ﻛﺎﻧﺖ ﺳﻌﺎﺩﺓ " ﻋﺒﺪ ﺍﻟﺤﻤﻴﺪ " ﻏﺎﻣﺮﺓ ﻋﻨﺪﻣﺎ ﺯﺍﺭﻩ " ﻛﺮﻡ " ﻓﻰ ﻣﺨﺰﻥ ﺍﻟﻌﻠﻒ ﻗﺎﺋﻼً :
- ﻳﺸﺮﻓﻨﻰ ﺍﻧﻰ ﺍﻃﻠﺐ ﻣﻦ ﺣﻀﺮﺗﻚ ﺍﻳﺪ ﺍﻵﻧﺴﻪ " ﺭﻳﻬﺎﻡ "
ﻗﺎﻝ ﻟﻪ " ﻋﺒﺪ ﺍﻟﺤﻤﻴﺪ " ﻓﻰ ﺳﻌﺎﺩﺓ ﻏﺎﻣﺮﺓ :
- ﻭﺃﻧﺎ ﻃﺒﻌﺎً ﻳﺸﺮﻓﻨﻰ ﺍﻧﻰ ﺃﺩﻳﻚ ﺑﻨﺘﻰ ﻳﺎ ﺑﺸﻤﻬﻨﺪﺱ " ﻛﺮﻡ " .. ﺑﺲ ﻻﺯﻡ ﺁﺧﺪ ﺭﺃﻯ " ﺭﻳﻬﺎﻡ " ﺍﻷﻭﻝ
ﺃﻭﻣﺄ " ﻛﺮﻡ " ﺑﺮﺃﺳﻪ ﻗﺎﺋﻼً :
- ﻃﺒﻌﺎً ﻳﺎ ﻋﻢ " ﻋﺒﺪ ﺍﻟﺤﻤﻴﺪ " ﺧﺪ ﻭﻗﺘﻚ .. ﺑﺲ ﻳﺎﺭﻳﺖ ﺑﻌﺪ ﺍﺫﻧﻚ ﺍﺣﻨﺎ ﻣﺶ ﻣﺤﺘﺎﺟﻴﻦ ﻓﺘﺮﺓ ﺧﻄﻮﺑﺔ .. ﻳﻌﻨﻲ ﺍﺣﻨﺎ ﺑﻨﺸﺘﻐﻞ ﻣﻊ ﺑﻌﺾ ﻣﻦ ﻓﺘﺮﺓ .. ﻭﺍﻷﻓﻀﻞ ﻳﺒﻘﻰ ﻛﺘﺐ ﻛﺘﺎﺏ ﻋﻠﻰ ﻃﻮﻝ
ﺻﻤﺖ " ﻋﺒﺪ ﺍﻟﺤﻤﻴﺪ " ﻗﻠﻴﻼً ﺛﻢ ﻗﺎﻝ :
- ﻓﻰ ﺍﻟﻌﺠﻠﺔ ﺍﻟﻨﺪﺍﻣﺔ ﻳﺎ ﺍﺑﻨﻰ .. ﺧﻠﻴﻬﺎ ﻓﺘﺮﺓ ﺧﻄﻮﺑﺔ ﺍﻷﻭﻝ ﺣﺘﻰ ﻟﻮ ﻓﺘﺮﺓ ﺻﻐﻴﺮﺓ ﻭﺑﻌﺪ ﻛﺪﻩ ﻟﻤﺎ ﺗﺤﺒﻮﺍ ﺗﻜﺘﺒﻮﺍ ﺍﻟﻜﺘﺎﺏ ﻣﻔﻴﺶ ﻣﺸﻜﻠﺔ .. ﺑﺲ ﻛﻞ ﺣﺎﺟﻪ ﺗﻴﺠﻰ ﺑﺎﻟﻬﺪﺍﻭﻩ
ﺃﻭﻣﺄ " ﻛﺮﻡ " ﺑﺮﺃﺳﻪ ﻗﺎﺋﻼً :
- ﺧﻼﺹ ﺯﻯ ﻣﺎ ﺗﺸﻮﻑ ﻳﺎ ﻋﻢ " ﻋﺒﺪ ﺍﻟﺤﻤﻴﺪ " .. ﺑﺲ ﺯﻯ ﻣﺎ ﺣﻀﺮﺗﻚ ﻗﻮﻟﺖ ﻓﺘﺮﺓ ﺧﻄﻮﺑﺔ ﺻﻐﻴﺮﺓ
ﺍﺑﺘﺴﻢ " ﻋﺒﺪ ﺍﻟﺤﻤﻴﺪ " ﻓﻰ ﻓﺮﺡ ﻗﺎﺋﻼً :
- ﻋﻠﻰ ﺧﻴﺮﺓ ﺍﻟﻠﻪ
ﺫﻫﺐ " ﻋﺒﺪ ﺍﻟﺤﻤﻴﺪ " ﺍﻟﻰ ﻏﺮﻓﺔ ﺑﻨﺎﺗﻪ .. ﻭﺑﺸﺮﻫﻢ ﺑﺎﻟﺨﺒﺮ .. ﻧﻈﺮ ﺍﻟﻰ " ﺭﻳﻬﺎﻡ " ﻗﺎﺋﻼً :
- ﺍﻟﺒﺸﻤﻬﻨﺪﺱ " ﻛﺮﻡ " ﻃﻠﺐ ﺍﻳﺪﻙ ﻣﻨﻰ ﻳﺎ " ﺭﻳﻬﺎﻡ " ﻳﺎ ﺑﻨﺘﻰ .. ﻗﻮﻟﺘﻰ ﺍﻳﻪ ؟
ﺣﺎﻭﻟﺖ " ﺭﻳﻬﺎﻡ " ﻛﺘﻢ ﻓﺮﺣﺘﻬﺎ ﺑﺼﻌﻮﺑﺔ .. ﻛﺎﻧﺖ ﺗﺸﻌﺮ ﺑﺎﻟﺮﻏﺒﺔ ﻓﻰ ﺍﻟﻘﻔﺰ ﻓﻰ ﺍﻟﻬﻮﺍﺀ .. ﻟﻜﻨﻬﺎ ﺗﻤﺎﻟﻜﺖ ﻧﻔﺴﻬﺎ ﻗﺎﺋﻠﻪ ﺑﻬﺪﻭﺀ :
- ﻭﺣﻀﺮﺗﻚ ﻗﻮﻟﺘﻠﻪ ﺍﻳﻪ ﻳﺎ ﺑﺎﺑﺎ ؟
- ﻗﻮﻟﺘﻠﻪ ﻫﺴﺄﻟﻚ ﺍﻷﻭﻝ ﻭﺑﻌﺪﻳﻦ ﺃﺭﺩ ﻋﻠﻴﻪ .. ﻫﺎ ﺭﺃﻳﻚ ﺍﻳﻪ
ﻧﻈﺮﺕ " ﺭﻳﻬﺎﻡ " ﺍﻟﻰ ﺍﻷﺭﺽ ﻓﻰ ﺧﺠﻞ ﻭﺍﺑﺘﺴﺎﻣﻪ ﻭﺍﺳﻌﺔ ﻣﺮﺳﻮﻣﺔ ﻋﻠﻰ ﺷﻔﺘﻴﻬﺎ .. ﻓﺘﺪﺧﻠﺖ " ﻳﺎﺳﻤﻴﻦ " ﻗﺎﺋﻠﻪ :
- ﻗﻮﻟﻪ ﻣﻮﺍﻓﻘﻪ ﻳﺎ ﺑﺎﺑﺎ .. ﺑﺲ ﻣﺘﻘﻮﻟﻮﺵ ﺩﻟﻮﻗﺘﻰ ﺳﻴﺒﻪ ﻳﻮﻣﻴﻦ ﻛﺪﻩ
ﺿﺤﻚ " ﻋﺒﺪ ﺍﻟﺤﻤﻴﺪ " ﻗﺎﺋﻼً :
- ﻭﺍﻟﻠﻪ ﺍﻟﺤﺮﻳﻢ ﺩﻭﻝ ﻋﻠﻴﻬﻢ ﺣﺮﻛﺎﺕ .. ﻣﺎ ﻧﺮﻳﺢ ﺍﻟﺮﺍﺟﻞ ﻭﻧﻘﻮﻟﻪ ﻣﻮﺍﻓﻘﻪ
ﻗﺎﻟﺖ " ﻳﺎﺳﻤﻴﻦ " ﺑﺴﺮﻋﺔ :
- ﻷ ﺍﺳﺘﻨﻰ ﻳﻮﻣﻴﻦ ﺗﻼﺗﻪ ﻛﺪﻩ ﻭﺑﻌﺪﻳﻦ ﻗﻮﻟﻪ ﺍﻧﻬﺎ ﻣﻮﺍﻓﻘﻪ
ﺧﺮﺝ " ﻋﺒﺪ ﺍﻟﺤﻤﻴﺪ " ﻭﺗﻌﺎﻧﻖ ﺍﻷﺧﺘﺎﻥ ﻓﻰ ﻓﺮﺡ .. ﻗﺎﻟﺖ " ﺭﻳﻬﺎﻡ : "
- ﺃﻧﺎ ﻣﺶ ﻣﺼﺪﻗﺔ ﻳﺎ " ﻳﺎﺳﻤﻴﻦ " ﺣﺴﻪ ﺑﺠﺪ ﺍﻧﻰ ﺑﺤﻠﻢ .. ﺃﻧﺎ ﻣﺶ ﺑﺤﻠﻢ ﺻﺢ ؟
ﺿﺤﻜﺖ " ﻳﺎﺳﻤﻴﻦ " ﻗﺎﺋﻠﻪ :
- ﻷ ﻣﺶ ﺑﺘﺤﻠﻤﻰ .. ﻓﻮﻗﻰ ﺑﺄﻩ ﺩﻩ ﺍﻧﺘﻰ ﺿﺮﺑﺘﻰ ﺧﺎﻟﺺ
- ﻣﺶ ﻟﻴﺎ ﺣﻖ .. ﺃﻧﺎ ﻓﺮﺣﺎﻧﻪ ﺃﻭﻯ .. ﻫﺎﻳﻦ ﻋﻠﻴﺎ ﺃﻧﺰﻝ ﺩﻟﻮﻗﺘﻰ ﺃﺭﻭﺣﻠﻪ ﺍﻟﻤﻜﺘﺐ ﻭﺃﻗﻮﻟﻪ " ﻛﺮﻡ " ﺃﻧﺎ ﻣﻮﺍﻓﻘﺔ ﻳﻼ ﻧﺘﺠﻮﺯ
ﺿﺤﻜﺖ " ﻳﺎﺳﻤﻴﻦ " ﻗﺎﺋﻠﻪ :
- ﻭﺍﻟﻠﻪ ﻣﺠﻨﻮﻧﺔ ﻭﺗﻌﻤﻠﻴﻬﺎ
ﺻﻤﺘﺖ " ﻳﺎﺳﻤﻴﻦ " ﻗﻠﻴﻼً ﺛﻢ ﻗﺎﻟﺖ :
- ﺑﺲ ﺍﺣﻨﺎ ﻟﺴﻪ ﻣﻌﺮﻓﻨﺎﺵ ﻫﻮ ﻧﺎﻭﻯ ﻳﻌﻴﺶ ﻫﻨﺎ ﻓﻰ ﺍﻟﻤﻨﺼﻮﺭﺓ ﻭﻻ ﻫﻴﺮﺟﻊ ﺍﻟﻘﺎﻫﺮﺓ
ﻗﺎﻟﺖ " ﺭﻳﻬﺎﻡ " ﻭﻗﺪ ﺍﻧﺘﺒﻬﺖ ﻟﻸﻣﺮ :
- ﻓﻌﻼً ﻣﻌﺎﻛﻰ ﺣﻖ .. ﺍﻟﻨﻘﻄﺔ ﺩﻯ ﻣﺶ ﻭﺍﺿﺤﺔ ﺑﺎﻟﻨﺴﺒﺔ ﻟﻰ
- ﻻﺯﻡ ﻧﻌﺮﻑ ﺍﻟﻨﻘﻄﺔ ﺩﻯ
ﻗﺎﻟﺖ " ﺭﻳﻬﺎﻡ " ﺑﺴﺮﻋﺔ :
- ﺃﻯ ﺍﻥ ﻛﺎﻥ ﻣﺶ ﻫﺘﻔﺮﻕ ﺑﺎﻟﻨﺴﺒﺔ ﻟﻰ ﺍﻟﻤﻬﻢ ﺍﻧﻰ ﺃﻋﻴﺶ ﻣﻊ " ﻛﺮﻭﻣﺘﻰ "
ﺿﺤﻜﺖ " ﻳﺎﺳﻤﻴﻦ " ﻗﺎﺋﻠﻪ :
" - ﻛﺮﻭﻣﺘﻚ " ؟ ... ﺗﺼﺪﻗﻰ ﻛﺮﻫﺘﻴﻨﻲ ﻓﻰ ﺍﺳﻤﻪ
ﻗﺎﻟﺖ " ﺭﻳﻬﺎﻡ " ﺑﺨﺒﺚ :
- ﺁﻩ " ﻛﺮﻭﻣﺘﻰ " .. ﺯﻯ ﻣﺎ " ﻋﻤﺮ " " ﻋﻤﻮﺭﺗﻚ "
ﺍﺑﺘﺴﻤﺖ " ﻳﺎﺳﻤﻴﻦ " ﻓﻰ ﺧﺠﻞ .. ﻓﻘﺎﻟﺖ " ﺭﻳﻬﺎﻡ " ﺑﻠﻬﻔﺔ :
- ﻳﺎ ﺳﺘﻰ ﺣﻨﻰ ﻋﻠﻰ ﺍﻟﺮﺍﺟﻞ ﺑﺄﻩ .. ﻫﺘﻔﻀﻠﻰ ﺗﻘﻼﻧﻪ ﻟﺤﺪ ﺍﻣﺘﻰ .. ﺍﻟﺮﺍﺟﻞ ﺧﻼﺹ ﺳﺨﻦ ﻭﺍﺳﺘﻮﻯ ﻋﻠﻰ ﺍﻵﺧﺮ .. ﻓﺎﺿﻠﺔ ﺗﻜﻪ ﻭﻳﺸﻴﻂ ﺍﻟﺤﻘﻴﻪ ﻗﺒﻞ ﻣﺎ ﻳﺸﻴﻂ ﺃﺑﻮﺱ ﺍﻳﺪﻳﻜﻰ
ﺿﺤﻜﺖ " ﻳﺎﺳﻤﻴﻦ " ﻗﺎﺋﻠﻪ :
- ﻋﻠﻴﻜﻲ ﺗﻌﺒﻴﺮﺍﺕ ﺗﻮﺩﻯ ﻓﻰ ﺩﺍﻫﻴﺔ
ﻗﺎﻟﺖ " ﺭﻳﻬﺎﻡ " ﺑﺨﺒﺚ :
- ﺑﺎﻟﻠﻪ ﻋﻠﻴﻜﻲ ﺃﻣﺎ ﺑﺘﺸﻮﻓﻴﻪ ﻣﺎ ﺑﺘﺤﺴﻴﺶ ﺍﻥ ﻗﻠﺒﻚ ﺩﻩ ﻣﻦ ﻛﺘﻴﺮ ﺍﻟﺪﻕ ﺻﻮﺗﻪ ﻭﺍﺻﻞ ﻷﺳﻮﺍﻥ
ﻗﺎﻟﺖ " ﻳﺎﺳﻤﻴﻦ " ﺑﺨﺠﻞ :
- ﺃﻳﻮﺓ ﺑﺤﺲ ﺑﻜﺪﻩ
ﺗﻨﻬﺪﺕ " ﺭﻳﻬﺎﻡ " ﻗﺎﺋﻠﻪ :
- ﻃﻴﺐ ﺑﺄﻩ ﺍﺭﺣﻤﻰ ﻗﻠﺒﻚ ﻭﻗﻠﺒﻪ .. ﺧﻠﻴﻨﺎ ﻧﻌﻤﻞ ﺧﻄﻮﺑﺘﻨﺎ ﻓﻰ ﻳﻮﻡ ﻭﺍﺣﺪ ﺃﻧﺎ ﻭﺍﻧﺘﻰ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻗﻠﻴﻼً ﻓﻰ ﺻﻤﺖ .. ﺛﻢ ﻗﺎﺋﻠﻪ :
- ﺭﺑﻨﺎ ﻳﻴﺴﺮ
ﺻﺎﺣﺖ " ﺭﻳﻬﺎﻡ " ﻗﺎﺋﻠﻪ :
" - ﻳﺎﺳﻤﻴﻦ " ﺑﺠﺪ ﺍﻧﺘﻰ ﺗﺸﻠﻰ .. ﺭﺑﻨﺎ ﻳﻜﻮﻥ ﻓﻰ ﻋﻮﻧﻚ ﻳﺎ " ﻋﻤﺮ .. " ﻟﻴﻚ ﺍﻟﺠﻨﺔ ﻳﺎ ﺍﺑﻨﻰ
ﻗﺎﻟﺖ " ﻳﺎﺳﻤﻴﻦ " ﺑﺠﺪﻳﻪ :
" - ﺭﻳﻬﺎﻡ " ﻣﺘﻨﺴﻴﺶ ﺍﻧﻰ ﻣﻄﻠﻘﺔ ﻳﻌﻨﻲ ﺃﻯ ﺣﺎﺟﻪ ﺃﻋﻤﻠﻬﺎ ﻣﺤﺴﻮﺑﺔ ﻋﻠﻴﺎ .. ﻣﺶ ﻋﺎﻳﺰﺓ ﺃﺗﺴﺮﻉ .. ﺣﺎﻭﻟﻰ ﺗﻔﻬﻤﻴﻨﻲ
ﻗﺎﻟﺖ " ﺭﻳﻬﺎﻡ : "
- ﻭﺍﻟﻠﻪ ﻓﻬﻤﺎﻛﻰ .. ﻭﻣﺘﺨﻔﻴﺶ " ﻋﻤﺮ " ﺍﻧﺴﺎﻥ ﻛﻮﻳﺲ
- ﻋﺮﻓﺘﻰ ﻣﻨﻴﻦ ﺑﺄﻩ ﺍﻧﻪ ﻛﻮﻳﺲ
ﺍﺑﺘﺴﻤﺖ " ﺭﻳﻬﺎﻡ " ﻗﺎﺋﻠﻪ ﺑـﻤﺮﺡ :
- ﻣﺶ ﺻﺎﺣﺐ " ﻛﺮﻭﻣﺘﻲ " ﻻﺯﻡ ﻳﺒﻘﻰ ﻛﻮﻳﺲ
ﺛﻢ ﻧﻈﺮﺕ ﻟﻬﺎ ﺑﺠﺪﻳﻪ ﻗﺎﺋﻠﻪ :
- ﺍﺳﺘﺨﻴﺮﻳﻰ ﻭﺷﻮﻓﻰ ﺭﺑﻨﺎ ﻫﻴﺨﺘﺎﺭﻟﻚ ﺍﻳﻪ
ﺃﻭﻣﺄﺕ " ﻳﺎﺳﻤﻴﻦ " ﺑﺮﺃﺳﻬﺎ ﻗﺎﺋﻠﻪ :
- ﺃﻧﺎ ﺑﻌﻤﻞ ﻛﺪﻩ ﻓﻌﻼً .. ﺑﺴﺘﺨﻴﺮ .. ﻭﺭﺍﺿﺔ ﺑﺎﻟﻠﻰ ﺭﺑﻨﺎ ﻳﺨﺘﺎﺭﻫﻮﻟﻰ
**********************
- ﻳﻌﻨﻲ ﺧﻼﺹ ﺃﺧﻴﺮﺍً ﻗﺮﺭﺕ ﺍﻧﻚ ﺗﺘﺠﻮﺯ
ﻫﺘﻒ " ﺃﻳﻤﻦ " ﺑﻬﺬﻩ ﺍﻟﻌﺒﺎﺭﺓ ﺃﺛﻨﺎﺀ ﺟﻠﻮﺳﻪ ﻣﻊ " ﻛﺮﻡ " ﻓﻰ " ﻋﻤﺮ " ﻓﻰ ﺣﺠﺮﺓ ﺍﻟﻤﻌﻴﺸﺔ ﺑﻤﻨﺰﻝ " ﻋﻤﺮ .. " ﻗﺎﻝ " ﻛﺮﻡ " ﺑﻤﺮﺡ :
- ﺃﻋﻤﻞ ﺍﻳﻪ ﻣﻜﻨﺘﺶ ﻋﺎﻳﺰ ﺃﺗﺠﻮﺯ ﺃﺑﺪﺍً .. ﺑﺲ ﺟﺖ ﺍﻟﻠﻰ ﺧﺪﺗﻨﻰ ﻋﻠﻰ ﻣﻼ ﻭﺷﻰ .. ﻭﻗﻠﺒﺖ ﺣﻴﺎﺗﻰ ﻣﻦ ﻓﻮﻗﻬﺎ ﻟﺘﺤﻠﺘﻬﺎ
ﺍﺑﺘﺴﻢ " ﻋﻤﺮ " ﻗﺎﺋﻼً :
- ﺃﺧﻴﺮﺍً ﻋﺸﺖ ﻭﺷﻮﻓﺖ ﺍﻟﻴﻮﻡ ﺩﻩ " .. ﻛﺮﻡ " ﻗﺮﺭ ﻳﺘﺠﻮﺯ ﺃﻧﺎ ﻟﺴﻪ ﻟﺤﺪ ﺩﻟﻮﻗﺘﻰ ﻣﺶ ﻣﺼﺪﻕ
ﻗﺎﻝ " ﺃﻳﻤﻦ " :
- ﻷ ﻭﻣﺶ ﺃﻯ ﺑﻨﺖ " .. ﺭﻳﻬﺎﻡ " ﺍﻟﻠﻰ ﻫﺘﻄﻠﻊ ﻋﻠﻴﻪ ﺍﻟﻘﺪﻳﻢ ﻭﺍﻟﺠﺪﻳﺪ ﺍﻥ ﺷﺎﺀ ﺍﻟﻠﻪ
ﺿﺤﻚ " ﻋﻤﺮ " ﻗﺎﺋﻼً :
- ﻳﺴﺘﺎﻫﻞ .. ﺑﺼﺮﺍﺣﺔ ﻫﻤﺎ ﺍﻻﺗﻨﻴﻦ ﻳﺴﺘﺎﻫﻠﻮﺍ ﺑﻌﺾ
ﻗﺎﻝ " ﻛﺮﻡ " :
- ﺁﻩ ﻏﻨﻮﺍ ﺃﺻﺎﺩ ﺑﻌﺾ ﺍﻧﺘﻮﺍ ﺍﻻﺗﻨﻴﻦ
ﺍﺑﺘﺴﻢ " ﻋﻤﺮ " ﻗﺎﺋﻼً ﺑﻔﺮﺡ :
- ﺑﺠﺪ ﻭﺍﻟﻠﻪ ﻓﺮﺣﺘﻠﻚ ﺃﻭﻯ ﻳﺎ " ﻛﺮﻡ "
ﻗﺎﻝ " ﺃﻳﻤﻦ " :
- ﻳﻼ ﺷﺪ ﺣﻴﻠﻚ ﺍﻧﺖ ﻛﻤﺎﻥ ﻳﺎ " ﻋﻤﺮ .. " ﻭﻣﻤﻜﻦ ﺗﻌﻠﻤﻮﺍ ﺍﻧﺘﻮﺍ ﺍﻻﺗﻨﻴﻦ ﺧﻄﻮﺑﺘﻜﻮﺍ ﻣﻊ ﺑﻌﺾ
ﻗﺎﻝ " ﻋﻤﺮ " ﺑﻠﻬﻔﻪ :
- ﻳﺎﺭﻳﺖ ﺑﺠﺪ ﻳﺎ " ﺃﻳﻤﻦ "
ﻗﺎﻝ " ﻛﺮﻡ " :
- ﻻ ﺍﻃﻤﻦ .. ﺃﻧﺎ ﺣﺎﺳﺲ ﺍﻥ ﺧﻼﺹ ﻓﺎﺿﻞ ﻋﻠﻰ ﺍﻟﺤﻠﻮ ﺯﻗﻪ
ﺻﺎﺡ " ﻋﻤﺮ : "
- ﻣﺎ ﺗﺤﺘﺮﻡ ﻧﻔﺴﻚ ﻳﺎ ﺍﺑﻨﻰ ﺍﻧﺖ .. ﺍﻳﻪ ﺣﻠﻮ ﺩﻯ ؟
ﺿﺤﻚ " ﻛﺮﻡ " ﻗﺎﺋﻼً :
- ﺧﻼﺹ ﻳﺎ ﺑﺎﺷﺎ ﻏﻠﻄﺔ ﻣﻄﺒﻌﻴﺔ
- ﻷ ﺍﺑﻘﻰ ﺧﺪ ﺑﺎﻟﻚ ﺑﻌﺪ ﻛﺪﻩ
- ﺣﺎﺿﺮ ﻳﺎ ﻋﻢ ﺍﻟﺤﻤﺶ
ﺃﻗﺒﻠﺖ " ﻛﺮﻳﻤﺔ " ﻭﻣﻌﻬﺎ ﺍﻟﺨﺎﺩﻣﺔ ﺣﺎﻣﻠﺔ ﺻﻨﻴﺔ ﺑﻬﺎ ﻋﺼﻴﺮ ﻭﺑﻌﺾ ﺃﻃﺒﺎﻕ ﺍﻟﺤﻠﻮﻯ .. ﻗﺎﻟﺖ " ﻛﺮﻳﻤﻪ " ﺑﺴﻌﺎﺩﺓ :
- ﺃﻟﻒ ﻣﺒﺮﻭﻙ ﻳﺎ " ﻛﺮﻡ .. " ﺑﺠﺪ ﻓﺮﺣﺘﻠﻚ ﺃﻭﻯ .. ﺭﺑﻨﺎ ﻳﺘﻤﻤﻠﻚ ﻋﻠﻰ ﺧﻴﺮ
ﻗﺎﻝ " ﻛﺮﻡ " ﺑﻤﺮﺡ :
- ﺷﻮﻓﺘﻰ ﻳﺎ ﻃﻨﻂ .. ﺃﺧﺮﺓ ﺻﺒﺮﻯ ﺁﺧﺪ ﺃﺧﺖ ﺧﻄﻴﺒﺔ " ﻋﻤﺮ " .. ﻳﻌﻨﻲ " ﻋﻤﺮ " ﻭﺭﺍﻳﺎ ﻭﺭﺍﻳﺎ ﺣﺘﻰ ﻓﻰ ﺟﻮﺍﺯﻯ ﻣﺶ ﻋﺎﻳﺰ ﻳﻌﺘﻘﻨﻰ
ﺿﺤﻜﺖ " ﻛﺮﻳﻤﺔ " ﻗﺎﺋﻠﻪ :
- ﺭﺑﻨﺎ ﻳﺨﻠﻴﻜﻮﺍ ﻟﺒﻌﺾ
ﺛﻢ ﻧﻈﺮﺕ ﺍﻟﻰ ﺛﻼﺛﺘﻬﻢ ﻗﺎﺋﻠﻪ :
- ﺑﺠﺪ ﻳﺎ ﻭﻻﺩ ﺻﺪﺍﻗﺘﻜﻮﺍ ﺩﻯ ﻋﻤﻠﺔ ﻧﺎﺩﺭﺓ ﺩﻟﻮﻗﺘﻰ .. ﺍﻧﺘﻮﺍ ﺭﺑﻨﺎ ﺃﻧﻌﻢ ﻋﻠﻴﻜﻮﺍ ﺑﻨﻌﻤﺔ ﻛﺒﻴﺮﺓ ﻧﺎﺱ ﻛﺘﻴﺮ ﺃﻭﻯ ﻣﺤﺮﻭﻣﺔ ﻣﻨﻬﺎ .. ﺻﺪﺍﻗﺘﻜﻮﺍ ﺩﻯ ﻛﻨﺰ ﺑﺠﺪ .. ﺍﻧﺘﻮﺍ ﻣﻦ ﺳﻨﻴﻦ ﻭﺍﻧﺘﻮﺍ ﻣﻊ ﺑﻌﺾ ﺃﻛﺘﺮ ﻣﻦ ﺍﻻﺧﻮﺍﺕ .. ﻭﺍﻗﻔﻴﻦ ﺟﻤﺐ ﺑﻌﺾ ﻓﻰ ﺍﻟﺤﺰﻥ ﻗﺒﻞ ﺍﻟﻔﺮﺡ .. ﺑﺠﺪ ﺍﻧﺘﻮﺍ ﻓﻰ ﻧﻌﻤﺔ ﺑﻜﻴﺮﺓ ﺃﻭﻯ ﺣﺎﻓﻈﻮﺍ ﻋﻠﻴﻬﺎ .. ﻭﻋﻠﻤﻮﺍ ﺩﻩ ﻟﻮﺍﻟﺪﻛﻮﺍ ﻭﻗﺮﺑﻮﻫﻢ ﻣﻦ ﺑﻌﺾ ﻋﺸﺎﻥ ﻳﻜﻮﻥ ﺑﻴﻨﻬﻢ ﺍﻟﺼﺪﺍﻗﺔ ﺍﻟﺠﻤﻴﻠﺔ ﺍﻟﻠﻰ ﺑﻴﻨﻜﻮﺍ ﺩﻟﻮﻗﺘﻰ .. ﻭﺍﻭﻋﻮﺍ ﺗﺒﻌﺪﻭﺍ ﻋﻦ ﺑﻌﺾ ﺃﺑﺪﺍً ﻣﻬﻤﺎ ﺣﺼﻞ .. ﺳﺒﺤﺎﻥ ﺍﻟﻠﻪ ﺍﻟﻄﻴﻮﺭ ﻋﻠﻰ ﺃﺷﻜﺎﻟﻬﺎ ﺗﻘﻊ ﻭﺍﻧﺘﻮﺍ ﺍﻟﺘﻼﺗﻪ ﻣﺘﺘﺨﻴﺮﻭﺵ ﻋﻦ ﺑﻌﺾ .. ﺭﺑﺎ ﻳﻌﻠﻢ ﺍﻥ ﻣﻌﺰﺗﻚ ﻳﺎ " ﻛﺮﻡ " ﺍﻧﺖ ﻭ " ﺃﻳﻤﻦ " ﻣﻦ ﻣﻌﺰﺓ " ﻋﻤﺮ " ﺍﺑﻨﻰ ﻭﺑﻌﺘﺒﺮﻛﻮﺍ ﻭﻻﺩﻯ ﺯﻳﻪ ﺑﺎﻟﻈﺒﻂ
ﻛﺎﻥ ﺍﻷﺻﺪﻗﺎﺀ ﺍﻟﺜﻼﺛﺔ ﻳﻨﻈﺮﻭﻥ ﻟﻬﺎ ﺑﺘﺄﺛﺮ ﻓﺄﻗﺒﻞ " ﻋﻤﺮ " ﻋﻠﻴﻬﺎ ﻭﻗﺒﻞ ﺭﺃﺳﻬﺎ ﻗﺎﺋﻼً :
- ﺭﺑﻨﺎ ﻣﺎ ﻳﺤﺮﻣﻨﻰ ﻣﻨﻚ ﻳﺎ ﺃﻣﻰ ﻭﻻ ﻣﻦ ﻧﺼﺎﻳﺤﻚ ﺍﻟﻐﺎﻟﻴﺔ
ﺧﺮﺟﺖ ﺍﻷﻡ ﻟﺘﺘﺮﻙ ﺍﻷﺻﺪﻗﺎﺀ ﺍﻟﺜﻼﺛﺔ ﻳﻨﻌﻤﻮﻥ ﺑﺼﺤﺒﺔ ﻳﻌﻀﻬﻢ ﺍﻟﺒﻌﺾ
***************************
ﻗﺎﻝ " ﻣﺼﻄﻔﻰ " ﻟﺬﻟﻚ ﺍﻟﺼﻮﺕ ﺍﻷﻧﺜﻮﻯ ﻋﺒﺮ ﺍﻟﻬﺎﺗﻒ :
- ﻷ ﺍﻟﻔﻠﻮﺱ ﻫﺘﺘﻘﺴﻢ ﻋﻠﻰ 3 ﻣﺶ 2 ؟
ﺍﻟﺼﻮﺕ ﺑﻀﻴﻖ :
- ﻟﻴﻪ ﺑﺄﻩ 3
- ﻋﺸﺎﻥ ﻫﺠﻴﺐ ﻭﺍﺣﺪ ﻣﺤﺘﺎﺟﻪ ﻣﻌﺎﻳﺎ ﻓﻰ ﺍﻟﻤﻬﻤﺔ ﺩﻯ
- ﻭﺍﺣﺪ ﻣﻴﻦ ﺍﻥ ﺷﺎﺀ ﺍﻟﻠﻪ .. ﺑﻘﻮﻟﻚ ﺍﻳﻪ ﺍﺣﻨﺎ ﻣﺶ ﻋﺎﻳﺰﻳﻦ ﻋﻚ
ﻗﺎﻝ " ﻣﺼﻄﻔﻰ " ﺑﻌﺼﺒﻴﻪ :
- ﺑﻘﻮﻟﻚ ﻣﺤﺘﺎﺟﻪ ﻣﻌﺎﻳﺎ .. ﺍﻓﺮﺽ ﺣﺼﻠﺖ ﺃﻯ ﻇﺮﻭﻑ ﺃﺣﺘﺎﺝ ﻓﻴﻬﺎ ﻟﺤﺪ ﺟﻤﺒﻰ .. ﻭﻃﺒﻌﺎ ﺣﻀﺮﺗﻚ ﻣﺶ ﻫﺘﺴﺎﻋﺪﻳﻨﻲ ﻟﻮ ﺍﺣﺘﺠﺘﻚ
- ﺃﻧﺎ ﺩﻭﺭﻯ ﻓﻰ ﺍﻟﺨﻄﺔ ﺩﻯ ﻣﻌﺮﻭﻑ ﻭﻣﺶ ﻫﻌﻤﻞ ﺃﻛﺘﺮ ﻣﻦ ﺍﻟﻠﻰ ﺍﺗﻔﻘﻨﺎ ﻋﻠﻴﻪ .. ﻭﻛﻔﺎﻳﺔ ﺍﻥ ﺃﻧﺎ ﺍﻟﻠﻲ ﺧﻄﺖ ﻟﻜﻞ ﺍﻟﻌﻤﻠﻴﺔ ﺩﻯ
- ﻭﻋﺸﺎﻥ ﻛﺪﻩ ﻣﺤﺘﺎﺝ ﻭﺍﺣﺪ ﻣﻌﺎﻳﺎ ﻭﻗﺖ ﺍﻟﺘﻨﻔﻴﻴﺬ .. ﻷﻥ ﻭﻗﺖ ﺍﻟﺘﻨﻔﻴﺬ ﺍﻟﻠﻪ ﺃﻋﻠﻢ ﺍﻳﻪ ﺍﻟﻠﻰ ﻣﻤﻜﻦ ﻳﺤﺼﻞ .. ﻭﻛﻤﺎﻥ ﻫﻮ ﺑﻴﻔﻬﻢ ﻓﻰ ﺍﻟﺤﺎﺟﺎﺕ ﺩﻯ ﻛﻮﻳﺲ ﻭﺃﻛﻴﺪ ﻫﻴﻔﻴﺪﻧﻰ ﻛﺘﻴﺮ ﺑﺪﻝ ﻣﺎ ﺍﻟﺪﻧﻴﺎ ﺗﺘﻌﻚ ﻓﻮﻕ ﺩﻣﺎﻏﻨﺎ
- ﺧﻼﺹ ﻣﻔﻴﺶ ﻣﺸﻜﻠﺔ ﺑﺲ ﻃﺎﻟﻤﺎ ﺍﻟﻔﻠﻮﺱ ﻫﺘﺘﻘﺴﻢ ﻋﻠﻰ 3 ﻳﺒﺄﻩ ﻧﻄﻠﺐ ﺃﻛﺘﺮ
- ﺍﺯﺍﻯ ؟
- ﻳﻌﻨﻲ ﺑﺪﻝ ﻣﺎ ﻛﻨﺎ ﻫﻨﻄﻠﺐ 2 ﻣﻠﻴﻮﻥ ﻧﻄﻠﺐ 3 ﻭﺑﻜﺪﺓ ﺣﺼﺔ ﻛﻞ ﻭﺍﺣﺪ ﻓﻴﻨﺎ ﺗﻔﻀﻞ ﺯﻯ ﻣﺎ ﻫﻰ
ﻗﺎﻝ " ﻣﺼﻄﻔﻰ " :
- ﺗﻤﺎﻡ ﻛﺪﻩ
- ﺑﺲ ﻗﻮﻟﻰ ﺍﻟﻠﻰ ﻫﺘﺠﻴﺒﻪ ﺩﻩ ﻭﺍﺛﻖ ﻓﻴﻪ ؟
- ﺃﻳﻮﺓ ﻣﺘﻘﻠﻘﻴﺶ .. ﺃﻣﺎﻥ
- ﻃﻴﺐ .. ﺑﺲ ﺧﻠﻰ ﺑﺎﻟﻚ .. ﺣﺮﻛﺔ ﻭﺍﺣﺪﺓ ﻏﻠﻂ ﻭﻫﻨﺮﻭﺡ ﻓﻰ ﺳﺘﻴﻦ ﺩﺍﻫﻴﺔ
ﻗﺎﻝ " ﻣﺼﻄﻔﻰ " ﺑﻨﻔﺎﺫ ﺻﺒﺮ :
- ﻗﻮﻟﺘﻠﻚ ﻣﺘﺨﻔﻴﺶ
- ﺍﻣﺘﻰ ﺍﻟﺘﻨﻔﻴﺬ
ﻗﺎﻝ " ﻣﺼﻄﻔﻰ " ﻭﻫﻮ ﻳﻀﻴﻖ ﻋﻴﻨﺎﻩ :
- ﺑﻜﺮﺓ
*************************
ﺗﻮﺟﻬﺖ " ﻳﺎﺳﻤﻴﻦ " ﺍﻟﻰ ﻣﻜﺘﺐ " ﻋﻤﺮ " ﻹﻋﻄﺎﺋﻪ ﻣﻠﻒ ﺍﻟﺘﻘﺎﺭﻳﺮ ﺍﻻﺳﺒﻮﻋﻴﺔ .. ﻓﺘﺤﺖ ﺍﻟﺒﺎﺏ ﻟﺘﺠﺪ ﻭﺍﻟﺪﺗﻪ ﺟﺎﻟﺴﻪ ﻣﻌﻪ ﻓﻰ ﺍﻟﻤﻜﺘﺐ ﻋﻠﻰ ﺃﺭﻳﻜﺔ ﺟﺎﻧﺒﻴﻪ .. ﺍﺑﺘﺴﻤﺖ " ﻛﺮﻳﻤﺔ " ﻗﺎﺋﻠﻪ :
- ﺍﺯﻳﻚ ﻳﺎ " ﻳﺎﺳﻤﻴﻦ "
ﺑﺎﺩﻟﺘﻬﺎ " ﻳﺎﺳﻤﻴﻦ " ﺍﻻﺑﺘﺴﺎﻣﻪ ﻗﺎﺋﻠﻪ :
- ﺍﻟﺤﻤﺪ ﻟﻠﻪ .. ﺍﺯﻯ ﺻﺤﺔ ﺣﻀﺮﺗﻚ
- ﺑﺨﻴﺮ ﻳﺎ ﺣﺒﻴﺒﺘﻰ ﺍﻟﺤﻤﺪ ﻟﻠﻪ
ﺛﻢ ﻧﻬﻀﺖ ﻗﺎﺋﻠﻪ :
- ﺃﺳﻴﺒﻜﻮﺍ ﺑﺄﻩ ﺗﺸﻮﻓﻮﺍ ﺷﻐﻠﻜﻮﺍ
ﻏﺎﺩﺭﺕ ﺛﻢ ﺃﻣﺴﻜﺖ ﺍﻟﺒﺎﺏ ﻭﺃﻏﻠﻘﺘﻪ ﺧﻠﻔﻬﺎ .. ﺗﻮﺗﺮﺕ " ﻳﺎﺳﻤﻴﻦ .. " ﻭﻟﺪﻫﺸﺘﻬﺎ ﻭﺟﺪﺕ " ﻋﻤﺮ " ﻳﺘﺠﻪ ﺍﻟﻰ ﺍﻟﺒﺎﺏ ﻭﻳﻔﺘﺤﻪ ﻣﺮﺓ ﺃﺧﺮﻯ ﺛﻢ ﻳﺘﻘﺪﻡ ﻣﻨﻬﺎ ﻭﻳﻘﻒ ﺃﻣﺎﻣﻬﺎ ﻣﺒﺘﺴﻤﺎً .. ﻻﺣﺖ ﺍﺑﺘﺴﺎﻣﻪ ﺻﻐﻴﺮﻩ ﻋﻠﻰ ﺷﻔﺘﻴﻬﺎ ﻭ ﺧﻔﻀﺖ ﻋﻴﻨﻴﻬﺎ ﻓﻰ ﺧﺠﻞ ﻗﺎﺋﻠﻪ :
- ﺍﺗﻔﻀﻞ ﻳﺎ ﺑﺸﻤﻬﻨﺪﺱ ﺍﻟﺘﻘﺮﻳﺮ ﺍﻻﺳﺒﻮﻋﻰ .. ﺍﻟﺪﻛﺘﻮﺭ " ﺣﺴﻦ " ﺭﺍﺟﻌﻪ ﻭﻣﻀﻰ ﻋﻠﻴﻪ
ﺃﺧﺬ ﻣﻨﻬﺎ ﺍﻟﻤﻠﻒ ﻗﺎﺋﻼً :
- ﻋﺎﺭﻓﺔ ﺃﻧﺎ ﻧﻔﺴﻲ ﻓﻰ ﺍﻳﻪ ؟
ﺻﻤﺘﺖ .. ﻓﺄﻛﻤﻞ ﺑﺤﻨﺎﻥ ﻗﺎﺋﻼً :
- ﻧﻔﺴﻲ ﺃﺳﻤﻊ " ﻋﻤﺮ " ﺑﺪﻝ ﺑﺸﻤﻬﻨﺪﺱ
ﺷﻌﺮﺕ ﺑﺎﻟﺨﺠﻞ ﻓﻨﻈﺮ ﺍﻟﻴﻬﺎ ﺑﺪﻑﺀ :
- ﺗﻌﺮﻓﻰ ﺍﻧﻚ ﻋﻤﺮﻙ ﻣﺎ ﻧﻄﻘﺘﻰ ﺍﺳﻤﻰ ﺃﺑﺪﺍً .. ﺣﺘﻰ ﻣﺎ ﺑﺘﻘﻮﻟﻴﻠﻴﺶ ﺑﺸﻤﻬﻨﺪﺱ " ﻋﻤﺮ " .. ﺑﺘﻘﻮﻟﻰ ﺑﺸﻤﻬﻨﺪﺱ ﺑﺲ .. ﻧﻔﺴﻲ ﺃﺳﻤﻊ ﻣﻨﻚ " ﻋﻤﺮ .. " ﺃﻛﻴﺪ ﺍﺳﻤﻰ ﻫﻴﺒﻘﻰ ﻟﻪ ﻃﻌﻢ ﺗﺎﻧﻰ ﻟﻤﺎ ﺃﺳﻤﻌﻪ ﻣﻨﻪ
ﻗﺎﻟﺖ ﺑﺴﺮﻋﺔ ﻟﺘﺘﻬﺮﺏ ﻣﻦ ﺗﺄﺛﻴﺮ ﻛﻠﻤﺎﺗﻪ ﻋﻠﻴﻬﺎ :
- ﺑﻌﺪ ﺍﺫﻧﻚ
ﺛﻢ ﻏﺎﺩﺭﺕ ﻣﺴﺮﻋﺔ ﻭﺧﻔﻘﺎﺕ ﻗﻠﺒﻬﺎ ﺗﺘﻌﺎﻟﻰ ﻭﺍﺑﺘﺴﺎﻣﺔ ﺷﻔﺘﻴﻬﺎ ﺗﺘﺴﻊ .. ﺣﺘﻰ ﺃﻥ " ﻭﻻﺀ " ﻻﺣﻈﺖ ﺍﻟﺴﻌﺎﺩﺓ ﺍﻟﺒﺎﺩﻳﺔ ﻋﻠﻰ ﻣﺤﻴﺎﻫﺎ ﻓﺎﻗﺘﺮﺑﺖ ﻣﻨﻬﺎ ﻗﺎﺋﻠﻪ :
- ﺧﻴﺮ .. ﻣﺶ ﻋﺎﺩﺗﻚ ﻳﻌﻨﻲ ﺍﻻﺑﺘﺴﺎﻣﻪ ﺍﻟﻠﻰ ﻣﻦ ﺍﻟﻮﺩﻥ ﻟﻠﻮﺩﻥ
ﺣﺎﻭﺕ " ﻳﺎﺳﻤﻴﻦ " ﺍﺧﻔﺎﺀ ﺍﺑﺘﺴﺎﻣﺘﻬﺎ ﻗﺎﺋﻠﻪ :
- ﻋﺎﺩﻯ ﻳﻌﻨﻲ
ﺍﺑﺘﺴﻤﺖ " ﻭﻻﺀ " ﻗﺎﺋﻠﻪ :
- ﻷ ﻣﺶ ﻋﺎﺩﻯ .. ﻟﻤﺎ ﺃﺷﻮﻑ ﻭﺍﻟﺪﺓ " ﻋﻤﺮ " ﺟﻴﺎﻟﻚ ﺍﻟﻤﻜﺘﺐ ﻭﺗﻌﺪ ﻣﻌﺎﻛﻰ ﻭﻗﺖ ﻃﻮﻳﻞ ﻳﺒﺄﻩ ﻣﺶ ﻋﺎﺩﻯ .. ﻭﺍﻧﺘﻰ ﺗﺒﻘﻰ ﺍﻟﻔﺮﺣﺔ ﻣﺶ ﺳﻴﻌﺎﻛﻰ ﻳﺒﻘﻰ ﻣﺶ ﻋﺎﺩﻯ
ﻧﻈﺮﺕ ﺍﻟﻴﻬﺎ " ﻳﺎﺳﻤﻴﻦ " ﻭﻫﻰ ﺗﺸﻌﺮ ﺑﺎﻟﺤﻴﺮﺓ ﺃﺧﺒﺮﻫﺎ .. ﺃﻡ ﻻ ﺗﺨﺒﺮﻫﺎ .. ﺃﺧﺮﺟﺘﻬﺎ " ﻭﻻﺀ " ﻣﻦ ﺣﻴﺮﺗﻬﺎ ﻗﺎﺋﻠﻪ ﺑﺈﺑﺘﺴﺎﻣﻪ :
- ﻣﻦ ﻏﻴﺮ ﻣﺎ ﺗﻘﻮﻟﻰ ﻭﺍﺿﺢ ﺟﺪﺍً ﺍﻟﻠﻰ ﺑﻴﺤﺼﻞ .. ﺍﻧﺘﻰ ﺑﻨﺖ ﻃﻴﺒﺔ ﻭﺗﺴﺘﺎﻫﻠﻰ ﻛﻞ ﺧﻴﺮ
ﻗﺎﻟﺖ " ﻳﺎﺳﻤﻴﻦ " ﺑﺨﺠﻞ :
- ﺃﻧﺎ ﻟﺴﻪ ﻣﻮﺍﻓﻘﺘﺶ
ﻗﺎﻟﺖ " ﻭﻻﺀ " ﺑﻨﻔﺲ ﺍﻻﺑﺘﺴﺎﻣﻪ :
- ﺃﻫﻢ ﺣﺎﺟﻪ ﺍﺳﺘﺨﻴﺮﻱ ﻛﻮﻳﺲ ﻭﺍﺳﺄﻟﻮﺍ ﻋﻠﻴﻪ ﻛﻮﻳﺲ .. ﻭﺃﻯ ﺣﺎﺟﻪ ﺗﺴﻤﻌﻴﻬﺎ ﻋﻨﻪ ﻧﺎﻗﺸﻴﻪ ﻓﻴﻬﺎ ﻭﺷﻮﻓﻰ ﺭﺩﻩ ﻋﻠﻴﻬﺎ ﺍﻳﻪ .. ﻳﻌﻨﻲ ﺍﻟﻠﻰ ﺃﻗﺼﺪ ﺃﻗﻮﻟﻬﻮﻟﻚ ﻟﻤﺎ ﺗﻌﺮﻓﻰ ﻋﻨﻪ ﺣﺎﺟﻪ ﻣﺘﻜﺒﺮﻳﺶ ﺩﻣﺎﻏﻚ ﻣﻨﻬﺎ .. ﻷ ﻻﺯﻡ ﺗﻌﺮﻓﻰ ﺃﺻﻞ ﻭﻓﺼﻞ ﺍﻟﺤﻜﺎﻳﺔ ﻣﻨﻪ .. ﻋﺸﺎﻥ ﺗﺒﻘﻰ ﻋﻠﻰ ﻧﻮﺭ ﻣﻦ ﺍﻷﻭﻝ .. ﻭﺗﻜﻮﻧﻰ ﻣﺘﺄﻛﺪﺓ ﻣﻦ ﺃﺧﻼﻕ ﺍﻟﺮﺍﺟﻞ ﺍﻟﻠﻰ ﻫﺘﺮﺗﺒﻄﻰ ﺑﻴﻪ
ﺃﻭﻣﺄﺕ " ﻳﺎﺳﻤﻴﻦ " ﺑﺮﺃﺳﻬﺎ ﻗﺎﺋﻠﻪ :
- ﻣﻌﺎﻛﻰ ﺣﻖ .. ﺃﻯ ﺣﺎﺟﻪ ﺍﺷﺎﻋﻪ ﺃﺳﻤﻌﻬﺎ ﻋﻨﻪ ﻻﺯﻡ ﺃﺗﺄﻛﺪ ﻫﻰ ﺻﺢ ﻭﻻ ﻷ
- ﺭﺑﻨﺎ ﻳﺘﻤﻤﻠﻚ ﻋﻠﻰ ﺧﻴﺮ ﻳﺎ " ﻳﺎﺳﻤﻴﻦ " ﻟﻮ ﻛﺎﻥ ﻓﻴﻪ ﺧﻴﺮ ﻟﻴﻜﻲ
ﺍﺑﺘﺴﻤﺖ " ﻳﺎﺳﻤﻴﻦ " ﻗﺎﺋﻠﻪ :
- ﺗﺴﻠﻤﻲ ﻳﺎ ﻭﻻﺀ .. ﻭﻋﻘﺒﺎﻟﻚ ﺍﻧﺘﻰ ﻛﻤﺎﻥ
****************************
ﺟﻠﺴﺖ " ﻛﺮﻳﻤﻪ " ﻣﻊ ﺯﻭﺟﻬﺎ ﻋﻠﻰ ﺷﺮﻓﺔ ﻏﺮﻓﺘﻬﻤﺎ ﻗﺎﺋﻠﻪ :
- ﺑﺼﺮﺍﺣﺔ ﺍﺗﺼﺪﻣﺖ ﻟﻤﺎ ﺷﻮﻓﺘﻬﺎ .. ﻻﻧﻬﺎ ﻣﺨﺘﻠﻔﻪ ﻋﻦ " ﻧﺎﻧﺴﻲ .. " ﻭﻗﻮﻟﺖ ﺍﻟﻜﻼﻡ ﺩﻩ ﻝ " ﻋﻤﺮ "
ﻗﺎﻝ " ﻧﻮﺭ " :
- ﺑﺼﺮﺍﺣﺔ ﺍﻟﻠﻰ ﺍﺳﻤﻬﺎ " ﻧﺎﻧﺴﻲ " ﺩﻯ ﺃﻧﺎ ﻣﻜﻨﺘﺶ ﻣﺮﺗﺤﻠﻬﺎ ﺧﺎﻟﺺ .. ﺑﺲ ﺍﻧﺘﻰ ﻋﺎﺭﻓﻪ ﺍﻧﻰ ﻣﺒﺤﺒﺶ ﺃﻓﺮﺽ ﺭﺃﻳﻲ ﻋﻠﻰ " ﻋﻤﺮ "
ﻗﺎﻟﺖ " ﻛﺮﻳﻤﻪ :
- ﺍﻟﺒﻨﺖ ﻟﺒﺴﻬﺎ ﻣﺤﺘﺸﻢ ﺃﻭﻯ ﻭ ﻣﺤﺠﺒﺔ ﻭﻫﺎﺩﻳﺔ ﻭﺧﺠﻮﻟﺔ ﻭﻛﻤﺎﻥ ﻋﺎﻗﻠﺔ ﻭﺫﻛﻴﺔ ﻭﺣﺴﻴﺘﻬﺎ ﻛﻤﺎﻥ ﻃﻴﺒﺔ ﺃﻭﻯ
ﺿﺤﻚ " ﻧﻮﺭ " ﻗﺎﺋﻠﻪ :
- ﻛﻞ ﺩﻩ ﻋﺮﻓﺘﻴﻪ ﻋﻨﻬﺎ ﻣﻦ ﻣﻘﺎﺑﻠﺔ ﻭﺍﺣﺪﺓ
ﺍﺑﺘﺴﻤﺖ " ﻛﺮﻳﻤﻪ : "
- ﺍﻧﺖ ﻋﺎﺭﻑ ﺍﻧﻰ ﺑﻘﺪﺭ ﺃﻓﻬﻢ ﺍﻟﻨﺎﺱ ﺑﺴﺮﻋﺔ .. ﻭﺍﻟﺒﻨﺖ ﻓﻌﻼً ﻣﺮﻳﺤﻪ .. ﺗﻌﺮﻑ ﻳﺎ " ﻧﻮﺭ " ﻣﺤﺴﺘﺶ ﺃﺑﺪﺍً ﺍﻧﻬﺎ ﻭﺍﺣﺪﺓ ﻛﺎﻧﺖ ﻣﺘﺠﻮﺯﺓ ﻗﺒﻞ ﻛﺪﻩ .. ﻳﻌﻨﻲ ﺗﺤﺴﻬﺎ ﺑﻨﻮﺗﻪ ﺻﻐﻴﺮﺓ .. ﻭﻟﻤﺎ ﺍﺗﻜﻤﻠﺖ ﻋﻦ ﺟﻮﺍﺯﺗﻬﺎ ﺍﻷﻭﻟﻰ ﻭﺍﻧﻬﺎ ﻛﺎﻧﺖ ﺗﺠﺮﺑﺔ ﻗﺎﺳﻴﺔ ﻋﻠﻴﻬﺎ .. ﺑﺼﺮﺍﺣﺔ ﺻﻌﺒﺖ ﻋﻠﻴﺎ ﺃﻭﻯ .. ﺣﺴﻴﺖ ﺍﻥ ﺍﻟﺒﻨﺖ ﺩﻯ ﺍﺗﻈﻠﻤﺖ ﻛﺘﻴﺮ .. ﻭﺷﺎﻳﻠﻪ ﻓﻰ ﻗﻠﺒﻬﺎ ﻛﺘﻴﺮ .. ﻭﺩﻩ ﺳﺒﺐ ﺧﻮﻓﻬﺎ ﻣﻦ ﺍﻻﺭﺗﺒﺎﻁ ﻣﺮﺓ ﺗﺎﻧﻴﺔ
- ﺣﺒﺘﻴﻬﺎ ﻳﻌﻨﻲ
- ﺑﺼﺮﺍﺣﺔ ﺃﻳﻮﺓ .. ﻟﻤﺎ ﺃﻋﺪﺕ ﻭﺍﺗﻜﻤﻠﺖ ﻣﻌﺎﻫﺎ ﺣﺴﺘﻬﺎ ﺍﻧﺴﺎﻧﻪ ﻧﺎﺿﺠﺔ .. ﻣﺶ ﻭﺍﺣﺪﺓ ﺑﺘﺠﺮﻯ ﻭﺭﺍ ﺍﻟﻤﻈﺎﻫﺮ ﻭﺧﻼﺹ .. ﻭﺍﺣﺪﺓ ﺷﺎﻳﻔﻪ " ﻋﻤﺮ " ﻋﺮﻳﺲ ﻟﻘﻄﺔ ﺑﺎﻟﻨﺴﺒﺔ ﻟﻬﺎ .. ﻷ ﺍﻟﺒﻨﺖ ﺑﺘﻔﻜﺮ ﻓﻰ ﻛﻞ ﺣﺎﺟﻪ .. ﻷﻧﻬﺎ ﻣﺶ ﻋﺎﻳﺰﺓ ﺗﺨﺘﺎﺭ ﻏﻠﻂ .. ﻭﻣﺶ ﻣﻬﺘﻤﺔ ﺑﺎﻟﻤﻈﺎﻫﺮ .. ﺃﺩ ﻣﺎ ﻫﻰ ﻣﻬﺘﻤﺔ ﺑﺸﺨﺼﻴﺔ " ﻋﻤﺮ " ﻭﺑﺄﺧﻼﻗﻪ .. ﺍﻟﺒﻨﺖ ﺩﻯ ﻟﻮ ﺣﺒﺖ " ﻋﻤﺮ " ﻫﺘﺤﺒﻪ ﻣﻦ ﻛﻞ ﻗﻠﺒﻬﺎ .. ﻭﻫﺘﺤﺒﻪ ﻋﺸﺎﻧﻪ ﻫﻮ .. ﻋﺸﺎﻥ " ﻋﻤﺮ " .. ﻣﺶ ﻋﺸﺎﻥ ﻫﻮ ﻣﻴﻦ ﻭﺍﺑﻦ ﻣﻴﻦ
ﺛﻢ ﺃﻛﻤﻠﺖ ﻗﺎﺋﻠﻪ :
- ﻭﺑﻌﺪﻳﻦ ﻭﺍﺿﺢ ﺍﻧﻬﺎ ﻣﺆﺩﺑﺔ ﻭﻣﺘﺮﺑﻴﺔ ﻛﻮﻳﺲ .. ﻣﺮﺍﻋﻴﺔ ﺣﺪﻭﺩﻫﺎ ﻓﻰ ﺍﻟﻜﻼﻡ ﻣﻌﺎﻳﺎ ﻭﺑﺘﺘﻜﻠﻢ ﺑﺈﺣﺘﺮﺍﻡ ﻭﺑﺄﺩﺏ .. ﺑﻌﻜﺲ " ﻧﺎﻧﺴﻲ " ﺍﻟﻠﻰ ﻟﻤﺎ ﻛﻨﺖ ﺑﺤﺎﻭﻝ ﺃﻧﺼﺤﻬﺎ ﻋﺸﺎﻥ ﻣﺼﻠﺤﺘﻬﺎ ﻫﻰ ﻭ " ﻋﻤﺮ " ﻛﺎﻧﺖ ﺑﺘﺴﻤﻌﻨﻰ ﻛﻼﻡ ﻣﻴﺼﺤﺶ ﺑﻨﺖ ﻣﺘﺮﺑﻴﺔ ﺗﻘﻮﻟﻪ ﻟﻮﺍﺣﺪﻩ ﻓﻰ ﺳﻦ ﻭﺍﻟﺪﺗﻬﺎ .. ﺑﺼﺮﺍﺣﺔ " ﻳﺎﺳﻤﻴﻦ " ﺩﺧﻠﺖ ﺩﻣﺎﻏﻰ
ﺍﺑﺘﺴﻢ " ﻧﻮﺭ " ﻗﺎﺋﻼً :
- ﻓﺮﺣﺘﻴﻨﻲ ﺑﻜﻼﻣﻚ ﺩﻩ .. ﻭﻣﻦ ﻛﻼﻣﻚ ﻋﻨﻬﺎ ﻭﺍﺿﺢ ﺍﻧﻰ ﻫﺤﺒﻬﺎ ﺃﻧﺎ ﻛﻤﺎﻥ
ﺃﻛﺪﺕ " ﻛﺮﻳﻤﻪ " ﻗﺎﺋﻼً :
- ﻫﻰ ﻓﻌﻼً ﺗﺘﺤﺐ .. ﺣﺴﻪ ﺍﻥ " ﻋﻤﺮ " ﺍﻟﻤﺮﺓ ﺩﻯ ﺍﺧﺘﺎﺭ ﺻﺢ
************************
- ﻃﻴﺐ ﻧﺘﻔﻖ ﻛﺪﻩ ﻣﻦ ﺍﻷﻭﻝ ﺍﻟﻜﻠﻤﺔ ﻛﻠﻤﺘﻰ ﻭﺍﻟﻠﻰ ﻫﻘﻮﻟﻪ ﻳﺘﻨﻔﺬ ﺑﺎﻟﺤﺮﻑ .. ﻳﺎ ﻛﺪﻩ ﻳﺎ ﻣﺶ ﺩﺍﺧﻞ ﺍﻟﻠﻌﺒﺔ
ﻧﻄﻖ " ﺑﺴﻄﻮﻳﺴﻲ " ﻫﺬﻩ ﺍﻟﻌﺒﺎﺭﺓ .. ﻛﺎﻥ ﺭﺟﻞ ﻃﻮﻳﻞ ﺍﻟﻘﺎﻣﺔ ﻋﺮﻳﺾ ﺍﻟﻤﻨﻜﺒﻴﻦ ﻟﻪ ﻫﻴﺌﺔ ﻣﺮﻋﺒﺔ ﻣﻨﻔﺮﺓ ﻭﺍﻟﺸﺮﺭ ﻳﺘﻄﺎﻳﺮ ﻣﻦ ﻋﻴﻨﻴﻪ .. ﺗﺸﻌﺮ ﻭﺃﻧﺖ ﺗﻨﻈﺮ ﺍﻟﻴﻪ ﺑﻌﺪﻡ ﺍﻻﺭﺗﻴﺎﺡ .. ﺭﺩ ﻋﻠﻴﻪ " ﻣﺼﻄﻔﻰ " ﻗﺎﺋﻼً :
- ﻣﺎﺷﻰ ﻳﺎ " ﺑﺴﻄﻮﺳﻲ " ﺍﺗﻔﻘﻨﺎ .. ﺑﺲ ﺑﺸﺮﻁ ﻣﺶ ﻋﺎﻳﺰ ﺍﻟﺒﻨﺖ ﺗﺘﺄﺫﻯ ﻳﻌﻨﻲ ﻋﻤﻠﻴﻪ ﻧﻀﻴﻔﻪ ﻣﻦ ﻏﻴﺮ ﻧﻘﻄﺔ ﺩﻡ
ﻗﺎﻝ ﺑﺼﻮﺕ ﺃﺟﺶ :
- ﺍﺗﻔﻘﻨﺎ ﻳﺎ ﺑﺮﻧﺲ .. ﺍﻣﺘﻰ ﺍﻟﺘﻨﻔﻴﺬ
- ﺑﻜﺮﺓ
- ﻗﺸﻄﺔ .. ﻭﻧﺼﻴﺒﻲ ؟
- ﻣﻠﻴﻮﻥ ﺟﻨﻴﺔ ﺯﻯ ﻣﺎ ﺍﺗﻔﻘﻨﺎ
- ﺣﻠﻮ ﺍﻟﻜﻼﻡ .. ﻳﻼ ﺑﺄﻩ ﺗﻌﺎﻟﻰ ﺍﻋﺪ ﻋﺸﺎﻥ ﻧﺘﻔﻖ ﻋﻠﻰ ﺍﻟﺘﻔﺎﺻﻴﻞ
************************
ﻗﺎﻣﺖ " ﻳﺎﺳﻤﻴﻦ " ﻓﺰﻋﺔ ﻣﻦ ﻧﻮﻣﻬﺎ ﻣﺮﺩﺩﻩ ﺛﻼﺙ ﻣﺮﺍﺕ :
- ﺃﻋﻮﺫ ﺑﺎﻟﻠﻪ ﻣﻦ ﺍﻟﺸﻴﻄﺎﻥ ﺍﻟﺮﺟﻴﻢ
ﺍﺳﺘﻴﻘﻈﺖ " ﺭﻳﻬﺎﻡ " ﻋﻠﻰ ﺻﻮﺗﻬﺎ ﻗﺎﺋﻠﻪ :
- ﺧﻴﺮ ﻓﻰ ﺍﻳﻪ ؟
ﻟﻢ ﺗﺴﺘﻄﻊ " ﻳﺎﺳﻤﻴﻦ " ﺍﻟﺘﺤﺪﺙ ﻓﻘﺎﻣﺖ " ﺭﻳﻬﺎﻡ " ﻭﺟﻠﺴﺖ ﺍﻟﻰ ﺟﻮﺍﺭﻫﺎ ﺗﺘﻔﺤﺼﻬﺎ ﻗﺎﺋﻠﻪ :
- ﻣﺎﻟﻚ ﻓﻰ ﺍﻳﻪ ؟
ﻗﺎﻟﺖ " ﻳﺎﺳﻤﻴﻦ " ﺑﺼﻮﺕ ﻣﺮﺗﺠﻒ :
- ﻣﻌﺮﻓﺶ ﺣﺴﻴﺖ ﺍﻥ ﻓﻰ ﺣﺎﺟﺔ ﻃﺎﺑﻘﻪ ﻋﻠﻰ ﻧﻔﺴﻲ ﺃﻭﻯ
ﻗﺎﻟﺖ ﻟﻬﺎ " ﺭﻳﻬﺎﻡ " :
- ﺍﺳﺘﻌﻴﺬﻯ ﺑﺎﻟﻠﻪ
ﺃﺯﺍﺣﺖ " ﻳﺎﺳﻤﻴﻦ " ﺍﻟﻐﻄﺎﺀ ﻭﻧﻬﻀﺖ .. ﺳﺄﻟﺘﻬﺎ " ﺭﻳﻬﺎﻡ " :
- ﺭﺍﺣﺔ ﻓﻴﻦ
ﻗﺎﻟﺖ " ﻳﺎﺳﻤﻴﻦ " ﻭﻫﻰ ﺗﺤﺎﻭﻝ ﺍﺳﺘﻤﺎﻉ ﺷﺘﺎﺕ ﻧﻔﺴﻬﺎ :
- ﻫﻘﻮﻡ ﺃﺗﻮﺿﻰ ﻭﺃﺻﻠﻰ ﻗﻴﺎﻡ ﺑﺎﻗﻰ ﺳﺎﻋﺔ ﻋﻠﻰ ﺍﻟﻔﺠﺮ .. ﺗﻮﺿﺄﺕ " ﻳﺎﺳﻤﻴﻦ " ﻭﺻﻠﺖ ﺣﺘﻰ ﺁﺫﺍﻥ ﺍﻟﻔﺠﺮ .. ﻛﺎﻧﺖ ﻛﻠﻤﺎ ﺷﻌﺮﺕ ﺑﺎﻟﺨﻮﻑ ﻟﺠﺄﺕ ﺍﻟﻰ ﺍﻟﺼﻼﺓ ﺍﻟﺘﻰ ﺗﺮﻳﺢ ﻗﻠﺒﻬﺎ ﻭﺗﻄﻤﺄﻧﻪ .. ﺃﻳﻘﻈﺖ " ﺭﻳﻬﺎﻡ " ﻟﺼﻼﺓ ﺍﻟﻔﺠﺮ .. ﺛﻢ ﻋﺎﺩﺕ ﺍﻟﻰ ﻣﺼﻼﻫﺎ ﻭﺭﺩﺩﺕ ﺃﺫﻛﺎﺭ ﺍﻟﺼﺒﺎﺡ ﺍﻟﺘﻰ ﺗﺤﺎﻓﻆ ﻋﻠﻴﻬﺎ ﻛﻞ ﻳﻮﻡ ﻭﺗﺬﻛﺮﺕ ﺣﺪﻳﺚ ﺭﺳﻮﻝ ﺍﻟﻠﻪ ﺻﻠﻰ ﺍﻟﻠﻪ ﻋﻠﻴﻪ ﻭﺳﻠﻢ " : ﻣﺎ ﻣﻦ ﻋﺒﺪ ﻳﻘﻮﻝ ﻓﻲ ﺻﺒﺎﺡ ﻛﻞ ﻳﻮﻡ ﻭﻣﺴﺎﺀ ﻛﻞ ﻳﻮﻡ : ﺑﺴﻢ ﺍﻟﻠﻪ ﺍﻟﺬﻱ ﻻ ﻳﻀﺮ ﻣﻊ ﺍﺳﻤﻪ ﺷﻲﺀ ﻓﻲ ﺍﻷﺭﺽ ﻭﻻ ﻓﻲ ﺍﻟﺴﻤﺎﺀ ﻭﻫﻮ ﺍﻟﺴﻤﻴﻊ ﺍﻟﻌﻠﻴﻢ ﺛﻼﺙ ﻣﺮﺍﺕ ﻓﻴﻀﺮﻩ ﺷﻲﺀ " ... ﺛﻢ ﺃﻣﺴﻜﺖ ﻣﺼﺤﻔﻬﺎ ﻭﺃﺧﺬﺕ ﺗﻘﺮﺃ ﻓﻴﻪ ﺣﺘﻰ ﺍﻟﺸﺮﻭﻕ
ﻛﺎﻥ ﻳﻮﻡ ﻋﻤﻞ ﻋﺎﺩﻯ ﺑﺎﻟﻨﺴﺒﻪ ﺍﻟﻰ " ﻳﺎﺳﻤﻴﻦ .. " ﺃﻧﻬﺖ ﻋﻤﻠﻬﺎ ﻭﺃﻭﺷﻜﺖ ﻋﻠﻰ ﺍﻟﺘﻮﺟﻪ ﺍﻟﻰ ﻏﺮﻓﺘﻬﺎ ﻋﻨﺪﻣﺎ ﻭﺟﺪﺕ ﺭﻗﻤﺎً ﻏﺮﻳﺒﺎً ﻳﺘﺼﻞ ﺑﻬﺎ ﺭﺩﺕ ﻓﻮﺟﺪﺕ ﻣﻦ ﺗﻘﻮﻝ :
- ﺍﺯﻳﻚ ﻳﺎ " ﻳﺎﺳﻤﻴﻦ " ﺃﻧﺎ ﺍﻟﺪﻛﺘﻮﺭﺓ " ﻣﻬﺎ "
ﺷﻌﺮﺕ " ﻳﺎﺳﻤﻴﻦ " ﺑﺎﻟﺪﻫﺸﺔ .. ﻟﻤﺎﺫﺍ ﺗﺘﺼﻞ ﺑﻬﺎ .. ﺧﺎﺻﺔ ﺑﻌﺪﻣﺎ ﻋﻤﻠﺖ " ﻳﺎﺳﻤﻴﻦ " ﻣﻦ " ﺳﻤﺎﺡ " ﺑﺪﻭﺭ " ﻣﻬﺎ " ﻓﻰ ﻗﺼﺔ ﺣﺮﻳﻖ ﻣﺨﺰﻥ ﺍﻟﻌﻠﻒ .. ﻗﺎﻟﺖ " ﻳﺎﺳﻤﻴﻦ " ﺑﺒﺮﻭﺩ :
- ﺧﻴﺮ ﻳﺎ ﺩﻛﺘﻮﺭﺓ ؟
ﻗﺎﻟﺖ " ﻣﻬﺎ " :
- ﻣﺤﺘﺎﺟﺔ ﺃﺗﻜﻠﻢ ﻣﻌﺎﻛﻰ ﺷﻮﻳﺔ
ﻗﺎﻟﺖ " ﻳﺎﺳﻤﻴﻦ " ﺑﻨﻔﺲ ﺍﻟﺒﺮﻭﺩ :
- ﻣﻔﻴﺶ ﺃﻯ ﺣﺎﺟﻪ ﺑﻴﻨﻰ ﻭﺑﻴﻦ ﺣﻀﺮﺗﻚ ﻧﺘﻜﻠﻢ ﻓﻴﻬﺎ .. ﻣﻊ ﺍﻟﺴﻼﻣﻪ
ﻗﺎﻟﺖ " ﻣﻬﺎ " ﺑﺴﺮﻋﺔ :
- ﺍﻟﺤﺎﺟﺔ ﺩﻯ ﻋﻦ ﺍﻟﺒﺸﻤﻬﻨﺪﺱ " ﻋﻤﺮ "
ﺗﻮﻗﻔﺖ " ﻳﺎﺳﻤﻴﻦ " ﻟﺘﺴﻤﻌﻬﺎ .. ﻓﺄﻛﻤﻠﺖ " ﻣﻬﺎ " ﻗﺎﺋﻠﻪ :
- ﺃﻧﺎ ﻣﺶ ﻫﺎﺧﺪ ﻣﻦ ﻭﻗﺘﻚ ﺃﻛﺘﺮ ﻣﻦ ﺧﻤﺲ ﺩﻗﺎﻳﻖ ﺑﺲ
ﻗﺎﻟﺖ " ﻳﺎﺳﻤﻴﻦ : "
- ﺍﺗﻔﻀﻠﻰ ﺳﻤﻌﺎﻛﻰ
ﻗﺎﻟﺖ " ﻣﻬﺎ " ﻋﻠﻰ ﺍﻟﻔﻮﺭ :
- ﻷ ﻣﺶ ﻫﻴﻨﻔﻊ ﻓﻰ ﺍﻟﺘﻠﻴﻔﻮﻥ ﺍﻷﻓﻀﻞ ﺃﻛﻠﻤﻚ ﻭﺟﻬﺎً ﻟﻮﺟﻪ ﺃﻧﺎ ﻭﺍﻗﻔﻪ ﺃﺩﺍﻡ ﺑﺎﺏ ﺍﻟﻤﺰﺭﻋﺔ ﻣﻦ ﺑﺮﻩ ﻟﻮ ﺳﻤﺤﺘﻰ ﺍﻃﻠﻌﻰ ﻧﺘﻜﻠﻢ ﺷﻮﻳﺔ ﻻﻧﻰ ﻣﺶ ﻫﻴﻨﻔﻊ ﺃﺩﺧﻞ ﺍﻟﻤﺰﺭﻋﺔ ﺑﻌﺪ ﺍﻟﻠﻰ ﺣﺼﻞ
ﺻﻤﺘﺖ " ﻳﺎﺳﻤﻴﻦ " ﻗﻠﻴﻼً ﻓﺄﻟﺤﺖ ﻋﻠﻴﻬﺎ " ﻣﻬﺎ " ﻗﺎﺋﻠﻪ :
- ﻣﺶ ﻫﺎﺧﺪ ﻣﻦ ﻭﻗﺘﻚ ﺃﻛﺘﺮ ﻣﻦ ﺧﻤﺲ ﺩﻗﺎﻳﻖ .. ﺑﺲ ﺑﺠﺪ ﺍﻟﻤﻌﻠﻮﻣﺎﺕ ﺍﻟﻠﻰ ﻋﻨﺪﻯ ﻣﻬﻤﺔ ﺟﺪﺍً ﻭﻻﺯﻡ ﺗﻌﺮﻓﻴﻬﺎ .. ﺃﻧﺎ ﻣﻨﺘﻈﺮﺍﻛﻰ ﺃﺩﺍﻡ ﺍﻟﺒﻮﺍﺑﺔ .. ﺳﻼﻡ
ﺃﻏﻠﻘﺖ ﺍﻟﺨﻂ ﻭﺗﺮﻛﺖ " ﻳﺎﺳﻤﻴﻦ " ﺗﺘﺨﺒﻂ ﻣﻦ ﺍﻟﺤﻴﺮﺓ .. ﺃﻧﻬﺖ " ﻣﻬﺎ " ﺍﻟﻤﻜﺎﻟﻤﺔ ﻟﺘﺘﺼﻞ ﺑـ " ﻣﺼﻄﻔﻰ " ﻗﺎﺋﻠﻪ :
- ﺃﻧﺎ ﻛﺪﺓ ﻋﻤﻠﺖ ﺍﻟﻠﻰ ﻋﻠﻴﺎ ﺍﻟﺪﻭﺭ ﻋﻠﻴﻚ ﺑﺄﻩ .. ﻧﻔﺬ ﺍﻟﻠﻰ ﻣﻄﻠﻮﺏ ﻣﻨﻚ ﺻﺢ
ﻗﺎﻟﺖ ﺫﻟﻚ ﺛﻢ ﺃﻏﻠﻘﺖ .. ﺗﺮﺩﺩﺕ " ﻳﺎﺳﻤﻴﻦ " ﻓﻰ ﺍﻟﺬﻫﺎﺏ ﺛﻢ ﺃﺧﻴﺮﺍً ﻋﺰﻣﺖ ﺃﻣﺮﻫﺎ ﻭﺗﻮﺟﻬﺖ ﺍﻟﻰ ﺍﻟﺒﻮﺍﺑﻪ .. ﻓﺘﺢ ﻟﻬﺎ ﺍﻟﻐﻔﻴﺮ ﻭﺧﺮﺟﺖ .. ﻧﻈﺮﺕ ﻳﻤﻴﻨﺎً ﻭﻳﺴﺎﺭﺍً ﻓﻠﻢ ﺗﺠﺪ ﺃﺣﺪﺍً .. ﺳﺎﺭﺕ ﻗﻠﻴﻼ ﻓﻰ ﺍﺗﺠﺎﻩ ﺍﻷﺷﺠﺎﺭ ﺍﻟﺘﻰ ﺗﻘﻊ ﻋﻠﻰ ﺃﺣﺪ ﺟﺎﻧﺒﻲ ﺍﻟﻤﺰﺭﻋﺔ .. ﻟﺘﺠﺪ ﻓﺠﺄﺓ ﻣﻦ ﻳﻄﺒﻖ ﻋﻠﻴﻬﺎ ﻣﻦ ﺍﻟﺨﻠﻒ ﻭﻳﻜﻤﻢ ﻓﻤﻬﺎ ﻭﺃﻧﻔﻬﺎ ﺑﻘﻄﻌﺔ ﻗﻤﺎﺵ .. ﻭﻣﺎ ﻫﻰ ﺇﻻ ﻟﺤﻈﺎﺕ ﻭﻓﻘﺪﺕ " ﻳﺎﺳﻤﻴﻦ " ﺍﻟﻮﻋﻰ ﺍﺛﺮ ﺍﻟﻤﺎﺩﺓ ﺍﻟﻤﺨﺪﺭﺓ ﺍﻟﻤﻮﺿﻮﻋﻪ ﻓﻰ ﺍﻟﻘﻤﺎﺵ .
ﺟﺮﻫﺎ ﺍﻟﺮﺟﻞ ﻓﻰ ﺍﺗﺠﺎﻩ ﺍﻟﺴﻴﺎﺭﺓ ﺍﻟﺘﻰ ﺃﺧﻔﺎﻫﺎ ﻓﻰ ﺷﺎﺭﻉ ﺟﺎﻧﺒﻲ ﺑﺠﻮﺍﺭ ﺍﻟﻤﺰﺭﻋﺔ ﺛﻢ ﺣﻤﻠﻬﺎ ﻭﻭﺿﻌﻬﺎ ﻓﻰ ﺻﻨﺪﻭﻕ ﺍﻟﺴﻴﺎﺭﺓ ﻭﺩﺧﻞ ﻭﺟﻠﺲ ﺑﺠﻮﺍﺭ " ﻣﺼﻄﻔﻰ " ﻭﻗﺎﻝ ﻟﻪ :
- ﻳﻼ ﺑﺴﺮﻋﺔ
ﺍﻧﻄﻠﻖ " ﻣﺼﻄﻔﻰ " ﺑﺎﻟﺴﻴﺎﺭﺓ ﺍﻟﻰ ﺍﻟﻤﻜﺎﻥ ﺍﻟﺬﻯ ﺍﺗﻔﻘﺎ ﻋﻠﻴﻬﺎ ﻣﻦ ﻗﺒﻞ .. ﻓﻘﺪ ﻣﺴﺤﺎ ﺍﻟﻤﻨﻄﻘﺔ ﺍﻟﻤﺠﺎﻭﺭﺓ ﻟﻠﻤﺰﺭﻋﺔ ﺟﻴﺪﺍً ﻭﺍﺧﺘﺎﺭﺍ ﺃﻧﺴﺐ ﻣﻜﺎﻥ ﻻﺧﻔﺎﺀ " ﻳﺎﺳﻤﻴﻦ " ﺑﻪ .. ﻭﺻﻠﻮﺍ ﺍﻟﻰ ﺍﻟﻤﻜﺎﻥ ﻭﻧﺰﻝ ﺍﻟﺮﺟﻼ ﻭﺣﻤﻼ " ﻳﺎﺳﻤﻴﻦ " ﺍﻟﻰ ﺍﻟﺪﺍﺧﻞ ﻭﻭﺿﻌﺎﻫﺎ ﻋﻠﻰ ﺍﻷﺭﺽ ﻭﺃﺧﺬ " ﻣﺼﻄﻔﻰ " ﻳﺮﺑﻂ ﻳﺪﻳﻬﺎ ﺧﻠﻒ ﻇﻬﺮﻫﺎ ﻭﺭﺑﻂ ﻗﺪﻣﻬﺎ ﻭﻛﻤﻢ ﻓﻤﻬﺎ ﻭﻭﺿﻊ ﻋﺼﺒﺔ ﻋﻠﻰ ﻋﻴﻨﻬﺎ .. ﺛﻢ ﺃﺷﺎﺭ ﻟﻪ " ﺑﺴﻄﻮﻳﺴﻲ " ﺑﺎﻟﺨﺮﻭﺝ ﻓﺨﺮﺟﺎ ﻣﻌﺎً ﻭﺃﻏﻠﻘﺎ ﺍﻟﺒﺎﺏ ﻭﻭﻗﻔﺎ ﺑﺠﺎﻧﺐ ﺍﻟﺴﻴﺎﺭﺓ .. ﻗﺎﻝ ﻟﻪ ﺑﺴﻄﻮﻳﺴﻲ :
- ﺯﻯ ﻣﺎ ﺍﺗﻔﻘﻨﺎ ﻓﺘﺸﻬﺎ ﻛﻮﻳﺲ ﻭﺧﺪ ﻣﻨﻬﺎ ﻣﻮﺑﺎﻳﻠﻬﺎ ﻭﺃﻯ ﺣﺎﺟﻪ ﻣﻌﺎﻫﺎ ﻭﻣﺘﺨﻠﻴﻬﺎﺵ ﺗﺸﻮﻑ ﻭﺷﻚ ﻭﻻ ﺗﺴﻤﻊ ﺻﻮﺗﻚ ..
ﺛﻢ ﺃﻋﻄﺎﻩ ﻗﻨﺎﻉ ﻗﻤﺎﺵ ﻟﻠﻮﺟﻪ ﻭﻗﺎﻝ ﻟﻪ :
- ﻭﺍﻟﺒﺲ ﺩﻯ ﻛﻤﺎﻥ ﻛﻞ ﻣﺎ ﺗﻴﺠﻲ ﺩﺍﺧﻞ ﻋﻨﺪﻫﺎ
ﻗﺎﻝ ﻟﻪ " ﻣﺼﻄﻔﻰ : "
- ﺃﻟﺒﺴﻬﺎ ﻟﻴﻪ ﻫﻰ ﺃﺻﻼ ﻋﻴﻨﻬﺎ ﻣﺘﻐﻤﻴﻪ ﻭﻣﺶ ﺷﻴﻔﺎﻧﻰ
ﺻﺮﺥ ﻓﻴﻪ " ﺑﺴﻄﻮﻳﺴﻲ " ﺑﻐﻀﺐ ﻗﺎﺋﻼً :
- ﺍﻧﺖ ﺳﻤﻌﺖ ﺃﻧﺎ ﻗﻮﻟﺖ ﺍﻳﻪ .. ﺍﻟﻠﻰ ﺃﻗﻮﻟﻚ ﻋﻠﻴﻪ ﻳﺘﻨﻔﺬ ﺑﺎﻟﺤﺮﻑ ﺍﻟﻮﺍﺣﺪ ﺑﺪﻭﻥ ﻣﺎ ﺗﻨﺎﻗﺸﻨﻰ ﻓﻴﻪ .. ﺳﻤﻌﺖ
ﻗﺎﻝ " ﻣﺼﻄﻔﻰ " ﺑﺸﺊ ﻣﻦ ﺍﻟﺨﻮﻑ :
- ﻣﺎﺷﻰ
ﻗﺎﻝ " ﺑﺴﻄﻮﻳﺴﻲ " ﺑﻠﻬﺠﺔ ﺁﻣﺮﻩ :
- ﻳﻼ ﺍﻟﺒﺴﻪ ﻭﺍﺩﺧﻠﻬﺎ ﺟﻮﻩ .. ﻭﺃﻧﺎ ﻫﺮﻭﺡ ﺃﻋﻤﻞ ﺍﻟﻠﻰ ﺍﺗﻔﻘﻨﺎ ﻋﻠﻴﻪ
ﺍﻧﻄﻠﻖ " ﺑﺴﻄﻮﻳﺴﻲ " ﺑﺎﻟﺴﻴﺎﺭﺓ ﻭﺃﺭﺗﺪﻯ " ﻣﺼﻄﻔﻰ " ﺍﻟﻘﻨﺎﻉ ﻭﻓﺘﺢ ﺍﻟﺒﺎﺏ ﻭﺩﺧﻞ .. ﺍﻗﺘﺮﺏ ﻣﻦ " ﻳﺎﺳﻤﻴﻦ " ﺍﻟﺘﻰ ﺗﺮﻗﺪ ﻋﻠﻰ ﺍﻷﺭﺽ ﻭﺟﺜﺎ ﺑﺠﻮﺍﺭﻫﺎ ﻭﺃﺯﺍﺡ ﺭﺑﻄﺔ ﻋﻴﻨﻬﺎ ﻭ ﻓﻤﻬﺎ ﻟﻴﻨﻈﺮ ﺍﻟﻴﻬﺎ ﺑﺴﺨﺮﻳﻪ ﻗﺎﺋﻼً ﺑﺼﻮﺕ ﺧﺎﻓﺖ :
- ﻗﻮﻟﺘﻠﻚ ﻣﺶ ﻫﻌﺘﻘﻚ
ﺃﺧﺬ " ﻣﺼﻄﻔﻰ " ﻳﻔﻚ ﺣﺠﺎﺑﻬﺎ ﻭﻳﻠﻘﻴﻪ ﻋﻠﻰ ﺍﻷﺭﺽ .. ﺭﺍﻭﺩﻩ ﺷﻴﻄﺎﻧﻪ ﻟﻠﺤﻈﺔ ﻟﻺﻧﺘﻘﺎﻡ ﻣﻨﻬﺎ ﻭﺍﻟﺜﺄﺭ ﻟﻜﺮﺍﻣﺘﻪ ﻭﻟﺮﺟﻮﻟﺘﻪ .. ﻟﻜﻨﻪ ﻭﺟﺪﻫﺎ ﺗﺘﺤﺮﻙ ﻭﻗﺪ ﺑﺪﺃﺕ ﻓﻰ ﺍﻹﻓﺎﻗﻪ ﻓﺄﺳﺮﻉ ﺑﺮﺑﻂ ﻋﺼﺒﺔ ﻋﻴﻨﻬﺎ ﻭﻛﻤﻢ ﻓﻤﻬﺎ .. ﺩﻗﺎﺋﻖ ﻭﻗﺪ ﺑﺪﺃﺕ " ﻳﺎﺳﻤﻴﻦ " ﻓﻰ ﺍﺳﺘﻌﺎﺩﺓ ﻭﻋﻴﻬﺎ ﺑﺎﻟﻜﺎﻣﻞ .. ﺣﺎﻭﻟﺖ ﺍﻟﺘﺤﺮﻙ ﻭ ﺍﻟﻮﻗﻮﻑ .. ﻓﻤﺎ ﻛﺎﻥ ﻣﻦ " ﻣﺼﻄﻔﻰ " ﺇﻻ ﺃﻥ ﺻﻔﻌﻬﺎ ﻋﻠﻰ ﻭﺟﻬﻬﺎ ﺻﻔﻌﺔ ﻗﻮﻳﺔ .. ﺷﻌﺮﺕ ﺑﺎﻟﺮﻋﺐ ﻭﺍﻷﻟﻢ ﻭﺟﻬﺸﺖ ﻓﻰ ﺑﻜﺎﺀ ﺷﺪﻳﺪ .. ﺟﻠﺴﺖ ﺳﺎﻛﻨﺔ ﻟﻠﺤﻈﺎﺕ ﺛﻢ ﺣﺎﻭﻟﺖ ﺍﻟﻘﻴﺎﻡ ﻣﺮﺓ ﺃﺧﺮﻯ ﻓﺼﻔﻌﻬﺎ ﻣﺮﺓ ﺃﺧﺮﻯ ﺑﻘﻮﺓ .. ﺳﻘﻄﺖ ﻋﻠﻰ ﺍﻷﺭﺽ ﺗﺒﻄﻰ ﻣﻦ ﺷﺪﺓ ﺍﻟﺨﻮﻑ ﻭﺍﻷﻟﻢ ﺍﻟﺬﻯ ﺁﻟﻢ ﻭﺟﻬﻬﺎ .. ﺟﻠﺴﺖ ﻓﻰ ﻣﻜﺎﻧﻬﺎ ﺗﺒﻜﻰ ﻻ ﺗﻔﻬﻢ ﺷﻴﺌﺎً .. ﻻ ﺗﻌﻰ ﺷﻴﺌﺎً .. ﺧﺎﺋﻔﺔ ﻣﻦ ﺃﻥ ﺗﺘﺤﺮﻙ ﻓﺘﺘﻠﻘﻰ ﻟﻄﻤﺔ ﺃﺧﺮﻯ ﻋﻠﻰ ﻭﺟﻬﻬﺎ .
***********************
ﺳﻤﻊ " ﻋﺒﺪ ﺍﻟﺤﻤﻴﺪ " ﻃﺮﻗﺎﺕ ﻣﺘﻮﺍﻟﻴﻪ ﻋﻠﻰ ﺑﺎﺏ ﻏﺮﻓﺘﻪ .. ﻧﻬﺾ ﻟﻴﻔﺘﺢ ﺍﻟﺒﺎﺏ ﻓﻮﺟﺪ " ﺭﻳﻬﺎﻡ " ﺗﻘﻮﻝ ﻓﻰ ﻟﻮﻋﻪ :
- ﺑﺎﺑﺎ ﺍﻟﺤﻘﻨﻰ ﻳﺎﺳﻤﻴﻦ ﻣﺶ ﻣﻮﺟﻮﺩﺓ ﻓﻰ ﺍﻟﻤﺰﺭﻋﺔ ﻭﻣﺶ ﺑﺘﺮﺩ ﻋﻠﻰ ﻣﻮﺑﺎﻳﻠﻬﺎ
ﺻﺎﺡ " ﻋﺒﺪ ﺍﻟﺤﻤﻴﺪ " ﺑﻔﺰﻉ :
- ﻳﻌﻴﻦ ﺍﻳﻪ ﻣﺶ ﻣﻮﺟﻮﺩﺓ ﻓﻰ ﺍﻟﻤﺰﺭﻋﺔ .. ﻛﻠﻤﺘﻰ " ﺳﻤﺎﺡ "
ﻗﺎﻟﺖ " ﺭﻳﻬﺎﻡ " ﻭﻫﻰ ﺗﺸﻌﺮ ﺑﺎﻟﻔﺰﻉ :
- ﺃﻳﻮﺓ ﻛﻠﻤﺘﻬﺎ ﻗﺎﻟﺘﻠﻰ ﻣﺠﺘﻠﻬﺎﺵ ﻭﻣﺘﻜﻠﻤﻮﺵ ﺃﺻﻼً ﺍﻟﻨﻬﺎﺭﺩﺓ .. ﺃﻧﺎ ﺧﺎﻳﻔﻪ ﺃﻭﻯ .. ﻣﺶ ﻣﻦ ﻋﺎﺩﺗﻬﺎ ﺍﻧﻬﺎ ﺗﺨﺘﻔﻰ ﻛﺪﻩ ﻭﻣﺘﺮﺩﺵ ﻋﻠﻰ ﻣﻮﺑﺎﻳﻠﻬﺎ
ﺧﺮﺝ " ﻋﺒﺪ ﺍﻟﺤﻤﻴﺪ " ﻭ " ﺭﻳﻬﺎﻡ " ﻭﺑﺤﺜﺎ ﻋﻨﻬﺎ ﻣﺮﺓ ﺃﺧﺮﻯ ﻓﻰ ﻣﻜﺎﻥ ﻋﻤﻠﻬﺎ ﻭﻓﻰ ﺍﻟﻤﺰﺭﻋﺔ ﻛﻠﻬﺎ ﻭﺳﺄﻻ ﻋﻨﻬﺎ ﻛﻞ ﻣﻦ ﻳﻘﺎﺑﻼﻧﻪ .. ﻟﻜﻦ ﻻ ﺃﺛﺮ ﻟـ " ﻳﺎﺳﻤﻴﻦ .. " ﺗﻮﺟﻬﺎ ﺍﻟﻰ ﻣﻜﺘﺐ " ﻋﻤﺮ " ﻟﻴﺠﺪﺍﻩ ﻭﻗﺪ ﻏﺎﺩﺭ .. ﻭﻧﻔﺲ ﺍﻟﻜﻼﻡ ﻣﻊ " ﻛﺮﻡ " ﻭ " ﻋﻤﺮ .. " ﻗﺎﻝ " ﻋﺒﺪ ﺍﻟﺤﻤﻴﺪ " :
- ﺗﻌﺎﻟﻰ ﻧﺮﻭﺡ ﺑﻴﺖ ﺍﻟﺒﺸﻤﻬﻨﺪﺱ " ﻋﻤﺮ " ﻳﻤﻜﻦ ﻳﻜﻮﻥ ﻋﺎﺭﻑ ﻋﻨﻬﺎ ﺣﺎﺟﻪ
ﺗﻮﺟﻬﺎ ﺍﻟﻰ ﺑﻴﺖ ﺍﻟﻤﺰﺭﻋﺔ ﻭﻃﺮﻗﺎ ﺍﻟﺒﺎﺏ .. ﻓﺘﺤﺖ ﺍﻟﺨﺎﺩﻣﺔ ﻓﻄﻠﺐ ﻣﻨﻬﺎ " ﻋﺒﺪ ﺍﻟﺤﻤﻴﺪ " ﺃﻥ ﻳﺘﺤﺪﺙ ﺍﻟﻰ ﺍﻟﺒﺸﻤﻬﻨﺪﺱ " ﻋﻤﺮ .. " ﺩﺧﻠﺖ ﺍﻟﺨﺎﺩﻣﺔ ﻭﻧﺎﺩﺕ " ﻋﻤﺮ " ﺍﻟﺬﻯ ﻛﺎﻥ ﻳﺠﻠﺲ ﻣﻊ ﻭﺍﻟﺪﺍﻩ .. ﻗﺎﻡ ﻣﻦ ﻓﻮﺭﻩ ﻭﺗﻮﺟﻪ ﺍﻟﻰ ﺍﻟﺒﺎﺏ ﻭﻗﺎﻝ ﺑﺈﻫﺘﻤﺎﻡ :
- ﻋﻢ " ﻋﺒﺪ ﺍﻟﺤﻤﻴﺪ .. " ﺍﺗﻔﻀﻞ ﺍﺩﺧﻞ .. ﺍﺗﻔﻀﻠﻰ ﻳﺎ ﺁﻧﺴﻪ " ﺭﻳﻬﺎﻡ "
ﻗﺎﻃﻌﻪ " ﻋﺒﺪ ﺍﻟﺤﻤﻴﺪ " ﻗﺎﺋﻼً ﺑﻠﻬﻔﻪ :
- ﻣﺎﺷﻮﻓﺘﺶ " ﻳﺎﺳﻤﻴﻦ " ﻳﺎ ﺑﺸﻤﻬﻨﺪﺱ
ﻧﻈﺮ " ﻋﻤﺮ " ﺍﻟﻴﻪ ﺑﺤﻴﺮﻩ ﻗﺎﺋﻼً :
- ﻷ ﻣﺸﻮﻓﺘﻬﺎﺵ ﺍﻟﻨﻬﺎﺭﺩﺓ
ﺃﺧﺬ " ﻋﺒﺪ ﺍﻟﺤﻤﻴﺪ " ﻳﻀﺮﺏ ﻛﻔﺎً ﺑﻜﻒ ﻗﺎﺋﻼً :
- ﻻ ﺣﻮﻝ ﻭﻻ ﻗﻮﺓ ﺍﻻ ﺑﺎﻟﻠﻪ ﺃﻣﺎﻝ ﺭﺍﺣﺖ ﻓﻴﻦ ﺑﺲ ﻳﺎ ﺭﺑﻲ
ﺃﺟﻬﺸﺖ " ﺭﻳﻬﺎﻡ " ﻓﻰ ﺍﻟﺒﻜﺎﺀ ﺑﺼﻮﺕ ﺧﺎﻓﺖ ﻭﺣﺎﻭﻟﺖ ﺍﻹﺗﺼﺎﻝ ﺑﺎﺧﺘﻬﺎ ﻣﺮﺓ ﺃﺧﺮﻯ ﺩﻭﻥ ﺟﺪﻭﻯ .. ﻗﺎﻝ " ﻋﻤﺮ " ﺑﺈﻫﺘﻤﺎﻡ :
- ﻣﺘﺨﻔﺶ ﻫﻰ ﻣﻤﻜﻦ ﺗﻜﻮﻥ ﻋﻨﺪ " ﺳﻤﺎﺡ " ﺻﺤﺒﺘﻬﺎ ﺃﻭ ﻫﻨﺎ ﻓﻰ ﺍﻟﻤﺰﺭﻋﺔ
ﺻﺎﺡ " ﻋﺒﺪ ﺍﻟﺤﻤﻴﺪ " ﻗﺎﺋﻼً :
- ﻗﻠﺒﻨﺎ ﻋﻠﻴﻬﺎ ﺍﻟﺪﻧﻴﺎ ﻫﻨﺎ ﻓﻰ ﺍﻟﻤﺰﺭﻋﺔ .. ﻭ " ﺳﻤﺎﺡ " ﺑﺘﻘﻮﻝ ﻣﺮﺣﺘﻠﻬﺎﺵ ﺍﻟﻨﻬﺎﺭﺩﺓ .. ﻭﻣﺒﺘﺮﺩﺵ ﻋﻠﻰ ﻣﻮﺑﺎﻳﻠﻬﺎ .. ﺃﻧﺎ ﻫﺘﺠﻨﻦ ﺍﻟﺒﻨﺖ ﺩﻯ ﺭﺍﺣﺖ ﻓﻴﻦ ﺑﺲ
ﺷﻌﺮﺕ " ﻋﻤﺮ " ﺑﺎﻟﻘﻠﻖ ﻓﺨﺮﺝ ﻣﻌﻬﻤﺎ ﻗﺎﺋﻼً :
- ﺗﻌﺎﻟﻮﺍ ﻧﺪﻭﺭ ﻋﻠﻴﻬﺎ ﻓﻰ ﺍﻟﻤﺰﺭﻋﺔ ﺗﺎﻧﻰ
ﺫﻫﺐ " ﻋﻤﺮ " ﺍﻟﻰ ﺷﺠﺮﺗﻪ ﺣﺪﻳﺚ ﺗﻨﻔﺮﺩ " ﻳﺎﺳﻤﻴﻦ " ﺑﻨﻔﺴﻬﺎ .. ﻟﻢ ﻳﺠﺪﻫﺎ ﻫﻨﺎﻙ .. ﺑﺤﺜﻮﺍ ﻓﻰ ﻛﻞ ﻣﻜﺎﻥ ﺑﺎﻟﻤﺰﺭﻋﺔ ﺩﻭﻥ ﺃﺩﻧﻰ ﺃﺛﺮ ﻟﻬﺎ .. ﺁﺧﺮ ﻣﻦ ﺭﺁﻫﺎ ﻛﺎﻥ ﺍﻟﻐﻔﻴﺮ ﺍﻟﺬﻯ ﻗﺎﻝ ﻟـ " ﻋﻤﺮ " :
- ﻓﺘﺤﺘﻠﻬﺎ ﺍﻟﺒﻮﺍﺑﺔ ﻭﺧﺮﺟﺖ ﻭﻣﺠﺘﺶ ﻣﻦ ﺳﺎﻋﺘﻬﺎ
ﻗﺎﻝ ﻟﻪ " ﻋﻤﺮ " ﺑﻠﻬﻔﻪ :
- ﻣﺎ ﻗﺎﻟﺘﺶ ﺭﺍﺣﻪ ﻓﻴﻦ .. ﻓﻰ ﺣﺪ ﻛﺎﻥ ﻣﺴﺘﻨﻴﻬﺎ ﺑﺮﻩ ؟
ﻗﺎﻝ ﺍﻟﻐﻴﺮ :
- ﻭﺍﻟﻠﻪ ﻣﺎ ﺃﻋﺮﻑ ﻳﺎ ﺑﺸﻤﻬﻨﺪﺱ ﻣﺨﺪﺗﺶ ﺑﺎﻟﻰ .. ﻭﻫﻰ ﻣﺎ ﻗﺎﻟﺘﻠﻴﺶ ﺣﺎﺟﻪ
ﻛﺎﻥ ﺍﻟﺨﻮﻑ ﻗﺪ ﺗﻤﻜﻦ ﻣﻦ " ﻋﻤﺮ .. " ﻛﺎﻥ ﻳﺸﻌﺮ ﺍﻟﺤﻴﺮﺓ ﻭﺍﻟﺨﻮﻑ ﻭﺍﻹﺿﻄﺮﺍﺏ .. ﺍﺗﺼﻞ ﺑـ " ﺃﻳﻤﻦ " ﻭ " ﻛﺮﻡ " ﺍﻟﻠﺬﺍﻥ ﻛﺎﻧﺎ ﻓﻰ ﻣﻬﻤﺔ ﺑﺎﻟﻤﻨﺼﻮﺭﺓ ﻓﻌﺎﺩﺍ ﺃﺩﺭﺍﺟﻬﻤﺎ ﺍﻟﻰ ﺍﻟﻤﺰﺭﻋﺔ ﻣﺮﺓ ﺃﺧﺮﻯ ﺗﺠﻤﻊ ﺍﻟﺠﻤﻴﻊ ﻓﻰ ﺑﻴﺖ " ﻋﻤﺮ " ﺍﻟﺬﻯ ﻗﺎﻝ :
- ﻫﺘﻜﻮﻥ ﺭﺍﺣﺖ ﻓﻴﻦ ﺑﺲ .. ﻫﻰ ﻣﺘﻌﺮﻓﺶ ﺃﻯ ﺣﺪ ﻫﻨﺎ
ﻗﺎﻟﺖ " ﺭﻳﻬﺎﻡ " ﺑﺎﻛﻴﻪ :
- ﻫﻰ ﺃﺻﻼً ﻣﺒﺘﺮﻭﺣﺶ ﻓﻰ ﻣﻜﺎﻥ ﻣﻦ ﻏﻴﺮ ﻣﺎ ﺗﻘﻮﻟﻰ ﺃﻧﺎ ﺃﻭ ﺑﺎﺑﺎ .. ﻭﻛﻤﺎﻥ ﻋﻤﺮﻫﺎ ﻣﺎ ﺳﺎﺑﺖ ﻣﻮﺑﺎﻳﻠﻬﺎ ﻛﺪﻩ ﻭﻣﺘﺮﺩﺵ ﻋﻠﻴﻨﺎ .. ﺃﻛﻴﺪ ﺣﺼﻠﻬﺎ ﺣﺎﺟﻪ
ﻗﻔﺰ ﻗﻠﺐ " ﻋﻤﺮ " ﻣﻦ ﻣﻜﺎﻧﻪ ﻋﻨﺪ ﺳﻤﺎﻉ ﺗﻠﻚ ﺍﻟﻜﻠﻤﺎﺕ .. ﺍﻗﺘﺮﺏ " ﻛﺮﻡ " ﻣﻦ " ﺭﻳﻬﺎﻡ " ﻗﺎﺋﻼً ﺑﺤﻨﺎﻥ :
" - ﺭﻳﻬﺎﻡ " ﻫﺪﻯ ﻧﻔﺴﻚ ﺷﻮﻳﺔ ﺍﻥ ﺷﺎﺀ ﺍﻟﻠﻪ ﻫﻨﻼﻗﻴﻬﺎ
ﺃﺟﻬﺸﺖ ﻓﻰ ﺍﻟﺒﻜﺎﺀ ﻣﺮﺓ ﺃﺧﺮﻯ ﻓﺄﻣﺴﻚ ﻛﻮﺏ ﺍﻟﻤﺎﺀ ﺍﻟﻤﻮﺿﻮﻉ ﻋﻠﻰ ﺍﻟﻄﺎﻭﻟﺔ ﻭﺃﻋﻄﺎﻫﺎ ﻟﻬﺎ ﻗﺎﺋﻼً :
- ﻃﺐ ﺍﺷﺮﺑﻲ ﻭﺍﻫﺪﻯ
ﺃﺧﺬﺕ ﻣﻨﻪ ﺍﻟﻜﻮﺏ ﻭﺭﺷﻔﺖ ﺭﺷﻔﺘﻴﻦ ﺛﻢ ﺃﻋﻄﺘﻪ ﻟﻪ .. ﻗﺎﻟﺖ " ﻛﺮﻳﻤﻪ " ﺑﺤﻨﺎﻥ :
- ﺍﻃﻤﻨﻰ ﻳﺎ ﺣﺒﻴﺒﺘﻰ ﺍﻥ ﺷﺎﺀ ﺍﻟﻠﻪ ﻫﻰ ﺑﺨﻴﺮ .. ﻭﺷﻮﻳﺔ ﻭﻫﻨﻼﻗﻴﻬﺎ ﻫﻨﺎ
ﻗﺎﻝ " ﻧﻮﺭ " :
- ﻃﻴﺐ ﺧﻠﻮﻧﺎ ﻳﺎ ﺟﻤﺎﻋﺔ ﻧﻔﻜﺮ ﺗﻔﻜﻴﺮ ﻋﻤﻠﻰ .. ﻣﺜﻼً ﻻ ﻗﺪﺭ ﺍﻟﻠﻪ ﻟﻤﺎ ﺧﺮﺟﺖ ﻣﻦ ﺍﻟﺒﻮﺍﺑﺔ ﻣﻤﻜﻦ ﺗﻜﻮﻥ ﻣﺸﻴﺖ ﻋﻠﻰ ﺍﻟﻄﺮﻳﻖ ﻭﻋﺮﺑﻴﻪ ﺧﺒﻄﺘﻬﺎ ﻭﺃﻛﻴﺪ ﺧﺪﻭﻫﺎ ﻋﻠﻰ ﺍﻟﻤﺴﺘﺸﻔﻰ ﻳﺒﺄﻩ ﺍﻟﻠﻰ ﻧﻌﻤﻠﻪ ﺩﻟﻮﻗﺘﻰ ﺍﻧﻨﺎ ﻧﺘﺼﻠﻰ ﺑﻜﻞ ﺍﻟﻤﺴﺘﺸﻔﻴﺎﺕ ﺍﻟﻠﻰ ﻓﻰ ﺍﻟﻤﻨﺼﻮﺭﺓ ﻭﻧﺴﺄﻝ ﻋﻨﻬﺎ
ﺃﻏﻤﺾ " ﻋﻤﺮ " ﻋﻴﻨﺎﻩ ﻓﻰ ﺃﻟﻢ ﻭﻫﻮ ﻳﺸﻌﺮ ﺑﺎﻟﺨﻮﻑ ﺍﻟﺸﺪﻳﺪ ﻗﺎﻡ ﻣﻦ ﻓﻮﺭﻩ ﻓﻘﺎﻝ ﻟﻪ ﻭﺍﻟﺪﻩ :
- ﻋﻠﻰ ﻓﻴﻦ
ﻗﺎﻝ ﺩﻭﻥ ﺃﻥ ﻳﻨﻈﺮ ﺧﻠﻔﻪ :
- ﺭﺍﻳﺢ ﺍﻟﻤﻜﺘﺐ ﺍﺗﺼﻞ ﺑﻜﻞ ﺍﻟﻤﺴﺘﺸﻔﻴﺎﺕ ﺍﻟﻠﻰ ﻓﻰ ﺍﻟﺪﻟﻴﻞ
ﺍﺗﺼﻞ " ﻋﻤﺮ " ﺑﺠﻤﻴﻊ ﺍﻟﻤﺴﺘﺸﻔﻴﺎﺕ ﻭﺍﻗﺴﺎﻡ ﺍﻟﻄﻮﺍﺭﺉ ﺩﻭﻥ ﺟﺪﻭﻯ .. ﺷﻌﺮ ﺑﺎﻟﺤﻨﻖ ﻭﺍﻟﻐﻀﺐ ﺍﻟﺸﺪﻳﺪ .. ﻭﺍﻟﺨﻮﻑ ﻭﺍﻟﻔﺰﻉ ﻓﻰ ﺁﻥ ﻭﺍﺣﺪ
ﺃﺧﺬ ﻣﻔﺘﺎﺡ ﺳﻴﺎﺭﺗﻪ ﻭﺗﻮﺟﻪ ﺍﻟﻰ ﺍﻟﺨﺎﺭﺝ .. ﺃﺳﺮﻉ " ﻛﺮﻡ " ﻭ " ﺃﻳﻤﻦ " ﺧﻠﻔﻪ .. ﻗﺎﻝ ﻟﻪ " ﺃﻳﻤﻦ : "
- ﻋﻠﻰ ﻓﻴﻦ ﻳﺎ " ﻋﻤﺮ "
ﻟﻢ ﻳﺠﻴﺒﻪ " ﻋﻤﺮ " ﻭﻓﺘﺢ ﺑﺎﺏ ﺳﻴﺎﺭﺗﻪ .. ﻓﺄﺷﺎﺭ " ﺃﻳﻤﻦ " ﻟـ " ﻛﺮﻡ " ﺑﺎﻟﺮﻛﻮﺏ ﻓﺮﻛﺒﺎ ﺍﻻﺛﻨﺎﻥ ﻣﻊ " ﻋﻤﺮ " ﺩﻭﻥ ﺳﺆﺍﻟﻪ .. ﺍﻧﻄﻠﻖ " ﻋﻤﺮ " ﺑﺴﻴﺎﺭﺗﻪ ﻳﺸﻖ ﻃﺮﻳﻘﻪ ﺧﺎﺭﺝ ﺍﻟﻤﺰﺭﻋﺔ .. ﻧﻈﺮ ﺍﻟﻴﻪ " ﻛﺮﻡ " ﺍﻟﺠﺎﻟﺲ ﺑﺠﻮﺍﺭﻩ ﻓﻮﺟﺪ ﻋﻼﻣﺎﺕ ﺍﻟﺘﻮﺗﺮ ﻋﻠﻰ ﻭﺟﻬﻪ .. ﻛﺎﻥ ﻳﺴﻴﺮ ﺑﺴﻴﺎﺭﺗﻪ ﻋﻠﻰ ﻏﻴﺮ ﻫﺪﻯ ﻓﻰ ﺍﻟﻤﻨﺎﻃﻖ ﺣﻮﻝ ﺍﻟﻤﺰﺭﻋﺔ .. ﻛﺎﻧﺖ ﻋﻴﻨﺎﻩ ﺗﺒﺤﺜﺎﻥ ﻋﻨﻬﺎ ﻓﻰ ﻟﻬﻔﺔ .. ﻗﺎﻟﺖ ﻟﻪ " ﺃﻳﻤﻦ " ﺍﻟﺠﺎﻟﺲ ﻓﻰ ﺍﻟﺨﻠﻒ :
- ﻣﺘﻘﻠﻘﺶ ﻳﺎ " ﻋﻤﺮ " ﺍﻥ ﺷﺎﺀ ﺍﻟﻠﻪ ﻫﻨﻼﻗﻴﻬﺎ
ﻟﻢ ﻳﺠﺒﻪ " ﻋﻤﺮ " .. ﺑﻞ ﻟﻢ ﻳﺴﻤﻌﻪ ﺃﺻﻼً .. ﻛﻞ ﻣﺎ ﻛﺎﻥ ﻳﺴﻴﻄﺮ ﻋﻠﻰ ﺗﻔﻜﻴﺮﻩ .. ﺃﻳﻦ ﻫﻰ " ﻳﺎﺳﻤﻴﻦ .. " ﻭﻣﺎﺫﺍ ﺣﺪﺙ ﻟﻬﺎ .. ﺃﻯ ﺑﺤﺎﻟﻪ ﺟﻴﺪﻩ .. ﻫﻞ ﺃﺻﺎﺑﻬﺎ ﺳﻮﺀ .. ﻛﺎﻥ ﻗﻠﺒﻪ ﻳﻨﺰﻑ ﻓﻰ ﻟﻮﻋﻪ .. ﻇﻞ ﻳﺒﺤﺚ ﻭﻳﺒﺤﺚ ﺩﻭﻥ ﺟﺪﻭﻯ .. ﻣﺮﺕ ﺛﻼﺙ ﺳﺎﻋﺎﺕ ﻟﻢ ﻳﺘﻮﻗﻒ ﻓﻴﻬﺎ ﻟﺨﻈﻪ .. ﺑﺤﺚ ﻛﺎﻥ ﻳﺨﺮﺝ ﻣﻦ ﺷﺎﺭﻉ ﻟﻴﺪﺧﻞ ﻓﻰ ﺁﺧﺮ .. ﻭﻋﻴﻨﺎﻩ ﺗﺒﺤﺚ ﻋﻠﻰ ﺍﻟﺠﺎﻧﺒﻴﻦ ﻓﻰ ﻟﻬﻔﻪ .. ﻗﺎﻝ ﻟﻪ " ﻛﺮﻡ " :
- ﻣﻔﻴﺶ ﻓﺎﻳﺪﻩ ﻣﻦ ﺍﻟﻠﻰ ﺑﺘﻌﻤﻠﻪ ﺩﻩ
ﻫﺘﻒ " ﻋﻤﺮ " ﻓﻰ ﻏﻀﺐ :
- ﺃﻣﺎﻝ ﻋﺎﻳﺰﻧﻰ ﺃﻋﻤﻞ ﺍﻳﻪ .. ﺃﻋﺪ ﻓﻰ ﺍﻟﺒﻴﺖ ﺣﺎﻃﻂ ﺍﻳﺪﻱ ﻋﻠﻰ ﺧﺪﻯ ﻭﺃﻧﺎ ﻣﺶ ﻋﺎﺭﻑ ﻫﻰ ﻓﻴﻦ ﻭﻻ ﺍﻳﻪ ﺍﻟﻠﻰ ﺣﺼﻠﻬﺎ
ﻫﺪﺋﻪ " ﻛﺮﻡ " ﻗﺎﺋﻼً :
- ﻣﺶ ﻗﺼﺪﻯ ﺃﺿﺎﻳﻘﻚ ﻳﺎ " ﻋﻤﺮ " ﺑﺲ ﺍﺣﻨﺎ ﺑﻘﺎﻟﻨﺎ ﺃﻛﺘﺮ ﻣﻦ 3 ﺳﺎﻋﺎﺕ ﻋﻤﺎﻟﻴﻦ ﻧﻠﻒ ﻭﻣﻔﻴﺶ ﻓﺎﻳﺪﺓ ﻗﺎﻝ " ﻋﻤﺮ " ﺑﻀﻴﻖ ﺑﺎﻟﻎ :
- ﻃﺐ ﺃﻋﻤﻞ ﺍﻳﻪ .. ﻟﻮ ﺭﻭﺣﻨﺎ ﺑﻠﻐﻨﺎ ﻫﻴﻘﻮﻟﻮﻟﻨﺎ ﺍﺳﺘﻨﻮﺍ 24 ﺳﺎﻋﺔ .. ﺍﻋﻤﻞ ﺍﻳﻪ .. ﺍﻋﻤﻞ ﺍﻳﻪ
ﺍﻗﺘﺮﺡ " ﺃﻳﻤﻦ " :
- ﻃﻴﺐ ﺗﻌﺎﻟﻮﺍ ﻧﺮﺟﻊ ﺍﻟﻤﺰﺭﻋﺔ ﺗﺎﻧﻰ ﻭﻧﺪﻭﺭ ﻓﻴﻬﺎ ﺗﺎﻧﻰ .. ﻳﻤﻜﻦ ﺗﻜﻮﻥ ﻣﺜﻼً ﺗﻌﺒﺖ ﻭﻫﻰ ﺃﻋﺪﻩ ﻓﻰ ﻣﻜﺎﻥ ﻭﺃﻏﻤﻰ ﻋﻠﻴﻬﺎ ﻣﺜﻼً .. ﺗﻌﺎﻟﻮﺍ ﻧﺪﻭﺭ ﺗﺎﻧﻰ
ﺻﺎﺡ " ﻋﻤﺮ " ﺑﻐﻀﺐ :
- ﺑﻘﻮﻟﻚ ﺍﻟﻐﻔﻴﺮ ﺷﺎﻓﻬﺎ ﻭﻫﻰ ﺧﺎﺭﺟﻪ ﻣﻦ ﺍﻟﻤﺰﺭﻋﺔ .. ﻳﻌﻨﻲ ﻫﻰ ﻣﺶ ﻫﻨﺎﻙ
ﺳﻜﺖ " ﻛﺮﻡ " ﻭ " ﺃﻳﻤﻦ " ﺣﺘﻰ ﻻ ﻳﻨﻔﻌﻞ " ﻋﻤﺮ " ﺃﻛﺜﺮ ﻣﻦ ﺫﻟﻚ .. ﻛﺎﻥ ﻣﻦ ﺍﻟﻮﺍﺿﺢ ﺃﻥ ﺍﻟﻐﻀﺐ ﻗﺪ ﺑﻠﻎ ﻣﻦ ﻫﻤﺒﻠﻐﻪ .. ﻟﺬﻟﻚ ﺁﺛﺮﺍ ﺍﻟﺼﻤﺖ .. ﺭﻥ ﻫﺎﺗﻒ " ﺃﻳﻤﻦ " ﻓﺮﺩ ﻗﺎﺋﻼ :
- ﺃﻳﻮﺓ ﻳﺎ " ﺳﻤﺎﺡ "
ﺗﻌﻠﻘﺖ ﺑﻪ ﻋﻴﻨﺎ " ﻋﻤﺮ " ﺑﻠﻬﻔﻪ ﻓﻰ ﺍﻟﻤﺮﺁﻩ .. ﻗﺎﻝ " ﺃﻳﻤﻦ " :
- ﻷ ﻣﻔﻴﺶ ﺟﺪﻳﺪ .. ﺣﺎﺿﺮ ﻫﻌﺮﻓﻚ .. ﺳﻼﻡ
ﻗﺎﻝ " ﻋﻤﺮ " ﺑﻠﻬﻔﻪ :
- ﺍﻳﻪ
- ﻣﻔﻴﺶ ﺑﺘﺴﺄﻝ ﻋﺮﻓﻨﺎ ﺣﺎﺟﻪ ﻭﻻ ﻻﺀ
ﺿﺮﺏ " ﻋﻤﺮ " ﺑﻘﺒﻀﺘﻪ ﺑﻘﻮﺓ ﻋﻠﻰ ﻣﻘﻮﺩ ﺍﻟﺴﻴﺎﺭﺓ ﻗﺎﺋﻼً :
- ﻫﺘﻜﻮﻥ ﺭﺍﺣﺖ ﻓﻴﻦ ﺑﺲ
**************************
ﻇﻠﺖ " ﻳﺎﺳﻤﻴﻦ " ﺗﺒﻜﻰ ﻭﺗﺒﻜﻰ .. ﻛﺎﻧﺖ ﺗﺨﺸﻰ ﺃﻥ ﺗﺘﺤﺮﻙ ﻣﻦ ﻣﻜﺎﻧﻬﺎ ﻓﻴﻀﺮﺑﻬﺎ ﺫﻟﻚ ﺍﻟﺮﺟﻞ ﺍﻟﺬﻯ ﻻ ﺗﺮﺍﻩ .. ﻭﺃﺧﻴﺮﺍً ﺳﻤﻌﺖ ﺑﺎﺏ ﻳﻔﺘﺢ ﺛﻢ ﻭﻗﻊ ﺃﻗﺪﺍﻡ ﺗﻘﺘﺮﺏ .. ﺛﻢ ﺗﻨﺼﺮﻑ ﻣﺮﺓ ﺃﺧﺮﻯ .. ﺷﻌﺮﺕ ﺑﻮﺟﻮﺩ ﺃﻛﺜﺮ ﻣﻦ ﺷﺨﺺ ﻣﻌﻬﺎ .. ﺛﻢ ﺧﺮﺟﻮﺍ ﻭﺃﻏﻠﻘﻮﺍ ﺍﻟﺒﺎﺏ ﺧﻠﻔﻬﻢ .. ﻗﺎﻝ " ﻣﺼﻄﻔﻰ " ﻟـ " ﺑﺴﻄﻮﻳﺴﻲ " :
- ﻛﻠﻪ ﺗﻤﺎﻡ ﺧﺪﺕ ﻣﻨﻬﺎ ﻣﻮﺑﺎﻳﻠﻬﺎ ﻭﻣﻌﻬﺎﺵ ﺃﻯ ﺣﺎﺟﻪ ﺗﺎﻧﻴﺔ
ﻣﺪ ﻳﺪﻩ ﺑﺎﻟﻤﻮﺑﺎﻳﻞ ﺍﻟﻰ " ﺑﺴﻄﻮﻳﺴﻲ " ﺍﻟﺬﻯ ﺃﺧﺮﺝ ﺍﻟﺸﺮﻳﺤﺔ ﻭﻛﺴﺮﻫﺎ ﺛﻢ ﻫﺸﻢ ﺍﻟﻤﻮﺑﺎﻳﻞ ﺗﺤﺖ ﺃﻗﺪﺍﻣﻪ .. ﻗﺎﻝ ﻟﻪ " ﻣﺼﻄﻔﻰ " ﺑﺪﻫﺸﺔ :
- ﻟﻴﻪ ﻋﻤﻠﺖ ﻛﺪﻩ ؟
ﻗﺎﻝ " ﺑﺴﻄﻮﻳﺴﻰ " ﺑﺴﺨﺮﻳﺔ :
- ﻣﺘﻌﺮﻓﺶ ﺍﻥ ﺍﻟﻤﻮﺑﺎﻳﻼﺕ ﻣﻤﻜﻦ ﻳﺘﺘﺒﻌﻮﺍ ﺍﺷﺎﺭﺗﻬﺎ ﻭﻳﻌﺮﻓﻮﺍ ﺍﻟﻤﻜﺎﻥ ﺍﻟﻠﻰ ﺍﻟﻤﻮﺑﺎﻳﻞ ﻣﻮﺟﻮﺩ ﻓﻴﻪ
ﻫﺘﻒ " ﻣﺼﻄﻔﻰ " :
- ﺁﻩ ﻋﺸﺎﻥ ﻛﺪﻩ ﺧﻠﺘﻨﺎ ﻧﺴﻴﺐ ﻣﻮﺑﺎﻳﻼﺗﻨﺎ ﻓﻰ ﺍﻟﻘﺎﻫﺮﺓ
- ﺃﻳﻮﺓ
ﺍﺑﺘﺴﻢ " ﻣﺼﻄﻔﻰ " ﻗﺎﺋﻼً :
- ﺃﺣﺒﻴﺒﻲ ﻳﺎ " ﺑﺴﻄﻮﻳﺴﻰ " ﻣﻦ ﻏﻴﺮﻙ ﻛﻨﺖ ﻫﻀﻴﻊ
ﻗﺎﻝ " ﺑﺴﻄﻮﻳﺴﻲ " ﺑﺴﺨﺮﻳﻪ :
- ﺻﺤﻴﺢ ﺍﻧﺖ ﺑﺸﻤﻬﻨﺪﺱ ﻭﻣﻌﺎﻙ ﺷﻬﺎﺩﺓ .. ﻟﻜﻦ ﺍﻟﺪﻧﻴﺎ ﺑﺘﻌﻠﻢ ﺃﻛﺘﺮ ﻣﻦ ﺍﻟﻤﺪﺍﺭﺱ ﻳﺎ ﻫﻨﺪﺳﻪ
ﺍﺑﺘﺴﻢ " ﻣﺼﻄﻔﻰ " ﻗﺎﺋﻼً :
- ﺩﻩ ﺍﻧﺖ ﺍﻟﻠﻰ ﻫﻨﺪﺳﻪ
ﺛﻢ ﻗﺎﻝ ﺑﺠﺪﻳﻪ :
- ﻗﻮﻟﻰ ﺑﺄﻩ ﻫﻨﻌﻤﻞ ﺍﻳﻪ ﺑﻌﺪ ﻛﺪﻩ .. ﻣﺶ ﻫﻨﺘﺼﻞ ﺑﻴﻬﻢ
ﻗﺎﻝ " ﺑﺴﻄﻮﻳﺴﻲ " :
- ﺍﺗﻘﻞ .. ﻛﻠﻪ ﺑﺄﻭﺍﻧﻪ
*************************
ﺑﻌﺪ ﺳﺎﻋﺘﻴﻦ ﺃﺧﺮﺗﻴﻦ ﻣﻦ ﺍﻟﺴﻴﺮ ﻭﺍﻟﺒﺤﺚ .. ﻋﺎﺩ " ﻋﻤﺮ " ﺑﺴﻴﺎﺭﺗﻪ ﺍﻟﻰ ﺍﻟﻤﺰﺭﻋﺔ ﻣﺮﺓ ﺃﺧﺮﻯ .. ﻓﺘﺢ ﺑﺎﺏ ﺍﻟﺒﻴﺖ ﻟﻴﻘﻮﻡ " ﻋﺒﺪ ﺍﻟﺤﻤﻴﺪ " ﻣﺴﺮﻋﺎً ﻗﺎﺋﻼً ﺑﻠﻬﻔﻪ :
- ﻓﻰ ﺟﺪﻳﺪ ﻳﺎ ﺑﺸﻤﻬﻨﺪﺱ ؟
ﻫﺰ " ﻋﻤﺮ " ﺭﺃﺳﻪ ﻧﻔﻴﺎً .. ﻓﻮﺿﻊ " ﻋﺒﺪ ﺍﻟﺤﻤﻴﺪ " ﻳﺪﻩ ﻋﻠﻰ ﺭﺃﺳﻪ ﻗﺎﺋﻼً :
- ﺑﻨﺘﻰ ﺿﺎﻋﺖ .. ﺑﻨﺘﻰ ﺿﺎﻋﺖ
ﻗﺎﻝ ﻟﻪ " ﻋﻤﺮ " ﺑﺼﺮﺍﻣﺔ :
- ﻷ ﻣﻀﻌﺘﺶ .. ﻫﻨﻼﻗﻴﻬﺎ " .. ﻳﺎﺳﻤﻴﻦ " ﻣﻀﻌﺘﺶ ﻫﻨﻼﻗﻴﻬﺎ .. ﺳﻠﻴﻤﺔ ﻭﻛﻮﻳﺴﺔ
ﺗﻮﺟﻪ " ﻋﻤﺮ " ﺍﻟﻰ ﺃﻗﺮﺏ ﻣﻘﻌﺪ ﻭﺗﻬﺎﻟﻚ ﻋﻠﻴﻪ .. ﺃﺳﺪ ﺭﺃﺳﻪ ﺑﻴﺪﻳﻪ ﻭﺃﻏﻠﻖ ﻋﻴﻨﻴﻪ ﻓﻰ ﺃﻟﻢ .. ﺍﻗﺘﺮﺑﺖ ﻣﻨﻪ ﺍﻣﻪ ﻗﺎﺋﻠﻪ ﺑﺸﻔﻘﻪ :
- ﺍﻧﺖ ﻛﻮﻳﺲ ﻳﺎ " ﻋﻤﺮ "
ﺃﻭﻣﺄ ﺑﺮﺃﺳﻪ ﺩﻭﻥ ﺃﻥ ﻳﺘﺤﺪﺙ .. ﻣﺴﺤﺖ ﺃﻣﻪ ﻋﻠﻰ ﺷﻌﺮﻩ .. ﺛﻢ ﺍﻟﺘﻔﺘﺖ ﺍﻟﻰ " ﺭﻳﻬﺎﻡ " ﻗﺎﺋﻠﻪ :
- ﺗﻌﺎﻟﻰ ﻳﺎ ﺑﻨﺘﻰ ﺍﺭﺗﺎﺣﻰ ﻓﻮﻕ .. ﺍﻧﺘﻰ ﻫﻠﻜﺘﻰ ﻧﻔﺴﻚ ﻣﻦ ﺍﻟﻌﻴﺎﻁ
ﻗﺎﻟﺖ " ﺭﻳﻬﺎﻡ " ﺑﻮﻫﻦ :
- ﻷ ﺷﻜﺮﺍً ﻳﺎ ﻃﻨﻂ ﺃﻧﺎ ﻫﺮﻭﺡ ﺃﻭﺿﺘﻰ ﻋﺸﺎﻥ ﻟﻮ " ﻳﺎﺳﻤﻴﻦ " ﺭﺟﻌﺖ
ﻗﺎﻟﺖ " ﻛﺮﻳﻤﻪ " ﺑﺤﻨﺎﻥ :
- ﻃﻴﺐ ﻳﺎ ﺑﻨﺘﻰ ﻭﺭﺑﻨﺎ ﻳﻄﻤﻨﻨﺎ ﻋﻠﻴﻬﺎ .. ﻟﻮ ﻓﻰ ﺟﺪﻳﺪ ﺑﻠﻐﻮﻧﺎ ﻭﻟﻮ ﻓﻰ ﺟﺪﻳﺪ ﻫﻨﺒﻠﻐﻜﻮﺍ ..
ﺛﻢ ﺃﻋﻄﺖ " ﺭﻳﻬﺎﻡ " ﺭﻗﻢ ﻫﺎﺗﻔﻬﺎ ﻭﺃﺧﺬﺕ ﺭﻗﻢ " ﺭﻳﻬﺎﻡ "
ﻏﺎﺩﺭﺕ " ﺭﻳﻬﺎﻡ " ﻣﻊ " ﻋﺒﺪ ﺍﻟﺤﻤﻴﺪ " ﻋﺎﺋﺪﺍﻥ ﺍﻟﻰ ﻏﺮﻓﺔ " ﻳﺎﺳﻤﻴﻦ " ﻳﻨﺘﻈﺮﻭﻧﻬﺎ
ﺛﻢ ﻗﺎﻣﺖ ﻭﻏﺎﺩﺭﺕ ﻣﻊ " ﻋﺒﺪ ﺍﻟﺤﻤﻴﺪ " ﺍﻟﻰ ﻏﺮﻓﺘﻬﻤﺎ .. ﻟﺤﻈﺎﺕ ﻭﻭﺟﺪ " ﻋﻤﺮ " ﻫﺎﺗﻔﻪ ﻳﺮﻥ .. ﻭﺟﺪ ﺭﻗﻤﺎً ﻏﺮﻳﺐ ﺭﺩ ﻟﻴﺠﺪ ﺭﺟﻼً ﻳﻘﻮﻝ ﺟﻤﻠﺔ ﻭﺍﺣﺪﺓ :
" - ﻳﺎﺳﻤﻴﻦ " ﻋﻨﺪﻯ ﻟﻮ ﺷﻤﻴﺖ ﺭﻳﺤﺔ ﺍﻟﺒﻮﻟﻴﺲ ﻓﻰ ﺍﻟﻤﻮﺿﻮﻉ ﻫﻘﺘﻠﻬﺎ ﻭﺃﺑﻌﺘﻠﻚ ﺟﺜﺘﻬﺎ ﻫﺪﻳﺔ ﻟﺤﺪ ﻋﻨﺪﻙ .. ﺍﺳﺘﻨﻰ ﻣﻨﻰ ﺗﻠﻴﻔﻮﻥ ﺑﻌﺪ ﻳﻮﻣﻴﻦ
ﻗﺎﻝ ﺫﻟﻚ ﺛﻢ ﺃﻏﻠﻖ ﻭﺗﺮﻙ " ﻋﻤﺮ " ﻓﻰ ﺣﺎﻟﺔ ﻣﻦ ﺍﻟﺨﻮﻑ ﻭﺍﻟﺮﻋﺐ ﻭﺍﻟﻔﺰﻉ .. ﻭﺍﻟﺤﻴﺮﺓ
