المجنونة وقعت في الحب

Part 17

:لارااااا شبيكِ؟
لارا: طحت من الدرج عمر وربي توجع
عمر: استندي عليه وقومي عود جينا ناخذلكم اجازه علمود تروحون للسوگ
لارا(مستمره تبجي): ما اريد اروح لأي مك.. ااااااخ ماما رجلي
وسام: عمر خلي ناخذها للمستشفى خاف انرضت ودا تنزف
عمر: اسبقني فوگـ راح أّنزل لارا للسياره
وسام: ماشي
گومني عمر سندت عليه ونزلت جوه ..صعدت بالسياره
عمر: هسه ارجع بس احكي ويا عزام واجيب البنات واجي ماشي؟
لارا: ماشي
ظليت گاعده بس ما بطلت بجي من رجليه ..شوي وانفتح باب السياره باوعت جان وسام ويا استاذ زياد سألني عن رجليه وراح

وسام: بعدها تأذيج ؟
لارا: ايي
وسام: النزف وگف لو بعده؟
لارا: لا بعده
وسام:فدوه لعيونج بيه ولا بيج تحملي شوي نروح للمستشفى
لارا: وسام ترى بكلامك هذا تحسسني اني وحده رخيصه شنو هالحكي
وسام: لو بس يصير عندج احساس شوي چان حسيتي بكلامي
لارا: هو اني بلا احساس وعديمه مشاعر .
وين عمر والبنات؟
وسام: اي انا اشهد انو انتي بلا احساس..و عمر فوگ دا ينتظرهن معرف شدا يسون
لارا: اهاا
ظل واگف برا يم السياره لحد ما اجه عمر والبنات
هدت شوي من الم رجليه بس فجاءه حسيت بألم مو طبيعي صرخت بصوت عالي ...وسام بسرعه اجه يمي وعمر والبنات اجوي ركض وسام(بخوف) : شبييج
لارا:....(لا رد ..تبجي)
نزل وسام وصعد گدام وعمر يمه والبنات يمي
 ‎لينا: ولِك ليش ما لفيتيها حتى يخف النزف
 لارا: بشنووو الفها
وسام چان لاف على رگبته لفاف اسود نزعه وشمره على سناء لحتى تلف الجرح ..لفت الجرح وصلنا للمستشفى نزل عمر لحتى يشوف دكتور واني ولينا نزلت معي و وسام نزل ورانا من وصلت يم باب المستشفى حسيت بدوخه مو طبيعه وراها اغمى عليه ...
———————ه
لينــا ...
ورا ما نزلت لارا تأخرت كولش جوه من اجت شمس سألتها گالت عبالي رجعت گالت راح اروح يم استاذ سامر ..ردت اطلع اشوف وين صارت دخلت ست نبراس گالت نروح للأداره اني وساره وسناء وناخذ جنطه لارا ويانا ..اخذنا الجنط وطلعنا للأداره چان بس وسام موجود و ورا ما دخلنا دخل عمر رحت يمه
لينا: عمر بعد لارا اروح ادورها
عمر: محاجه تدوريها لارا جوه بالسياره
لينا: ليش نزلت قبلنا؟
عمر: طاحت من الدرج
لينا: ياا شصا..
عمر:كافي تتسألين خلي افتهم من المديره هسه وبعدين تشوفين شبيها
راح عمر يم المديره وگالها على حاله لارا وانو نزلت جوه بس ست رواء ما قبلت وشافت الهويه مال عمر و وسام و الا احد يشوف لارا اذا صدوگ او جذب وتطمن عليها انها موجوده  يالله نطلع
عمر: زين ننزل ويا واحد من المدرسين وهو يشوفها جوه ما تقدر تصعد
ست رواء: ماشي هسه ينزل استاذ زياد ويشوفها ويطمن عليها
عمر: وسام
وسام: نعم
عمر: بلا زحمه عليك انزل ويا المدرس اريد احكي ويا عزام بشغله ضروريه
وسام: اي خويه تدلل
نزل وسام ويا استاذ زياد وعمر راح يحجي ويا عزام لأن موجود بغرفه المدرسين لشوي اجه عمر ونزلنا كلنا جوه.. وصلنا يم السياره صرخت لارا رحنا كلنا چانت لازمه رجليها تنزف ..صعدتّ بسرعه يمها رحنا للمستشفى من وصلنا يم الباب عمر طلع گدامنا يشوف دكتور و وسام چان يمشي ورانا..چنت امشي ويمي لارا ما حسيت الا لما لارا اغمى عليها وگعت للگاع وسام اجه يركض وخلى راس لارا بحظنه واني ظليت واكفه مصدومه معرف اشوف لارا شصار بيها كتلني الخوف او انتبهه لتصرفات وسام جانت نظره خوف بعيونه مو طبيعيه ..ما خلى الممرض يشيلها  شالها هو وخلاها ع السديه ..اجه الدكتور خيطلها الجرح وربطلها سيروم اني ولا كلمه حجيت بس صافنه واباوعلهم وعمر عود راح يشوف دكتور لحد هسه ما رجع...
وسام: لينا بلا امر عليج الموبايل نسيته بالسياره جيبي
لينا: اوك ماشي
ما ردت اطلع بس استحيت منه ..رحت للسياره ساره وسناء من شافوني طفرو عليه
سناء: لج شلون صارت 
ساره: خوما متأذيه حيل
سناء: ليش طولو ما اجوي
ساره:ا..
لينا(بمقاطعه): وجع وجع وجع شبيكم انفجعتم ما بيها شي بس اغمى عليها وخيطولها الجرح
سناء:نگدر نشوفها
لينا:لوما وسام وعمر عدهم معارف اهنا ما يدخلونا
ساره:زين شوكت يطلعوها يطولون ؟
لينا: والله ما اعرف هسه اشوف
سناء: ليش راح ترجعين جوه
لينا:وسام يريد موبايلو بس اوديلو الموبايل واشوف ايمتى يطلعون وارجع اهنا
ساره: عفيه لينا لا تطولين ظل بالي يمها
لينا:ماشي
فصلت الفون عن الكيبل مال السياره اخذته ونزلت من السياره وصلت للمكان الي بي لارا  وگفت يم الباب چان بس وسام بالغرفه ومنطيني ظهره ويحجي ويا لارا ورغم چانت بعدها مو صاحيه تقربت بهدوء شوي چان لازم ايدها سمعت كلامه
وسام: شوكت تگعدين عاد هالگد متأذيه ! ..ليش صارت بيج مو بيه ..اووف لو بس تگعدين وتحسين بيه وعن شنو دا احجي ههه تعرفين من شوكت صار بيه هيج ؟ من طفرتي من الدرج عليه وتعذبت  من طلعتي ع الباب وچنتي فاتحه شعرج صورتج مدا تروح من بالي واليوم الصبح من چنتي واگفه ع البلكونه وشعرج يطيره الهوه كل تفصيل صغير بيج اعشقه شوكت تحسين بيه عاد شوكت تصيرين الي بعد ما عرفت مشاعري تجاهج اليوم مستحيل اخليج تصيرين لغيري مستحيل
ظليت مصدومه بمكاني من سمعت كلامه صحيت من صدمتي علي صوت عمر بالممر خفت لا يشوف وسام وهو لازم ايد لارا ويحجي وياها والله يكسر المستشفى على راسنا
لينا(بتوتر):وساام
التفت بسرعه .وسام(بصدمه): شوكت جيتي اهنا؟
لينا: مو وقت اسألتك هسه قوم من مكانك عمر بالممر اذا يشوفك يموتنا
گام وسام ابتعد انطيته موبايله و وگف يم الباب واني گعدت يم لارا ..دخل عمر مع الدكتور ظل يباوع علينا ويستمع لكلام الدكتور خلص الدكتور الأرشادات عن الأدويه وگال ننتظر ما نطلعها لحد ما يخلص السيروم ..طلع الدكتور باوع علينا عمر ..
عمر: يعني بربكم صار ساعه افتر بالمستشفى مثل المخبل ما عرفتو تطلعون يم الرسبشن او تتصلون بيه
وسام:والله اني چنت ناسي الموبايل بالسياره وتوني جبته حتى اتصل بيك
عمر: يمعود انت اخويه لوما انت وياهم كان يظل بالي يمهم
وسام:اگول اسكت ما بينا هاي الرسميات
عمر :ولا يهمك سكتت
استأذنت وطلعت للسياره بس فكره تجيبني وفكره توديني لما لارا تكعد اگولها الي سمعته لو لا ..رحت يم البنات طمنتهم وظلينا نحجي لحد ما صارت الساعه 11:12  اجت لارا ورجعنا للبيت
—————ه

بـمكان بعيـد عن العـراق ...امريكا.. ولايه  ميشيغان -لانسنج
السـاعه الـ 6:12 ص

طلعت من الشقه اسوي رياضه اجاني اتصال من الوالد.. رديت عليه
..:الو؟
.:يا هلا ومرحبا بالصوت وراعي
..:هلا بيك زود وليدي ..شلونك
..:بخير الحمدلله.. انت شلونك وامي وزيد شلونهم
..:عسى دوم يارب .. الحمدلله كلنا بخير
..:يدوم نبضك
..:اگول يابه علي
علي: تفضل يابه
ابو علي: شوكت تجي لبريطانيا؟
علي: ان شاء الله كم يوم واجي بس ليش حجي خوما صاير شي
ابو علي: لا وليدي ماكو شي بس راح نرجع للعراق نظل اسبوعين ونرجع

علي: اشو ترجعون للعراق وبهالوكت يابه انت شايف وضع العراق شلونه الناس تطلع من هناك وانت ترجع صار سبع سنوات ما رحت هناك هسه تريد تروح
ابو علي: يابه ما نروح للأماكن الخطره راح نروح للسليمانيه وهناك بيت ابو اسامه وابو عزام وابو خالد وهم عمامك راح يجون هناك نظل فتره ونرجع اهنا
علي: يابه هذا اكيد الزعطوط المدلل لاعب براسك موو
ابو علي: ههههه والله يابه ما اگولك لا.. اي زيد يريد يروح هناك
علي : لا حول ولا قوه زين شوكت تروحون
ابو علي: ان شاء الله الخميس نروح
علي: على راحتكم
ابو علي: تلحگنا هناك مو ؟
علي : لا ما اروح
ابو علي: براحتك ..يلا مع السلامه
علي: الله وياك
...سديت الخط وظليت اركض لحد ما تعبت..چان الجو كلش بارد وهي نهايه شهر الـ 12 ..باوعت مسافه گدام چان اكو مقهى توجهت هناك وما عندي اي فكره شنو راح اسوي ..دخلت للمقهى باوعت للأماكن چان اكو طاوله فارغه بزاويه توجهت الها طلبت نسكافيه درت وجهي للزجاج الي چان يطل على الشارع واباوع على الناس الماره قليل اباوع ضحكاتهم  وركضهم لأن بدت تمطر صارت صورتهم مو واضحه من المطر الي يضرب على الزجاج ..ظليت اشرب بالنسكافيه وفكره تجيبني وفكره توديني ...
صـدگ نسيت اعرفكم عن نفسي
اني علي عمري 24 سنه اشتغل محامي متخرج من جامعه ميشيغان الأمريكيه ..اصلي شمري من بغداد من چان عمري 11 سنه ابويه رادو بالأنبار بالتحديد بقضاء الرطبه لأن چان دكتور شاطر وهناك ماكو كادر طبي كلش قليل فا ابويه وافق وانتقلنا هناك لأن عنده هواي معارف ..بأول فتره ما تقبلت الوضع ابد لأن ما متعود ع المنطقه وفجاءه تركت اصدقائي وچنت خامس ابتدائي بس بعدين تعرفت على ولد صديق  الوالد واقرب واحد الي هو اصيل صارت علاقتي بي اكثر من صداقه او اخوان ما تنوصف ...
عندي بس اخ واحد الي هو زيد عمره 17 سنه →→بعدين اعرفكم عليه
اهلي طلعو من العراق بالـ 2007 لبريطانيا ظليت سنتين هناك من خلصت الأعداديه طلعت لأمريكا لولايه ميشيغان-ان اربر حتى ادرس بجامعه ميشيغان لأن چان حلمي ادرس بهاي الجامعه وحققت حلمي من تخرجت صار سنتين انتقلت لانسنج-ميشيغان ..
ادري حجيت هواي بس لازم تتحملوني بهاي القصه→→اذا علاوي ما نتحمله لعد نتحمل منو
طبعاً گلت لأبويه مراح ارجع للعراق لأن ما ردت يحجي گدام اصيل انو اني راح ارجع ادري  يفلت ما يصبر فا راح اروح وراهم ...

ظليت گاعد تقريبا لساعه ونص وراها طلعت حتى ارجع للشقه ..وصلت للشقه جمدت برد نسيت ما فتحت تدفئه گبل لا اطلع ..فتحت تدفئه ورحت سبحت ..
طلعت من الحمام بدلت ملابسي ورحت سويت ريوگ ..بين ما دا اتريگ فتحت نت تفاجأت بمسجات عمر
—————
#Ghufran Alkubaisi