သဏ္ဍာန်ဆန်း

(Extra_4) U

နေရာက ကောင်းသစ်လွင်ရဲ့ ကောင်းကင်ဘားမှာ ဖြစ်သည်။ အချိန်က ညနေခြောက်နာရီခန့်။ ဆိုင်ထဲမှ ထောင့်ကျကျစားပွဲဝိုင်း တစ်ခုတွင် ရှိနေတဲ့သူတွေက လင်းရဝေနဲ့ သုတဟန်။ ပြီးတော့ ဆိုင်ပိုင်ရှင် ကောင်းသစ်လွင်လည်း ရှိနေသည်။

"မင်းတို့ နှစ်ယောက်က ဘာလဲ ငါ့ဆိုင်မှာ လာဒိတ်တာလား ..."

ကောင်းက သူနဲ့မျက်နှာချင်းဆိုင်မှာ ပူးကပ် ထိုင်နေကြသော နှစ်ယောက်ကိုကြည့်ပြီး ပြောလိုက်သည်။

"ဟန်လေး အလုပ်ဆင်းတာကို သွားကြိုရင်းနဲ့ နည်းနည်းပါးပါး သောက်ချင်စိတ်ဖြစ်လာလို့ ဒီဝင်လာတာ ...ငါတို့ မဒိတ်ပါဘူး ...ပိတ်ရက်တွေမှ ဒိတ်ကြတာ ..."

"ဪ ..."

ကောင်းက နှစ်ယောက်သားကို ဝေ့ကြည့်လိုက်ပြီး ပြုံးနေသည်။ လင်းရဝေတစ်ယောက် ချစ်သူရပြီးထဲက သူတို့ဆီ အလာကျဲသွားသည်။ လုံးဝအဆက်အသွယ် ပြတ်သွားတာမျိုးတော့ မဟုတ်ပေမယ့် တစ်ပတ်တစ်ခါ တွေ့ဖို့တောင် မလွယ်တော့တာမျိုးလောက်ပင်။

"သုတဟန်ရော ဘယ်လိုလဲ မင်းတို့ companyက KS groupနဲ့ ပူးပေါင်းလိုက်ပြီဆိုတော့ အလုပ်နေရာ အခြေအနေ ..."

"မဆိုးပါဘူး အရင်က ကိုယ်တိုင်ရပ်တည်ခဲ့တဲ့ companyဆိုပေမယ့် KS groupလို အင်အားကြီးနေရာရဲ့ လက်အောက်ခံဖြစ်သွားတော့လည်း ပိုအကျိုးများလာတာတွေကြီးပါပဲ ..."

သုတဟန်က ပြုံး၍ပြောနေပြီး သူ့ရှေ့က အရက်ခွက်ကို တစ်ချက်ကောက်မော့လိုက်သည်။

"မင်းတို့ CEOကြီးကတော့ သူ့ယောင်္ကျားနဲ့ တစ်နေရာထဲ အလုပ်‌လုပ်နေရတော့ အရင်ကထက် အလုပ်တွေ ပိုကြိုးစားနေမှာ ..."

သုတဟန်က မိုင်း တည်ထောင်ထားတဲ့ companyမှာ အလုပ်လုပ်နေတဲ့သူ ဖြစ်ဟည်။ အခုအဲ့ဒီ့ companyက KS groupနဲ့ ပူးပေါင်းလိုက်လေပြီ။ ဦးဆီဇာမင်းထင်နဲ့ အပေးအယူ လုပ်ထားသည့်အတိုင်း KS group လက်အောက်ခံအဖြစ် ပူးပေါင်းပြီးနောက် မိုင်းက ရှယ်ယာရှင်တို့ရဲ့ ယုံကြည်မှုတွေကို ရခဲ့သည်။ ဒါကြောင့်လည်း KS groupကြီးရဲ့ အသက်အငယ်ဆုံး CEOတစ်ယောက် ဖြစ်လာခဲ့လေသည်။ ဆန်းကတော့ KSမှ ဌာနတစ်ခုရဲ့ ဒါရိုက်တာတစ်ယောက် ဖြစ်နေခဲ့‌ပြီ ဖြစ်၏။