فتحت عيوني على وسعهن چانت هديته موبايل ايفون 5 وچنت متمنيه يصير عندي من فرحتي ما حسيت على روحي واني حاظنته حييل
علي : ولج خنكتيني اعرف عجبتج
بعدت عنه واني ابتسامتي ما تروح عن وجهي
لارا: وربي حيييل عجبتني مشكوور
علي: ولوو على شنو تشكريني هي هديه ميلادج ومن چنت هناك اشتريتها الج
لارا: اتركك من هديتي لهجتك احلى من اللهجه الكبيسيه مو راهمه عليك ظلك احكي هيك
علي: هههههه حاضر راح اظل احجي هيج
ابتسمت وباوعت وراي چانو نفس اله سه مال الجيه كلهم مشغولين بس وسام عيونه علينا وجانت تجدح نار من الغيره الواضحه ابتسمت بوجهه ودرت وجهي لعلي
لارا: ايمتى نروح عاد؟
علي: خلي يرتبون السيارات وبعدها نروح
لارا: اوف شكلهم راح يطولون حيل
علي: انتظري شوي
سكتت وبعدها اجه زيد وگف يمنا
زيد: ليش واگفين اهنا؟
علي: ننتظر شوكت تفرج ويگولولنا ع السيارات عاد
سكتنا احنا الـ٣ باوعت لعلي چان هم صافن اخذت جوله على ملامحه ...طوله 186 جسمه رياضي كولش ملامحه ملامح رجوله طاغيه رجل شرقي بكل صفاته جان اسمر مايل للحنطي عيونه كبار لونهن بني غامق رموشه كثيفه خشمه سبحان من رسمه لحيته خفيفه جان لابس بنطرون رصاصي على ثلجي وقميص ابيض وفوگها بلوزه صوف بلون البنطرون ومخلي بأيده جاكيت ثلجي فرو وحذاء رياضي ابيض وساعه جلد لونها ثلجي ترتيبه كولش حلو چنت احس بي مواصفات الرجل المثالي ..قاطعني تأملي صوت علي
علي: وين وصلتي مضيعه شي بوجهي اجي ادوره وياج ترى اعرف اني حلو
گبر فشلني
لارا: اووووي شلون واثق من روحك اصلاً كنت افكر البنات من يشوفوك هم يروحون من غير جهه" الحمدلله الله ما خلى الناس تسمع الي بداخلنا چان كل شوي جايني نعال طياري"
علي: لا يظلون يباوعون عليه
لارا: نننننن
علي: زعطوطه ما تكبرين
زيد: علاوي اترك اختي بحالها
علي: ع اساس اني ابن البطه السوده اذا هي اختك لعد اني شنو
لارا: زيد اخويه بس الي مو الك
علي: ديلا كاتل روحي عليج وعلى اخوج ...هسه امشو نگولهم احنا نروح گدامهم شنو نظل واگفين هيج
لارا: اي وربي تعبت
علي: راح اگولهم ونروح بسياره اصيل
لارا & زيد: اوك
راح علي واني التفتت على زيد
لارا: يلا احكي
زيد: شنو احجي؟
لارا: زيد مو عليه هالسوالف ليش انقلب حالك فجاءه
زيد :احجيلج بالبيت
لارا( بأبتسامه): رااح تروح معنا ؟؟
زيد: لا انتي تروحين معنا
لارا: ومنو قال بابا راح يقبل
زيد: بابا حجى ويا وقبل
لارا: احللللف
زيد: والله
لارا: يييييس والله ونسه
قاطعنا كلام اصيل
اصيل: يلا تروحون لو اروح واعوفكم
زيد: جايين
رحنا يمهم سلمنا وگبل لا نطلع باوعت لوسام نفس النظره جانت بعيونه رجعت ابتسمت وابتسامتي الا شوي تصير ضحكه ..صعدت بالسياره چنا بس اني وزيد ورا التفتت شفت نظرات زيد اختفت ابتسامتي نظراته جانت نظرات اتهام او شي ثاني ما عرفت افسرها ...مشت السياره واني منزله راسي ع الفون اتهرب من نظرات زيد وترني كولش ما انكر انو صار كل شي بوسام يعجبني اهتمامه وكلام وغيرته وكل شي بس هسه الخوف سيطر عليه احس زيد فاهمني من نظراتي ...
وصلنا للفندق واصيل وصلنا وراح حاول علي ويا بس ما قبل يظل فا راح علي ويا..الشقه چانت بالطابق الأول فتنا جوه جانو عمو خليل وخاله هاله موجودين
زيد: شوكت لحگتو توصلون
عمو خليل: انتو تظلون تفترون واحنا طلعنا گبل ع الشقه
زيد: اهاا
ظلينا گاعدين نحجي ويا عمو خليل وخاله هاله شكد اموت بسوالفهم.. للساعه 2 استأذنو حتى ينامون وراحو ظلينا بس اني وزيد گاعدين
لارا: اعرف راح تستلمني بس خلي اروح اغسل وهاا مستحيل اظل بهدومي هاي راح اخذ من هدومك
زيد: وجع اكلتيني روحي
راح زيد جابلي من ملابسه اني حتى ما شفت شنو هو سحبته منه ورحت للحمام غسلت وجهي وغيرت لبسي جان تراك نص ردان جان بجامه سوده والتيشيرت جان ابيض وعليه علم ريال مدريد چان البس عرريض وطويل عليه لفيت شعري كعكه وشوي جان نازل على وجهي مابيه ارتبه اخذت الملابس مالتي واول ما طلعت زيد خرب ضحك
لارا: وووجع شكووو
زيد: لج باعي جنج عصفور مبلل
لارا: وجع اذا انت كأنك فيل انا ايش دخلني
زيد:ترى والله هذا كولش صغير عليه
لارا: انكب عاد
زيد: انسي هسه تعالي اول شي نطلع حلويات واريد احجي وياج بشغله
لارا: اووكييشن
زيد: لأن بيها حلويات
لارا: اكيد خوما مشتااقه عليك
زيد: امشي امشي
رحنا جبنا الحلويات الي جايبها زيد ورجعنا كعدنا بالصاله
زيد : يلا احجيلي بالتفصيل
لارا: شنو احكي؟
زيد: لارا اعرف فاهمه قصدي فا احجي
لارا(بأستغراب):لا والله مو فاهمه عن شنو تحكي
زيد: وسام
اعرف انو زيد يفسر الأنسان من النظرات لهيح خفت كولش
لارا(بخوف): شبي؟
زيد: لارا تعرفين فاهم كل شي فا احجي من شوكت صارت بينا اسرار
لارا:راح احكي بس ..
زيد(بمقاطعه): لارا اعرف بشنو تفكرين احجي بلا خوف
اخذت نفس وكتله اخر موقف ويا وسام وموقف المستشفى والباقي غلست عنها
زيد: وانتي لهيج حبيتي؟
لارا: منو قالك حبيتو؟
زيد: انجبي لج غير شفتج شلون تباوعين عليه طايحه الحظ
لارا: حكيتلي راح تتفهم
زيد: متفهم و وسام اعرفه و واثق منه ما يخذلج واعرف انتي بعدج بالبدايه زعطوطتي لا تتعلقين زياده لأن وراج حلم هم
لارا: ما وصلت لدرجه الغباء هاي لحتى انسى انو اريد اصير نفس عمو خليل
زيد: صدوگ هيي خاف عبالج تفهمت هاي السالفه خوما تحجين ويا؟
لارا: وجع وجع شنو احكي ويا لهدرجه ما عندك ثقه بيه اكيد لا
زيد: اهاا عبالي
ظلينا نحجي للساعه 5 الفجر گمنا صلينا وزيد نام واني ظليت گاعده للساعه 5 ونص مليت گمت اخذت الفون وفتحت نت لگيت مسجات من هوواي بنات وهند بنت خالتي كلها جانت معايدات رديت عليهم وفتت للانستا شفت مسجات من وسام بدون شعور رديت عليه ورا دقيقه هو جاوبني
وسام: شعندج لحد هسه كاعده
لارا: ظليت كاعده ويا زيد وهسه زيد نام واني كتلني الملل وفتحت نت
استلمني تحقيق بس جنت مستمتعه بالرد عليه وحبيت اهتمامه ظليت احجي ويا للساعه 7 ونص الصبح ومو حاسه بالوكت جنهن ثواني حسيت نفسي جعت كولش استأذنت وسديت البرنامج ورحت اسوي ريوگ لأن عمو خليل يگعد هيج وكت ...طلعت للمطبخ حطيت الجاي ع الطباخ ورحت طلعت البيض خليته ع الكاونتر وظليت ادور على طاوه فتحت الكاونتر الفوگ لگيت طاوه حاولت ارفع نفسي لحتى اجيبها ظليت اگمز هم ما وصلت ضربت رجلي بالكاع بعصبيه لأن ما گدرت اوصل سمعت صوت احد وراي التفتت بسرعه ...
#Ghufran Alkubaisi
YOU ARE READING
المجنونة وقعت في الحب
ChickLitفتاة في عمـر الصبـا كيف لها ان تدرك تلك الحياة بعد الخذلان....كيف لها ان تعرف من الحقيقة تمرد وخداع ...وكيف لها ان تعرف بأنه لا يريدها.....وكيف لها تعيش في واقع غير واقعها وان تعيش في خيال من نسج القيود ..ولكـن ستجد كل شي في وقته فقـط "كانت صبـورة"
