قطار العمر

البارت الثامن والثلاثون

قطار العمر
البارت الثامن والثلاثون
للكاتب غزوان علي

السلام عليكم اختي
ميناس.. انت منو
اختي اني لكيت صاحب هذا الجهاز مشمور بلشارع الظاهر مسلبيه
ميناس.. شنو ريسااااان
والله يااختي مااعرف اسمه بس لكيته بلشارع مدمه ومحد يرضى يشيله واني شلته واخذته للمستشفى وهو هسه بلطوارئ وحالته صعبه وهمزين لكيت هذا التلفون بجيبه ولكيت اسم زوجتي الحبيبه ودكيت عليج
ميناس.. كمت الطم على وجهي واحجي ويه الرجال فدوه عايش لو ميت
هسه دخلوه للعمليات هو وربه ادعيله يعيش
ميناس.. سديته منه وركض لبست الجبه مثل المخبله كله ولا ريسان مااعرف شون وصلت للمستشفى الطريق كله ابجي واباوع للسما واكوله ربي انت كرمتني بيه بعد عذاب وضيم وقهر وصبرت ومايوم اشتكيت لتحرمني منه بجاه حبيبك المصطفى لتحرمني منه اني ظهري انكسر وتعبت من الخساره كل شويه اوكع بنكره واخسر الاحبهم لتخسرني ريسان دخيلك ياكريم ابجي بشهكه بحيث سايق التكسي يحجي ويايه محتاجه شى اختي بيج شى مااكدر اجاوبه بس امرد بروحي وابجي اخر شى كتله رجلي متسلب وبين الحياه والموت وخطيه طار بلسياقه حتى كروه مااخذ مني مرات تصادف مواقف بحياتك واشخاص تحس فعلاً الدنيا بعدها بخير

ركضت مثل المخبله للطوارئ وكالو بلعمليات كعدت بلكاع اشهك من البجي والرايح والجاي يباوع عليه فاقده من الخوف والدموع لأول مره اتمنى عندي اهل بيهم حظ اعتمد عليهم وتمنيت سندي فارس موجود ويوكف ويايه اباوع يمنه يسره المن انطي وجهي شون حالي بعده اذا صار بيه شى يعني لهاي الدرجه الدنيا متريد تضحكلي لهاي الدرجه اني فگر معودت عشت كم يوم راحه تطلع فتن عليه ااااااخ يانار گلبي المن اشكي ومنو اليه
طلعت وحده من السسترات وكالت محتاجين دم اروح واجي على مصرف الدم ويردون متبرع حتى ينطوني فصيلته ويردون ٣ كيس وبلازما واني احجي ويه الموظفين وابجي حالتي مثل المعركه داخله لو اعيش لو تنتهي حياتي اصعب شى بهيج مواقف من تكون وحدك لا معين ولا سند
لزمت التلفون المن اخابر اريد اتذكر الموقف صعب بحيث عقل مضل بيه تذكرت  لازم ابلغ اهله اخاف يحتاجون دم بس ماعندي رقم اي احد وتذكرت مريم اي عندي رقمها ودكيت عليها

مريم .. هلا والله بمرت اخويه هاا شبيج ميناس شنو مكعد افتهم يمعوده على كيفج والله ممفتهمه شى  شنوو ريسان شبيه يمه عزه اخويه وهسه عايش يمه لا ياالله ونزلت ركض على بابا
بابا ماما الحكو
ام ريسان .. دخيلك ياعلي شبيج تخبلتي ليش تبجين لتوكعين من الدرج على كيفج شصار شكو
مريم .. ريسان مضروب وبلمستشفى
ام ريسان .. يمه وليدي يمه عزه ولج تعزيني يسعاد وليدي ريسان وهسه وينه يمه يبعد امك وشبابك ولج احجي
ابو ريسان .. شبيكم عياطكم للشارع
ام ريسان .. الحك ابنك عكازتك ظهرك انكسر يبو ريسان راح منه
فهميني شصار وليش تلطمين
مريم .. بابا خابرت زوجه ريسان وتكول بلمستشفى مصوب ولازم ترحون اله وكعت السبحه من ايده وعاط
ابو ريسان .. لا وليدي ريسان كله ولا وليدي  وهسه هو وين
مريم .. بلمستشفى بلعمليات
ابو ريسان .. امشينا
مريم .. راحو يركضون ويرجفون اول مره اشوف بابا هيج ضعيف ويرجف خابرت حيدر وبلغته وراحو كلهم وبقيت ادعي يرجع اخويه النا هذا مو بس اخويه اعتبره ابويه 
كعدت بلطرمه وابجي واباوع للسما واتوسل برب العالمين يعيش