| ذبـول الاقحوان | "باللهجة العراقية "

|الفصل السادس و الثلاثون |

#ذبول الاقحوان
#الفصل السادس و الثلاثون
#بقلم الراوية

.

صـلوا على النـبي 💚

.

صهيب..

بنـفس اليوم الراحت بي صفاء لبغداد
گعدت الصبح..و اني مقرر ادور شغل حتلو عـامل بأجـرة يوميـة
من زمان افكر اطـلع اشتغل خـوما اظل عطال بطال
الفلـوس الي جوه ايـدنا يجي يوم و تخـلص..

گلت لأبويـة و ما گـال شي..طلعت للسوگ و گـمت اسال على اهل المحـلات تريدون عامل

للظهـر يـلا لگيت صاحب مـحل يريـد واحد يوگف بالمحل..چـان محل مواد غـذائية

هو جاب غدا و تغـدينا اني وياه..و هو يسولفلي على المحـل و گعد يعلمني على الاسعار
اول يـوم مرة و الحمدلله الـوضع تمام
گـال اني حسـبتلك نـص يومية..و باچر انطيهن هن و يومية باچـر
گلت ميخالف..بوگـتها حسبلي 15 الف باليوم..همين نعمة..على الأقل اطلع مصروفي

ثاني يوم گعدت الـصبح و سويت ريـوگ الي..
تأففت و اني اسوي بالچـاي..چانت مرات تجي صفاء تسويلنا ريوگ بس هي بـغداد هسـا..

طلعت للمحـل و بدا الشغل..صاحب المحل أمـن بيه بسرعة..چان يطلع عمرو بالـ36 سنـة هيچ شي
گال ظل واگـف بالمحل عندي شغل انـي

و راح..و ظليت اني واگف و بسرعة تأقلـمت بالشغل و گما احاسب و ابيع..صار الظهر و هـذا ما جا..و لا عندي رقـمو اخابـرو..
و اني ما جايب غدا ويـاي و الجوع كتلني
عـاد اكو كافتيريا قريبة من هيـن..رحت جبتلي لفتين گص و اكلتهن..

للـ1 و نص يلا جا و اني بعدني مفتح المحل لأن مو بس مفرد يـبيع جملة و ما شاء الله المحل سوگـو ما شي

گال الوالدة تخربطت و اخذتهـا للطـبيب
تحمدت الو بالسـلامة و همين مر اليوم و بوكت التعزيل سألتو على الأجـرة و گـال باچر
سكتت گلت الرجال مبين تعبان و فـوگاها امو مريضة

ثالث يوم همين طلعت للمحـل و شلت و وديت و هو گاعـد ورا المكـتب..المحل طابگ محلين سو و چـبير ما شاء الله المفروض يجـيب عامل ثاني

السـاعة بالـ2 الظهر هيـچ..چنت اعزل ببطـالة زيت
صاحـلي و تركت الي بيـدي و رحت علية
چـان يسمونو ابو مهـند

هـو فتح المجر و حط على المـيز عشـرة الاف
عگدت حاجـبي من گال اخذهن
تـوقعت يريدني اروح اجيب شي..بس تفاجـئت من گال

- صهيب انت خوش زلمة بس انه اشوف نـفسي ما محتاج عامل..اعذرنـي خوية

- و هـاي أجـرتي ؟؟

حچـيتها باستغـراب و هو يشابك اصابعـو

- چـا تريد نص يومية المحل

- لا مو هيچ..بس انت گلتلي باليوم 15 الف
و اني صارلي نهارين اشتغل يعني حسـابي بال30 الف

- لا ولله ؟؟