قطار العمر

البارت الخامس والثلاثون

قطار العمر
البارت الخامس والثلاثون
للكاتب غزوان علي

بــعـدهـا بـروحـي طـفـلـه تـخـاف اذا جـاسـوا تـراجـيـها____

بــعـدهـا تـريـد واحـد لْـۆ بـجـت يـسـمـع بـواجـيـها 💔

.
عبير.. اذا متحول الفلوس بحسابي احرك الدنيا عليك اني مو ميناس وتقشمروها ٤٠ مليون يجني بحسابي لا احرك الاخضر واليابس
ميناس.. صحت عبير هي جمدت بمكانها
جريت التلفون من ايدها ردت اعرف ويه منو تحجي الفجر سمعت صوت انمار يكولها والها ولج ثوله كتلج يومين واحولج بله لغوه زايده
سديته بوجهه وغلقت التلفون وشمرته بلكاع وكتلها واني مصدومه من الي سمعته
يعني انتي متوبين كلت عقلت وصرنا خوات صدك يعني لهاي الدرجه انتي عوجه ومتكدرين اتجرين عدل
عبير.. اسمعيني ميناس تره مفتهمه غلط
ميناس.. شنو الي افتهمه غلط اختي كاعد ساعه ٥ ونص الفجر تخابر اخويه حتى تتفق وياه يدزلها فلوس اكيد هاي فلوس البيعه الاخيره الي وكفتي وكلتي اني مااريد اخسر اخوتي ومااخذ فلوس طلعتي من جوه الجوه تخططين وادبرين
عبير.. والله الفلوس اليه والج
ميناس.. والج عين تكذبين لو ما سامعتج بأذني ولو الي والج ليش تخابري الفجر وبسكوت حتى محد يعرف يعني بس فهميني شغله عوفج من الفلوس والبيوت طز بكولشي اني شنو الي مسويته الج وتكرهيني بسببه اني شنو بدر مني وگلبج دوم اسود عليه يجوز اني سويت ومااعرف
عبير.. والله وروح بابا هيج سويت حتى يدزونا فلوس وهي اصلاً بلنص الي والج
ميناس.. لتكذبين اني موطفله كدامج واصدكج متفقه ويه اخوج السگط الي حرامات محسوب اخ عليه تاكلون نصيبي ونصيب المكاريد ولد فارس عوفج مني مخفتو الله بجهاله مو ذوله بحكم اليتامه واكل مال اليتيم جرم عظيم عند الله
انتي متخافين اخوج ميخاف امج الي تصلي وتذكر الله متخاف شون عين كويه عدكم

عبير.. كافي وخليني احجي بس اسمعيني
ميناس.. بله احجي خلي افتهم
عبير.. من طلعتي من بيت اهلي كعدت افكر بكلامج كلت صدوك همه لو بمكانه يتنازلون النه وخفت اكولج وتسوين مشكله خابرت على انمار وحجيت وياه وهددته اذا ميدز الفلوس اطبك وياج ونشتكي عليهم وحتى نور ويانا يعني ٣ اشخاص ونخسرهم كولشي
ميناس.. وليش مكتيلي اداعي بحصتي منهم اني مو وكفت كبال امج وكتلج ونفختي ريشج وكلتي اني مااريد اخسر اخوتي ليش محطيتي ايدي بأيدج
عبير.. خفت اخسر كولشي وخاصه امج حاده سنونها علينا ملكيت غير هذا الحل وكلت شيطلع منهم انعم الله اقسمه بيني وبينج وبدون مشاكل
ميناس.. جذابه ما اصدكج
بقت تحلف الف يمين حارت شسوت بقت بس القران مقسمت عليه
كافي حلفان
عبير.. صدكيني الي سويته لمصلحتنا ادري بيه اذا صرنا كلنا ضده مراح نحصل شى بس هيج وبلتهديد يدز الوحده ويخلص من الهوسه والي يدزه نقسمه علينا
ميناس.. عفتها وصعدت بدون اي كلام رغم شگد حلفت بس ممصدكه اعرفها متسوي شى زين

رجعت صعدت وتمددت وافكر بكلامها اني شنو الي جابرني ابقى وياها بيت واحد شو جهالي احسهم ممرتاحين والايجار عليه ومصرف البيت كله عليه هسه هي راح تجيها فلوس خلي تستلم واطلع ادورلي غير بيت مجرد بقائي وياها بيت واحد يخليني مثل الحرامي دوم ادور وراها واراقب تصرفاتها
غفيت يمكن ساعه وطفرت على المنبه رحت كعدت ملوكه عدها امتحان وبعد ايام امتحان سيوفي هم كعدته يراجع نزلت لكيتها بلمطبخ تحظر الريوك مباوعت بوجهه اريد افتهم شنو الي بدماغها بشنو تفكر دوم احسها تحجي شى وعقلها بيه شى ثاني
عبير.. بعدج زعلانه
ميناس.. مجاوبتها ومالي خلگها اصلاً نعسانه من سهره البارحه وبنفس الوقت دايخه من تصرفها ومااعرف شون اقيمه واني ممصدكه ولا كلمه منها
حطيت الربطه على راسي وطلعت وره ملاك بوقتها بس هي وطيبه بت عبير بلسياره
شافني نزل من السياره
ريسان .. شفتها طلعت ممصدك هلا بلصباح الحلوو
ميناس.. صباح الخير
ريسان .. صباح العافيه ياكل الخير
ميناس.. استحيت من نظراته وكلت للبنات يله اصعدو
دير بالكم عليهم
ريسان .. بعيوني
ميناس.. رغم شكد دايخه من كل الصار بس ابتسامه ريسان والفرحه بعيونه من شافني خلاني ابتسم ودخلت بس من شفت عبير تفتر بلبيت راح ابتسامتي
اوف يابنت ابويه وامي شكد مااكول انطيج فرصه ادكين الناقصه بيه مشيت ردت اصعد انام بعدني نعسانه حتى ريوك محابه اتريك جان تلزمني
عبير.. لتزعلين والله لخاطرنا سويت هيج لو ما هذا التصرف منحصل كولشي منهم
ميناس.. ماشي راح احاول اصدكج
عبير.. والله والقران
ميناس.. اششش كافي حلفان لعبتيها لروحي شوفي عبير الفلوس بس توصل تتوزع علينا بلتساوي
عبير.. اكيد هذا جان الي بالي
ميناس.. مو بس اني وياج
عبير.. منو لعد ويانه
ميناس.. جهال فارس
عبير.. بس الفلوس متكفي
ميناس.. جهال فارس بالاول لازم ويانا
عبير.. خلي يدز وصار كولشي تردي اسوي
ميناس.. خوش اني اصعد انام نعست
عبير.. شنو منايمه
ميناس.. لا مأجاني نوم
صعدت ذبيت نفسي على الجربايه والنومه نومه محسيت غير ب٣ الظهر كمت توضيت وصليت ونزلت شفت الجهال كاعدين بلكاع وكلمن لازم كتابه ويقرا فتحت الجدر لكيت مبقيه اكل اليه
اكلت ودخلت سبحت وبدلت
عبير.. ها رايحه للصالون
ميناس.. اي عندي شغل هوايه ماما سيوفي اقرا زين فدوه لگلبك
عبير.. اكولج تره مسواك ماعدنا منظفات وبقوليات هواي نواقص
ميناس.. مو ذاك اليوم تسوكنا
عبير.. خلصن قابل اشربهن استعمال يومي
ميناس.. ماشي باجر اتسوك اليوم ماالحك
رحت للصالون وضليت اليوم كله اشتغل شغل المحل جان زين رغم الاوضاع التعبانه
بس لان الصالونات هم قليله بلمنطقه
رجعت للبيت تعبانه حيل حضرت ملابس الجهال وعشاهم وعشيتهم
ونمت
ثاني يوم كعدت لكيت ٣ مكالمات ريسان ورساله منه كاتب مساء الورد لأحلى ورده دخلت بأنفاسي
ضحكت على كلامه شون يعني دخلت اوف منك ابو لسان
كمت غسلت وبدلت طول هاي اليومين واني اي كلام ونقاش ويه عبير ماكو
مثل كل يوم رحت كملت شغلي بلصالون ومن رجعت جانت عبير كاعده تنتظرني
عبير.. تعالي منوس
ميناس.. خير نسيت المسواك باجر نتسوك
عبير.. لا مو شغله مسواك استلمت الفلوس من انمار
ميناس.. هااااا بهاي السرعه
عبير.. اي دزهم
ميناس.. شكد
عبير.. ٢٠ بس
ميناس.. لا بالله مو جانو ٤٠
عبير.. يكول ماعندي
ميناس.. باوعت عليها واني ممصدكتها عرفت ممصدكه كلامها
عبير.. اوكفي ادري بيج شاكه
لزمت تلفونها ودكت على انمار بقى يدك لحد مجاوب وفتحت سبيكر جان تكوله
عبير.. احنا مو كلنا ٤٠ شجاك
انمار.. اكولها ثور تكولي احلبه بابا ماعندي خلصن اشتريت محل بحصتي والباقي انطيته لأخوتج مو زين طلعت الج ٢٠ منهم غيرج ولا فلس حصل اخذيهم واكعدي واسكتي وعلى الجايات اراضيج
عبير.. هم عايزه بلجاي متنطيني حصتي كامله
انمار.. بس اخذي ذني وسدي حلكج تره حيل خنكتيني
ميناس.. سدته بس اني ليش گلبي ممصدك بيها معقوله فلم بينهم وحتى لو فلم شكدر اسوي باوعت عليها وكتلها
انطيني ٧ منهم
عبير.. الج
ميناس.. لا انطيهم لنور
عبير.. هوايه ٧ ميناس اني كلت مليون مليونين كولش كافي والباقي الي والج تره هيج مراح يبقى النا غير فتافيت
ميناس.. يبقى ١٣ عود اخذي انتي ٧ واني ٦ مو مشكله المهم انطي لنور ولجهال فارس
عبير.. اني ممقتنعه على اي اساس اوزع حصتي وانطي منها ٧ مليون لنور خلي تروح اداعي بحصتها اني شكو
ميناس.. شو من لزمتج كلتي تلاثتنا سوه هسه صارت خلي تروح اداعي
عبير.. جان ٤٠ كلت خلي انطيها خمسه مليون ونفضها مو هنه عشرين انطي حالها من حالنا
ميناس.. لو تجين على الحق والشرع الي لا امج ولا اخوتج يعرفوه هي وجهاله الهم ٨٠ حصه ولد بس شنسوي لأهلج الميخافون من الله فوكاها دنت نفسهم على مال ولد اخوهم اااااخ يانار گلبي بس لو بيدي شى اسوي اله اخليهم يعفنون بلسجن بس ماعندي شى ضدهم وانتي هم موكفتي ويايه كله من وراج