟﻸﺳﻒ ﺍﺣﻨﺎ ﻓﻰ ﻣﺠﺘﻤﻌﻨﺎ ﺷﻮﻳﻪ ﺃﻓﻜﺎﺭ ﻣﺘﺨﻠﻔﺔ ﻋﺎﻳﺰﻩ ﺑﻨﺰﻳﻦ ﻭﻋﻮﺩ ﻛﺒﺮﻳﺖ ﻭﻳﺘﻮﻟﻊ ﻓﻴﻬﺎ .. ﺩﺍﻳﻤﺎً ﻳُﻨﻈﺮ ﻟﻠﻤﺮﺃﺓ ﺍﻟﻤﻄﻠﻘﺔ ﺑﺪﻧﻴﻮﻳﻪ ﻛﺄﻧﻬﺎ ﻣﺶ ﺯﻯ ﺑﺎﻗﻰ ﺍﻟﻨﺴﺎﺀ .. ﺣﺘﻰ ﻟﻮ ﺳﺒﺐ ﺍﻟﻄﻼﻕ ﻣﺶ ﻣﻨﻬﺎ .. ﺑﺮﺩﻩ ﻻﺯﻡ ﻳﺘﺒﺼﻠﻬﺎ ﺍﻟﺒﺼﻪ ﺩﻯ .. ﻭﻛﻞ ﺃﻡ ﺑﺘﺒﻘﻰ ﻫﺘﺠﻨﻦ ﻟﻮ ﺍﺑﻨﻬﺎ ﻗﺎﻝ ﺍﻥ ﻋﺎﻳﺰ ﻳﺘﺠﻮﺯ ﻭﺍﺣﺪﻩ ﺍﺗﺠﻮﺯﺕ ﻗﺒﻞ ﻛﺪﻩ ﻋﻠﻰ ﺍﻟﺮﻏﻢ ﺍﻥ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ﻟﻢ ﻳﺘﺰﻭﺝ ﺍﻻ ﻭﺍﺣﺪﺓ ﺑﺲ ﺑﻜﺮ ﻭﻫﻰ ﺃﻣﻨﺎ ﻋﺎﺋﺸﺔ ﺭﺿﻰ ﺍﻟﻠﻪ ﻋﻨﻬﺎ ﻭﺑﺎﻗﻰ ﺃﻣﻬﺎﺕ ﺍﻟﻤﺆﻣﻨﻴﻦ ﻛﺎﻧﻮﺍ ﻣﺘﺰﻭﺟﺎﺕ ﻗﺒﻞ ﻛﺪﻩ ﻭﺃﻭﻟﻬﻢ ﺃﻣﻨﺎ ﺧﺪﻳﺠﻪ ﺭﺿﻰ ﺍﻟﻠﻪ ﻋﻨﻬﺎ ﺍﻟﻠﻰ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ ﻗﺎﻝ ( ﺍﻧﻰ ﺭُﺯﻗﺖ ﺣﺒﻬﺎ )
ﺗﻤﺘﻢ " ﻋﻤﺮ : "
- ﻋﻠﻴﻪ ﺍﻟﺼﻼﺓ ﻭﺍﻟﺴﻼﻡ
ﺗﻨﻬﺪ ﻋﻤﻴﻘﺎً ﺛﻢ ﻗﺎﻝ :
- ﺃﻧﺎ ﻛﻤﺎﻥ ﻣﻜﻨﺘﺶ ﺃﺗﺨﻴﻞ ﻓﻰ ﻳﻮﻡ ﻣﻦ ﺍﻷﻳﺎﻡ ﺍﻧﻰ ﻣﻤﻜﻦ ﺃﺗﺠﻮﺯ ﻭﺍﺣﺪﻩ ﺍﺗﺠﻮﺯﺕ ﻗﺒﻞ ﻛﺪﻩ .. ﺑﺲ ﺑﺠﺪ ﺣﺒﻴﺘﻬﺎ ﻳﺎ " ﺃﻳﻤﻦ " .. ﻛﻞ ﺣﺎﺟﻪ ﻓﻴﻬﺎ ﻋﺠﺒﺎﻧﻰ .. ﻫﻰ ﺩﻯ ﺍﻟﺰﻭﺟﺔ ﺍﻟﻠﻰ ﺃﺗﻤﻨﺎﻫﺎ ﻓﻌﻼً .. ﻓﺎﻛﺮ ﻟﻤﺎ ﻗﻮﻟﺘﻠﻰ ﺍﻧﻚ ﻣﺶ ﺑﺘﺪﻭﺭ ﻋﻠﻰ ﺯﻭﺟﺔ ﻭﺑﺲ .. ﺍﻧﺖ ﺑﺘﺪﻭﺭ ﻋﻠﻰ ﺃﻡ ﻟﻮﻻﺩﻙ ﻛﻤﺎﻥ
ﺃﻭﻣﺄ " ﺃﻳﻤﻦ " ﺑﺮﺃﺳﻪ .. ﻓﺄﻛﻤﻞ " ﻋﻤﺮ " ﻗﺎﺋﻼً :
- ﺃﻫﻮ ﺍﻧﺎ ﺷﺎﻳﻒ " ﻳﺎﺳﻤﻴﻦ " ﻣﺶ ﺑﺲ ﺯﻭﺟﻪ .. ﺷﺎﻳﻔﻬﺎ ﺃﻡ ﻟﻮﻻﺩﻯ .. ﻭﺻﺎﺣﺒﻪ .. ﻭﺣﺒﻴﺒﻪ .. ﻭﺃﺧﺖ .. ﻭﺻﺪﻳﻘﻪ .. ﻭﻛﻞ ﺣﺎﺟﻪ ﻓﻰ ﺩﻧﻴﺘﻲ .. ﺑﺠﺪ ﺑﺤﺒﻬﺎ ﺃﻭﻯ .. ﻭﻣﺶ ﻫﺮﺗﺎﺡ ﺍﻻ ﻟﻤﺎ ﺗﻜﻮﻥ ﻟﻴﺎ
ﺍﺑﺘﺴﻢ " ﺃﻳﻤﻦ " ﻗﺎﺋﻼً :
- ﺍﻥ ﺷﺎﺀ ﺍﻟﻠﻪ ﻫﺘﻜﻮﻥ ﻟﻴﻚ .. ﺑﺲ ﺍﻧﺖ ﺍﺻﺒﺮ ﺷﻮﻳﺔ .. ﻭﺑﻼﺵ ﺻﺪﺍﻡ ﺑﻴﻨﻚ ﻭﺑﻴﻦ ﺃﻫﻠﻚ .. ﻟﺤﺪ ﻣﺎ ﻳﺘﻘﺒﻠﻮﺍ ﺍﻷﻣﺮ ﺍﻥ ﺷﺎﺀ ﺍﻟﻠﻪ .. ﺑﺲ ﻗﻮﻝ ﻳﺎﺭﺏ
ﺗﻤﺘﻢ " ﻋﻤﺮ " ﻗﺎﺋﻼً :
- ﻳﺎﺭﺏ .. ﻳﺎﺭﺏ ﺗﻜﻮﻥ ﻣﻦ ﻧﺼﻴﺒﻲ
*******************
ﻛﺎﻥ ﻳﻘﻒ ﻳﻌﻄﻰ ﺗﻌﻠﻴﻤﺎﺗﻪ ﻷﺣﺪ ﺍﻟﻌﻤﺎﻝ ﻋﻨﺪﻣﺎ ﻭﺟﺪﻫﺎ ﻓﺠﺄﺓ ﺗﻘﻒ ﺃﻣﺎﻣﻪ .. ﺻﺮﻑ ﺍﻟﻌﺎﻣﻞ ﺛﻢ ﺗﻮﺟﻪ ﻧﺎﺣﻴﺘﻬﺎ ﻗﺎﺋﻼً :
" - ﻧﻬﻠﺔ " .. ﺍﻳﻪ ﺍﻟﻠﻰ ﺟﺎﺑﻚ ﻫﻨﺎ
ﻗﺎﻟﺖ " ﻧﻬﻠﺔ " ﺑﺒﺮﻭﺩ :
- ﻋﺎﻳﺰﺓ ﺃﺗﻜﻠﻢ ﻣﻌﺎﻙ
ﻗﺎﻝ ﻟﻬﺎ ﺑﺘﺄﻓﻒ :
- ﻣﺶ ﻓﺎﺿﻰ .. ﻋﻨﺪﻯ ﺷﻐﻞ
ﻗﺎﻟﺖ ﺑﺤﺪﻩ :
- ﺩﻟﻮﻗﺘﻰ ﻳﺎ " ﻣﺼﻄﻔﻰ "
ﺛﻢ ﺍﺳﺘﻄﺮﺩﺕ ﻗﺎﺋﻠﻪ ﻭﻓﻰ ﻋﻴﻨﻴﻬﺎ ﻧﻈﺮﻩ ﻣﺤﺬﺭﻩ :
- ﺣﺎﻻً
ﺫﻫﺒﺎ ﺍﻟﻰ ﺣﻴﺚ ﻣﻜﺘﺒﻪ ﻭﻃﻠﺐ ﻣﻦ ﺯﻣﻴﻠﻪ ﻣﻐﺎﺩﺭﺓ ﺍﻟﻤﻜﺘﺐ ﻟﻠﺤﻈﺎﺕ .. ﺃﻏﻠﻖ ﺍﻟﺒﺎﺏ ﻭﻧﻈﺮ ﺍﻟﻴﻬﺎ ﻗﺎﺋﻼً ﺑﺒﺮﻭﺩ :
- ﺧﻴﺮ ﻓﻰ ﺍﻳﻪ ؟
ﻧﻈﺮﺕ ﺍﻟﻴﻪ ﻗﺎﺋﻠﻪ :
- ﺃﻧﺎ ﺣﺎﻣﻞ
ﺍﺗﺴﻌﺖ ﻋﻴﻨﺎ " ﻣﺼﻄﻔﻰ " ﺩﻫﺸﻪ ﻭﻫﺘﻒ ﻗﺎﺋﻼً :
- ﻧﻌﻢ ﻳﺎﺧﺘﻰ
ﻗﺎﻟﺖ ﺑﺤﺰﻡ :
- ﺑﻘﻮﻟﻚ ﺃﻧﺎ ﺣﺎﻣﻞ
ﺻﻤﺖ ﻗﻠﻴﻼً ﻳﺤﺎﻭﻝ ﺍﺳﺘﻴﻌﺎﺏ ﺍﻷﻣﺮ ﺛﻢ ﻧﻈﺮ ﺍﻟﻴﻬﺎ ﻗﺎﺋﻼً ﺑﺤﺪﻩ :
- ﻭﺃﻧﺎ ﺍﻳﻪ ﻳﻀﻤﻨﻠﻰ ﺍﻧﻚ ﺣﺎﻣﻞ ﻣﻨﻰ ﺃﻧﺎ .. ﺍﻧﺘﻰ ﺃﺻﻼ ﻭﺍﺣﺪﺓ ﺗﻴﻴﻴﻴﻴﻴﻴﻴﻴﻴﻴﻴﺖ .. ﺭﻭﺣﻰ ﺷﻮﻓﻰ ﻣﻴﻦ ﺃﺑﻮﻩ ﺃﻧﺎ ﻣﺶ ﻣﻤﻜﻦ ﺃﻋﺘﺮﻑ ﺑﻴﻪ
ﺻﺎﺣﺖ " ﻧﻬﻠﺔ " ﺑﺤﺪﻩ :
- ﺁﻩ ﻳﺎ ﺗﻴﻴﻴﻴﻴﻴﻴﻴﻴﻴﻴﻴﺖ .. ﺍﻧﺖ ﻋﺎﺭﻑ ﺍﻥ ﻣﺤﺪﺵ ﻟﻤﺴﻨﻰ ﻏﻴﺮﻙ
ﻗﺎﻝ ﺑﺴﺨﺮﻳﺔ :
- ﻻ ﻣﺶ ﻋﺎﺭﻑ .. ﻭﺃﻧﺎ ﺍﻳﻪ ﻳﺜﺒﺘﻠﻰ ﻛﻼﻣﻚ ﺩﻩ
ﻗﺎﻟﺖ ﺑﺼﺮﺍﻣﺔ :
- ﺑﺴﻴﻄﺔ ﻳﺎ ﺑﺸﻤﻬﻨﺪﺱ .. ﺗﺤﻠﻴﻞ ﺻﻐﻴﺮ ﻟﻠـ DNA ﻳﺘﻌﻤﻞ ﻭﻓﻰ ﺧﻼﻝ ﺷﻬﺮ ﻭﺍﺣﺪ ﺑﺘﻄﻠﻊ ﺍﻟﻨﺘﻴﺠﻪ
ﺑُﻬﺖ " ﻣﺼﻄﻔﻰ " .. ﻓﺄﻛﻤﻠﺖ " ﻧﻬﻠﻪ " ﻗﺎﺋﻠﻪ :
- ﻭﻟﻮ ﺭﻓﻌﺖ ﺑﺎﻟﺘﺤﻠﻴﻞ ﺩﻩ ﻗﻀﻴﺔ ﻫﻘﺪﺭ ﺑﻜﻞ ﺳﻬﻮﻟﺔ ﺍﻧﻰ ﺃﺛﺒﺖ ﺍﻧﻪ ﺍﺑﻨﻚ ﻭﺃﻛﺘﺒﻪ ﺑﺈﺳﻤﻚ ﻛﻤﺎﻥ
ﺟﻠﺲ " ﻣﺼﻄﻔﻰ " ﻓﻠﻢ ﺗﻌﺪ ﻗﺪﻣﺎﻩ ﺗﺤﻤﻼﻧﻪ .. ﺃﺧﺬ ﻳﺘﺨﻴﻞ ﻛﻼﻡ ﻣﻦ ﺣﻮﻟﻪ ﻋﻨﺪﻣﺎ ﺗُﻠﻄﺦ ﺳﻤﻌﺘﻪ ﺑﻬﺬﺍ ﺍﻟﺸﻜﻞ .. ﻗﺎﻝ ﺑﻮﻫﻦ :
- ﻭﺍﻟﻤﻄﻠﻮﺏ ﺩﻟﻮﻗﺘﻰ
ﻗﺎﻟﺖ " ﻧﻬﻠﺔ " ﺑﻘﺴﻮﺓ :
- ﺍﻟﻤﻄﻠﻮﺏ ﺍﻧﻨﺎ ﻧﺘﺠﻮﺯ
ﻗﻔﺰ ﻣﻦ ﻣﻘﻌﺪﻩ ﺻﺎﺋﺤﺎً :
- ﻧﻌﻢ ﻳﺎ ﺭﻭﺡ ﺃﻣﻚ
ﻗﺎﻟﺖ " ﻧﻬﻠﺔ " ﺑﻠﻬﺠﺔ ﺗﻬﺪﻳﺪ :
- ﺍﻋﻤﻠﻬﺎ ﺑﻤﺰﺍﺟﻚ ﺃﺣﺴﻦ ﻣﻦ ﺍﻟﻔﻀﻴﺤﺔ ﻓﻰ ﺍﻟﻤﺤﺎﻛﻢ .. ﺩﻩ ﻏﻴﺮ ﺍﻟﻔﺼﻴﺤﺔ ﺍﻟﻠﻰ ﻫﻌﻤﻠﻬﺎﻟﻚ ﻫﻨﺎ ﻓﻰ ﺷﻐﻠﻚ ﻭﻋﻨﺪ ﺑﻴﺘﻚ .. ﻣﺶ ﻫﺨﻠﻰ ﺣﺪ ﺍﻻ ﻭﻳﺘﻒ ﻓﻰ ﻭﺷﻚ
ﺻﺮﺥ ﻗﺎﺋﻼً :
- ﻭﻫﺘﻔﻀﺤﻰ ﻧﻔﺴﻚ ﺍﻧﺘﻰ ﻛﻤﺎﻥ
ﻗﺎﻟﺖ ﺑﻤﺮﺍﺭﻩ :
- ﺃﻧﺎ ﻛﺪﻩ ﻛﺪﻩ ﺧﻼﺹ ﺍﺗﻔﻀﺤﺖ ﻳﻌﻨﻲ ﻋﻠﻴﺎ ﻭﻋﻠﻰ ﺃﻋﺪﺍﺋﻲ
ﺻﻤﺖ ﻳﺤﺎﻭﻝ ﺍﺳﺘﻴﻌﺎﺏ ﺍﻟﻤﻮﻗﻒ .. ﺛﻢ ﻧﻈﺮ ﺍﻟﻴﻬﺎ ﻗﺎﺋﻼً :
- ﻭﺃﻫﻠﻚ ﻫﺘﻘﻮﻟﻴﻠﻬﻢ ﺍﻳﻪ ﻋﻠﻰ ﺍﻟﺠﻮﺍﺯﻩ ﺍﻟﺴﺮﻳﻌﺔ ﺩﻯ
ﻗﺎﻟﺖ ﺑﺴﺨﺮﻳﻪ :
- ﺃﻫﻠﻰ ؟ .. ﺍﻧﺖ ﻋﺎﺭﻑ ﺍﻥ ﺍﺧﻮﺍﺗﻰ ﻛﻠﻬﻢ ﻣﺘﺠﻮﺯﻳﻦ ﻭﻛﻞ ﻭﺍﺣﺪ ﻓﻰ ﺣﺎﻟﻪ ﻣﺤﺪﺵ ﺑﻴﺴﺄﻝ ﻋﻨﻰ ﻭﻻ ﺃﺻﻼ ﺃﻓﺮﻕ ﻣﻌﺎﻫﻢ ﻓﻰ ﺣﺎﺟﻪ ﻣﻠﻴﺶ ﺍﻻ ﺃﻣﻰ ﻭﺩﻯ ﻣﺎ ﻫﺘﺼﺪﻕ ﺗﺨﻠﺺ ﻣﻨﻰ ﻭﺍﻟﺒﻴﺖ ﻳﻔﻀﻰ ﻋﻠﻴﻬﺎ ﻫﻮ ﻭﺟﻮﺯﻫﺎ
ﻗﺎﻝ ﺑﺴﺨﺮﻳﻪ :
- ﻣﺮﺗﺒﻪ ﻛﻞ ﺣﺎﺟﻪ ﻳﻌﻨﻲ
ﻧﻈﺮﺕ ﺍﻟﻴﻪ ﻗﺎﺋﻠﻪ ﺑﻠﻬﺠﺔ ﺗﻬﺪﻳﺪ :
- ﺁﺧﺮ ﺍﻻﺳﺒﻮﻉ ﺗﻜﻮﻥ ﻛﺘﺒﺖ ﻋﻠﻴﺎ ﻳﺎ " ﻣﺼﻄﻔﻰ .. " ﻭﺇﻻ ﻭﺩﻳﻨﻲ ﻭﻣﺎ ﺃﻋﺒﺪ ﻟﻬﺘﺸﻮﻑ ﻣﻨﻰ ﺍﻟﻠﻰ ﻳﺸﻴﺒﻚ ﻗﺒﻞ ﺃﻭﺍﻧﻚ .. ﻭﺍﻧﺘﻰ ﻋﺎﺭﻑ " ﻧﻬﻠﺔ " ﻟﻤﺎ ﺑﺘﻘﻮﻝ ﺣﺎﺟﻪ ﻣﺒﺘﻘﻮﻟﻬﺎﺵ ﻋﻠﻰ ﺍﻟﻔﺎﺿﻰ .. ﺑﺘﻨﻔﺬ ﻋﻠﻰ ﻃﻮﻝ
ﺧﺮﺟﺖ ﻭﺗﺮﻛﺘﻪ ﻳﺘﺨﺒﻂ ﺑﻴﻦ ﺍﻟﺤﻴﺮﺓ ﻭﺍﻟﺤﺴﺮﺓ ﻭﺍﻟﻨﺪﻡ ﻭﺍﻟﻐﻀﺐ
**********************
ﺟﻠﺴﺖ " ﻳﺎﺳﻤﻴﻦ " ﻓﻰ ﻏﺮﻓﺘﻬﺎ ﻭﺍﺟﻤﻪ .. ﺗﻔﻜﺮ ﻓﻴﻤﺎ ﺳﻤﻌﺘﻪ ﻣﻦ " ﻭﻻﺀ " ﻭﻣﻦ ﻗﺒﻠﻬﺎ " ﺷﻴﻤﺎﺀ .. " ﻛﺎﻥ ﻋﻘﻠﻬﺎ ﻣﺸﺘﺖ ﻟﻠﻐﺎﻳﻪ .. ﻟﻜﻦ ﺍﻟﺸﺊ ﺍﻟﻮﺣﻴﺪ ﺍﻷﻛﻴﺪ .. ﻫﻰ ﺃﻧﻬﺎ ﺗﺮﻳﺪ ﺯﻭﺟﺎً ﺑﺼﻔﺎﺕ ﻣﻌﻴﻨﻪ .. ﻭﻟﻦ ﺗﺘﻨﺎﺯﻝ ﻓﻰ ﻫﺬﻩ ﺍﻟﺼﻔﺎﺕ ﺃﺑﺪﺍً .. ﻓﻰ ﺻﺒﺎﺡ ﺍﻟﻴﻮﻡ ﺍﻟﺘﺎﻟﻰ ﺫﻫﺒﺖ ﺍﻟﻰ ﻋﻤﻠﻬﺎ ﻛﺎﻟﻤﻌﺘﺎﺩ .. ﺍﺳﺘﻘﺒﻠﺘﻬﺎ " ﻭﻻﺀ " ﺑﺎﻹﺑﺘﺴﺎﻡ .. ﻓﺒﺎﺩﻟﺘﻬﺎ " ﻳﺎﺳﻤﻴﻦ " ﺍﻹﺑﺘﺴﺎﻡ .. ﺑﺪﺃﺕ ﻓﻰ ﺃﺩﺍﺀ ﻋﻤﻠﻬﺎ ﺑﺘﺮﻛﻴﺰ ﻭﻓﻰ ﺻﻤﺖ .. ﻭﻓﺠﺄﺓ ﻭﺟﺪﺕ ﺳﻴﺪﺓ ﺗﻘﻒ ﺃﻣﺎﻣﻬﺎ .. ﻛﺎﻥ ﻳﺒﺪﻭ ﻣﻦ ﻣﻼﺑﺴﻬﺎ ﺃﻧﻬﺎ ﺳﻴﺪﻩ ﺭﺍﻗﻴﻪ .. ﻟﻜﻦ ﻟﻢ ﻳﻌﺠﺐ " ﻳﺎﺳﻤﻴﻦ " ﻧﻈﺮﺓ ﺍﻟﺘﻌﺎﻟﻰ ﺍﻟﺘﻰ ﺗﺘﻄﻠﻊ ﺑﻬﺎ ﺍﻟﻴﻬﺎ .. ﺍﻗﺘﺮﺑﺖ ﻣﻨﻬﺎ ﺍﻟﻤﺮﺃﺓ ﻗﺎﺋﻠﻪ :
- ﺍﻧﺘﻰ ﻣﺪﺍﻡ " ﻳﺎﺳﻤﻴﻦ " ؟
ﻗﺎﻟﺖ " ﻳﺎﺳﻤﻴﻦ " ﺑﺼﻮﺕ ﺧﺎﻓﺖ ﻭﻫﻰ ﺗﺸﻌﺮ ﺑﺎﻟﺤﻴﺮﻩ ﻟﻤﻌﺮﻓﺔ ﺗﻠﻚ ﺍﻟﺴﻴﺪﺓ ﺑﺈﺳﻤﻬﺎ :
- ﺃﻳﻮﺓ ﺃﻧﺎ " ﻳﺎﺳﻤﻴﻦ "
ﻧﻈﺮﺕ ﺍﻟﻤﺮﺃﺓ ﺍﻟﻴﻬﺎ ﻣﻦ ﺭﺃﺳﻬﺎ ﺍﻟﻰ ﺃﺧﻤﺺ ﻗﺪﻣﻴﻬﺎ ﻭﻛﺄﻧﻬﺎ ﺗﺘﻔﺤﺺ ﺟﺎﺭﻳﻪ ﻓﻰ ﺳﻮﻕ ﺍﻟﺠﻮﺍﺭﻯ ﺍﺣﻤﺮﺕ ﻭﺟﻨﺘﺎ " ﻳﺎﺳﻤﻴﻦ " ﻣﻦ ﺍﻟﻐﻀﺐ .. ﻭﻋﺎﺩﺕ ﺍﻟﻰ ﺍﻛﻤﺎﻝ ﻋﻤﻠﻬﺎ ﻣﺘﺠﺎﻫﻠﻪ ﺗﻠﻚ ﺍﻟﻤﺮﺃﺓ ﺍﻟﺘﻰ ﺗﺮﻣﻘﻬﺎ ﺑﻨﻈﺮﺍﺕ ﻭﻗﺤﻪ .. ﺍﻗﺘﺮﺑﺖ ﻣﻨﻬﺎ ﺍﻟﻤﺮﺃﺓ ﺃﻛﺜﺮ ﻗﺎﺋﻠﻪ :
- ﺃﻧﺎ ﻋﻤﺖ " ﻋﻤﺮ ﺍﻷﻟﻔﻰ "
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﺑﺪﻫﺸﻪ ﻭﻗﺪ ﺻﺪﻣﺖ ﻋﻨﺪﻣﺎ ﻋﻠﻤﺖ ﺑﺸﺨﺼﻴﺘﻬﺎ .. ﺃﻛﻤﻠﺖ ﻣﺪﺍﻡ " ﺛﺮﻳﺎ " ﺑﻨﺒﺮﻩ ﻣﺘﻌﺎﻟﻴﻪ :
- ﺟﻴﺖ ﺃﺷﻮﻑ ﺍﻟﺒﻨﺖ ﺍﻟﻠﻰ " ﻋﻤﺮ " ﻋﺎﻳﺰ ﻳﺪﺧﻠﻬﺎ ﻋﻴﻠﺘﻨﺎ
ﺍﺣﻤﺮﺕ ﻭﺟﻨﺘﺎ " ﻳﺎﺳﻤﻴﻦ " ﻣﺮﺓ ﺃﺧﺮﻯ ﻟﻜﻦ ﻫﺬﻩ ﺍﻟﻤﺮﺓ ﺧﺠﻼً .. ﻭﺍﺑﺘﺴﻤﺖ ﻟﻤﺪﺍﻡ " ﺛﺮﻳﺎ " ﻗﺎﺋﻠﻪ :
- ﺃﻫﻼ ﻭﺳﻬﻼً ﺑﺤﻀﺮﺗﻚ .. ﻧﻮﺭﺗﻰ ﺍﻟﻤﺰﺭﻋﺔ
ﻗﺎﻟﺖ ﻣﺪﺍﻡ " ﺛﺮﻳﺎ " ﺑﻨﻔﺲ ﺍﻟﻨﺒﺮﺓ ﺍﻟﻤﺘﻌﺎﻟﻴﻪ :
- ﺍﻟﻠﻰ ﻋﺮﻓﻨﺎﻩ ﻣﻦ " ﻋﻤﺮ .. " ﺍﻥ ﺍﻧﺘﻰ ﻭﻭﺍﻟﺪﻙ ﻭﺃﺧﺘﻚ ﺑﺘﺸﺘﻐﻠﻮﺍ ﻫﻨﺎ ﻓﻰ ﺍﻟﻤﺰﺭﻋﺔ
ﺃﻭﻣﺄﺕ " ﻳﺎﺳﻤﻴﻦ " ﺑﺮﺃﺳﻬﺎ ﻗﺎﺋﻠﻪ :
- ﺃﻳﻮﺓ ﻓﻌﻼ
- ﻃﻴﺐ ﺃﻧﺎ ﻫﺘﻜﻠﻢ ﻣﻌﺎﻛﻰ ﻣﻦ ﺍﻵﺧﺮ .. ﻻﻥ ﻃﺒﻌﻰ ﺍﻧﻰ ﻭﺍﺿﺤﻪ ﻭﺻﺮﻳﺤﻪ ﻭﻣﺒﺤﺒﺶ ﺍﻟﻠﻒ ﻭﻻ ﺍﻟﺪﻭﺭﺍﻥ
ﺷﻌﺮﺕ " ﻳﺎﺳﻤﻴﻦ " ﺑﺎﻟﻘﻠﻖ .. ﻗﺎﻟﺖ :
- ﺍﺗﻔﻀﻠﻰ
ﻗﺎﻟﺖ ﻣﺪﺍﻡ " ﺛﺮﻳﺎ " ﺑﻬﺪﻭﺀ ﻭﺣﺰﻡ :
- ﻃﺒﻌﺎ ﺍﻧﺘﻰ ﻋﺎﺭﻓﻪ ﻣﻴﻦ ﻫﻮ " ﻋﻤﺮ .. " ﻭﻫﻮ ﺍﺑﻦ ﻣﻴﻦ .. ﻭﻋﻨﺪﻩ ﺍﻳﻪ .. ﻭﺍﻥ ﺑﻨﺎﺕ ﻛﺘﻴﺮ ﺃﻭﻯ ﻳﺘﻤﻨﻮﻩ .. ﻭﻣﺶ ﺃﻯ ﺑﻨﺎﺕ .. ﺑﻨﺎﺕ ﻟﻬﻢ ﺣﺴﺐ ﻭﻧﺴﺐ .. ﻳﻌﻨﻲ ﺑﻨﺎﺕ ﻣﺘﺘﻌﻴﺒﺶ .. ﻭﻣﻦ ﻧﻔﺲ ﻣﺴﺘﻮﺍﻩ ﺍﻟﻤﺎﺩﻯ ﻭﺍﻹﺟﺘﻤﺎﻋﻰ .. ﺍﻧﺘﻰ ﺑﺄﻩ ﺷﺎﻳﻔﻪ ﺍﻧﻚ ﻫﺘﻜﻮﻧﻰ ﺯﻭﺟﻪ ﻣﻨﺎﺳﺒﻪ ﻟﻮﺍﺣﺪ ﺯﻯ " ﻋﻤﺮ .. " ﻳﻌﻨﻲ ﺷﺎﻳﻔﻪ ﻧﻔﺴﻚ ﺯﻭﺟﻚ ﻳﺘﺸﺮﻑ ﺑﻴﻬﺎ ﻭﻫﻮ ﺑﻴﻘﺪﻣﻬﺎ ﻟﻠﻨﺎﺱ .. ﻭﻻ ﻳﺘﻜﺴﻒ ﻣﻨﻬﺎ ﻭﻣﻦ ﻋﻴﻠﺘﻬﺎ
ﺍﻧﻔﺠﺮﺕ ﺍﻟﺪﻣﺎﺀ ﻓﻰ ﺃﻭﺭﺩﺓ " ﻳﺎﺳﻤﻴﻦ " ﻓﺼﺎﺭ ﻭﺟﻬﻬﺎ ﻣﺜﻞ ﺍﻟﺠﻤﺮﺓ ﺍﻟﻤﺸﺘﻌﻠﻪ .. ﻛﺎﻧﺖ ﺗﺸﻌﺮ ﺑﺒﺮﻛﺎﻥ ﺛﺎﺭ ﺑﺪﺍﺧﻠﻬﺎ ﻟﻮﻗﻊ ﺗﻠﻚ ﺍﻟﻜﻠﻤﺎﺕ ﻋﻠﻴﻬﺎ .. ﻟﻜﻨﻬﺎ ﺭﺍﻋﺖ ﺃﻧﻬﺎ ﺗﺘﺤﺪﺙ ﺍﻟﻰ ﺳﻴﺪﺓ ﻓﻰ ﻋﻤﺮ ﻭﺍﻟﺪﺗﻬﺎ ﺭﺣﻤﻬﺎ ﺍﻟﻠﻪ .. ﻓﻘﺎﻟﺖ ﺑﺼﻮﺕ ﺣﺎﻭﻟﺖ ﺃﻥ ﺗﺠﻌﻠﻪ ﻫﺎﺩﺋﺎً ﺑﻘﺪﺭ ﺍﻹﻣﻜﺎﻥ :
- ﺃﻧﺎ ﻣﺶ ﺷﺎﻳﻔﻪ ﺣﺎﺟﻪ ﺗﻌﻴﺒﻨﻰ ﺃﻭ ﺗﻌﻴﺐ ﻋﻴﻠﺘﻰ .. ﻭﺍﻻﻧﺴﺎﻥ ﺍﻟﻠﻰ ﻫﺘﺠﻮﺯﻩ ﻟﻮ ﻣﺤﺴﺶ ﺍﻧﻰ ﺃﺷﺮﻓﻪ .. ﻳﺒﻘﻰ ﻣﻴﻠﺰﻣﻨﻴﺶ ﺃﺻﻼً
ﺍﺑﺘﺴﻤﺖ ﻣﺪﺍﻡ " ﺛﺮﻳﺎ " ﺑﺴﺨﺮﻳﻪ .. ﺛﻢ ﻗﺎﻟﺖ :
- ﻃﺒﻌﺎ ﺍﻧﺘﻰ ﻋﺎﺭﻓﻪ ﺍﻥ " ﻋﻤﺮ " ﻛﺎﻥ ﺧﺎﻃﺐ ﻗﺒﻞ ﻛﺪﻩ
ﺃﻭﻣﺄﺕ " ﻳﺎﺳﻤﻴﻦ " ﺑﺮﺃﺳﻬﺎ ﻓﻰ ﺻﻤﺖ .. ﻓﺄﻛﻤﻠﺖ ﻗﺎﺋﻠﻪ :
- ﻫﻰ ﻭﺃﻫﻠﻬﺎ ﻛﺎﻧﻮﺍ ﻃﻤﻌﺎﻧﻴﻦ ﻓﻰ " ﻋﻤﺮ " .. ﻭﻓﻀﻠﺖ ﺍﻟﺒﻨﺖ ﺗﻠﻒ ﻋﻠﻴﻪ ﻭﺗﻌﻤﻞ ﺍﻟﻤﺴﺘﺤﻴﻞ ﻋﺸﺎﻥ ﺍﻟﺠﻮﺍﺯﻩ ﺩﻯ ﺗﺘﻢ ﻟﺤﺪ ﻣﺎ ﻛﺸﻔﻬﺎ ﻋﻠﻰ ﺣﻘﻴﻘﺘﻬﺎ .. ﻭﻓﺴﺦ ﺍﻟﺨﻄﻮﺑﻪ
ﺃﺧﺮﺟﺘﻬﺎ ﻣﺪﺍﻡ " ﺛﺮﻳﺎ " ﻣﻦ ﺣﻴﺮﺗﻬﺎ ﻋﻨﺪﻣﺎ ﺃﺧﺒﺮﺗﻬﺎ ﺑﺴﺒﺐ ﻓﺴﺦ ﺍﻟﺨﻄﻮﺑﺔ .. ﻷﻥ ﻫﺬﺍ ﺍﻷﻣﺮ ﻇﻠﺖ ﺗﻔﻜﺮ ﻓﻴﻪ ﻛﺜﻴﺮﺍً .. ﺃﻛﻤﻠﺖ ﻣﺪﺍﻡ " ﺛﺮﻳﺎ " ﻗﺎﺋﻠﻪ ﺑﺸﺊ ﻣﻦ ﺍﻟﻜﺒﺮ :
- ﻋﺸﺎﻥ ﻛﺪﻩ ﻻﺯﻡ ﺍﻟﻤﺮﺓ ﺩﻯ ﻟﻤﺎ ﻳﻴﺠﻰ ﻳﺨﺘﺎﺭ .. ﻳﺨﺘﺎﺭ ﺻﺢ .. ﻭﻛﻠﻨﺎ ﻻﺯﻡ ﻧﺸﺎﺭﻛﻪ ﺍﻻﺧﺘﻴﺎﺭ ﺩﻩ .. ﻻﻥ ﺍﻟﺒﻨﺖ ﺍﻟﻠﻰ ﻫﻴﺘﺠﻮﺯﻫﺎ ﻫﺘﺸﻴﻞ ﺍﺳﻢ ﻋﻴﻠﺘﻨﺎ ﺍﻟﻠﻰ ﻃﻮﻝ ﻋﻤﺮﻫﺎ ﻓﻰ ﺍﻟﺴﻤﺎ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﺑﺸﻔﻘﻪ .. ﻧﻌﻢ ﺑﺸﻔﻘﻪ ﻓﻠﻘﺪ ﺗﺬﻛﺮﺕ ﺣﺪﻳﺚ ﺍﻟﻨﺒﻲ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ " ﻟﻦ ﻳﺪﺧﻞ ﺍﻟﺠﻨﺔ ﻣﻦ ﻛﺎﻥ ﻓﻰ ﻗﻠﺒﻪ ﻣﺜﻘﺎﻝ ﺫﺭﻩ ﻣﻦ ﻛﺒﺮ " .. ﺃﻛﻤﻠﺖ ﻣﺪﺍﻡ " ﺛﺮﻳﺎ " ﻗﺎﺋﻠﻪ :
- ﺍﻟﻠﻰ ﻋﺎﻳﺰﻩ ﺃﻗﻮﻟﻪ .. ﺍﻧﻰ ﺷﺎﻳﻔﻪ ﺍﻧﻚ ﺍﺧﺮ ﻭﺍﺣﺪﻩ ﻣﻤﻜﻦ ﺗﻜﻮﻧﻰ ﻣﻨﺎﺳﺒﻪ ﻟﻌﻴﻠﺔ " ﺍﻷﻟﻔﻰ .. " ﺍﻧﺘﻰ ﻭﺍﺣﺪﺓ ﻛﻮﻳﺴﺔ ﻭﺃﻛﻴﺪ ﻫﺘﻼﻗﻰ ﺍﻧﺴﺎﻥ ﻛﻮﻳﺲ ﺯﻳﻚ ﻟﻪ ﻧﻔﺲ ﻇﺮﻭﻓﻚ ﻭﻣﻦ ﻧﻔﺲ ﻣﺴﺘﻮﺍﻛﻰ
ﺷﻌﺮﺕ " ﻳﺎﺳﻤﻴﻦ " ﺑﺎﻟﻌﺒﺮﺍﺕ ﺗﺤﺎﻭﻝ ﺃﻥ ﺗﺠﺪ ﺍﻟﻄﺮﻳﻖ ﻟﻌﻴﻨﻴﻬﺎ .. ﻟﻜﻨﻬﺎ ﺃﻭﻗﻔﺘﻬﺎ ﺑﺤﺰﻡ .. ﻟﻦ ﺗﺴﻤﻊ ﻟﺘﻠﻚ ﺍﻟﻤﺮﺃﺓ ﺍﻟﻤﺘﻐﻄﺮﺳﺔ ﺃﻥ ﺗﺮﻯ ﺗﺄﺛﻴﺮ ﻛﻠﻤﺎﺗﻬﺎ ﺍﻟﻤﺴﻤﻮﻣﺔ ﻋﻠﻴﻬﺎ .. ﻗﺎﻟﺖ " ﻳﺎﺳﻤﻴﻦ " ﺑﺼﻮﺕ ﻣﺮﺗﺠﻒ :
- ﺃﻧﺎ ﻟﺴﻪ ﻣﺪﺗﺶ ﻗﺮﺍﺭ ﻓﻰ ﺍﻟﻤﻮﺿﻮﻉ ﺩﻩ
ﻗﺎﻟﺖ " ﺛﺮﻳﺎ " ﺑﺴﺨﺮﻳﺔ :
- ﻫﻮ ﻓﻰ ﻭﺍﺣﺪﻩ ﻋﺎﻗﻠﻪ ﺗﻘﻮﻝ ﻟـ " ﻋﻤﺮ " ﻷ
ﺷﻌﺮﺕ " ﻳﺎﺳﻤﻴﻦ " ﺑﻤﺰﻳﺪ ﻣﻦ ﺍﻟﺤﻨﻖ .. ﻓﺄﻛﻤﻠﺖ ﺛﺮﻳﺎ :
- ﺃﻧﺎ ﺑﺲ ﺣﺒﻴﺖ ﺃﻧﺼﺤﻚ .. ﺍﻟﻔﺮﻕ ﺑﻴﻨﻚ ﻭﺑﻴﻦ " ﻋﻤﺮ " ﻫﻴﺪﻣﺮ ﺣﻴﺎﺗﻜﻮﺍ ﺑﻌﺪ ﻛﺪﻩ .. ﻫﻮ ﻣﻤﻜﻦ ﻳﻜﻮﻥ ﺑﻴﺤﺒﻚ ﺩﻟﻮﻗﺘﻰ .. ﺑﺲ ﺑﻌﺪ ﺍﻟﺠﻮﺍﺯ ﺍﻟﺤﺐ ﺑﻴﻀﻴﻊ ﻭﺍﻟﺤﺎﺟﺎﺕ ﺍﻟﺘﺎﻧﻴﺔ ﻫﻰ ﺍﻟﻠﻰ ﺑﺘﻈﻬﺮ .. ﺳﺎﻋﺘﻬﺎ ﻫﻴﻨﺪﻡ ﻋﻠﻰ ﺍﺧﺘﻴﺎﺭﻩ .. ﻭﻋﻠﻰ ﺗﺴﺮﻋﻪ .. ﻭﻫﻴﻌﺮﻑ ﺍﻧﻜﻮﺍ ﻣﺶ ﻣﻨﺎﺳﺒﻴﻦ ﻟﺒﻌﺾ .. ﺃﻧﺎ ﺑﻘﻮﻟﻚ ﺍﻟﻜﻼﻡ ﺩﻩ ﻻﻥ ﺃﻛﻴﺪ ﺍﻧﺘﻰ ﻣﺶ ﻋﺎﻳﺰﻩ ﺗﻜﻮﻧﻰ ﻣﻄﻠﻘﺔ ﻟﻠﻤﺮﺓ ﺍﻟﺘﺎﻧﻴﺔ
ﺷﻌﺮﺕ " ﻳﺎﺳﻤﻴﻦ " ﻭﻛﺄﻧﻬﺎ ﺗﻠﻘﺖ ﺻﻔﻌﺔ ﻗﻮﻳﺔ ﻋﻠﻰ ﻭﺟﻬﻬﺎ .. ﺍﻵﻥ ﻟﻢ ﺗﻌﺪ ﺗﺴﺘﻄﻴﻊ ﻛﺒﺢ ﺟﻤﺎﺡ ﻋﺒﺮﺍﺗﻬﺎ ﺍﻟﺘﻰ ﺃﺧﺬﺕ ﺗﺘﺠﻤﻊ ﻓﻰ ﻋﻴﻨﻴﻬﺎ ﻣﻬﺪﺩﻩ ﺑﺎﻟﺴﻘﻮﻁ ﻓﻰ ﺃﻯ ﻟﺤﻈﻪ .. ﻋﻠﻤﺖ ﻣﺪﺍﻡ " ﺛﺮﻳﺎ " ﺃﻧﻬﺎ ﻟﻤﺴﺖ ﻭﺗﺮﺍً ﺣﺴﺎﺳﺎ .. ﻓﺄﻛﻤﻠﺖ ﺑﻘﺴﻮﺓ :
- ﻫﻮ ﺩﻩ ﺍﻟﻠﻰ ﻫﻴﺤﺼﻞ ﺑﻌﺪ ﻣﺎ ﻳﻔﻮﻕ ﻣﻦ ﺍﻟﻨﺰﻭﺓ ﺍﻟﻠﻰ ﻫﻮ ﻓﻴﻬﺎ .. ﻭﻳﻘﺎﺭﻥ ﺑﻴﻨﻚ ﻭﺑﻴﻦ ﺍﻟﺒﻨﺎﺕ ﺍﻟﻠﻰ ﺣﻮﻟﻴﻪ .. ﺯﻱ ﺑﻨﺘﻰ " ﺍﻳﻨﺎﺱ " ﻣﺜﻼ .. ﻫﻰ ﺟﺎﻳﻪ ﺍﻟﻤﺰﺭﻋﺔ ﺑﻌﺪ ﺷﻮﻳﺔ ﻟﻤﺎ ﺗﺸﻮﻓﻴﻬﺎ ﻫﺘﻌﺮﻓﻰ ﻧﻮﻋﻴﺔ ﺍﻟﺒﻨﺎﺕ ﺍﻟﻠﻰ ﻓﻌﻼً ﻣﻨﺎﺳﺒﻪ ﻟـ " ﻋﻤﺮ "
ﺻﻤﺘﺖ ﻗﻠﻴﻼ ﺛﻢ ﻗﺎﻟﺖ ﺑﺈﺑﺘﺴﺎﻣﻪ ﻣﺼﻄﻨﻌﻪ :
- ﺍﻧﺘﻰ ﺷﻜﻠﻚ ﺑﻨﺖ ﻃﻴﺒﺔ ﻭﺗﺴﺘﺎﻫﻠﻰ ﻛﻞ ﺧﻴﺮ .. ﺑﺲ ﻋﺸﺎﻥ ﻣﺘﺮﺟﻌﻴﺶ ﺗﻨﺪﻣﻰ ﻻﺯﻡ ﺗﻔﻜﺮﻯ ﻛﻮﻳﺲ .. ﻭﺷﻜﻠﻚ ﻛﻤﺎﻥ ﻋﺎﻗﻠﺔ ﻭﻋﺸﺎﻥ ﻛﺪﻩ ﺃﻧﺎ ﻭﺍﺛﻘﻪ ﺍﻧﻚ ﻣﺶ ﻫﺘﺠﻴﺒﻰ ﺳﻴﺮﻩ ﻝ " ﻋﻤﺮ " ﻋﻦ ﻛﻼﻣﻰ ﻣﻌﺎﻛﻰ .. ﺍﻧﺎ ﺍﺗﻜﻠﻤﺖ ﻋﺸﺎﻥ ﻣﺼﻠﺤﺘﻜﻮﺍ ﺍﻧﺘﻮﺍ ﺍﻻﺗﻨﻴﻦ .. ﻭﻟﻮ ﺍﺣﺘﺠﺘﻰ ﺣﺎﺟﻪ ﻓﻰ ﺃﻯ ﻭﻗﺖ ﻋﺮﻓﻴﻨﻲ
ﺃﻧﻬﺖ ﻛﻼﻣﻬﺎ ﺛﻢ ﺍﺳﺘﺪﺍﺭﺕ ﻭﺍﻧﺼﺮﻓﺖ .. ﺷﻌﺮﺕ " ﻳﺎﺳﻤﻴﻦ " ﺑﺎﻷﻟﻢ ﻳﻐﺰﻭ ﻗﻠﺒﻬﺎ .. ﻭﺑﻨﻔﺴﻬﺎ ﻳﻀﻴﻖ .. ﻭﺳﻤﺤﺖ ﻟﺪﻣﻮﻋﻬﺎ ﺃﺧﻴﺮﺍً ﺑﺎﻟﺴﻘﻮﻁ .. ﻟﻢ ﺗﺘﻌﺮﺽ ﻟﻤﺜﻞ ﻫﺬﻩ ﺍﻹﻫﺎﻧﻪ ﻣﻦ ﻗﺒﻞ .. ﺷﻌﺮﺕ ﻭﻛﺄﻧﻬﺎ ﻛﺎﻧﺖ ﺗﻘﻒ ﺃﻣﺎﻡ ﺗﻠﻚ ﺍﻟﻤﺮﺃﺓ ﻋﺎﺭﻳﻪ ﻛﻴﻮﻡ ﻭﻟﺪﺗﻬﺎ ﺃﻣﻬﺎ .. ﺷﻌﺮﺕ ﺑﺄﻥ ﻫﺬﻩ ﺍﻟﻤﺮﺃﺓ ﺗﻮﺟﻪ ﺍﻟﻰ ﻗﻠﺒﻬﺎ ﻭﺭﻭﺣﻬﺎ ﻃﻌﻨﺎﺕ ﺣﺎﺩﻩ ﻏﻴﺮ ﻣﺒﺎﻟﻴﻪ ﺑﺘﺄﺛﻴﺮ ﺗﻠﻚ ﺍﻟﻄﻌﻨﺎﺕ ﻋﻠﻴﻬﺎ .. ﺷﻌﺮﺕ ﺑﺄﻧﻬﺎ ﺗﺨﺘﻨﻖ .. ﺃﺧﺬﺕ ﻧﻔﺴﺎً ﻋﻤﻴﻘﺎً ﺗﺤﺎﻭﻝ ﺑﻪ ﺍﻳﺼﺎﻝ ﺍﻟﻬﻮﺍﺀ ﺍﻟﻰ ﺭﺋﺘﻴﻬﺎ .. ﻟﻜﻦ ﻫﻴﻬﺎﺕ .. ﻣﺎﺯﺍﻟﺖ ﺗﺸﻌﺮ ﺃﻥ ﺍﻟﺪﻧﻴﺎ ﺗﻀﻴﻖ ﻭﺗﻀﻴﻖ ﺣﺘﻰ ﺃﻃﺒﻘﺖ ﻋﻠﻰ ﺃﻧﻔﺎﺳﻬﺎ .. ﺃﺧﺮﺟﻬﺎ ﺻﻮﺕ " ﻭﻻﺀ " ﻣﻦ ﺷﺮﻭﺩﻫﺎ :
" - ﻳﺎﺳﻤﻴﻦ " ﻣﺎﻟﻚ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻭﺍﻟﻜﻠﻤﺎﺕ ﻣﺤﺒﻮﺳﻪ ﻓﻰ ﺣﻠﻘﻬﺎ
ﻗﺎﻟﺖ ﻟﻬﺎ " ﻭﻻﺀ " ﺑﻠﻬﻔﻪ :
- ﺍﻳﻪ ﻣﺎﻟﻚ .. ﺗﻌﺎﻟﻰ ﺍﻋﺪﻯ ﺟﻮﻩ ﻃﻴﺐ .. ﻫﻰ ﻋﻤﺖ " ﻋﻤﺮ " ﻗﺎﻟﺘﻠﻚ ﺍﻳﻪ ﺿﺎﻳﻘﻚ ﻛﺪﻩ
ﺗﺮﻛﺘﻬﺎ " ﻳﺎﺳﻤﻴﻦ " ﻭﻣﺸﺖ ﻓﻰ ﻃﺮﻳﻘﻬﺎ ﻭﺻﻠﺖ ﺍﻟﻰ ﺣﻴﺚ ﻳﻌﻤﻞ ﻭﺍﻟﺪﻫﺎ ﻓﻨﺎﺩﺗﻪ .. ﺃﻗﺒﻞ ﻭﺍﻟﺪﻫﺎ .. ﻓﻘﺎﻟﺖ ﻟﻪ ﺑﺤﺰﻡ :
- ﻗﻮﻝ ﻟﻠﺒﺸﻤﻬﻨﺪﺱ " ﻋﻤﺮ " ﺍﻧﻰ ﺭﻓﻀﺘﻪ
ﺑﻬﺖ " ﻋﺒﺪ ﺍﻟﺤﻤﻴﺪ " ﻭﻗﺎﻝ :
- ﻟﻴﻪ ﻳﺎ ﺑﻨﺘﻰ ﻛﺪﻩ ﺩﻩ ﺭﺍﺟﻞ ﻛﻮﻳﺲ ﻣﻴﺘﻌﻴﺒﺶ
ﻗﺎﻟﺖ " ﻳﺎﺳﻤﻴﻦ " ﺑﺼﻮﺕ ﻣﺘﻬﺪﺝ :
- ﺃﺭﺟﻮﻙ ﻳﺎ ﺑﺎﺑﺎ ﻣﺘﻀﻐﻄﺶ ﻋﻠﻴﺎ
ﺛﻢ ﺗﺴﺎﻗﻄﺖ ﻋﺒﺮﺓ ﻣﻦ ﻋﻴﻨﻴﻬﺎ ﻭﻫﻰ ﺗﻨﻈﺮ ﺍﻟﻴﻬﺎ ﻗﺎﺋﻠﻪ :
- ﻭﻻ ﻫﺘﻐﺼﺒﻨﻰ ﻋﻠﻴﻪ ﺯﻯ " ﻣﺼﻄﻔﻰ " ؟
ﺑﺪﺍ ﺍﻟﺘﺄﺛﺮ ﻋﻠﻰ ﻭﺟﻪ " ﻋﺒﺪ ﺍﻟﺤﻤﻴﺪ " ﻭﻗﺎﻝ :
- ﻟﻤﺎ ﺍﻟﻮﻻﺩ ﺑﻴﻐﻠﻄﻮﺍ ﺍﻷﺏ ﺑﻴﺴﺎﻣﺢ .. ﻟﻜﻦ ﻟﻤﺎ ﺍﻷﺏ ﺑﻴﻐﻠﻂ ﻭﻻﺩﻩ ﺑﻴﻜﻮﻧﻮﺍ ﻓﺎﻛﺮﻳﻦ ﻏﻠﻄﺘﻪ ﻭﻣﺒﻴﻨﺴﻮﻫﺎﺵ ﺃﺑﺪﺍً
ﻧﻈﺮﺕ ﺍﻟﻰ ﻭﺍﻟﺪﻫﺎ ﺑﺘﺄﺛﺮ ﻗﺎﺋﻠﻪ :
- ﺃﻧﺎ ﺁﺳﻔﻪ ﻳﺎ ﺑﺎﺑﺎ ﻣﻜﻨﺶ ﻗﺼﺪﻯ ﺃﺯﻋﻠﻚ .. ﺃﻧﺎ ﺑﺲ ﻣﻀﺎﻳﻘﻪ ﺷﻮﻳﺔ ﻭﻣﺶ ﻋﺎﺭﻓﻪ ﺃﻧﺎ ﺑﻘﻮﻝ ﺍﻳﻪ .. ﺣﻘﻚ ﻋﻠﻴﺎ
- ﺧﻼﺹ ﻳﺎ ﺑﻨﺘﻰ ﻣﺤﺼﻠﺶ ﺣﺎﺟﻪ .. ﻭﻣﺎﺩﻣﺘﻰ ﻣﺶ ﻋﺎﻳﺰﺍﻩ ﺧﻼﺹ .. ﺩﻯ ﺣﻴﺎﺗﻚ ﻣﺶ ﻫﻐﺼﺒﻚ ﻋﻠﻰ ﺟﻮﺍﺯ ﺗﺎﻧﻰ ﺃﺑﺪﺍً
ﺍﺑﺘﺴﻤﺖ ﻟﻪ ﻗﺎﺋﻠﻪ :
- ﺭﺑﻨﺎ ﻳﺨﻠﻴﻚ ﻟﻴﺎ ﻳﺎ ﺑﺎﺑﺎ .. ﻭﺑﻌﺪ ﺍﺫﻧﻚ ﺃﻧﺎ ﻫﺮﻭﺡ ﻝ " ﺳﻤﺎﺡ " ﺃﻋﺪ ﻣﻌﺎﻫﺎ ﺷﻮﻳﺔ
- ﻣﺎﺷﻰ ﻳﺎ ﺑﻨﺘﻰ ﺑﺲ ﻣﺘﺘﺄﺧﺮﻳﺶ .. ﻭﺧﻠﻯﺐ ﺍﻟﻚ ﻣﻦ ﻧﻔﺴﻚ
ﺫﻫﺒﺖ ﻟﺪﻛﺘﻮﺭ " ﺣﺴﻦ " ﻭﺍﺳﺘﺄﺫﻧﺘﻪ ﻓﻰ ﺍﻻﻧﺼﺮﺍﻑ ﻷﻧﻬﺎ ﺗﺸﻌﺮ ﺑﺘﻮﻋﻚ .. ﻓﻘﺎﻝ ﻟﻬﺎ :
- ﻻ ﺳﻼﻣﺘﻚ ﺃﻟﻒ ﺳﻼﻣﻪ .. ﺍﺣﻨﺎ ﺍﺻﻼً ﺍﻟﻨﻬﺎﺭﺩﺓ ﻳﻌﺘﺒﺮ ﻣﻔﻴﺶ ﺷﻐﻞ ﻛﺘﻴﺮ .. ﻣﻔﻴﺶ ﻣﺸﻜﻠﺔ ﺭﻭﺣﻰ ﺍﺭﺗﺎﺣﻰ
ﺷﻜﺮﺗﻪ ﻗﺎﺋﻠﻪ :
- ﺷﻜﺮﺍً ﻳﺎ ﺩﻛﺘﻮﺭ
ﻏﺎﺩﺭﺕ ﻭﺍﺗﺼﻠﺖ ﺑـ " ﺳﻤﺎﺡ " ﻗﺎﺋﻠﻪ :
" - ﺳﻤﺎﺡ " ﺍﻧﺘﻰ ﻓﺎﺿﻴﻪ ﺍﻟﻨﻬﺎﺭﺩﺓ
- ﺁﻩ ﻓﺎﺿﻴﺔ ﺧﻴﺮ ﻫﺘﻴﺠﻰ ؟
- ﻟﻮ ﻣﻜﻨﺶ ﻳﻀﺎﻳﻘﻚ .. ﺣﺴﻪ ﺍﻧﻰ ﻣﺨﻨﻮﻗﻪ ﻭﻣﺤﺘﺎﺟﻪ ﺍﺗﻜﻠﻢ ﻣﻊ ﺣﺪ
- ﻃﻴﺐ ﻳﺎ ﺣﺒﻴﺒﺘﻰ ﻣﻨﺘﻈﺮﺍﻛﻰ ﻭﻣﺘﻘﻠﻘﻴﺶ " ﺃﻳﻤﻦ " ﻫﻴﺘﺄﺧﺮ ﺍﻟﻨﻬﺎﺭﺩﺓ ﻣﺶ ﺟﺎﻯ ﺍﻻ ﺑﺎﻟﻠﻴﻞ
- ﺧﻼﺹ ﺃﻧﺎ ﺧﺎﺭﺟﻪ ﺃﺭﻛﺐ ﺣﺎﻻ
ﺃﺛﻨﺎﺀ ﺳﻴﺮﻫﺎ ﻓﻰ ﺍﺗﺠﺎﻩ ﺍﻟﺒﻮﺍﺑﻪ .. ﻭﻣﻦ ﺑﻌﻴﺪ .. ﺭﺃﺕ ﺳﻴﺎﺭﺓ ﺗﺪﻟﻒ ﺍﻟﻰ ﺩﺍﺧﻞ ﺍﻟﻤﺰﺭﻋﺔ .. ﺗﻮﻗﻔﺖ " ﻳﺎﺳﻤﻴﻦ .. " ﺭﺍﺕ ﻓﺘﺎﺓ ﺗﻨﺰﻝ ﻣﻦ ﺍﻟﺴﻴﺎﺭﺓ .. ﻓﺘﺎﺓ ﺟﻤﻴﻠﺔ ﺫﺍﺕ ﺷﻌﺮ ﻃﻮﻳﻞ ﺗﺮﺗﺪﻯ ﻣﻼﺑﺲ ﺃﻧﻴﻘﺔ ﺿﻴﻘﻪ ﻋﺎﺭﻳﺔ ﺍﻟﺴﺎﻗﻴﻦ .. ﺗﻔﺤﺼﺘﻬﺎ " ﻳﺎﺳﻤﻴﻦ " ﻭﻫﻰ ﺗﺴﺄﻝ ﻧﻔﺴﻬﺎ ﺗُﺮﻯ ﻫﻞ ﻫﻰ ﺗﻠﻚ ﺍﻟﻔﺘﺎﺓ ﺍﻟﻤﺪﻋﻮﺓ " ﺍﻳﻨﺎﺱ " ﻭﺍﻟﺘﻰ ﺣﺪﺛﺘﻬﺎ ﻣﺪﺍﻡ " ﺛﺮﻳﺎ " ﻋﻨﻬﺎ .. ﻛﺎﺩﺕ ﺃﻥ ﺗﻬﻢ ﺑﺎﻹﻧﺼﺮﺍﻑ ﻟﻜﻨﻬﺎ ﻭﺟﺪﺕ " ﻋﻤﺮ " ﻳﺨﺮﺝ ﻣﻦ ﺍﻟﺒﻴﺖ ﻭﻳﺬﻫﺐ ﻓﻰ ﺍﺗﺠﺎﻩ ﺗﻠﻚ ﺍﻟﻔﺘﺎﺓ .. ﻭ .... ﻛﺎﻧﺖ ﺍﻟﻤﻔﺎﺟﺄﺓ ﺍﻟﺘﻰ ﻋﺼﻔﺖ ﺑﻜﻞ ﻛﻴﺎﻥ " ﻳﺎﺳﻤﻴﻦ " .. ﺃﻟﻘﺖ ﺍﻟﻔﺘﺎﺓ ﻧﻔﺴﻬﺎ ﺑﻴﻦ ﺫﺭﺍﻋﻴﻪ ﻭﻗﺒﻠﺘﻪ ﻋﻠﻰ ﻭﺟﻨﺘﻴﻪ ﺑﺪﻭﻥ ﺃﺩﻧﻰ ﺧﺠﻞ ﺃﻭ ﺣﻴﺎﺀ .. ﺷﻌﺮﺕ " ﻳﺎﺳﻤﻴﻦ " ﺑﺴﻜﻴﻦ ﺣﺎﺩ ﻳُﻐﺮﺱ ﻓﻰ ﻗﻠﺒﻬﺎ .. ﻧﻈﺮﺕ ﺍﻟﻰ " ﻋﻤﺮ " ﻟﺘﺘﺒﻴﻦ ﺭﺩ ﻓﻌﻠﻪ .. ﻟﻜﻨﻬﺎ ﻭﺟﺪﺕ ﻣﻼﻣﺤﻪ ﻋﺎﺩﻳﻪ .. ﻭﻛﺄﻥ ﻫﺬﺍ ﻫﻮ ﺍﻟﻄﺒﻴﻌﻰ ﻭﺍﻟﻤﻌﺘﺎﺩ .. ﻭﻛﺄﻥ ﻣﺲ ﺍﻣﺮﺃﺓ ﻻ ﺗﺤﻞ ﻟﻪ ﺃﻣﺮﺍً ﻋﺎﺩﻳﺎ ﺑﺎﻟﻨﺴﺒﻪ ﻟﻪ .. ﻭﻛﺄﻥ ﺗﻠﻚ ﺍﻷﻣﻮﺭ ﺃﺻﺒﺤﺖ ﻋﺎﺩﻳﺔ ﻟﻤﺠﺮﺩ ﺃﻧﻬﺎ ﺍﺑﻨﺔ ﻋﻤﺘﻪ .. ﻛﺎﻧﺖ ﺍﻟﻔﺘﺎﺓ ﺗﻨﻈﺮ ﺍﻟﻴﻪ ﻣﺒﺘﺴﻤﻪ ﺿﺎﺣﻜﻪ ﺗﺘﺤﺪﺙ ﻭﺗﺘﺤﺪﺙ .. ﻭﻫﻮ ﻭﺍﻗﻒ ﻳﺴﺘﻤﻊ ﻭﻳﺘﺤﺪﺙ .. ﺗﺠﻤﻌﺖ ﺍﻟﺪﻣﻮﻉ ﻓﻰ ﻋﻴﻨﻴﻬﺎ ﻓﺮﺃﺕ ﺑﺼﻌﻮﺑﺔ ﺍﻟﻔﺘﺎﺓ ﻭﻫﻰ ﺗﺪﻟﻒ ﺍﻟﻰ ﺍﻟﺪﺍﺧﻞ .. ﺃﻣﺎ " ﻋﻤﺮ " ﻓﺘﻮﺟﻪ ﺍﻟﻰ ﺳﻴﺎﺭﺗﻪ ﻭﺍﻧﻄﻠﻖ ﺑﻬﺎ ﺧﺎﺭﺝ ﺍﻟﻤﺰﺭﻋﺔ .
*******************
ﺟﻠﺴﺖ " ﺳﻤﺎﺡ " ﺑﺠﻮﺍﺭ " ﻳﺎﺳﻤﻴﻦ " ﺗﻨﻈﺮ ﺍﻟﻴﻬﺎ ﻓﻰ ﺻﻤﺖ .. ﻧﺤﺪﺛﺖ " ﻳﺎﺳﻤﻴﻦ " ﻗﺎﺋﻠﻪ :
- ﻋﺎﺭﻓﻪ .. ﻣﻦ ﻛﺘﺮ ﻣﺎ ﺃﻧﺎ ﺣﺴﻪ ﺑﺄﻟﻢ ﺟﻮﺍﻳﺎ .. ﺣﺴﻪ ﺍﻧﻰ ﻣﺘﺨﺪﺭﻩ ﻭﻋﺎﻣﻠﻪ ﺯﻯ ﺍﻟﻤﺸﻠﻮﻟﻪ ﺍﻟﻠﻰ ﻣﺶ ﻗﺎﺩﺭﻩ ﺗﺘﺤﺮﻙ .. ﺃﻧﺎ ﻛﻨﺖ ﻓﺎﻛﺮﻩ ﺍﻧﻰ ﺧﻼﺹ ﻫﻔﺮﺡ ﺯﻯ ﺑﺎﻗﻰ ﺍﻟﺒﻨﺎﺕ .. ﻭﻫﺮﺟﻊ ﺍﺑﺘﺴﻢ ﻭﺃﺿﺤﻚ ﻣﻦ ﻗﻠﺒﻲ ﺗﺎﻧﻰ .. ﻟﻤﺎ ﺑﺎﺑﺎ ﻗﺎﻟﻰ ﺍﻧﻪ ﺍﺗﻘﺪﻣﻠﻰ .. ﻓﺮﺣﺖ ﺃﻭﻯ .. ﻣﻜﻨﺘﺶ ﻣﺼﺪﻗﻪ .. ﻛﻨﺖ ﻓﺮﺣﺎﻧﻪ ﺃﻭﻯ .. ﻛﻨﺖ ﺣﺴﻪ ﺍﻥ ﻗﻠﺒﻲ ﻃﺎﻳﺮ .. ﻛﻨﺖ ﺑﻔﻜﺮ ﺑﺴﻄﺤﻴﻪ ﺃﻭﻯ .. ﺍﻧﺎ ﺯﻯ " ﻭﻻﺀ " ﻓﻜﺮﺕ ﻓﻰ ﺍﻟﻘﺸﺮﺓ ﺑﺲ ..
ﻗﺎﻃﻌﺘﻬﺎ " ﺳﻤﺎﺡ " ﻗﺎﺋﻠﻪ :
" - ﻋﻤﺮ " ﻣﺶ ﻭﺣﺶ ﻳﺎ " ﻳﺎﺳﻤﻴﻦ "
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻗﺎﺋﻠﻪ ﺑﻤﺮﺍﺭﻩ :
- ﺍﺣﻨﺎ ﻣﻨﻨﻔﻌﺶ ﺑﻌﺾ ﻳﺎ " ﺳﻤﺎﺡ .. " ﻣﺶ ﻋﺎﺭﻓﻪ ﺍﺯﺍﻯ ﺍﻧﺎ ﻛﻨﺖ ﻋﺎﻣﻴﻪ ﻛﺪﻩ .. ﻫﻮ ﻭﺍﺣﺪ ﺍﺗﺮﺑﻰ ﺑﻄﺮﻳﻘﻪ ﻏﻴﺮ ﺍﻟﻠﻰ ﺃﻧﺎ ﺍﺗﺮﺑﻴﺖ ﺑﻴﻬﺎ .. ﻭﺍﺣﺪ ﻣﺒﺎﺩﺋﻪ ﻭﺍﻓﻜﺎﺭﻩ ﻭﺣﻴﺎﺗﻪ ﻛﻠﻬﺎ ﻣﺨﺘﻠﻔﻪ ﺗﻤﺎﻣﺎً ﻋﻨﻰ .. ﻣﻔﻴﺶ ﺃﻯ ﺗﻜﺎﻓﺆ ﺑﻴﻨﺎ ﻳﺎ " ﺳﻤﺎﺡ " .. ﻋﻤﺘﻪ ﻛﺎﻧﺖ ﻣﻌﺎﻫﺎ ﺣﻖ .. ﺑﻌﺪ ﻣﺎ ﺍﻟﺤﺐ ﺩﻩ ﻳﻀﻴﻊ ﻣﺶ ﻫﻴﻼﻗﻰ ﺣﺎﺟﻪ ﺗﺨﻠﻴﻪ ﻳﺘﻤﺴﻚ ﺑﻴﺎ .. ﻫﻴﻌﺮﻑ ﺳﺎﻋﺘﻬﺎ ﺍﻧﻨﺎ ﻣﻜﻨﺎﺵ ﻣﻨﺎﺳﺒﻴﻦ ﻟﺒﻌﺾ .. " ﺳﻤﺎﺡ " ﺃﻧﺎ ﻃﻮﻝ ﻋﻤﺮﻯ ﻋﺎﻳﺰﻩ ﻭﺍﺣﺪ ﻳﺘﻘﻰ ﺭﺑﻨﺎ ﻓﻴﺎ .. ﻭﺍﺣﺪ ﺃﻧﺎ ﻭﻫﻮ ﻧﻌﻴﻦ ﺑﻌﺾ .. ﻭﻧﻘﺮﺏ ﻣﻦ ﺭﺑﻨﺎ ﺳﻮﺍ .. ﻭﻧﺒﻨﻰ ﺑﻴﺘﻨﺎ ﺳﻮﺍ ﻭﻧﺮﺑﻰ ﻭﻻﺩﻧﺎ ﺗﺮﺑﻴﻪ ﺻﺢ .. ﻭﻧﻜﻮﻥ ﻗﺪﻭﺓ ﺣﺴﻨﻪ ﻟﻴﻬﻢ .. ﺍﺯﺍﻯ ﺍﺧﺘﺎﺭﻟﻬﻢ ﺃﺏ .. ﺑﻴﺴﺘﺤﻞ ﺣﺮﻣﺎﺕ ﺭﺑﻨﺎ ﺑﺎﻟﺸﻜﻞ ﺩﻩ
ﻗﺎﻃﻌﻬﺎ " ﺳﻤﺎﺡ " ﻣﺮﺓ ﺃﺧﺮﻯ ﻗﺎﺋﻠﻪ :
- ﺑﺼﻰ ﺍﻟﻠﻰ ﺃﻧﺎ ﺃﻋﺮﻓﻪ ﺍﻧﻪ ﻫﻮ ﻭﺑﻨﺖ ﻋﻤﺘﻪ ﻭﺃﺧﻮﻫﺎ ﻣﺘﺮﺑﻴﻴﻦ ﻣﻊ ﺑﻌﺾ ﻭﺯﻯ ﺍﻻﺧﻮﺍﺕ .. ﻳﻌﻨﻰ ﻫﻤﺎ ﻭﺍﺧﺪﻳﻦ ﻋﻠﻰ ﺑﻌﺾ ﺍﻭﻯ ﻳﻌﻨﻰ ...
ﻗﺎﻃﻌﺘﻬﺎ " ﻳﺎﺳﻤﻴﻦ " ﺑﺤﺪﻩ :
- ﺍﻧﺘﻰ ﻣﻘﺘﻨﻌﻪ ﺑﺎﻟﻠﻰ ﺍﻧﺘﻰ ﺑﺘﻘﻮﻟﻴﻪ ﺩﻩ .. ﺍﻟﻠﻰ ﻳﻐﻠﻂ ﻏﻠﻄﻪ ﺻﻐﻴﺮﻩ ﻳﻐﻠﻂ ﻏﻠﻄﺔ ﻛﺒﻴﺮﺓ ﻳﺎ " ﺳﻤﺎﺡ .. " ﻣﺎﺑﺎﻟﻚ ﻭﻫﻮ ﺍﺻﻼ ﻣﺶ ﺷﺎﻳﻒ ﺍﻧﻪ ﺑﻴﻐﻠﻂ ..
ﺻﻤﺘﺖ ﻗﻠﻴﻼ ﺛﻢ ﻫﺘﻔﺖ ﺑﺎﻛﻴﻪ ﺑﺼﻮﺕ ﻣﺘﻘﻄﻊ :
" - ﻣﺼﻄﻔﻰ " ﻟﻤﺎ ﺧﺎﻧﻰ ﻛﺎﻥ ﻋﺎﺭﻑ ﺍﻧﻪ ﺑﻴﺨﻮﻧﻰ .. ﺃﻣﺎ ﺩﻩ ﺍﻟﺨﻴﺎﻧﻪ ﻋﻨﺪﻩ ﻋﺎﺩﻯ .. ﻫﻴﺨﻮﻧﻰ ﻭﻫﻮ ﺃﺻﻼ ﻣﺶ ﺣﺎﺳﺲ ﺍﻥ ﺩﻯ ﺧﻴﺎﻧﻪ .. ﻭﺍﺣﺪ ﻋﺎﻳﺶ ﻓﻰ ﻋﺎﻟﻢ ﻏﻴﺮ ﺍﻟﻠﻰ ﺃﻧﺎ ﻋﺎﻳﺸﺔ ﻓﻴﻪ ﻭﻏﻴﺮ ﺍﻟﻠﻰ ﺍﻧﺎ ﻣﺘﺮﺑﻴﻪ ﻋﻠﻴﻪ .. ﺑﻜﺮﺓ ﻟﻤﺎ ﻧﺘﺠﻮﺯ ﻳﻘﻮﻟﻰ ﺍﻗﻠﻌﻰ ﺍﻟﺤﺠﺎﺏ ﺯﻯ ﺑﻨﺖ ﻋﻤﺘﻰ ﻭﺯﻯ ﺧﻄﻴﺒﺘﻰ ﺍﻟﻘﺪﻳﻤﺔ .. ﺑﻜﺮﺓ ﻳﻠﺒﺴﻨﻰ ﺯﻳﻬﻢ .. ﻭﺳﻠﻤﻲ ﻋﻠﻰ ﺍﻟﺮﺟﺎﻟﻪ ﺯﻳﻬﻢ .. ﻭﺃﺑﻘﻰ ﺧﺴﺮﺕ ﺩﻳﻨﻲ ﻭﺩﻧﻴﺘﻰ .. ﺑﺘﻘﻮﻟﻰ ﺍﻧﻪ ﻣﺶ ﻭﺣﺶ .. ﻃﻴﺐ ﻟﻮ ﻫﻮ ﻣﺶ ﻭﺣﺶ ﺍﺧﺘﺎﺭ ﻭﺍﺣﺪﺓ ﺑﺎﻟﺸﻜﻞ ﺍﻟﻠﻰ ﻭﺻﻔﺘﻬﻮﻟﻚ ﻟﻴﻪ ﻋﺸﺎﻥ ﺗﻜﻮﻥ ﺧﻄﻴﺒﺘﻪ ؟ .. ﻫﺎ .. ﻭﺑﻌﺪﻫﺎ ﻳﺨﺘﺎﺭﻧﻰ ﺍﻧﺎ ....
ﻗﻠﺖ " ﺳﻤﺎﺡ " :
- ﺑﺲ ﻫﻮ ﺩﻟﻮﻗﺘﻰ ﺍﺧﺘﺎﺭﻙ ﺍﻧﺘﻰ ﻳﺎ " ﻳﺎﺳﻤﻴﻦ "
ﻗﺎﻟﺖ ﺑﻤﺮﺍﺭﻩ :
- ﻫﻮ ﻣﻔﺮﻗﺶ ﺍﻯ ﺣﺎﺟﻪ ﻋﻦ " ﻣﺼﻄﻔﻰ " " .. ﻣﺼﻄﻔﻰ " ﺍﺧﺘﺎﺭﻧﻰ ﻻﻧﻪ ﻋﺎﻳﺰ ﻭﺍﺣﺪﻩ ﻳﺤﻄﻬﺎ ﻓﻰ ﺍﻟﺒﻴﺖ ﺯﻯ ﺍﻯ ﻛﺮﺳﻲ ﻓﻰ ﺍﻟﺒﻴﺖ ﻭﻳﺒﻘﻰ ﻭﺍﺛﻖ ﻓﻴﻬﺎ ﻭﻓﻰ ﺍﺧﻼﻗﻬﺎ .. ﻭﻫﻮ ﺑﺮﻩ ﻳﻌﻤﻞ ﺍﻟﻠﻰ ﻋﻠﻰ ﻣﺰﺍﺟﻪ .. ﻭ " ﻋﻤﺮ " ﺯﻳﻪ ﺍﺧﺘﺎﺭﻧﻰ ﻟﻨﻔﺲ ﺍﻟﺴﺒﺐ ..
ﻗﺎﻟﺖ ﻭﺍﻟﺪﻣﻮﻉ ﺗﺘﺴﺎﻗﻂ ﻣﻦ ﻋﻨﻴﻨﻴﻬﺎ :
- ﻟﻤﺎ " ﻣﺼﻄﻔﻰ " ﺧﺎﻧﻰ ﻳﺎ " ﺳﻤﺎﺡ " ﺍﻷﻟﻢ ﻛﻨﺖ ﺣﺴﺎﻩ ﻓﻰ ﻛﺮﺍﻣﺘﻰ .. ﻟﻜﻦ ﻟﻮ " ﻋﻤﺮ " ﺧﺎﻧﻰ .....
ﺗﻌﺎﻟﻰ ﺻﻮﺗﻬﺎ ﻓﻰ ﺍﻟﺒﻜﺎﺀ ﻗﺎﺋﻠﻪ ﻗﺎﺋﻠﻪ :
- ﺍﻷﻟﻢ ﻫﻴﻜﻮﻥ ﻓﻰ ﻗﻠﺒﻲ .. ﻭﺃﻧﺎ ﻣﺶ ﻫﻘﺪﺭ ﺃﺗﺤﻤﻞ ﺩﻩ
ﻫﺪﺋﺘﻬﺎ " ﺳﻤﺎﺡ " ﻗﺎﺋﻠﻪ :
- ﻭﺍﻧﺘﻰ ﺍﻳﻪ ﺍﻟﻠﻲ ﻳﺨﻠﻴﻜﻰ ﺗﻔﻜﺮﻯ ﺍﻧﻪ ﻫﻴﺨﻮﻧﻚ ﻳﺎ " ﻳﺎﺳﻤﻴﻦ "
ﻗﺎﻟﺖ " ﻳﺎﺳﻤﻴﻦ " ﺑﺤﺰﻡ ﻣﻦ ﺑﻴﻦ ﺩﻣﻮﻋﻬﺎ :
- ﻻﻥ ﺣﻴﺎﺗﻪ ﻏﻠﻂ ﻭﻋﻴﺸﺘﻪ ﻏﻠﻂ .. ﻭﺗﺼﺮﻓﺎﺗﻪ ﻏﻠﻂ .. ﻫﻮ ﻭﺍﺣﺪ ﻣﺒﻴﺨﻔﺶ ﻣﻦ ﺭﺑﻨﺎ ﻭﺑﻴﻌﻤﻞ ﺍﻟﻐﻠﻂ ﻋﻴﻨﻲ ﻋﻴﻨﻚ ﻛﺪﻩ ﺃﺩﺍﻡ ﺍﻟﻨﺎﺱ .. ﺍﻟﻠﻰ ﻳﻌﻤﻞ ﺣﺎﺟﻪ ﺻﻐﻴﺮﻩ ﺑﺒﺠﺎﺣﻪ ﻛﺪﻩ ﻳﻌﻤﻞ ﺍﻟﻜﺒﻴﺮﺓ ﻳﺎ " ﺳﻤﺎﺡ "
ﺻﻤﺘﺖ ﻗﻠﻴﻼ ﺛﻢ ﻗﺎﻟﺖ :
- ﻭﺑﻌﺪﻳﻦ ﻣﺶ ﺩﻯ ﺍﻟﻤﺸﻜﻠﺔ ﺍﻟﻮﺣﻴﺪﻩ .. ﺍﻟﻤﺸﻜﻠﺔ ﺍﻧﻰ ﺍﻛﺘﺸﻔﺖ ﺍﻧﻰ ﻓﻌﻼ ﺍﻧﻪ ﻣﻴﻨﻔﻌﻨﻴﺶ .. ﺩﻩ ﻭﺍﺣﺪ ﻫﻴﻨﺰﻟﻨﻰ ﻣﻌﺎﻩ ﻟﺘﺤﺖ .. ﻭﺃﻧﺎ ﻋﺎﻳﺰﻩ ﻭﺍﺣﺪ ﻳﺎﺧﺪ ﺑﺎﻳﺪﻱ ﻭﻧﻄﻠﻊ ﺳﻮﺍ .. ﻋﺎﻳﺰﻩ ﻭﺍﺣﺪﻩ ﻟﻪ ﻧﻔﺲ ﻣﺒﺎﺩﺋﻲ ﻧﺮﺑﻲ ﻭﻻﺩﻧﺎ ﻋﻠﻰ ﻣﺒﺎﺩﺉ ﻭﺍﺣﺪﺓ ﻭﻗﻴﻢ ﻭﺍﺣﺪﺓ ﻭﺍﻓﻜﺎﺭ ﻭﺍﺣﺪﺓ .. ﻣﺶ ﺃﻧﺎ ﺍﺑﻨﻰ ﻭﺃﺑﻮﻫﻢ ﻳﻬﺪ ..
ﺛﻢ ﻗﺎﻟﺖ ﺑﻮﻫﻦ :
- ﻣﺶ ﻋﺎﻳﺰﻩ ﺃﻃﻠﻖ ﺗﺎﻧﻰ ﻳﺎ " ﺳﻤﺎﺡ " ﻛﻔﺎﻳﺎﻧﻰ ﺟﺮﺡ ﻭﺍﺣﺪ .. ﻣﺶ ﻫﻘﺪﺭ ﺃﺗﺤﻤﻞ ﺟﺮﺡ ﺗﺎﻧﻰ .. ﻣﺶ ﻫﻘﺪﺭ ﺃﺧﺎﻃﺮ ﺗﺎﻧﻰ .. ﺃﻧﺎ ﻣﻌﻨﺪﻳﺶ ﺃﻯ ﺛﻘﻪ ﻓﻲ " ﻋﻤﺮ .. " ﺯﻯ ﻣﺎ ﻛﺎﻥ ﻣﻌﻨﺪﻳﺶ ﺃﻯ ﺛﻘﻪ ﻓﻰ " ﻣﺼﻄﻔﻰ "
ﻧﻈﺮﺕ ﻟﻬﺎ " ﺳﻤﺎﺡ " ﺑﺤﺰﻥ ﻗﺎﺋﻠﻪ :
- ﻃﻴﺐ ﻓﻜﺮﻯ ﺗﺎﻧﻰ .. ﻭﺍﺳﺘﺨﻴﺮﻯ ﺗﺎﻧﻰ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻗﺎﺋﻠﻪ ﺑﺤﺰﻡ :
- ﺃﻧﺎ ﺍﺳﺘﺨﺮﺕ .. ﻭﻓﻜﺮﺕ ﻛﻮﻳﺲ .. ﺍﻟﺮﺍﺟﻞ ﺍﻟﻰ ﻫﺨﺘﺎﺭﻩ ﺯﻭﺝ ﻟﻴﺎ ﻫﺨﺘﺎﺭﻩ ﺑﻘﻠﺒﻲ ﻭﻋﻘﻠﻰ .. ﻣﺶ ﺑﻘﻠﺒﻲ ﺑﺲ .. ﻭﻻ ﺑﻌﻘﻠﻲ ﺑﺲ .. ﻻﺯﻡ ﺍﻻﺗﻨﻴﻦ ﻳﻮﺍﻓﻘﻮﺍ ﻋﻠﻴﻪ .. ﻻﺯﻡ ﻳﺘﺸﺮﻑ ﺑﻴﺎ ﻭﺳﻂ ﻋﻠﻴﺘﻪ ﻭﻭﺳﻂ ﺍﻟﻨﺎﺱ .. ﺃﻧﺎ ﻣﺶ ﻭﺍﺣﺪﺓ ﻣﻦ ﺍﻟﺸﺎﺭﻉ ﺯﻯ ﻣﺎ ﻋﻤﺘﻪ ﺣﺎﻭﻟﺖ ﺗﻔﻬﻤﻨﻰ .. ﺃﻧﺎ ﺑﻨﺖ ﻧﺎﺱ .. ﺻﺤﻴﺢ ﻧﺎﺱ ﻓﻘﺮﺍ .. ﺑﺲ ﻣﺤﺘﺮﻣﻴﻦ ﻭﻧﻌﺮﻑ ﺭﺑﻨﺎ .. ﻫﻰ ﻓﺎﻛﺮﺓ ﺍﻧﻰ ﻣﺶ ﻫﻘﺪﺭ ﺍﺭﻓﺾ " ﻋﻤﺮ " ﻭﻗﺎﻟﺘﻬﺎﻟﻰ ﻭﺵ ﻛﺪﻩ ﺍﻥ ﻣﻔﻴﺶ ﺑﻨﺖ ﺗﻘﻮﻝ ﻝ " ﻋﻤﺮ " ﻷ .. ﺑﺲ ﺃﻧﺎ ﻫﻘﻮﻝ ﻷ .. ﺃﻧﺎ ﻭﻋﻤﺮ ﻣﺴﺘﺤﻴﻞ ﻧﻜﻮﻥ ﻟﺒﻌﺾ .. ﺩﻩ ﺁﺧﺮ ﻭﺍﺣﺪ ﻣﻤﻜﻦ ﺃﻭﺍﻓﻖ ﺍﻧﻰ ﺃﺗﺠﻮﺯﻩ
************************
ﺗﻮﺟﻪ " ﻋﺒﺪ ﺍﻟﺤﻤﻴﺪ " ﺍﻟﻰ ﻣﻜﺘﺐ " ﻋﻤﺮ " ﻃﺮﻕ ﺍﻟﺒﺎﺏ ﻓﺴﻤﻪ ﺻﻮﺕ " ﻋﻤﺮ " ﺑﺎﻟﺪﺍﺧﻞ :
- ﺍﺗﻔﻀﻞ
ﺩﺧﻞ " ﻋﺒﺪ ﺍﻟﺤﻤﻴﺪ " ﻓﻬﺐ " ﻋﻤﺮ " ﻭﺍﻗﻔﺎً ﻭﺍﺳﺘﻘﺒﻠﻪ ﺑﺎﺑﺘﺴﺎﻣﻪ ﻗﺎﺋﻼً :
- ﺍﺗﻔﻀﻞ ﻳﺎ ﻋﻢ " ﻋﺒﺪ ﺍﻟﺤﻤﻴﺪ " .. ﺍﺗﻔﻀﻠﻰ ﺍﻋﺪ
ﻗﺎﻝ " ﻋﺒﺪ ﺍﻟﺤﻤﻴﺪ " ﻓﻰ ﻭﺟﻮﻡ :
- ﺗﺴﻠﻢ ﻳﺎ ﺑﺸﻤﻬﻨﺪﺱ ﺑﺲ ﺃﻧﺎ ﺟﺎﻯ ﺃﻗﻮﻟﻚ ﻛﻠﻤﺘﻴﻦ ﻭﻫﻤﺸﻰ ﻋﺸﺎﻥ ﻭﺭﺍﻳﺎ ﺷﻐﻞ
ﻭﻗﻔﺖ " ﻋﻤﺮ " ﺃﻣﺎﻣﻪ ﻣﺒﺘﺴﻤﺎً ﻭﻧﻈﺮ ﺍﻟﻴﻪ ﻗﺎﺋﻼً :
- ﺧﻴﺮ .. ﺍﺗﻔﻀﻞ
ﺗﻨﻬﺪ " ﻋﺒﺪ ﺍﻟﺤﻤﻴﺪ ﺗﻨﻬﻴﺪﺓ ﺣﺴﺮﺓ ﻭﺑﺪﺍ ﻣﺘﺮﺩﺩﺍً ﻭﻗﺎﻝ ﺩﻭﻥ ﺃﻥ ﻳﻨﻈﺮ ﺍﻟﻴﻪ :
- ﺑﻨﺘﻰ ﺭﻓﻀﺘﻚ ﻳﺎ ﺑﺸﻤﻬﻨﺪﺱ
ﻭﻗﻊ ﺍﻟﺨﺒﺮ ﻛﺎﻟﺼﺎﻋﻘﺔ ﻋﻠﻰ ﺭﺃﺱ " ﻋﻤﺮ " .. ﺍﺧﺘﻔﺖ ﺍﺑﺘﺴﺎﻣﺘﻪ ﺷﻴﺌﺎً ﻓﺸﻴﺌﺎً ﺣﺘﻰ ﺗﻼﺷﺖ ﺗﻤﺎﻣﺎ .. ﺻﻤﺖ ﻭﻫﻮ ﻳﺤﺎﻭﻝ ﺍﺳﺘﻴﻌﺎﺏ ﻣﺎ ﺳﻤﻊ .. ﻓﻨﻈﺮ ﺍﻟﻴﻪ " ﻋﺒﺪ ﺍﻟﺤﻤﻴﺪ " ﻗﺎﺋﻼً :
- ﺃﻧﺎ ﻣﺶ ﻣﻤﻜﻦ ﺃﻏﺼﺒﻬﺎ ﻣﺮﺓ ﺗﺎﻧﻴﺔ .. ﺟﻮﺍﺯﺗﻬﺎ ﺍﻷﻭﻟﻰ ﻛﺎﻧﺖ ﻏﺼﺐ ﻋﻨﻬﺎ .. ﻭﺣﻠﻔﺖ ﺑﻌﺪﻫﺎ ﺍﻧﻰ ﻋﻤﺮﻯ ﻣﺎ ﻫﻌﻤﻞ ﻛﺪﻩ ﻓﻰ ﺑﻨﺖ ﻣﻦ ﺑﻨﺎﺗﻰ
ﺻﺪﻡ " ﻋﻤﺮ " ﻟﻠﻤﺮﺓ ﺍﻟﺜﺎﻧﻴﺔ ﻓﻰ ﺃﻗﻞ ﻣﻦ ﺩﻗﻴﻘﺔ .. ﻋﻨﺪﻣﺎ ﻋﻠﻢ ﺃﻥ ﺯﻭﺍﺝ " ﻳﺎﺳﻤﻴﻦ " ﻛﺎﻥ ﺭﻏﻤﺎً ﻋﻨﻬﺎ
ﻧﻈﺮ ﺍﻟﻴﻪ " ﻋﺒﺪ ﺍﻟﺤﻤﻴﺪ " ﺑﺄﺳﻒ ﻗﺎﺋﻼً :
- ﺃﻧﺎ ﺁﺳﻒ ﻳﺎ ﺑﺸﻤﻬﻨﺪﺱ
ﺛﻢ ﺍﺳﺘﺪﺍﺭ ﻭﺍﻧﺼﺮﻑ .. ﺟﻠﺲ " ﻋﻤﺮ " ﻋﻠﻰ ﺃﻗﺮﺏ ﻣﻘﻌﺪ ﻭﻫﻮ ﻣﺎﺯﺍﻝ ﺗﺤﺖ ﺗﺄﺛﻴﺮ ﺻﺪﻣﺔ ﺭﻓﻀﻬﺎ ﺍﻳﺎﻩ .
*************************
ﺣﻀﺮ ﺍﻟﻤﺄﺫﻭﻥ ﻭﺍﻟﺸﻬﻮﺩ ﻓﻰ ﺑﻴﺖ " ﻧﻬﻠﺔ .. " ﻟﻢ ﻳﺤﻀﺮ ﺃﻯ ﻣﻦ ﺍﺧﻮﺗﻬﺎ .. ﻓﻘﻂ ﺃﻣﻬﺎ ﻭﺯﻭﺟﻬﺎ .. ﺑﺪﺃ ﺍﻟﻤﺄﺫﻭﻥ ﻓﻰ ﻣﺮﺍﺳﻢ ﺍﻟﺰﻭﺍﺝ .. ﻭﻫﻨﺎ ﻗﺎﻝ " ﻣﺼﻄﻔﻰ " ﻟﻠﻤﺮﺓ ﺍﻟﺜﺎﻧﻴﺔ :
- ﻗﺒﻠﺖُ ﺯﻭﺟﻬﺎ
