| ذبـول الاقحوان | "باللهجة العراقية "

| الفصل الثامن و العشرين |

#ذبول الاقحوان
#الفصل الثامن و العشرين
#بقلم الراوية

.

صـلوا على النـبي 💚

.

ريم..

مـن چـنا صغار..چـانوا اهلنا يخوفونـا بالسعلوة
و بعجـوز الظـهرية..و بالغـريرة..اذا طلعنا بالليل لو الـظهر
تجي و تاخذنـا..و بالمـغارة مالتها تاكـلنا
فـ چنا نـرتعش من الخوف
و نروح ركض ركـض لأحـظان امهـاتنا

كـبرنا و صغـر خوفنا مـن هاي الـوحوش..لأن رددنا بداخلـنا
ماكو وحـوش..چذبة اخترعـوها اهلنا لتخوفينا

بـس هسا انـه اؤمن انـو اكو وحوش..و هاي الوحـوش تتجسد بالـبشر
اقسـى الوحوش بالعـالم
مـن يشبع يريد المـزيد..من يطمع يبدي يشوف كـلشي دنـانير..يتجـبر و يتكبر كـل ما احد زاد من شأنـة
الرحـمة الي بگـلبة تنمحي كـل ما زاد طغـيان

يـوم اثنـين..من ابشع ايـام حياتي
مهما مرت سنين..ايام..لحـظات سعيدة ترسم ضحكة على وجـهي
تظل هذاك اليـوم كابوس يلاحقنـي و يخنگـني

دنيـا ظهر چان بوقـتها..رجعنا من المدرسة و ما چـنت جوعانه..تغدوا و انه ظليـت اقرا..
من خلصت رحت خليت الي لگـمة اكلها..و انه اكل فاتت فاطمة للمطـبخ و جفلت
نـقاط مـن مرگة طاحت على ثـوبي..خزيت فاطمة و گلت

- تحمـحي سوي صوت مو هيچ تفوتيـن

ضحكت و هي تاخذ تفـاحة مـن الثلاجة و طلعت
تنهدت و گـمت من على المـيز مع ما گـمت چـلب غطا الطبلة بـ دانتـيل دشداشتي و الخزر
و انه احـاول افكه..صارت ردن دشداشتي بصـحن المرگ

اشياء بسيطـة..حوادث اغلب البشر يتعرض الهـا..
بس چـانت سبب رئيسي بالصـار الي..فكيت التشابك
و رحت غيرت ملابسي..و على المغسلة بالحمام غسلت الـردن و طـلعت برا انـشرة
و انه اتسخـط الجو حـار..و محد اكو كلها جوه ناس نايمة ناس گاعـدة

مع ما أجـيت اتحرك حتى افوت
حسيت بأيـد تحاوط حلگـي..گمت ادفر اريد اتفلت و الـرعب تملكـني..عضيت الأيد الي خانگـه صوتي
بس ما تأثر دموعي نزلت على خدي مثل الجـمر
گمت بگلبي انادي ابوية امي..علي اي شخص ينـقذني حتلو جواد يطلع و يصـرخ
بس محـد سمع صوتي..ايديه ربطهن بيده اكبر مني بالحجـم و بسرعة و بسـهولة گدر يسيطر على حـركتي..
ضـربته على چتفه بـراسي بس وراها حصلت ضربة على عنـقي من ورا
خلت الصورة عندي تتـشوش
بس مـا فقدت..اغمض و افتح بين النايمة و الگـاعدة

چنت بس اسمع حفيف الشجـر و تكـسر الاغصان بالگـاع بسبب مشيـنا..اريد انطق بس السـاني ثگيل كلش..

غمضت عيوني بعد ما حسيت ما عنـدي اي طاقة..فتحت جفوني و انه متمددة على ارض قاسـية ترابية
السگـف من سعف و اخشـاب..ايدية مربوطة بحـبل و حلگـي ملفوف بـ قطعة قمـاش
اريد احرك ايدية ما اكـدر أون و انه اتحـرك بعشوائية