المجنونة وقعت في الحب

Part 2

طلعنـا من الرطبه الساعه عشرة ونص الطريق جان كولش متعب وسيطرات لداعش على طريق الرمادي والفلوجه للساعه 2 يلا وصلنـا بغداد والساعه 4 ونص يلا طلعنا من بغداد وعود احنا طلعنـا بسرعه الله يعين البقيه.. اوضاع البلد چانت مخربطه كولش يعني ما تفهم شنو الي ديصير وياك بلحظه تنكتل وبلحظه تنخطف وبلحظه تتشرد وتضيع عائلتك وبلحظه يروح شخص عزيز على كلبك ما تعرف شنو الي يصير وياك بلحظه وحده ..حطيت راسي بالمرتبه الي گدام جانو كاعدين ماما وجوان وريم باوعت لريم :ريوم والله بنفسي اظل ببغداد
ريم:me too
جوان:لو بس تسكتين انتي وياها شايفه الاوضاع شلونها اهنا حتى تظلون بيها
ريم: هو اوضاع العراق كلها مخربطه تريدين بغداد تصير زينه
سما: يولم جوعانه
ريم :يلا احنا وين نحكي وهاي وين انكبي اكو بالحافظه اكل
لارا:طلعيلي معكِ راح اموت جوع بس متعاجزه اطلع اكل
ماما :ارجعي لمكانك انتي وياها ما تستحون انتم نوصل هناك وشوفم شيصير
رجعنـا ورا لأن ماما عصبت وهمزين ما شمرتنا من السياره
طبعاً چنا نحجي بصوت ناصي لأن عيب من الرجال ندري گرابه بس مو نصفط سوالف ويا
امم الطريق طويل احجيلكم عن شخصيتي وشخصيات خواتي لبين ما نوصل
اني انسانه خياليه لدرجه مو طبيعبه احب كولش انو اعيش حياتي على طريقتي وطبعا هذا الشي ميصير بالعراق ماكو بنيه تعيش على طريقتها وبراحتها بس اطمح كولش انو اسوي هذا الشي حتى لو بالمستقبل.. اعشق شي اسمه كتب وروايات لأحلام مستنغانمي واثير عبدالله واجاثا كريستي وغابرييل غارسيا ماركيز احب اطور نفسي بيها لحتى ما تغلبني الحياه
هاي شخصيتي..اما مواصفاتي اني قزمه طولي تقريباً 150 سم عيوني لونهن عسلي على اخضر مو كبار حيل بس تبين كبار لأن رموشي طويله ...خشمي مو چبير متراهم ويا ملامحي الحمدلله وحلگي صغير وجهي دائري وبشرتي برونزيه (بين الحنطي والسمار)....
اعرفكم على خواتي .. جوان انسانه جديه بكلشي بالحياه ما تحب تعيش الخيال كولش واقعيه حيل وهي مخطوبه لأبن عمي اسمه عزام مواصفاتها ..بيضه عيونها كبار لونهن عسلي وطولها هم قزمه157
ريم: انساانه رقييييقه كوولش تحب تعيش ما بين الواقع والخيال وع الاغلب الواقع لان تخاف تعيش الخيال وتنصدم بالواقع ..تحب سوالف الاجانب مواصفاتها...تقريبا تشبهه جوان بس لون عيونها بني غامق وبشرتها حنطيه و طولها 155
سما:تقريباً بالشخصيه تشبهني والمواصفات تشبهه ريم بكل شي الحلگ والخشم نتشابهه كلنا نفس الشي
....بعد هالحجي كله واحنا لحد هسه يلا وصلنا سيطره (طاس لوجه) السـاعه هسه 11 وعشره بالليل احس جسمي مكسر من كد الگعده للساعه 11 ونص دخلنا للسليمانيـه الدنيا جانت توها دا تبرد والجو منعش كولش ...وصلنـا يم الفندق الي مأجر بي بابا جان بمنطقه ابراهيم باشـا نزلنا احنا للفندق وابن خاله ماما جان عنده بيت عمه اهنا فا ما قبل ينزل ..دخلنا للشقه جانت حلوه اول ما تدخل للشقه صاله صغيره وغرفتين وع اليمين مطبخ والصحيات فوتنا الغراض وگعدنا نحجي ويا بابا...
بابا:ها الله يساعدكم الطريق متعب موو؟
ماما:ويساعدك ..اي والله هلاك شنو هاي السيطرات تطلع روحك يالله تطلع منها
بابا:هاي بعد وضع البلد يتطلب هيك
ريم:بابا يعني هسه بهاي السيطرات مضبطين وضع البلد؟ اشو نفس الشي
بابا: هاي بعد حكومه يا بابا احنا كل يوم نسوي مضاهرات ونطالب ونريد وماكو شي اشو جزعنا واحنا نحكي ولا كأن ..الحمدلله ع كل حال
ريم: الحمدلله
..گـمنا حطينا العشا لأن بابا جان طالب العشا من المطعم .. بعد ما خلصنا شلنا المواعين وغسلتها جوان
گعدت ع الفون ماكو اي شي اسوي بي لأن مابي نت مسحت نص الصور من الضوجه للسـاعه12 فتت نمـت
للساعه عشـره وربع گعدتني سما وهي تسحب بالبطانيه منا واني اسحـب منا اگوم هسه اكفخها
لارا: لك سمـا ولي عن وجهي راح اقوم الطشكِ بالحايط
سما: لارووووو وثول قومي شبيكِ امانه والله طلعت روحي وحدي عفييه لارا
لارا: امشـي انقلعي على ريم تقعد معك انا شنو ذنبي ولي مناااا
سما:ما يقبلون يقومون هي وجوان طلعولي روحي
گمزت من مكاني : يعني بعدهم ما قعدم
سما: لا
طفرت ركض غسلت وجهي وفرچت وطلعت باوعت لسما يلا
سما: يولي نستلم رزايل من الصبح شتطلبينا
لارا:معليكِ بس امشي انتي عليكِ ريمو لأن رقيقه مقدر أذيها وانا عليه جوان
سما: يولي والله ريموو خطيه
لارا :اقول انكبي قال خطيه قال دمشي بابا امشي
رحنا اني وسما سطرنا راسهن لحد ما گامو غصب مو طيب
حظرنا الريوگ وگعدو ماما وبابا واسامه تريگنا وخلصنا باوعت لبابا لحيته صارت كولش طويله وجهه ذبلان متغير كولش والتعب واضح بوجهه وطبعاً هالشي بسبب الي شافه خلال هاي الفتره والحزن الي شافه وفقدان اشخاص يعزهم هالشي يهدم الانسان بس ماكو حزن يظل دايم لأن الحياه مثل الروايه لازم تعيشها لحظه بلحظه وما توگف على سطر حزين..حجت جوان ويا بابا : بابا ليش ما تزين لحيتك
بابا: لا ناوي اربيها
جوان: لااا بابا ما تلوگلك ابد مو حلوه عليك هيك طويله
ريم: اي والله بابا زينها
بابا: ان شاء الله اليوم قبل لا نطلع لرانيه ازينها
جوان :بابا يعني راح نروح لبيت عمو حسام ؟
بابا : اي اليوم أجر الهم شقه بهذا الفندق ونطلع العصر ونجي احنا وياهم باكر
لارا: بابا ليش راح نظل اهنا؟
بابا : بابا هسه الاوضاع اهناك ابد مو زينه وانتم بنات وشايفه اهناك حسبي الله ونعم الوكيل عليهم واخاف عليكم خلي تهدأ الاوضاع ونرجع وبين ما اخلص شغل هم
ماما:الله يسهل ان شاء الله
گمنا صفطنا ملابسنا ورتبنا الغراض والمسواگ بالمطبخ
للسـاعه ٣ العصر بابا گال نحظر نفسنا نطلع لمنطقه رانيه منطقه بأطراف السليمانيـه
للسـاعه اربعه الا ربع خلصنا وطلعنا توجهنا لرانيه هي بعيده شوي تقريباً ساعه الا ربع يلا نوصل
طلعنـا الطريق جان حلو كولش كله اشجار ونسه كولش ...گبل لا نوصل لبيت عمي احجيلكم عنهم شوي
عمو حسام عنده ٣ ولد وبنتين ..عمو حسام عمره 48 سنه هو عمي الجبير توفى صارله سنه ونص تقريباً
زوجته سهاد عمرها 45 سنه انسان راقيه كولش وحبابه وهادئه كولش حكيمه وهي بنت عم عمو حسام وبابا
اولاده...عزام: عمره 24 سنه وهو خطيب اختي جوان هو انسان رائع اعتبره اخويه واعزه كولش متفهم بمعنى الكلمه وهو مدرس كيمياء
اصيل :عمره 23 سنه انسان مرح لدرجه كبيره يحب يتشاقى ويموت بسوالف المقالب وهاي الشغلات.. تخرج گبل سنه مدرس احياء
عمر:عمره 20 سنه انسان كولش هادئ وغامض مستحيل تگدر تعرف شي عن حياته وجان متعلقه روحه بعمو حسام ومن توفى عمو الله يرحمه مر بفتره كولش صعبه والحمدلله تعداها قريب كولش على بابا وهو يدرس صيدليه مرحله ثانيه لحتى يحقق حلم عمو حسام
لينا : عمرها 15 سنه وقريبه مني كولش توؤم روحي وهي مثل شخصيتي بالضبط وحتى بالشكل الي يشوفنا يكول توؤم
ليان: عمرها 12 سنه وهي قريبه من سما شخصيتها مثل شخصيه عمر وما يفهمها غير سما .....
مر الوكت بسرعه وصلنـا لبيت عمو حسام ..نزلنا
او ما نزلت طلعت لينا تركض يبووو شگد مشتاقتلها رحت ركض حظنتها
لينا: ووويلي وربي ما صدقت من حكيتي راح اجي ياااااااا مو مصدقه شفتكِ يا ثوله
لارا: عاااااا يولي سنه ما شايفتك مشتاااقتلك بقد الدنيا يا غمه(ما تعرف تسوي شي براسه حظ)
لينا :ايا غمه بس مقبوله لأن تعبانه من الطريق
لارا: انطمي خل اسلم ع الباقين هسه
سلمت على عمه سهاد وليان و ولد عمي ودخلنا لجوه ..طبعـاً بيت عمو حسام ساكنين اهنا لأن اخوان عمه سهاد كلهم برانيه وبنفس المنطقه
گعدنا جوه واني ولينا ولا وگفنا حجي وسما وليان هم . وريمو كالعاده ساكته واذا احد حجه وياها على قدر الجواب وتسكت..بعد نص ساعه اجوي ولد عم بابا (الي هم اخوان عمه سهاد) هم خمسه ..2 گاعدين بالسليمانيه و 3 اهنا ..بابا و ولد عمي طلعو يسلمون عليهم ونسوانهم دخلو جوه گمنا سلمنا عليهم ما راح اعرف عليهم كلهم لان هواي بس ع شخصيتين الاولى هي ندى صديقه ريم كوولش بعمر ريم و وياها بالمدرسه ندى مو مثل شخصيه ريم يعني معرف شلون صارو صديقات ندى تحب تضحك وتشاقه واجتماعيه كولش عكس ريم
الشخصيه الثانيه هي هدى اختها لندى بعمرنا اني ولينا وشخصيتها مثل شخصيه ريم بس احنا دا نحاول نخربها ..ظلينا نحجي للساعه 8 متت جوع گمت اخربط حتى بالحجي كلت لينا :هيي لينو راح اموت جوع ترى
لينا: هسه ماما حا تحط العشا انتظري شوي
لارا: ايمتى يولي
لينا: انكبي قومي نجيبو من المطبخ
لارا:ايييي هو هذا الحكي الزين
گمنا تعشينا ورا ما خلصنا اخذنا المواعين للمطبخ وگفو جوان وسالي (بنت خال لينا الجبير) لحتى يغسلون المواعين ..وگفنا اني ولينا وهدى وندى وريم نساعدهم يعني ع اساس نساعدهم بس گضيناها كلها سوالف ورا ما خلصنا للساعه 10 ونص گامو دا يروحون ..ظلينا نلح عليهم لحتى يظلون البنات ويانا وهم قبلوا..ماما وعمه سهاد ظلو يحجون واحنا البنات گعدنا وحدنا وما خلينا احد ما جبنا سنه كامله مو متشاوفين فا عدنا كومه حجي للساعه 11 ونص اجه بابا وحجه ويا عمه سهاد علمود يجون ويانا للسليمانيه عمه سهاد ما عارضت وگالتله: والله يا ابو اسامه انت عمهم وهالشي يريحني ع الاقل يكونون جوه عيونك وتراقبهم
بابا: والنعم منكِ يا ام عزام ..بس والله ما ارتاح اذا ما اشوفهم وهذول ولد الغالي وامانه برقبتي عمه سهاد: لا يا ابو اسامه الي يريحك سوي ..بس ايمتى نطلع؟
بابا:باكر اذا راد الله لأن عندي شغل هناك وشعدنا مطولين اهنا
عمه سهاد: هسه اقول للبنات ونكمل كلشي ان شاء الله ما نطول
بابا: براحتكم ..يلا انا استأذن ..تصبحون على خير
وانت من اهله
گمنا كلنا احنا عشره بنات جيش مو بنات واني وهدى ولينا علينا نرتب الملابس بالجنط ولمى وليان وسما عليهم المطبخ ينضفوا وسالي وجوان وسالي وريم وندى عليهم باقي البيت..ظلينا نشتغل للساعه 4 ونص الصبح انتهينا يلا خلصنا طلعنا الاكل الي ظل من العشا وگعدنا ناكل ونحجي للساعه 6 فتنا نمنا للساعه عشره ونص اجتي ماما گعدتنا بالموت يالله گمنا ريم وندى كامو بسرعه وجوان وسالي جانو گاعدين گبلنا طبعاً جوان كاعده علمود عزام لمى گامت لأن ما تحب تظل نايمه وگومت ليان وسما وياها غصب ظلينا بس اني وهدى ولينا ..هدى كل ما اريد تگوم ندفرها اني ولينا ترجع لمكانها
هدى : ول عيب اريد اقوم وجع انتو ظلو مكبوبات(نايمات)
لينا: اقول انطمي وارجعي نامي لا يجيكِ جلاق هسه
لارا: هدى ترى هسه دفره بنص جهرتكِ ارجعي نامي وانكبي
هدى: يا بشريات شبعت نوم شنو قابل غصب
لارا: لعبتي نفسي من النومه الله ياخذكِ اقوم احسلي
لينا: لارا بهاي كفشتك تقدرين هسه تدخلين موسوعه غينيس
لارا : بشنو ادخلها يعني كا صاحبه اكبر كفشه يعني؟وبعدين انتي حطمتي قبلي شوفي شعركِ طاگه عليه قنبله كأنو نايمه جوه شمس السودان ومتغطيه بلحاف ديباج
لينا: انكبي يولي اصلاً اشبهك
لارا: كان انتي حلوه لأن تشبهيني
لينا : اقول انكبي وقومي هدى طفرت
گمنا اني وياها لمينا شعرنا كعكه وطلعنا ركض لحتى نتسابق نغسل
مر الوكت بسرعه ..خلصنا كل شي للساعه 1 الظهر ودعنا اهل عمه سهاد وطلعنا للسليمانيه

لهنا نهايه البارت ..وهناك راح نبدا حياه ثانيه تختلف عن الي تعودنا عليه
#Ghufran Alkubaisi