قطار العمر

البارت الثالث والثلاثون

قطار العمر
البارت الثالث والثلاثون
للكاتب غزوان علي

وتبدأ محطه عمري الثلاثينيه ودعت محطات الطفوله القاسيه ومحطات المراهقه المؤلمه ومحطات العشرينيه المدمره وها انا ادخل محطه جديده بعمري هل يحق لي عيش الحب هل فات الاوان على هذه المحطه ام  قطاري لن يمر بهذه المحطه ابداً؟؟؟ 

كوم يمه ريسان وتالي وياك هاي ثالث مره اكعدك ولك حتى للصلاه صاير كوه تكوم
ريسان .. كمت يمه تكول بلجيش حصره واحد ينام بهذا البيت
ام ريسان .. مو انت كلت كعديني من الصبح اريد اطلع اشتغل
ريسان .. كعدت والله بس ابويه طلع لا
ام ريسان .. ابوك كاعد ينتظرك على الريوك
ريسان .. ياستار والعباس اذا فتح الموضوع اخلي واطلع
ام ريسان .. ولك شو انت ماتستحي غير ابوك ويريد مصلحتك
ريسان .. يمه كتلكم ماريدها ماارجعها لو يحضر الحمزه من گبره ما ارجعها معودت خلصت منها ومن ضيمها وطلايبها تردين ارد لنفس الضيم
ام ريسان .. وجهالك يايمه منو الهم
ريسان .. الهم الله اني ردت الجهال يمي هم جلبت بيهم عبالها تلزمني من ايدي التوجعني متدري ادوسها وادوس حتى جهالي اذا أذوني
واسمع ابويه يعيط
ابو ريسان .. وينكم مو جعت
ام ريسان .. اجينه حجي
كوم يمه بداعتي عندك وجفي الشر وتريك ويه ابوك وشيحجي اسكت فدوه لطوله لاتسوي طلابه من الصبح
ريسان .. استغفر الله هو اني ادور طلايب لو انتم يله روحي ليعيط بعد ويسويها عزه عليج واني اغسل واجي
كمت تعوذت من الشيطان وتوضيت وصليت قضى صلاه الفجر راحت مني لان نمت متأخر وراها بدلت ولكيت ابويه الحجي جاسم ابويه الله ينطي العافيه كاعد لابس دشداشته والسبحه بيده واستكان الجاي بيده الثانيه ويباوع عليه بتك عين ومعاجبه الوضع
صبحك الله بلخير يابه
ابو ريسان .. هله بويه هله اكعد بعد وكت چا ضليت للظهاري
ريسان .. نمت متأخر
ابو ريسان .. ليش لا كعدات الركن ما تجوز منها شكبرك صرت وليداتك بطولك وتكعد للصبح بلركونه
ريسان .. يابه قابل شارب لو العب ورق هي جايات وضحك ويه الولد وسوالف وادخل وين اولي قابل
ابو ريسان .. چا خوش وتشرب حتى ازوعك دم وايدك اصبع اصبع اكسرهن اذا لزمن الورق
ريسان .. يمه صبيلي خلي اتزقنب واروح
ام ريسان .. اسم الله وليدي هاك الچاي الي تحبه
ريسان .. اليوم صنطه وينها مريم
ام ريسان .. اختك مداوم اليوم
ابو ريسان .. شوكت ترجع مريتك
ريسان .. يامره
ابو ريسان .. لا تلعب علي انه گتلك مريتك ترد لدارك وكلمتي ماتكسرها

ريسان .. يابه اني يايوم كاسرلك كلمه حتى من زوجتني حوراء كلت بت عمك وراح تشيلك على راسها وتصير ظهر وزود الك گلت صار الي تشوفه صح اليه سوي واتزوجتها ومن ساعه المصخمه الي قبلت اتزوج بيها راس البله والمصايب وانتو شفتوها بعينكم انتي يوم بحضج وبختج احجي الصدك مو ايام تصيحين الداد منها اجي ايام الكاج كاعده هناك بلزويه وحاطه ايدج على خدج من سوالفها ولسانها الزفر
ابو ريسان .. صغيره وتتعلم مابيها شى
ريسان .. ياصغيره رحمه لجدي هاي صغيره هاي توديك للشط ترجعك عطشان لو لان بت اخوك
ابو ريسان .. ابوها تعهدلي متسوي مشاكل وتسمع كلامك وماتطلع بدون شورك والي تكوله تگلك صار
ريسان .. انت مصدك عمي هو اصلاً عمي كلاوچي وجذاب اكثر منها
ابو ريسان .. انجب شون تحجي هيج على عمك لا بارك الله بيك من ولد عاق
ريسان .. صرت عاق يابه لان حجيت الحق انت تدري كولش زين بأخوك وسوالفه وبته اضرب منه وذيج المره سمعت نفس الاسطوانه وحلف الف يمين متسوي شى يضوجني ورجعتها من وراك ومن وراه وخاطر فلان وفلان وجهالك وشون وكلت ميخالف امشيها واكبر عقلي ورجعتها حسبت الها يومين ثالث يوم رجعت ريمه لعادتها القديمه ولعبت روحي وخلتني اكفر بليوم الي اجيت بيه للدنيا
ام ريسان .. يمه كل النسوان هيج شنسوي هذا حظك من الدنيا
ريسان .. شنو حظي احد كلج اني مره ولازم اكعد بيت رجلي واتحمل ضيمه اني رجال وممجبور اعيش ويه وحده وصخه ومتسمع كلام ولسانها طويل وفوك كلها هذا ميعجبها العجب بت الباشا اشتغل من الصبح لليل مثل الزمال حتى اعلف بحلكها وتكول شمسويلي
ام ريسان .. حشاك يمه لتكول هيج
ريسان .. تدرون كولش زين حياتي والله سوده ليش تأذوني
ابو ريسان .. بت عمك ترجع خصم الموضوع واليوم ترجعها لا وعلي متبقى بلبيت
ريسان .. لتحلف وميحتاج اتعب روحك اني عايفلك البيت وهاج
صيحيلي بتج خلي اوديها للمدرسه
ام ريسان .. موكتلك مداوم كول ياالله ابني
ريسان .. كمت وزهكانه روحي لو الزم حوراء يمكن احركها
ابو ريسان .. قبل متطلع اذا حوراء مباتت هنا مالك بيات هنا افتهمت
ريسان .. عفته وطلعت واني نار صاير صعدت التكسي مالتي اطلع اشتغل على باب الله ولو الي يصبح هيج مصباح اكشر شيترجى
اني ريسان مواليد ١٩٧٦ من سكنه بغداد منطقة الحرية  انولدت وعايش بيها ابويه الحجي جاسم من العماره انولد بيها بس عاش بغداد وتزوج بت عمه الي هيه امي الخير والبركه الحجيه سعاد وعاشو بغداد حجو بين الله وهم بعمر الشباب ابويه جبير اهله رجال يخاف الله ويحب الجبير والصغير بس عيبه يفضل الناس على نفسه اي اعتبره عيب لان بهذا الوقت الي يضحي لخاطر غيره ويسوي زين متجي بس المشاكل والطلايب