المجنونة وقعت في الحب

Part 11

شفت المسج هذا تخبل رسمياً..
وسام:هلوو
لارا فدوه گولي لسناء ترد على موبايلها
..رديت عليه: اهلين ..العفو وسام بس بصفتي شنو اگولها وسام يريد تردين على فونج؟
وسام: بصفتج صديقة
لارا: من شوكت هالحجي اشو اني مدري اني صديقتك
وسام: هو انتي غير قبلتي اعتذاري يعني صرنا اصدقاء لا تناقشيني
لارا: يااااا اصير صديقتك واني مدري
وسام: وين تلگيها تصيرين صديقه الدكتور وسام
لارا: ديلا عاد كاتله روحي على الدكتور وسام
وسام: گبر فشلتيني
...وهسه بربج گولي لسناء بأي حجة
لارا: اوك راح اسألها عن فونها واخليها تشوفه
وسام: اوك مشكوره تعبتج
لارا: لا عادي ولو
وسام: شبيج جامليني وگولي تعبك راحه
لارا: حتى الولو راح اسحبها
وسام: شگد بخيله
لارا: مثلك غير
شفت نفسي حجيت ويا هواي حاولت انسحب بسرعه وما احسسه بشي
لارا: يلا هسه باي البنات هلكوني
وسام: اخذي راحتج ولا تنسين تگولين لسناء وسلمي ع البنات
لارا: هههه يوصل
من گبر اي والله يستخف دمه ما ينطاق سديت الفون باوعت لسناء وگلت: سنوو
سناء: ها حب
لارا: موبايلِك وين
سناء: ليش؟
توترت شحجي، گلت : انتي مو حكيتي تشوفينا صورِك الي بـبغداد
سناء: هااا ثواني اجيبه لأن مخليته ع الشحن
..اخذت نفس الحمدلله مدري شلون اجت السالفه ببالي بس طبعاً ما مشت على لينا تدري بيه من اتوتر اظل احك فوگ حواجبي...گامت سناء جابت موبايلها فتحت
شهگت بفزع :يوووومه وسام متصل ٣ مرات والفون سايلنت هسه يموتني
باوعت عليه لينا ورفعت حاجبها ابتسمت ونزلت راسي ع الفون رغم ما جنت اسوي بي شي بس اتهرب من لينا ...اتصلت سناء على وسام وراحت بجهه لينا قربت يمي شافت هدى وساره مندمجين بالحجي گالت: لارا ليش كذبتي؟
لارا: ليونتي بعدين احكيلك من يروحون البنات
لينا: اوك ماشي
رجعت سناء يمنا گالت :ساره وسام يگول يلا لا تطولون ارجعو بسرعه الساعه 9 ونص
ساره : اوك يلا
لارا &لينا: بعد وقت ..گرصتها بسرعه
لينا: ااااااااخ وجع ان شاء الله من گبر لهالعاده يا متوحشه
لارا: رد جميل جانم
لينا: جميل لو هنا
لارا: هه بايخه...وانتي وياها انكبم واقعدم
سناء: والله وسام متحلف بيه لأن تأخرت

اجت ببالي احجي ويا علمود يخليهم لأن چانت ضوجه كولش وماكو غير هالحل
لارا: اقعدي شوي ما يضر
هدى: بنات انا استأذن
لارا ولينا: انكبي واقعدي انتي ..كرصتني لينا صرخت
لينا: وجع اي والله
لارا:توجعك يا نذله يا سعلوه
لينا: بوجهك
ساره: اي انتو هيج طيرو الوكت عركات
لارا: انتي انكبي واقعدي يلا
گعدو وظلو يحجون ويا لينا واني رحت احجي ويا وسام يخليهم لأن ماكو غير حل يا اما يترزلون واني السبب ..ارسلتله مسج
لارا: هلوو وسام
توقعت ما يرد بسرعه بس چنه چان ينتظر المسج بلمح البصر جاوب
وسام: هلووات عيني
گلت بنفسي عمت عينك..سكتت ما عرفت شلون اطلب منه يخليهم لعنت غبائي للمره الألف على تهوري
وسام: شنو راح تظلين ساكته؟
لارا: لا مو هيج بس
وسام: بس شنو؟
لارا: وسام ممكن طلب؟
وسام: تفضلي اذا اگدر عليه
لارا: خلي ساره وسناء يمنا
وسام: يعني سناء گالتلج؟
لارا: ما گالت شي بس گالت وسام يريدنا نرجع
وسام: اي خلي يرجعون صارلهم ساعه مدري ساعه ونص
لارا: يعني بنظرك سوالف البنات تخلص بهالسهوله؟ هسه خليهم يمنا بليززز
وسام: امرري لله خليهم
لارا: ارسل مسج لسناء وگولها
وسام : وليش مو انتي تگوليلها
لارا: ذليتني بهالطلب لو ادري مو طالبه منك
وسام: خلص يمعوده اني اگولها انتي منو يگدر على لسانج
لارا: اوك مشكور وبايووشين
وسام: خلصت مصلحه يالله تطفر
لارا: اكيد
وسام:اخذي راحتج.. الله وياج
سديته منه ورا دقيقه وصل مسج لسناء باوعت على موبايلها وعلينا بصدمه
سناء: يومه اني مصخنه لو شنو
البنات عدا لارا :شكو
سناء: لج وسام يگول نص ساعه وتعاي
ساره: اماانه يومه وسام يغير رأيه شصاير بالدنيا
هدى: يلا يمعوده هسه المهم قبل تظلون
لينا: اي صح
لارا: اي المهم وين كنا نحكي؟
سناء: من الصدمه نسيت عن شنو چنت احجي
..نزلت للگاع گعدت وحطيت چيس الچبس بحظني :اقول شنو راح تشترون ملابس؟
ساره: اني راح اشتري فستان گصير بس معرف شكله لحد هسه ما فكرت
لينا: انا ما اعرف ما عندي فكره ببالي
سناء: اممم شنو رائيكم نشتري نفس اللبس؟
هدى: انا ملابسي الي اشتريتهم كلهم جدد ما لبستهم ما اعتقد راح اشتري
نزلت سناء گعدت يمي وسحبت چيس الچبس مني :شگلتي لولي ع فكرتي
لارا: اقول انكبي وما نفق عليكِ غير كيس الجبس مالي وجع
سناء: ما اعرف عجبني مالچ
ساره چان بأيدها چيس رحت يمها لشوي سحبته بسرعه ورجعت يم سناء
ساره: وووجع يا حقيره يا نذله
لارا: يطبك مرض
مر الوكت بسرعه واحنا نحجي صارت الساعه عشره وربع رادو طلعو گلنا لماما ولخاله سهاد ونزلنا كلنا نوصل هدى طبعاً ع اساس نوصلها لأن هي بالفندق الي ورا الفندق مالنا بالضبط بس طلعنا كا نوع من الدياحه
وصلنا هدى ورجعنا سناء وساره طلعو بالمصعد سلمنا عليهم واحنا طلعنا ع الدرج ..وصلنا للطابق الي ساكنين بي احنا چان وسام وحسين وعمر واصيل واگفين يم شقه عمو حسام باوعت اجت عيني بعين وسام ابتسم اني رديت الابتسامه ردت التفت على لينا بس شفت نظرات حسين تجاهه لينا نزلت راسي دخلت للشقه بسرعه لگينا بس خاله سهاد گاعده ..
لينا: ماما كان ليان وين؟
خاله سهاد: ظلت هي وسما گاعدين
لينا: الحمدلله نخلص منهم ونظل وحدنا
خاله سهاد: بلا حكي زايد ورحو غيرو هدومكم
لارا: انا اروح اجيب هدومي من الشقه وارجع
لينا: انكبي تعالي نلبس من هدومي
لارا: اوك اصلا مابيه اجيب بس اريد شي طويل
لينا: اوك امشي
رحنا للغرفه طبعاً شقتهم هم غرفتين وحده للبنات وخاله سهاد وياهم والثانيه للولد ..غيرت ملابسي لبست تراك زيتوني وبي ورد ابيض عريض شوي والكم مالته طويل ولبست شال لأن ولد عمي يظلون گاعدين طلعنا لصاله چانو عمر واصيل موجودين وخاله سهاد دا يشوفون فيلم ( the book thief)الفيلم چان حلو گعدنا وياهم نشوفه وطبعاً لينا تريد تعرف شصار وياي بس كلهم گاعدين مگدر احجي للساعه 12 وربع انتهى الفيلم خاله سهاد راحت تنام واصيل وعمر گامو يلعبون بلي ستيشن
لينا: لارا قومي نسوي اكل
لارا: اوك وانا هم جعت
عمر: جيبيولي معكم جوعان
اصيل : انا هم
لينا: اوك
رحنا للمطبخ اني اسوي چاي وهي تسوي بيض وتحط الجبن ..طبعاً هاي عاده بعائلتنا الأكل بالليل
لينا: لارو وجع يالله احكيلي شصار معِك
لارا: اسمعي يولي
لينا: اي اسمع
حجيتلها الي صار كله من حچه وياي الظهر لحد ما طلبت منه يظلون عدنا سناء وساره
لارا: وهذا كل الي صار
لينا: لارا اذا ارسل مره ثانيه ولو متأكده راح يرسل انتي جاوبي بأختصار
لارا: يولي اليوم والله حاولت اجاوبو بأختصار بس مو معقول اسد سالفه يفتحلي سالفه
لينا: المهم حاولي
لارا: ان شاء الله
طلعنا من المطبخ واخذنا الأكل لصاله چان عزام جاي
عزام: يا هلا ومرحبا لارا اهنا
لارا: هلا بيك استاذ عزام
عزام: اسم الله منين نازل هلأحترام هذا
لارا: ليش هالقد فاقد الامل مني
عزام : يالله بلكي اكو تغير شوي
لارا: ان شاء الله تطور نحو الأفضل
عزام: ان شاء الله ...اقول جيبولي گلاص اريد اكل وياكم ..راحت لينا تجيب گلاص لعزام
اني چنت منزله راسي اگلب بالفون انتظر اجه اصيل گعد قريب مني
اصيل: احم اقول لارا
رفعت راسي :تفضل ..چنت تقريباً عارفه شنو يريد يسأل
اصيل: زاد فضلك ..لارا منو هاي البنيه الي كانت اهنا اليوم
لارا(عرفت منو يقصد بس حبيت استغبي):أي بنيه منهم؟
اصيل: لارا راح تنرگعين بطاوه البيض عارفه قصدي لا تستغبين
لارا: اصيلووو ترى ما احكي
اصيل: اصيلو شنو يا ثوله انكبي واحكي وألا والله تحلمين انطيكي اي معلومه بعد
لارا: اوك ماشي راح احكي اصولي
اصيل: لاااا حووول ولا قووه يا بشريه احكي عاد جلطتيني
لارا: هاي سناء بنت عمو وليد معنا بالصف مستواها الدراسي كولش زين وشاطره طولها 156 وزنها 43 انسانه مرحه كولش و..
اصيل: وجع قولتلك منو هاي مو انطيني السيره الذاتيه مالتها
لارا: غير احكيلك تفاصيل حياه زوجتك المستقبليه
ما حسيت الا علبه الكلينكس صارت براسي
اصيل : انكبي يا طايحه الحظ
لارا: اااخ وجع شنو حكيت مو صوجك اصلا صوجي والله مال هسه احط السالفه بحلق لينا حتى تشوف شغلها معك
اصيل: ادري ما تسويها بيه
لارا: لا حيل واثق ..لييناااااااااا تعالي شوفي اصي..
سد حلگي بسرعه : لا بربك الا لينا لا تحطيني بحلقها شيخلصني وداعتِك اطلعلك المعلومات عن جامعه اكسفورد واحكيلك ويا مجد يصورلك الجامعه
لارا: امم اوك قبلت ها صح على طاري مجد زيد شلونو؟
اصيل: ليش مو جاي تحكين معو؟
لارا: لاا صار شهر تقريباً ما حكيت معو من كنت يمكم اخر شي حكيت معو
عمر : لارررراااااا
لارا: اذني يا ابن ادم اريدها
عمر: ترى والله ما احكي
لارا: قبل لا تحكي اختك وين تولي كل شي خلوها تقعد عاد اريد اكل يا بشر
لينا: فديييت والله تفهميني خلوني اقعد شوي عاد كافي تتشرطون
عزام: الي يريد شي يقوم هو يسوي لنفسو وهسه اذا ما تريدون يطبك مرض انا اريد اكل راح اموت جوع
رحنا كلنا گعدنا لحتى ناكل
لارا: عمر توني شنو ردت تحكي؟
عمر: بطلت خليكِ بفضولك
لارا: امانه احكي
عمر: راح تعرفين بالوقت المناسب هسه ماكو داعي
لارا:
عزام: عمر كملت نقلك على جامعه الي بكركوك ؟
عمر: اي وباكر راح ابدا اروح وارجع ويا وسام
لينا: تروح كل يوم لكركوك وترجع
عمر: اي لان ما نطول ساعه او ساعه ونص بالطريق
لينا: ما قُلت شي ع اساس ساعه او ساعه ونص قليله يعني
عمر: مو احسن ما اظل بسكن هناك ويالله تشوفوني بالأسبوع مره
اصيل: كافي حكي جاي تاكلون
ظلينا ساكتين لحد ما خلصنا اكل اخذنا المواعين انا ولينا غسلناهن ورجعنا لصاله مچان اكو احد عمر فات ينام لأن لازم يگعد من وكت

واصيل هم فات ينام لأن عنده اوراق طلاب يصححها وعزام ويا خطيبته
ظلينا بس احنا گاعدين بالصاله چان طالع فيلم رعب ظلينا نشوفه للـ2 خلص الفيلم گمنا لحتى ننام ..الصبح گعدت بالتسعه وربع اول مره بالعطله اگعد هيج وكت شفت لينا بعدها نايمه اخذت الفون فتحت نت وصلني مسج ع الانستا من وسام الساعه چان راسله بالسته الصبح
وسام: صبااح الخير
..گومي وكافي كسل شعندج نايمه لحد هسه اكيد ظليتي سهرانه
صفنت شبي هذا صدوگ چذب
طبعاً قريت المسجات من اللائحه الفوگ ما فتحت المحادثه..سديت الانستا ورحت فتحت كلاش جان جود موجود
لارا: صبااااااااااااااااح الخيييييير
جود: صباااااااح الانوووووووار
جود: شبيج مفجوعه من الصبح
لارا:جوعانه
جود:ما تروحين تاكلين
لارا: مابيه اگوم اسوي لنفسي انتظر بنت عمي تگعد حتى نسوي اني وياها
جود: ليش انتي مو بالبيت؟
لارا: لا يم بيت عمي
جود: عادي گعدي بنت عمج بصوتج المزعج الي تصرخين بي بالكلان
لارا: انهمد الا صوتي لا تحجي عليه لأن عندي معجبين هواي
جود: يااااا والله ما عرفتج يا اليسا
لارا: انطم غير لو اريد چان صرت احسن من اليسا
جود: انجبي ترى زاد الوضع عن حده
لارا: انطم هذا الصدوگ...ظلت احجي ويا جود لنص ساعه وراها وصلني مسج من ناديه :لولي شوفي التاگ الي سويته الج ع الانستا
رديت عليها: ثواني هسه اشوفه
استاذنت من جود وطلعت من اللعبه فتحت الانستا تذكرت مسجات وسام اهووو عيب هسه لازم ارد عليه يالله ارد ع التاگ مال ناديه شنو هاي ..رحت رديت عليه :صباح الأنوار...ما سهرت هواي ونايمه راحه مال العطله شكو بيها
رديت ع التاگ مال ناديه ردت اطلع رد وسام شفت كلامه مدري شنو احجي
#Ghufran Alkubaisi