قطار العمر

البارت العشرون

قطار العمر
البارت العشرون
للكاتب غزوان علي

سالم .. عمار انضم لتنظيم القاعده وصار واحد من اتباعهم
ميناس.. صخام بوجهي انتو شكعد تحجون عمار وتنظيم هو مويكولون هو تنظيم اسلامي عمار ابو الشرب والزنا شجابه عليهم
سالم .. لعد هيج تنظيمات شون تتكون غير من هيج نماذج تعبانه لو حرامي لو سكرين شكو واحد ساقط يلموهم ويسون تنظيم بيهم وماكو انسب من عمار لهيج مكان
ميناس.. وشراح تسوون
سعدون .. شنسوي نتبرى منه طبعاً اني دزيت لعمامي خبر وراح نتبرى منه
ميناس.. وتتوقعون يعوفنا وخاصه اني اذا ميشرب من دمي ميرتاح اذا هو بلا سلاح ولا تنظيم جان مراويني النجوم بعز الظهر عاد هسه
سعدون .. احنا يمج لتخافين

ميناس.. هو مو حچي لسان ابو رواء انتم اكثر ناس تعرفون اخوكم وخبالاته حتى انتم يجوز متسلمون من شره اني لحظه ماابقى هنا
سالم .. وين ترحين من كل عقلج
ميناس.. لعد من كل عقلكم ابقى هنا اني وجهالي حتى على لحظه الكاه فوك راسي
سالم .. ميناس وروح امي مااخلي يلمس شعره منج لو اعرف اگتله بيدي وخلي يكولون كتل اخوه ميهمني
ميناس.. دخيلك ياربي شنو هاي البلاوي الوكعت عليه ناقصني مصايب
سالم .. تهدي باالله ولتخافين احنا يمج والمنطقه بيها حراسات ومطوقه
الله يستر
بقيت اني الليل كوله ماانام الا يصير الصبح الا انام اخاف ع اطفالي  اشكال يخطر ع بالي مره افكر يجون التنظيم يصفونهم واني يقتلوني واطفالي ومره اكول هسه يجون الدوله يعتقلوني لان زوجي بلتنظيم وعايشه بدوامه ورعب محد عاشه اخاف اني مرتاحه وعايزني قهر انوب الخوف والرعب

مرت ليالي كل ليله احسها بسنه من عمري صح عمار مبين بس عرف يزرع الرعب بگلبي لحد ما اجت بالي شغله يجوز تهدأني شويه
سالم وينك تعال
سالم .. خير محتاجه شى
اريد سلاح
سالم .. ها ولج شسوين بيه
ميناس.. ماامن على روحي اقلها احمي نفسي وجهالي
واني عايشه وحدي ماعندي رجل بس اني واطفالي اقلها يصير ميصير عندي سلاح اذا اضطر ومااكدر ادافع عن نفسي اقتل اطفالي واقتل نفسي ومااخلي احد ياخذنه يعذبنه ويمثل بينه الموت ارحم

سالم .. ياستار واني وين رحت
ميناس .. الله يحفظك اليه بس هاي دنيا وكولشي نتوقع منها
تعرفين تستخدمي
ميناس.. اي اعرف فتره من الفترات من جنت مراهقه وجانو الولد بالامن علمني بارق وفارس  شون احمله بس ممنوع جان الرمي بذاك الوقت
سالم .. هسه ماكو اسهل من الرمي تكول نوزع چگليت مو طلقات وتأذي العالم

ميناس.. المهم اريد سلاح فدوه
سالم .. اليوم يمج السلاح وترتاحين
ميناس.. الي عدها رجال مثل عمار ومهدده من كل مكان عمرها مترتاح ولا تضوك طعم الراحه بيوم

اجه وجابلي السلاح وشاجور
سالم .. اطلعي بلحديقه ارمي طلعت رميت
سالم .. عفيه بمية رجال خليها عندج بعد ميحتاج اوصيج جنت شايل همج والليل كوله ازيد الحراسات ع بيتج بس هسه ارتاحيت