ما حسيت الا انسحبت بعيد عن اهلي شوي
التفتت وراي چان علي استغربت
لارا: علي شكو؟
علي: باوعي لارا عندي شي الج
استغربت كولش من نبره صوته وكلامه ..باوعت عليه بمعنى كمل
طلع من جيبه اسوارتين سود جلد على شكل ظفيره بس شكلها كولش حلو انطاني واحد والثاني لبسه بأيده
علي:هاي الأسوارتين اول شي اشتريتها من دخلت بريطانيا وچنت مقرر اجيبها الج بأول زياره للعراق ما عبالي هيج نطول بالرجعه بس ظليت محتفظ بيها لحتى انتي تلبسيه
لارا: شكراً شكلو حيل حلوو
علي: اگدر اطلب شي گبل لا اروح
لارا: اكيد
علي: ظلي لابسه الأسوار لا تشيلي من أيدج
لارا: ان شاء الله بس ارجع للبيت البسه
علي: براحتج وظلي طمنيني ع اخبارج من تفتحين موبايلج
لارا: ان شاء الله
خليت الأسواره بجيب الجاكيت ورجعنا بسرعه يمهم گبل لا اي احد يلاحظ انعزالنا عنهم ويفكرون بشي غلط
توجهو هم للطياره واحنا طلعنا لحتى نرجع
للشقه جلال سلم على بابا واصيل وراح واصيل رجع معنا ..ظليت طول الطريق ساكته لحد ما وصلت للعماره نزلت من السياره بسرعه وصعدت للشقه ركض ما اريد احجي ويا اي شخص
دخلت للشقه گبل فتت للغرفه غيرت ملابسي ونمت بدون لا احجي لو كلمه
-------ه
علـي..
بعد ما ودعت لارا وراحت اني گبل توجهت للطياره.. مقعدي چان يم الشباك ويمي چان مقعد زيد وطبعاً هو حالته مو احسن مني
غمضت عيوني ورجعت اتذكر البارحه
لما چنت واگف يم اصيل دا نسلم عليهم گبل لا نرجع للفندق اجا عمر سلم و وگف اجت ورا اخته و ولارا ..ولما اتذكر من عرفت وگامت تبجي احس كل دمعه توگع منها تحرگ گلبي اووف لو بأيدي ما اخلي دمعه توگع من عيونها لو بأيدي جان گلت يا بشر الا لارا ما ترهم لوجهه بس الضحك والله اضمها بگلبي ولا اخلي احد يأذيها بكلمه وحده ظليت اباوع لوجهه رغم البجي وجهه چان مثل الطفله احس برائه الكون كله بيها ظليت افكر بيها وصورتها ما تروح من بالي لحد ما نمت
•••••••••••••••••••ه
لارا..
حسيت على صوت سما تناديني من التعب ما اگدر افتح عيوني ظليت مغمضه واحجي
لارا: خييير
سما:تقول ماما قومي الساعه 3 ونص اذن العصر
طفرت من مكاني بسرعه
لارا: برربِك اذن العصر ؟
سما : والله شبيكِ
لارا: ياااااررربي شكثر جاي اسخت بالصلاه
رحت بسرعه للحمام غسلت وجهي وتوضيت ورجعت للغرفه بس جوان بيها اخذت الحجاب و صليت العصر والظهر
خلصت صلاه طلعت للصاله چانت هدوء بس ماما گاعده
رحت گعدت يمها
ماما: قبل لا تقعدين روحي تغدي
لارا:شنو تغديتم؟
ماما: سويت برياني
لارا: هسه اقوم اسوي چاي واطلع جبن
ماما :مو خليتلك من الغدى شتسوين بالجبن والجاي
لارا: مو مشتهيه اي شي بي دسم
ماما: براحتِك
لارا: انا اروح اسوي چاي
ماما: ماشي بس صبيلي معِك
لارا: اوك
رحت للمطبخ سويت چاي وطلعت الجبن.. لشوي خدر الچاي صبيت الي ولماما وطلعت للصاله انطيت الكاسه لماما وگعدت اني يمها ظليت اكل واني ساكته لحد ما خلصت اخذت الگلاص غسلته ورجعته لمكانه اخذتلي صفنه افكر بدراستي شگد ضيعت وكت وشگد سختت تذكرت التحدي مع جود طلعت بسرعه رحت الغرفه اخذت الرياضيات وظليت ادرس
"مـرت اسبوع العطله والأمتحانات بدون شي جديد مجرد تعب هلاك بالدراسه"
گعدت الساعه 4 ونص الفجر طلعت من الغرفه الشقه چانت ضلمه فتحت اضويه الصاله ورحت غسلت وفرچت اسناني وتوضيت وطلعت اخذت الحجات وصليت الفجر ..خلصت صلاه رحت گعّدت خواتي وليان ولينا لأن چانن نايمات يمنا ..گامن كلهن ظلت بس لينا
لارا: ليناااااااا كااافي عااد قومي لخاطر الله
لينا: يا بنت ادم منيلك هالنشاط بس فهميني ولِك ما صارلنا نص ساعه من نمنا شلون تسيطرين على حالِك
لارا: لا تضربيني عين دقومي عاد اليوم اخر امتحاان
لينا: خلللص قُمت والله قُمت
گامت لينا واني رجعت ابدل ..طبعاً اليوم اخر امتحان عدنا امتحان كيمياء
خلال فترة الامتحانات ما فتحت الموبايل ابببد ظليت بس ادرس و وسام اووف يابه بس ذكر اسمه ينطيني نبض جديد ..وسام شفته ٣ مرات خلال هاي الفتره وكل مره اشوفه من يججي وياي يخليني اتعلق اكثر بي طول هاي الفتره وهو ما راح دقيقه عن بالي
خلصت تبديل طلعت طفيت الطباخ وحظرت الريوك ورجعت ادرس اريد اطلع 100 انهلكت
اجوي كلهم تريگنا وكلها تراجع ما انتبهنا للساعه لحد ما صرخت ليان
ليان: ووووووولكم شوووفم الساعه 8 الا ربع
انخبصنا واني شمرت الكتاب ع القنفه وطلعنا كلنا بسرعه نزلنا جوا لگينا الباص موجود الحمدلله
صعدت اني ولينا اول شي علمود المقعد الأخير لگينا شمس ونبأ وسناء موجودات رحنا يمهم ومرينا اخذنا هدى وتوجهنا ع المدرسه وبدا الحجي عن الأمتحان كالعاده ولا سكتنا لحد ما وصلنا المدرسه نزلنا كلنا لگينا المجموعه كلهم واگفين برا يعني بعد مو مفتوحه القاعات
رحنا وگفنا يمهم وكلهم نسوا الأمتحان وگعدو يحجون شنو يسون من يرجعون بمناسبه العطله ظلينا واگفين لحد ما الحارس فتح باب المدرسه يعني القاعات انفتحت احنا اخر ناس صعدنا فوگ وچنا منقسمين لقاعتين فا كل وحده راحت لقاعتها
چنت متوتره كوولش وخايفه
والمدرسين يلعبون بأعصابنا
احترگت اعصابي يلا توزعت الأسئله ما قريتها بديت احل سؤال ورا سؤال لحتى اذا ما اعرف واحد ما اتوتر ويروح تركيزي
الساعه عشره خلصت و راجعت لحد ما عقلي توقف اخر شي سلمت الدفتر چانو البنات كلهم ع التسعه ونص طالعين يعني اني اخر شي ..طلعت لگيت البنات ينتظروني بالممر اول ما طلع كلها گبت بوجهي
شمس: وووولج شلوون جاوبتي
لورين: ليش طولتي
نبأ: ولج الاسئله مي ليش طولتي
لينا: لا تقولين مسخمتها
هدى: ووولك احكي
لارا: هو انتم انطيتوني مجال احكي الله ياخذكم
لينا: دكلي قندره واحكي شلون جاوبتي
لارا: الحمدلله حيل سهله بس ظليت اراجع
هدى: طاح حظك خوفتينا
لارا: هسه امشم امانه نروح ناكل والله ميته جوع
الكل: يييي امشي
لارا: مفجوعات
نزلنا اخذنا لفات ونزلنا طلعنا برا المدرسه ننتظر الباصات يخلصون البنات كلهم يالله نروح.. ظلينا ساعه ننتظر رغم تعبانين بس من الحماس والفرحه بالعطله ولا سكتنا
اجا الباص ودعنا البنات وشبكت ساره گامت تبجي
لارا: وولِك ليش تبكين
ساره: والله راح اشتاقلجن
لارا: ووول بلا بكي هسه انتي حا تجين يم سناء ونظل مع بعض خلللص لخاطري
ساره: ماشي
مَسحت دموعها و ودعتهم ..رحت للباص چان المقعد الأخير محجوز فا گعدت يم سناء ومقعد شمس ولينا گادمنا ونبأ يم هدى
بعد ما نزلو كل البنات اجه دورنا ونزلنا اول وحده اني صعدت ع الدرج والبقيه بالمصعد طلعت الطابق الأول لگيت وسام واگف رغم چنت ميته تعب بس ابتسمت بتعب
•°•°•°•°•°•°•°•°•°•°•
لا تنسون ڤويت & كومنت
#Ghufran Al-kubaisi
YOU ARE READING
المجنونة وقعت في الحب
ChickLitفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
