استغربت من فتحت المسجات جان مكتوب ...
ساره: هلو لولو
:شلونج اخبارج
:لارا فدوه جاوبي بسرعه والله محتاجه احجي وياج
رديت عليها :هلوات حياتي ..تمام وانتي ؟
شكو ولج خوفتيني خوما صاير وياج شي
ساره: دومج غلا..اني تمام الحمدلله
لارا: دومج
ساره: لارا امانه اريد احجيلج شغله بس امانه ما تطلع ولو مو واثقه منج ما اجي احجي الج بالذات
لارا: لج احجي والله وگعتي گلبي وعد مني ما يطلع شي
ساره: باوعي لارا اني تعرفت على ولد كا صديق بالفيس وظل 3 اشهر كا صديق بس بعدين گام يتغير بتصرفاته اشوف اهتمامه وطريقه كلامه وغيرته على لبسي واجه مره من بغداد للسليمانيه علمودي
لارا: اي ؟
ساره: اليوم اعترفلي هو يحبني ويريد يجي يخطبني
لارا: وانتي صدگتي؟
ساره: ليش ما اصدگه كلامه واضح انو يحبني ونبرة الحب بصوته مبينه
لارا: ساره باجر اشوفج بالمدرسه واحجي وياج لأن هسه لا انتي تفهميني ولا اني افهمج
ساره: لارا ترى ورب الكون بس انتي تعرفين حتى سناء من الطفوله وياها بس ما عندي جرائه احجيلها
لارا: عيب عليج هالحجي وغلاتج ما احجي لأحد بس باجر افتهم منج
ساره: اوك ماشي
لارا: ساره الولد لا تحجين ويا اي شي هسه
ساره: يمكن اني خبصت بالسالفه لعد
لارا:شصخمتي
ساره: باجر افهمج
لارا: اوك حب استأذن هسه
ساره: اذنج معج
سديت الواتس باوعت للساعه جانت 11 ونص ياابه لعد اني شگد ظليت گاعده ع اليوتيوب گمت فرچت اسناني ورحت لحتى انام لحتى اگعد من وكت
للساعه اربعه وربع الفجر گعدت على صوت المنبهه الشقه چانت دافيه گمت من مكاني بالگوه لحتى اصلي الفجر رحت غسلت وجهي وتوضيت ورحت لحتى اصلي..صليت السنه القبليه وراها الفجر خلصت صلاه ورحت جبت القرآءن ظليت اقرأ ومو حاسه بالوكت سديت القرآءن احس بطمأنينه كولش جبيره ظليت گاعده بمكاني واستغفر (طبعاً عن دراسه علميه الي يصلي الفجر و يظل گاعد يستغفر للشروق مستحيل تصيبه كأبه بيومه وهاي الدراسه علماء يهود وغيرهم اثبتو هذا الشي)
ما حسيت بالوكت الا لما خيوط ضوء خفيفه تدخل بزوايه مختلفه بالصاله گمت ورجعت سجاده الصلاه والقرآءن لمكانها ورحت يم الشباك فتحته چانت الشمس توها دا تشرق السما جانت ما بين اللون الأزگ والبرتقالي والجو بااارد كوولش ابتسمت شگد الحياه حلوه لما تكون تحت امر الله تحس انك خاضع لقوانين كونيه وبنفس الوكت انت حر مو خايف من شي بهالدنيا تحس انو الله معك بكل خطوه واذا وگعت بعدها تبتسمتلك الحياه لحتى الله يرضيك ويرضي گلبك مهما چان بائس شگد حلو انك تبدأ يومك برضى على نفسك وتصرفاتك وتكون راضي تمام الرضى باللي يصير معك وما تنكسر وتعرف انو الله مراح يتركك ابد
ظليت واگفه ومبتسمه صارت الذكريات تجي ببالي وكلها جانت تخليني اكون اتمسك بقوتي اكثر وما اوگع واغلط واذا غلطت احاول اتعلم من غلطي مهما چان
تذكرت ولد عرفته صدفه من العالمي بلعبه كلاش چان من الرطبه خلال شهر عرفت قصه حياته وشگد جان يأس من حياته ويكره يسوي كلشي رغم صغر سنه زادت ابتسامتي لما عرفت شلون اخلي يتغير واعرف انو قصته حقيقه لأن الرطبه ماكو شي يصير الا ينتشر خلال دقايق ..
التفت باوعت للساعه چانت 6 ونص سديت الشباك ورحت للمطبخ خليت الچاي ع الطباخ رحت للغرفه گعدت جوان ورحت لحتى ابدل الساعه 7 الا خمسه خلصت تبديل رحت للمطبخ جوان جانت مطفيه النار حظرت الصينيه واخذتها للصاله انتظرت جوان تجي لحتى نتريگ.. اخذت الفون فتحت النت بين ما تجي جوان اول ما فتحت هم شفت مسجات من وسام سديت الأنستا بدون لا اجاوب او افتحها لشوي اجت جوان دا نتريگ اندگ الباب رحت فتحته جانت لينا دخلنا واني رحت اكمل اكل ولينا ظلت تراجع الأمتحان تحسها راح تفقد الذاكره من گد ما راجعت ومتوتره ..الساعه سبعه وعشره نزلنا جوه ننتظر الباص لشوي اجت سناء
سناء: صباح الخير
الكل:صباح الأنوار
شوي اجت هدى :صباحووو
الكل:صباح الأنوار
هدى: بنات شلونكم ويا الكيمياء
لينا: انا شرحها الي عزام وهم بعدني احس نفسي مو دارستها
سناء: لج اني طلعت مدرس ع اليوتيوت يشرح وشرحه كولش حلو وعادي هسه مو خايفه
هدى: ولكم راح تطگ روحي ياربي اريد امتحن واخلص كأني جاي امتحن وزاري
لارا: والله لحالكم مضخمين الأمور وترى اسئله استاذ سامر بايخه يعني ما تسوه هالتوتر
لينا: لو تنطمين يا بنت
لارا: اوك انطميت وادعي من الله استاذ سامر ما يسوي حركه نذاله ويطشرنا
لينا: اذا يفرقنا انتحر الا فراقكم شلون اقدِر عليه وخصوصاً بالأمتحان
هدى : اوافق لينا بالرأي
سناء: واني اضم رأي الهم
بعد دقايق اجه الباص صعدنا طبعاً ردنا المرتبه الاخيره بس اليوم بنات 2 گاعدين سناء وهدى گعدو بالمراتب البدايه وجوان يم صديقتها واني ولينا رحنا للمرتبه الأخيره طبعاً البنات الي كعدنا معهم معنا بالصف بس كوووولش هادئات
لينا&لارا: صباح الخير
البنات: صباح الأنوار
لينا: نقلتو جديد لهذا الباص؟
..:اي لأن انتقلنا جديد قريب من هاي المنطقه
لينا:حياكم الله
لارا: قاعده بديوان لو بباص
لينا: وجع غير ارحب بيهم
لارا:رحبي حب رحبي ..صحي شنو اسمائكم
..:اني اسمي نبأ
..:واني شمس
لارا&لينا: عاشت الأسامي
نبأ&شمس: تعيش ايامكم
لارا: وانا لارا
لينا:وانا لينا
نبأ&شمس:عاشت الأسامي
:تعيش ايامكم
لينا:من وين؟
شمس: من الموصل وانتو؟
لينا:حياكم الله على راسي احنا من الأنبار
شمس:الله يحيج ويسلم راسج ...تشرفنا
لينا:والنا الشرف
ظلينا نحجي بالدراسه ومواضيع عامه لحد ما وصلنا المدرسه
صعدنا للصف واليوم معرف شصاير بالدنيا فتت بهدوء بحيث البنات صفنن بيه خاف صاير بيه شي مو عادتي ادخل مثل بقيه الناس بأحترام
رجاء: لارا بيج شي؟
ناديه :مريضه؟
لارا: لا تخافين انا ما يصير بيه شي بس حبيت اجرب شعوركم من تدخلون بهدوء
رجاء: يصير اخذ مكانج اني؟
لارا: انطمي هسه اطلع وارجع اطب بهوستي ما تاخذين مكاني
ناديه: اي روحي علمود اتأكد ما بيج شي
لارا: لا هسه مابيه خلوني ارتاح
رحت گعدت بمكاني ظلينا نحجي شوي ويا البنات دخلت ست زينب مدرسه الجغرافيه درسها بالگوه يمشي الوكت بي على اي شي ترزل چانت تباوع للأحذيه مالتنا باوعت على لينا ورفعت حاجبها ولينا وجهه انخطف لونه لأن جانت لابسه حذاء رياضي لونه وردي فسفوري كوولش
ست زينب :اييي عيني ست لينا شنو هالفسفوري هذا
لينا (بالگوه تطلع الحجي):ست ما بي شي
ست زينب:بالله گوليلي چم ولد طار وراج على هاللون
كتمت ضحكتي على شكل لينا ونزلت راسي
لينا:ان شاء الله بعد ما البسه
ست زينب :البسي مره ثانيه غير ارجعج حافيه للبيت
سكتت لينا ما ردت شي لأن اذا تحجي كلمه تبجي
خلص الدرس وطلعت ست زينب
لينا: اقسم بالله حرام عليها حاطه نفسها حتى ويا الحذاء ما لقت شي ثاني غيرو الله ياخذها
لارا:لينا كم ولد طار وراكِ
لينا: ياا نذله انكبي والله انتي نفسها اشوفها ليش تحبِك
رحت حظنتها :هي تحبني بس انا ما احبها لأن رزلتِك بعد
لينا: امشي ولي عن وجهي شنو شفتيني زعطوطه قدامك
لارا:مو صوجِك صوج الي ترضيكِ
رجاء: ولويش زعلانه ما شفت شسوت بيه علمود حواجبي وعادي تعودنا ع الرزايل
ناديه:والله انتي تستاهلين منتفه حواجبج على گولتها طالعه شيطان
رجاء:انجبي وجع..لا ومن تگول شكو مطلعه عطوبج وهاللبس تتخيلين نفسج لميس لو الله يريد يگلبچ فرنسيه
لارا: ما حكيتيلها عندي اصول ترجع لأمستردام
رجاء:غير تشمرني من الطابق السابع
ساره:لج والله من غبتي الأثنين الي راح چان تگول الصف محلو من دون رجاء ليش ما ممداومه
رجاء: برربج
ساره: والله واسألي البنات
رجاء:لا مدا اصدگ ست زيزو تحبني
لارا:دقومي نعال عليكِ وعلى زيزو
رجاء:انجبي
لارا: ساره
ساره: هاا
لارا:تعالي مع شوي
ساره: اوك امشي
لينا:لارا جيبيلي معك بيبسي
لارا:قومي جيبي لنفسك وجيبيلي معك لبين ما اجي
لينا: انقلعي لو بيه قُمت جبت لنفسي
لارا:انطمي باي
طلعنا برا سحبت لينا وطلعنا ع الطابق الأخير گعدنا بصف محد يدرس بي گعدت اني وگعدت هي گدامي ظلت ساكته
لارا:مراح تحكيلي شنو صاير معِك؟
ساره: باوعي اني صارلي 5 شهور احچي وياه بالبدايه چانت علاقتي بي علاقه صداقه او اخوه هيج شي ورا شهرين من علاقتي بي كمت اشوف اهتمامه بيه وبدراستي وبلبسي وغيرته اذا احجي عن أي ولد وشلون ينصحني حتى اشوف مستقبلي واني صارتلي رغبه اكثر بالدراسه بسببه يعني مستواي مچان هيج وشلون يفهمني اذا ضايجه او فرحانه او اي حاله چنت بيها ويحاول يخفف عني صرت متعلقه بي لدرجه ما تنوصف بحيث اراقب الموبايل اي مسج الي يجيني اطفر اتخيله هو والساعات الي احجي بيها ويا تكون احلى ساعات عمري وحتى لو چانت محادثتنا عاديه الأبتسامه ما تفارگ وجهي احياناً گبل لا انام ارجع اشوف المحادثه مالته وارجع اعيدها الف مره ومن گالي البارحه احبچ ..سكتت
لارا: شنو حكيتيلو؟
ساره: اعترفتله بمشاعري هم
سكتت ما اعرف شنو احجي احس ساره واصله مرحله مو بس تعشقه لدرجه متيمه بي
ساره: لويش سكتي؟
لارا:ما اعرف شنو احكيلك والله انتي واصله مرحله ماكو مجال حتى انصحِك
ساره: فدوه احجي لا تسكتين
لارا: ساره احذري ما اعرف نيه الولد معِك واعرف انتي هسه گلبِك الي يحكم مو عقلِك بس ساره انتي شايفه شكثرهم الي انخدعو
ساره: لارا يمكن اني الله يجمعني بي
لارا: شفتي يمكن مو اكيد مو اي شي بالحياه تجازفين بي وهذا گلبِك مو لأي شخص تسلمي
ساره: بس هو گالي اخلص الثالث ويجي يخطبني
لارا:ساره وثقه اهلِك؟ودينِك؟ليش ما فكرتي بالبدايه قبل لا تخطين هيك خطوه
ساره: لارا كلشي صار صدفه ما چنت اعرف راح اوگع هيج بس ما اگدر ابتعد عنه احس روحي معلگه بي
لارا:مراح احكي شي زياده بس ادعي الله ما يخذلِك وانتي لا تزوديها بالحكي ويا خلي كلشي بالحلال احلى
ساره: احاول ما احجي ويا
ردت احجي قاطعنا دخول استاذ سامر...
#Ghufran Alkubaisi
CZYTASZ
المجنونة وقعت في الحب
Literatura Kobiecaفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
