فتحت عيوني باوعت عليهم بأستغراب
ناديه:لارا صوتچ يجنن
سناء:اي والله
ساره:بربج كملي الاغنيه
جنت اباوع عليهم اول مره احد يگلي صوتج حلو غير هدى ولينا لأن ما جنت مهتمه بهالشي كولش بس من تعجبني اغنيه واظل لازگه واغنيها
رجعت اكمل الاغنيه لأن صارلي واهس اغني والاغنيه كولش احبها..خلصت الأغنيه البنات كلهم صارو يحجون بصوتي حسيت بشعور كولش حلو عرفت بوكتها شگد اللسان يبني الانسان وممكن انو يهدمه ..مر الوكت بسرعه وانتهى الدوام ..مرت اسبوعين وجانت كلها نفس الروتين عباره عن ضغط دراسه ...
يوم الخميس 2-11-2014 الساعه 2 الظهر
گعدت من النوم . رحت للمطبخ لحتى اكل طلعت الغده واخذته للصاله فتحت نت جانت كومه رسائل لأن ظليت 3 ايام مو فاتحه موبايلي لفت انتباهي مسجات ع الانستا فتحتها چان مكتوب بيها(السلام عليكم )(شلونج لارا)(لارا طبعاً اني كولش اسف اخذت عليچ نظره غلط والله مچان بقصدي انو اصيح عليج گدام الولد بس كلامه جان اي شخص بمكاني يصدگه )(واني اسف مره ثانيه اتمنى ما تاخذين عليه نظره محلوه)
عرفت انو هذا وسام چانت الرسائل گبل يومين رديت عليه (وعليكم السلام ...تمام الحمدلله)(لا خويه ولا يهمك اني هم غلطت من رفعت صوتي اني اسفه)
سديت الانستا ورحت فتحت كلاش چان جود داخل للكلان گبل دقيقه
لارا: هلااا نورت
جود:نور عيونچ
جود:شلونچ؟
لارا:تمام الحمدلله وانت؟
جود:دووم يارب ..
جود:تمام الحمدلله
لارا:يدوم عزك ونبض گلبك ويوم عرسك ونردح كدام الصاكه مرتك...دومك
جود:بعد وكت يمعوده شتطلبيني .يدوم نبضچ
لارا:..ونبضك
لارا:صدوگ ترى من اجيت المره الي فاتت اني ما جنت فاتحه والله
جود:لا عادي...واني هم ما جنت فاتح بس گالتلي اميره انتي سألتي عني
لارا:ايي صح رحت وگالتلي ما موجود
جود:مشغول بالدراسه والله ومگدر افتح لأن التهي بيها حيل
لارا: الله يوفقك ويسهل عليك
"طبعاً بالرغم انو ما صارلي شهر من اعرفه لجود بس علاقتي بي كولش قويه چان يشبهني كلشي بصفاته اي شي الي يحجي عن نفسه چنت احس يحجي عني "
...شوي وصلتني مسجات من وسام ..استأذنت من جود رحت ارد عليه چان مكتوب(سناء خابصتني بيج بالبيت وكل شوي تگول محبوبه كولش وگلبها طيب بس مجان على بالي هيج بهاي السرعه تقبلين اعتذاري لأن جنتي عصبيه كولش كلت حقدت عليه)
رديت عليه:غير ماخذ عليه نظره محلوه
انتبهت على نفسي اشو اخذني الواهس ويا چنت اريد اسد السالفه بسرعه ..رد هو: لا غيرتها هسه واصلاً جان حكم بساعه عصبيه
لارا:ولا يهمك
وسام:سمعت تريدين تصيرين دكتوره صح؟
گلت بگلبي هسه غير لزگ شلون سالفه
لارا:اي صح
وسام:شنو التخصص الي ببالج؟
لارا:طب بشري
وسام:اوووه يرادله معدل عالي عاد انتي گدها ؟
لارا:ماكو شي مستحيل اظل احاول لحد ما احقق حلمي اهم شي ما يدخل اليأس بگلبي هيج اگدر اكمل حياتي
وسام:حلو والله ..انتي انسانه كلش طموحه
لارا: بدون الطموح اعتقد راح انضم لقائمه الفاشلين
وسام:ربي يوفقج ..بس خلي ببالج يرادلچ اصرار ولازم ما تضعفين راح تنحطين بكومه مواقف بس لازم تتعديها وما توگفين عليها
لارا:ان شاء الله واكيد مراح اضعف
وسام:الله يسهل عليج
لارا:تسلم وأياك يارب
طلعت من الانستا افتر بالفون ماكو اي شي رديت ع الرسائل الي واصلتني ورجعت فتحت كلاش وكالعاده الملل يكتل واظل ع الهجومات شوي وفتح عبدالله وجود هم
عبدالله :هلــو
جود&لارا:هلوات
عبدالله :شبيكم يحظي ما تحجون الا اني احجي
لارا:جود خجول ما يحجي مو مثلك ما تنفتح بالحجي تدوخنا
عبدالله:گبر ام عطوب، جود عرفنا ع نفسك
جود:اسمي جود عمري 16 اصلي بغداد وسكن السليمانيه
عبدالله:حيـاك الله وعاشت الاسامي والعمر كله
جود:تسلم وتعيش ايامك
عبدالله:لارا هذا جيرانج
لارا:اي اعرف
عبدالله:گبر منين تعرفي خاف اااا
لارا:انجب عرفته ع العالمي
عبدالله:اوك انجبيت...زين جود ليش تسكت شاركنا بالحجي
جود:شنو احجي انتو دا تحجون سويه
عبدالله: واذا صير مثل لارا حشريه كل ما احد يحجي هي تنط
جود:لا يابه لا
لارا:وجع عبيد هاي اني هيج
عبدالله:اي هيج
لارا:طاح حظك كلت هسه يسحب كلامه
عبدالله:وليش اسحبه اذا كلامي صح
جود:عبدالله اني لحد هسه ما عرفت بس اسمك عرفني عليك
عبدالله:اسمي عبدالله عمري 15 من بابل
جود:اهاا حياك الله والعمر كله وعاشت الاسامي
عبدالله:تعيش ايامك ويحيي اصلك
جود:وايامك..
عبدالله:لارا اشو سكتي خاف مُتي
لارا:لا راح اصير مثل جود
جود:لا يمعود شتصيرين مثلي غير الكلان يموت ظلي احجي
عبدالله:يالله ربي اصدك وهيج تصيرين بهدوء جود
لارا:ها هيه اخذت قراري راح اصير بهدوء جود
جود:عمي شنو اني الناس تريد تصير مثلي
لارا:انهمد لا تذلنا عاد
جود:شنو انهمد
لارا:والله ما اعرف بس اعتقد ما بين اسكت وانجب
جود:همداج
لارا: وهمداك هم وياي ع الواهس
ظليت احجي ويا جود اكثر من اربع او خمس ساعات ومچنت حاسه لأن من احجي ويا جود مدري شلون الوكت يطير بسرعه
ما حسيت الا صارت الدنيا المغرب استاذنت وسديته ورحت لحتى اصلي ..توضيت وصليت ورجعت للصاله چانو دا يتعشون ..تعشيت واخذت المواعين اغسلهن ورا ما خلصت رحت للصاله اخذت الفون شفت لينا متصله عليه فتحت عالگتها مسجات رديت عليها بسرعه جاوبت
لينا:من الله ياخذك وينك الي ساعه اتصل
لارا: كنت مخليه موبايلي سايلنت ورحت اغسل المواعين شبيكِ
لينا: هسه انطمي وتعالي علينا
لارا: ليش شعدكم؟
لينا: سناء وهدى وساره يمي
لارا: شوي واجي بس اغير ملابسي وانطي خبر لماما
لينا:اوك انتظرِك
رحت لماما گلتلها وافقت رحت بدلت بسرعه ولبست شال وطلعت لشقه عمو حسام چانت الساعه 8 ونص ..سلمت ع البنات ..سألتني خاله سهاد: لارا عدكم احد بالبيت؟
لارا:لا خاله بس ماما والبنات
خاله سهاد: كان انا اروح هناك وانتم اخذم راحتكم
البنات :اخذي راحتج خاله ..طلعت خاله سهاد وظلينا وحدنا بالشقه ..ظلينا نحجي بالمدرسه وبهواي شغلات وما خلينا ولد شفنا بالشارع يعتب علينا ولا ممثل من المشرق للمغرب
سناء: صدووگ بنات عرس بنت خالتي الخميس الي يجي
لينا: وين يصير العرس؟
سناء: اهنا بالسليمانيه.. برب خلونا نروح سويه والله كولش نتونس
ساره: اييي امانه
لينا: معرف انا اشوف ماما
هدى: وانا هم
اني چنت منزله راسي ع الفون اگلب لحالي لأن ما احب اتناقش بالأعراس
سناء: لاروووو وانتي وجع
لارا: شنو؟
ساره: هسه بشنو اهفج بالله
لارا: شكوو
سناء: تروحين ويانا لعرس بنت خالتي
لارا: ما احب الأعراس
ساره: انجبي مو بكيفج غصب تجين
لينا: تناقشين لارا على عرس عرس بنت عمتي و ولد عمتي اثنين ما حظرتو تعالم هسه غيرم رائيها
سناء: چذذذذب
لينا: وربي
ساره: امانه لارا شبيج والله نتونس كلنا سويه وهم ناديه راح تجي ويانا
لارا: الله كريم اشوف منا للخميس
سناء: شنو رائيكم نروح هسه نحجي ويا خاله سهاد و خاله نداء علمود يقتنعن من هسه
لينا: والله انا حتى ملابس مو مشتريه والفساتين كلها تركتها بالرطبه
لارا: انا هم
ساره: الثلاثاء نروح اني وسناء ما عدنا تحاظير بس امتحان جغرافيه والدوام ظهري نداوم نمتحن اول درس وبالـ 3 نتفق ويا اي احد من الولد ياخذ النا اجازه ونطلع من المدرسه ع السوگ
لينا: اشوف ماما والله كريم
ساره: خلي نروح هسه نگولهن
لارا: اوك امشو ...طلعنا من الشقه كلنا رحنا لشقتنا ..دخلنا جوا سلمن ساره وسناء وهدى بكل ادب وهدوء واني ولينا صافنين يااابه ع الاحترام ما عرفتهم گالن لماما وخاله سهاد يمكن نص ساعه وهن يقنعن بيهن وهم نفس الجواب: عيب ما نعرفهم شيوديهم هناك وما يعرفوهم ..وسناء وساره يرجعون يحجون واحنا ساكتين اقتعنو ماما وخاله سهاد وماما گالت هي تحجي ويا بابا وتقنعه بس بعد ام هدى صارت السالفه على خاله سهاد هي تگولها وام هدى علاقتها حلوه بخاله سهاد ما ترفضلها طلب رجعنا للشقه اول ما دخلنا سناء گامت ترگص من الفرحه واحنا صافنين وراها مصدومين وهي مو ويانا ونأشرلها نريدها توگف ماكو ما وگفت لحد ما دارت وجهه بوجهه اصيل ظلت صافنه ما تعرف شنو تسوي واصيل واگف مصدوم واحنا الأربعه گدام الباب صافنين عليهم اصيل بسرعه نزل راسه وگال اسف مچنت اعرف احد راح يدخل للشقه طلع بلمح البصر وسناء بعدها واگفه من الصدمه ما گدرت اتحمل وگعت للگاع من الضحك والبنات كلهن وياي ما وگفنا الا لما سناء گالت: امانه هذا مو حلم
لارا: هههههههههههههه لا مو حلم يا صافيناز
البنات: ههههههههههههه
سناء انفلتت بالبجي وتحجي: الله ياخذج لينا ليش ما گلتي اخوانج يجون يا مطيه ولج ما شافني الا ارگص الله ياخذج يا طايحه الحظ
لينا: انا شدخلني واول مره اصيل يرجع هيك وقت
ظلينا نهدي بسناء لربع ساعه يلا سكتت غسلت وجهه ورجعت گمنا نضحك كلنا
اجاني مسج فتحت الفون جان المسج من وسام ع الانستا فتحت المحادثه انصدمت هذا تخبل رسمياً...
#Ghufran Alkubaisi
أنت تقرأ
المجنونة وقعت في الحب
ChickLitفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
