هاي الفتره راح انزل اكثر من بارت لحتى اخلص الروايه فا لازم تتحملون
لما سمعت صوت المسج طفرت بسرعه اخذت الموبايل وفتحته چان مسج من صديقي ريان هو سعودي بس درست ويا الثانويه ببريطانيا شمرت الموبايل بدون لا ارد خليت المخده على راسي وافكر لاا حول ولا قوه مراهقه تگلب حالي هيج وانتظر منها مسج وكل شوي افتح الموبايل عسى ولعل ترسل مع انو متأكد انو هي هسه نايمه لساعه 3 نمت بدون شعور من تعب التفكير
——————ه
لارا..
گعدت الساعه بالـ9 وربع گمت طلعت للصاله ماكو احد سمعت صوت بالمطبخ رحت لگيت ماما دا تسوي ريوگ وگفت يم الباب ابتسمت وجهه الصبح يكفيني عن الدنيا كلها اذا اضيع ما الگى غيرها ملجأ الي ولا احد ولا شحص بالدنيا يريد مصلحتي غيرهاغيرها عندي الدنيا كلها بكفه وماما وبابا او اهلي كلهم بكفه ثانيه
لارا: صباح الخير ام اسامه
ماما: صباح الأنوار ماما
لارا: جوووعانه
ماما: روحي غسلي وتعالي بين ما اقّعد ابوكِ واحط الريوگ
لارا: ان شاء الله
رحت غسلت وجهي وفرچت اسناني وتوضيت ورحت صليت الفجر قضاء انقهر كولش لما ما اگعد ع صلاه الفجر احس اكو شي بيومي ضايع
طلعت رحت للغرفه صليت وعدلت شكلي وطلعت للصاله لگيت ماما وبابا گاعدين رحت گعدت يمهم لشوي گعدن كل خواتي اجن گعدن معنا چنا كلنا ساكتين قليل كولش نحجي لأن بابا ما يحب احد يحجي ع الوجبه يگول الأكل اله اداب فا ما نحجي
خلصنا اكل.. جوان اخذت المواعين غسلتهن ورجعت وكلنا چنا مجتمعين فا بالعاده بكل جمعتنا متعودين على حجي بابا عن ايامهم گبل واصالتهم والعادات والتقاليد ورغم اني ابد ما احب اتقيد بالعادات والتقاليد وسوالف المجتمع العشائري بس احب كلام بابا عنه صح بعض احكامهم مو حلوه بس كلامهم اغلبه صح بس حكمهم ع المرأه احسه كولش غلط بنظرهم المرأه بس للبيت والطبخ ولزوجها وكل شي الي تسوي عيب ما لازم تأسس حياتها بنفسها او تكون الها حياه خاصه هي تسويها والي ما تمشي على حكمهم يا ويلها من كلامهم عاد او قانونهم الي راح يتطبق عليها والي يقهرني اكثر لما يگولون المره تنستر ببيت زوجها يحسسوني انو هي يم بيت اهلها مو مستوره او عار على اهلها ويبقى بس شوي ويرجعون لزمن الجاهليه واول ما تجي بنت ع الدنيا يدفنوها بالنهايه المرأه تبقى نص المجتمع والنص الثاني لوما هي ما يجي للدنيا وتبقى ثقافه الرجل لنفسه اما ثقافه المرأه يعني ثقافه جيل كامل لأن هي الي تربي اطفالها ومو من الصح يتركون البنت بدون تعليم على ابو خاضع لقوانين العشيره ويريد الستر لبناته " اعتقد مثل حلم ابليس بالجنه انو يتعدل حال العراق ويتفهمون هذا الشي"
ظل كلام بابا مستمر واحنا بقمه الأستمتاع بكلامه والنقاش معه ويوضحلنا بعض النقاط على شغلات احنا فاهميها غلط وهواي امور تصير بالمجتمع و على الرغم من انو بابا معروف بين عشيرته والناس كلها تهابه واله احترامه بين الشيوخ بس يمنا كولش يختلف يحسسنا بحنانه وعطفه لما نگعد كلنا يمه وحتى ماما معنا احسه وطن النا وطن متوفر بي الأمان الي فقدنا خلال التهجير و وطن متوفر بي السلام والهدوء و وطن موجوده بي بس الضحكه وممنوع بي الحزن و وطن ما محرومين بي من اي شي يبقى كله على بعضه وطــن بكل ما تعنيه الكلمه من معاني
YOU ARE READING
المجنونة وقعت في الحب
ChickLitفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
