2. ချစ်ဝဲဂယက်မှာ မင်းနဲ့ငါ(ခ်စ္ဝဲဂယက္မွာ မင္းနဲ႕ငါ) Completed

P 23

နိုဗယ်လင်းက အခုတလော ပန်းချီကားတစ်ခုကိုပဲ နေ့တိုင်းရေးဆွဲနေသည်။ တစ်ပုံစံတည်းဖြစ်နေသော ပန်းချီကားများက နှစ်ပုံသုံးပုံထပ်လာသောအခါ ဒွန်း သတိမထားမိပဲ မရှိနိုင်။

နို‌ဗယ်လင်းက အရင်သူလုပ်နေကျ နေ့စဉ်ဒူ၀အလုပ်များကိုပင် လျစ်လျူရှုပြီး ပန်းချီခုံနားမှာ အမြဲရှိနေသည်။

နောက်ဆုံးမှာတော့ ဒွန်း သိချင်သည့် စိတ်ကိုထိန်းမရသည့်အဆုံး ညဘက် နိုဗယ်လင်း အိပ်နေတုန်း ထိုပန်းချီကားများကို ‌စစ်ဆေးကြည့်မိသည်။

အမျိုးသမီးတစ်ဦးက ကလေးငယ်တစ်ဦးကို ပေါင်ပေါ်တင်၍ စာသင်ပေးနေဟန်ဖြစ်သည်။ နောက်ကျောပေးထားသည့်ပုံဖြစ်သော်လည်း ဘေးပတ်၀န်းကျင်ကိုတော့ အသေးစိတ်ဆွဲထားသည်။ ပုံထဲက အမျိုးသမီးနှင့် ကလေးကတော့ တူပေမယ့် ဘေးပတ်၀န်ကျင်နှင့် ရာသီဥတုကိုဆွဲထားသည်ကတော့ ကွဲပြားမှုရှိသည်။

ပုံထဲတွင်တော့ အခြားကလေးများက ဆော့ကစားနေဟန် ဆွဲထားပြီး အမျိုးသမီးနှင့် ကလေးငယ်ကတော့ သီးသန့်ရှောင်ထွက်နေသလို။

စန္ဒာ.........

နိုဗယ်လင်း ဆိုခဲ့ဖူးသော နာမည်တစ်ခု။ ပန်းချီကားနဲ့ ပတ်သတ်နိုင်လား။ နိုဗယ်လင်းက ထမင်းမေ့ဟင်းမေ့ ဒီပုံတွေကို ထိုင်ဆွဲနေခဲ့တာ။

အိပ်ရာပေါ်ရှိ နို‌ဗယ်လင်းကို လှမ်းကြည့်လိုက်ချိန်တွင် အသက်ငွေ့ငွေ့ကို ရှူရှိူက်၍ အိပ်ပျော်နေသည်။ ပါးဖောင်းလေးတွေက ခေါင်းအုံးပေါ်မှာ အိစက်စွာ တင်ရှိနေသည်။ နိုဗယ်လင်းက အိပ်နေသည့်အချိန်မျိုးတွင် သိပ်အေးချမ်းသည်။

အနားသို့လျှောက်သွားလိုက်ပြီး ခြေရင်းတွင် ခေါက်ထားသောစောင်ကို ဆွဲဖြန့်ကာ သူ့ကိုယ်ပေါ်လွှမ်းခြုံပေးလိုက်သည်။ ဆံပင်အုပ်အုပ်လေးတွေက မျက်တောင်ဖျားနား ရောက်လုမတတ်ရှည်နေပြီ။ သူပြန်ရောက်လာကတည်း ဆံပင်လိုက်ညှပ်ပေးဖို့ကို ဒွန်းမေ့နေခဲ့သည်။ နှဖူးပေါ်က ဆံစတွေကို ပင့်တင်ပေးလိုက်ပြီး ပေါ်လာသည့် မျက်နှာဖူးဖူးလေးကို ကြည့်ရင်း ဒွန်းသက်ပြင်းချမိသည်။