| ذبـول الاقحوان | "باللهجة العراقية "

| الفصل التاسع |

#ذبول الاقحوان
#الفصل التاسع
#بقلم الراوية

.

صـلوا على النـبي 💚

.

صفاء..

دائمـاً يگولون كلشي يجي صغـير و يكـبر
الا المشاكل و المـصايب..تجي چـبيرة و مع الوقت تصغـر الا ما يظللـها أثـر

الا الـصارلنا چـان مختلف الوضع..جتنـا مصيبة لا على البال و لا على الخـاطر و كبرت و كبرت الا أن دمـرت الكـل و اول مـن تعذب و اخـذ منها نصيب چانت انـي..

البـيت انگلب فوك جـوه..صياح و بچـي و عويل
الكل انصـدم و اجا الخـبر قاسي على گـلوب الكل..طلعوا الشباب و اولهم عيسى
ادحـك بالوجوه و اني احس بالخنـگة
دمعتي أبـت انو تگع..گبل كم يوم چـنت اني ويا نحچي شلون هسـا انقتل و طلعـت روحو

التمـت الجواريـن و الحجـية وگعت من طولهـا
مرت عيسى و ابراهيم چـانن يبچن و يصيحن و جهالهم ارتعبـوا..گمت ارش مـي على وجهه الحجيه و انـي اگـعد بيها

صحـت بفزع..دحگـتلي ثواني و كانها تريد تتـذكر شصار..و من حست على نـفسها رجـعت تصيح و تبچـي..

ادگ على أمـجد و ما يـرد
من الـساعة خمسـة للـ8 يلا جـوي و جايبـي وياهم بالتابـوب..بالمطبخ گعدت اني و بنات الجـوارين
بچـي و صياح مـلى البيت..ادحـگ للميز الي قبل ايام چـنا گاعدين عليه و نحچي
احس روحـو اطوف بالبيت..

سمعـنا هوستهم بـرا..ناس تگول نطلع هسا للنـجف و ندفنو و ناس تگول الوضع مو تمام من الصـبح نطلع..اخـر شيء گـالوا الصـبح الفجرية ندفنـو الدنيا ليل و مـو امـان

بالصالة خلوه..اخوانو گـعدوا يقرون قـرآن
و الليل كلو يقرون..بالممر گعدت على الدرج..لحـظات يصير هدوء و ما تسـمعلك صوت
و فجاة على غفلة يعلى البچـي و النوح

صعدت لغـرفتي لأن أمجـد يريد يغير ملابسـو، بدل و اني ادحـگلو الوجه شاحـب و عيونو مورمـة
گعد على التخت و هو يمسح على راسو و يستغفر
گـعدت بصفو و گـلت بخنگة

- أمـجد

- همم

- منـو الي قتلو

دحگ عليه و وگـف على حيلو
رفعت راسـي عليه لما گـال برود

- بسيطرة وهمية ناصبيها..و كتلو

- معقولة مسلحين

- ايي

حچـاها و طلع..و اني ظليت بمكاني گاعدة
عضيت على شـفتي و گـمت اتذكر الحلم..شگد خلى گـلبي ينقبض و احساس انو شي مو زيـن راح يحـصل

بالحـلم چـنت واگفة بمكان مثل الچـولة..بس رمل و حـصو مليـان..ادحگ بس فـراغ ماكو شي يدل انو هالمكـان بي اي حياة