ردت احجي قاطعنا دخول استاذ سامر ..
سكتت وگمنا اني وساره بسرعه
استاذ سامر: يعني ما سمعتو الجرس من دگ؟
لارا: لا والله استاذ
استاذ سامر:بسرعه للصف حظرن اوراقجن علمود الأمتحان
نزلنا راسنا وطلعنا بسرعه ظليت افكر خفت لا استاذ سامر سمع شي من كلامنا.. دخلنا للصف چان ترتيبنا مثل امتحان الرياضيات يعني اني يم ريام اخذت الورقه مالتي ورحت يمها باوعت عليها ابتسمت رديت الأبتسامه ورجعت اكتب اسمي ..كتب استاذ سامر الأسئله چانت مو كولش سهله بس ما تسرعت وظليت مركزه بيها لحد ما حليتها كلها باوعت گدام چان استاذ سامر ملتهي يباوع ع الأخير لأن الاخير دائما مشتبهه بيهم والمشكله لينا والباقي كلهم بالأخير التفتت باوعت لريام اشرتلي بمعنى السؤال الثالث ما حبيت اخجلها رغم انو هو اسهل سؤال رديتلها الجواب وهي كتبته وسلمت الورقه واني رجعت اركز احاول أتأكد من الحل شفت البنات اغلبهم طلعو ظليت بالصف لحد ما سلمت لينا الورقه سلمت وراها وطلعت .. فتت للكافتريا ..چانت مقابل صفنا مخزن الكتب ويمه ع اليسرى الكافتريا ..لگيت ريام
ريام:لارا
لارا: نعم
ريام: ممكن تجين معي شوي
لارا: طيب ماشي بس اشتري واجي
ريام: انتظرج بصف خامس -ب-
لارا: اوك
طلعت ريام واني رحت اخذت چبس وبيبسي وطلعت لگيت لينا بالممر
لينا: لك ثول اي والله صار ساعه ادورلِك وين كنتي
لارا: كنت اشتري شبيكِ
لينا: يولي حلي الأسئله امانه اريد اعرف حلي
لارا: بس اشوف ريام وارجع احلها
لينا: شعندِك مع ريام ومن ايمتى تصافيتي معها وكنتي اكثر وحده تكرهيها؟
لارا: مو قصه تصافينا او شي بس قالت تريد تحكي معي وعيب اردها
لينا:ماشي راح انتظرك مع البنات من تخلصين اصعدي فوگ كلنا هناك
لارا: ما بقى شي ويطلع استاذ سامر شعدكم فوگ؟
لينا: ست هبه مو مداومه ورحنا فوگ
لارا: ماشي انتي اصعدي وانا شوي واجي
لينا صعدت فوگ واني رحت للخامس -ب- طبعاً جان فارغ لأن الخامس بيوم الاحد ما يداومون فتت لگيت ريام گاعده ع الأستول وصافنه تشخبط بالقلم ع الستيج بشكل مبعثر سويت صوت لحتى تنتبهه باوعت عليه جانت عيونها غرگانه دموع سألتها بأهتمام: ريام بيكِ شي ؟
ريام: اول شي تعاي اگعدي
رحت سحبت ستول وگعدت يمها
لارا: تفضلي
ريام: اول شي شكراً..نزلت راسها وكملت.. وثاني شي اسفه
لارا: العفو ..بس ع شنو تشكريني وع شنو تتأسفين ما فهمت؟
ريام: اشكرج لأن اول مره شفتيني اغش وما حجيتي لأستاذ سامر وثاني مره اليوم ساعدتيني ورغم اني طلبت من رنا وجانت تعرف الجواب وغلست وهي صديقتي او شبهه صديقه واسفه على اسلوبي الأبد محلو من معرفتي بيج لحد هسه
لارا: عادي العفو حب انا ما سويت شي ولا تتأسفين عادي الأختلاف دائماً يصير مو مهم
ريام: تسلمين حبيبتي
لارا:ربي يسلمِك غلا ..سكتت شوي شفتها رجعت صفنت وكأن تدور احد ينقذها من عالم موحش بداخلها او تناقض داخلي ..سألتها عسى ولعل الگه الها حل
لارا: ريام بيكِ شي ليش شكلِك مو على بعضِك ؟
ريام: لا هيج ضروف صارتلي وها هيه ..ما حبيت اضغط عليها هواي
لارا: حبيبتي كلشي الو حل ومهما كانت ضروفك اعرفي انو الله خلى هاي الضروف لحتى تلاقين نفسك ونقاط القوه بنفسك ويعرف انو انتي قد هذا الحمل والا ما كان حملك هيك فا تفائلي ولعل وعسى الأبتسامه تطفي من نارِك شوي
ريام: مشكوره على كلامج بس حملي كولش ثگيل
لارا: ريام كل انسان الو ضروف وكل شخص عندو معاناه انتي ما تعرفين بيها بس رغم كلشي يظهر الضحكه والقوه وبداخلو بقايا انسان محطم بس لقى شي يجمع بي شتات نفسو وانتي اعرفي تجمعين شتات نفسك مهما كان حملِك
ريام: بجد ما اعرف شلون اشكرج على كلامج بس ريحني
لارا: لا شكر على واجب ..وهسه اذا تحبين امشي نروح ويا البنات فوگ قاعدين
ريام: لا روحي انتي اني يضوجون مني
لارا: لا عيب عليكِ شنو هالحكي امشي تعرفي عليهم ومحد يكرهك وربك بس لما تتعاملين معهم بفوقيه
ريام: مو بقصدي اتعامل هيج والله
لارا: كان امشي واسكتي
ريام :ماشي
طلعنا من الصف رحنا اول شي للصف مالتنا شفت البنات كل وحده گاعده بمجموعه ونبأ وشمس گاعدين وحدهم كالعاده هدوء معرف شلون يتحملون يظلون ساكتين وچانت طالبه گاعده گدام نبأ وشمس اسمها لورين ما نسمع صوتها بس من تگوم بالتحظير اليومي شاااطره كولش ..ما اعرف ليش اخذتني رجلي يمهم وگلت لريام تنتظر شوي
لارا: هلاووو
نبا&وشمس:هلاوات
لارا: اقول شنو ما تملون من القعده وحدكم؟
نبأ: ع العكس والله طالعه روحنا ما تشوفينا وحده صافنه بالثانيه
لارا: تروحون معي؟
شمس:وين؟
لارا:شلتي قاعدين فوگ نروح هناك نتونس سوه
گامت نبأ وسحبت شمس گالت: اي الله وايدج
لارا: امشو
التفتت على لورين حبيت اسألها لأن هي الوحيده الي گاعده وحدها
لارا: لورين تجين معنا؟
لورين: اخاف ازعجكم
لارا: لا ابد ماكو اي ازعاج اذا تحبين تعالي معنا
لورين : ماشي بس ادخل الكتاب بالجنطه واجي
لارا: اوك ماشي
دخلت الكتاب بالجنطه وطلعنا كلنا فوگ
قربت يم الصف وگفت البنات وصرت امشي ع اطراف اصابعي چانو سادين الباب او شبهه مسدود وگفت گدام الباب وچان الصف هوسه من اصواتهم انتظرت شوي لحد ما هدأ الجو دفرت الباب بكل قوتي اباوع لأشكالهن شلون انخطفت وجوهم والي وگعت من الرحله والي صرخت اشكالهم جانت تموت ضحك ما حسيت الا كلهم طفرو عليه شبعت كتل الله ياخذهن مو بنات چنهن يلعبن تيكواندو كسروني صرخت لحتى يگومن وراها سويت نفسي مغمي عليه بالگوه لازمه ضحكتي واني اسمعهن شلون انخبصو والي تگول بعدو عنها خلي تتنفس وحايرين شنو يسون لشوي گمت وعدلت نفسي شفتهم ضلو صافنين عليه رفعت حاجبي
لارا: خيييييير شكو صافنين
ساره: يعني چنتي تمثلين؟
لارا: اي بربكم شلوني مو انفع امثل بدال كاترينا كيف
سناء: يااااااا حقييييره والله مُتنا خووف يا نذله
لينا: يا نعال يا مطيه والله گلبي طاح
لارا:يطبكم طوب موتوني قتل وتالي مُتنا خوف موتتهم شفت وحده بيكم ماتت حتى اخلص من وحده منين اجيبلكم عرسان بلكي وحده تصيبها سكته جلطه منا منا
هدى :انطمي وجع يا طايحه الحظ والله خوفتينا
لارا: يااااارووحي بس انتي تقهريني شعندِك هالرقه الزايده
ساره: واحنا مو بعينج
لارا: لا انتو بخشمي
سناء: وويع مقرفه
لارا: ووووووواي يمه هسه مقرفه لا يالنازكه ما عرفتِك مو انتي الي توني سويتي حركه جون سينا وطفرتي على معدتي طلعتي مصاريني وحتى المعده والبنكرياس
لينا: وجع وجع شنو هااي صحي مقرفه
لارا: اسم الله يولي ساره لمسيهم هذولي صخنم لو شنو الموضوع لا ومنو الي حكى لينا وسناء ياااااااااا الله معجزه الهيه لينا وسناء رجعو للطبيعه الأنثويه
التفتنا كلنا على صوت ضحك مو طبيعي وچنا وحده تباوع ع الثانيه من الصدمه چانو ريام ولورين ونبأ وشمس واگعين يم الباب يضحكن واحنا گمنا نضحك على ضحكهن ويمكن ربع ساعه يالله سكتنا كلنا
لورين: وربي يمكن اول مره بحياتي هيج اضحك
ريام: اييي وربي
گمت من مكاني ورحت گعدت فوگ الرحله وخليت ظهري ع الحايط ومديت رجليه وگامو البنات توزعو گعدو بالصف لينا وسناء ظلو گاعدين متربعين بالگاع وساره سحبت نبأ وشمس ولورين وريام ودخلتهم گعدو ويانا وناديه جانت متربعه فوگ الرحله الثانيه وهدى گاعده على نفس رحله ناديه
سناء: بنات تلعبن صراحه وجراءه ؟
لينا: اذا نلعب لا تسألون هذا السؤال السخيف مال حبيتي وشنو اسم حبيبِك
هدى :اي والله كل ما نلعب يسألون نفس السؤال
سناء:ثول غير نسترزق الله بالفضايح وع اساس اكو سؤال ثاني يعني
ساره:هسه خلي نلعب والله ضوجه
لارا: منين بطل؟
ناديه:اكو جوه الرحله الأخيره هسه اجيبه
رات ناديه جابت البطل وطبعاً احنا ما عدنا مشكله تربعنا كلنا بالگاع على شكل دائره وخلينا البطل بالنص فرته سناء وطلع ساره تسأل ولورين تجاوب
لورين: تفضلي
ساره: اول شي گولو اقسم ان اقول الصراحه ولا شي غير الصراحه
لارا:من احد يقولي لازم تحكين الصراحه اول شي افكر بي شلون راح األف الكذبه
شمس:هيج تجبروني ع الجذب
ساره: هسه انجبن وگولن
كلنا گُلنا القسم بعدها بدت اللعبه
ساره: لورين جرئه لو صراحه؟
لورين: جرئه
ساره: روحي على استاذ سامر وگوليله استاذ عيد الأمتحان لأن راح اخذ 98
لورين: هييييييي وجع لو تموتين
ساره: هذا الي عندي محد گلج تختارين جرئه
ناديه: رحتي بيها
لارا: ترى والله عاديه استاذ سامر اسلوبو سهل معنا وخصوصاً احنا يلا لورين لا تكونين جبانه قدام هاي الثوله
ساره: ايا ثوله ..واذا تگدر خلي تروح
لورين :اوك راح انزل
نزلت لورين واحنا كلنا واگفين على الدرج الثاني لأن نگدر منه نشوف الأداره مال المدرسين ومتكومين وما مطلعين بس عيونا لحتى نشوف شنو تسوي ..نزلت لورين واحنا ظلينا واگفين المدرسه چانت هدوء ماكو احد طالع بس احنا لأن ما عدنا مدرسه ولو تدري المديره تحرگنا ..ناديه ظلت تتحرك واني بالگوه حاشره نفسي وكلهم البقيه فوگ راسي اخر شي ناديه داست على رجلي بالگوه كتمت صوتي گرصتها لحتى تشيل رجلها وهي الثوله صرخت ومن صَرخْت البنات كلهم وگعو وحده فوگ الثانيه واني وسناء طفرنا فوگ الدرج الثاني
ظليت گاعده ع الدرج واضحك على اشكالهن من گد ما ضحكت دموعي گامت توگع وهن گاعدات الي ع الدرج والي بالگاع لحد ما اجه استاذ سامر كلنا وگفنا
استاذ سامر: شعدكم واگفين اهنا؟
ظلينا ساكتين ولا وحده حجت وخطيه لورين وجهه صار احمر من الخجل
استاذ سامر: مو دا احجي وحده بيجن تنطق
..حبيت انقذ لورين من الموقف الي حطينا بيها وهي اول مره تگعد معنا ما جان عبالي راح اصخمها
لارا: استاذ كنا نلعب صراحه وجرئه وتحدينا لورين انو تنزل تحكي معك علمود الأمتحان وكنا نراقبها من هنا
استاذ سامر: افهم انجن استغليتن شطاره لورين وعلمود تحجي وياي و اوافق تعيدون الأمتحان؟ وهاي وانتي لارا الي اكول عليها ذكيه انتي هيج تتصرفين؟
لارا: لا والله استاذ مو هيك قصدنا ابد ..
استاذ سامر(بمقاطعه):بما انجن كلچن تهتمن بدروسچن درس الكيمياء الجاي كلجن تسجلن غياب وما تحظرنه
باوعت على لورين عيونها امتلت دموع خطيه قهرتني.
لارا: استاذ صح نعترف انو غلطنا وان شاء الله ما تنعاد بس عقابك قاسي
"طبعاً اني بداخلي مكيفه بعد احسن ياريت يظل معاند ما يدخلنا مالي خلگ هسه كالعاده نص الصف ما محظر وتوگع براسي ويوگع الدرس عليه وعلى لورين وشمس ونبأ وهو ينطي هواي تحضير"
استاذ سامر :برائيج قاسي؟
لارا: اي
استاذ سامر: اوك عاجبني هيج والدرس كلهن يحظرن الا انتي ولورين
"الله ياخذك گلت راح اتسلى لو ادري مو حاچيه"
نزلت راسي وما حجيت احس دموعي راح توگع لأن حسيته دا يعاند بيه
يلا كلچن للصف ولورين ولارا روحن كملن لعبتچن
لورين چانت الدمعه بطارف عينها ..راحن البنات واستاذ سامر وراهن ظلينا واگفين اني ولورين وحده تباوع للثانيه
لارا: اسفه لورين والله ما كان قصدي احطِك بهيك موقف
لورين: لا عادي ولج لا تعتذرين لأن انضلمتي حالج من حالي
لارا: واصلاً ليش نقهر نفسنا اصلاً نتونس عباله عقاب ما يعرف افرج عنا هالمره خلي غيرنا يحظر
لورين : امشي نصعد فوگ
رجعنا للصف الي گاعدين بي ظلينا ناكل ونحجي ما حسينا بالوكت الدرس الواحد ساعه الا ربع وهم اخذو درسين سوا نص درس ست هبه ودرس الكيمياء
چنت مندمجه بالحجي ويا لورين افكارنا چانت متشابهه والأحلى انو هي هم حلمها طب بشري
لورين: تعرفين اني اول مره اتعاقب هيج عقاب واتونس بي؟
لارا: اييي والله انا هم نفس الشي حبيت الحكي معك اول مره يواجهني شخص يكون مشابهني بنفس الافكار
لورين: اييي والله واني هيج ..تونست كولش وياج وحبيتج
لارا: حياتي تسلميلي شعور متبادل
لورين : يسلمج ربي
دفعو البنات الباب كولش قوي احس گلبي وگع لأن جنت مندمجه بالحجي ويا لورين اثنينا فزينا وباوعنا عليهم
ساره: الله ياخذچن لو ادري مو سأله السؤال وگع الدرس كله علينا شدعي عليچن
سناء: اذا اشوفجن بنار جهنم الا اجيب بانزين واخلي عليجن حتى اشوف نورچن
لينا: تعرفون شنو براسي هسه اسوي؟
كلنا باوعنا بمعنى شنو؟
لينا: اجيب قداحه وبانزين واخلي الكتب كلها وياها استاذ سامر واحرقها حتى اشوف العلم يشع نور
ريام: بجد اتمنى تحطين ست هبه ويا حتى نشوف الشعله الاولمبيا بالعراق
لارا: صححح لسانِك والله فرحتي بيومها ما تنوصف احتمال بيومها من فرحتي اتبنى عشر اطفال واربيهم ا..
لينا (بمقاطعه): انتي ترررببييهم عز الله راحو الأطفال اذا انتي تكونين امهم والله يطلعون صايعين
هدى : ووووانا اشهد
لارا: طيح الله حظكم كُنت اريد اخذ احمد اخو ساره هسه ما تخطبني لأخوها بعد كلامكم هذا
ساره: مجرد تخيلت شكل لارا مرت احمد حسيت اخوي راح بيها
سناء: لااا خطيه شبيچن وياها ولا يهمج حياتي اخذج لوسام
لارا: عود ليش مو لخالد
ساره: لا وسام كولش يرهملج
سناء: يعني بس اتخيل شكل خالد شلون ينتف شعره من ياخذج
لارا: الله ياخذكم ولم عن وجهي اروح انزل جوه احسلي
سناء: زعلتتي؟
لينا: لارا تزززعل
لارا: انتي انطمي ..لا يولي ما زعلت بس اريد انزل ارجع كتاب الكيمياء ما تسوه اراجع بي بعد
ساره: براحتج حب
شمس: نسيت اگولج لورين توني گالت تريدج
لارا: هسه اشوفها
طبعاً لورين من اجوي البنات استأذنت ونزلت ..
طلعت برا ونزلت للطابق الي بي صفنا على اخر درجه جانت الأداره گدامي طلع بوجهي استاذ بلال مدرس الفيزياء نزلت راسي وردت اروح سمعته صاحلي التفتت عليه
لارا: نعم استاذ
استاذ بلال: صيحي لورين وتعاي للأداره مال المدرسين ...
#Ghufran Alkubaisi
YOU ARE READING
المجنونة وقعت في الحب
ChickLitفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
