| ذبـول الاقحوان | "باللهجة العراقية "

| الفصل الثالث |

#ذبول الاقحوان
#الفصل الثالث
#بقلم الراوية

.

صـلوا على النـبي 💚

.

صفاء..

عـمي وليد چـان يختلف عن ابويـة، انسان فـكاهي لدرجة
علاقتو وي اولادة كـ علاقة الاصدقاء و الأخوان..مو متشـدد ابداً و عندو اهـم شي انو انت ترضى على نفسـك..و كـل شخص عـندو حرية الاختيار

حـيل احب عمـي وليد..من چنت اروحلهم يخليني بصفو اگـعد و يبدي يحـچي و يگول تشوفـون هالصفـاء تسواكم كلكـم
چـنت اتباهه بي، و اغـور بـ اولادو رغم علاقتـي القويه وياهم الا انو من يـصل الموضوع عن عمـي اطنش الكل

ركـضت على جـدتي و ابويـة يحاول يسكـتها
و هي تبـچي مفجـوعة، ابوية يگوللها ما بي شي

اما هي ما تـقتنع تضرب على رجليها و تگول گلبي مقبوض من الصبح ابني راح يروح منـي
صـهيب طلع على الهـوسة و هو ما مفتهم شكـو

طببنـا جدة جوه و جبتلها مـي تشربـو و نهـدأ بيـها
طـول اليوم عشنا بقلق و خـوف كل شوية نـخابرهم و نفس الوضع
الـحادث حـيل قوي..

صارت بالـ12 بالليل، جدة غـفت ورا ما ابوية اضطر يكذب و هو يگوللها صحـى هسا الصبح نحچـي ويا

اني ما گدرت اغفي و لا انـام، اروح و ارجع عـلى ابوية و صهيب
لا احـنا يمو و لا هو عدنا
تفصلنا كيلو متـرات و حـدود..بس گـلوبنا يمهم
نـص ساعة مرت بالضبـط..چنت بالغرفـة غطيت جدة و طلعت من سمعت صوت برا

اول ما طلعت للمـمر لگيت صهيب گاعد على الدرج و يبچي بخنيگ
هيـن عرفت شنو صار..عرفت عمي وليـد عافنا
رجفت شفايفـي و كتمت شهگت جتي تفر من بيـنهن
هزيت راسـي بلا و اني اگـول بغصة

- صهيب عمـي مات

هز راسو بأي و هو يضرب على راسو بكـف ايدو
ابوية بالصالة گـاعد شفتو منزل راسو و هو يردد انا لله و انا اليه راجـعون

ابوية دحگـتلو گاعد بالصالة و منزل راسـو تقدمت عليه خطـوة و اني اسمعو يستغفـر ربه
حسيت البيت بجـدرانو تضيق عليـة
ما اعرف اواسي ابوية لو صهـيب..لو نفسي الي احس ضعـت
عضـيت على شفتي و فتحت باب غرفة جـدة
شفتها گـاعدة على التخت، حبسـت دمعتي بعيني
و گـلت بمحاولة بائسة انو ابيـن كلشي طبيعـي

- ها جـدة شو گـعدتي

صافنة ليـگدام لحظات ظلت ساكته..صـدت عليه و گالت

- وليد مـات

رجفت شفتي و جيـت احچـي كلمة
بس هي وگـفت بصعوبة على حـيلها و حچت بتقطـع و عيونها تمليـهن طبقة دمع خفيفة

- شـفت جـدچ جا اخذه..گـال وليد الي و خالد الـچ

فات ابوية و من شافتو جـدة گبل گـامت تبچي
حظنتو و گعدت تنعي و تبچي بحرقة گلب ام