မိုးသည် ခပ်အုံ့အုံ့။ ရာသီဥတုမှာ စိုထိုင်းကာ နေရောင်မှာ အားဖျော့လှသည်။ မှူး ဖိုင်တွဲအနီပိုက်ပြီး ကားပေါ်မှ ဆင်းလာတော့ နေ့သစ်က ရုံးရှေ့တွင် ရပ်စောင့်နေသည်။ မှူးအနည်းငယ်အံ့သြသွား၏။ နေ့သစ်က မှူးကို ပြုံးပြီး ကြည့်နေသဖြင့် နေ့သစ်ဆီ လျှောက်သွားလိုက်သည်။
"မှူးကို စောင့်နေတာလားမောင်"
"ဟုတ်တယ်၊ မှူး မောင့်ဖုန်းမကိုင်လို့''
"တမင်မကိုင်တာမဟုတ်ပါဘူး၊ မှူး အလုပ်များနေလို့ပါ''
"မောင်သိပါတယ်၊ မောင်အခုပြင်ဦးလွင်သွားရမယ်၊ မောင့်သူငယ်ချင်း weddingအတွက် outdoorဓာတ်ပုံရိုက်ဖို့ မှူးကို လာပြောပြတာ''
"သွားလေမောင်ရဲ့၊ ကားလည်း ဂရုစိုက်မောင်းဦး''
မှူး အေးဆေးစွာပင် ပြန်ပြောသည်။ နေ့သစ်က မှူးဘယ်ဘက်လက်ကို ဆွဲယူပြီး ရွှေရောင်နာရီကို ပြုံးကြည့်သည်။
"မောင်ပေးတဲ့နာရီလေးကို ဝတ်ပေးလို့ အရမ်းပျော်တယ်၊ ကျေးဇူးပါမှူး"
မှူး ဘာမှမပြောဘဲ နေ့သစ်ကို ကြည့်နေမိသည်။ နေ့သစ်က သူ၏ဘယ်လက်၌ ကိုင်ထားသည့်ကော်ဖီဘူးကို မှူး လက်ထဲသို့ ထည့်ပေးလာ၏။
"မှူးအတွက် ကော်ဖီ မောင်ကိုယ်တိုင်ရှယ်ဖျော်ထားတာ''
"မှူးသောက်လာခဲ့ပြီးပြီ"
"သောက်ပြီးလည်း ထပ်သောက်လို့ရပါတယ်မှူးရဲ့၊ အထဲဝင်တော့လေ"
မှူး မဝင်သေးဘဲ ရုံးထဲသို့ လှမ်းကြည့်သည်။ တွေးဆကာ အားမနာစွာ စကားတစ်ခွန်းထုတ်ပြောလိုက်သည်။
"နောက်တစ်ခါ မှူးအလုပ်ကို မလာပါနဲ့၊ ဒီနေရာမှာ နားတွေမျက်စိတွေအများကြီးရှိတယ်၊ မှူး ဘယ်သူ့အပြောမှမခံနိုင်ဘူးမောင်''
နေ့သစ်က ရုံးပတ်ဝန်ကျင်အနီးအနားဆိုင်များရှိ လူအချို့၊ ဝန်ထမ်းအချို့ကို ကြည့်လိုက်ပြီး မျက်နှာညှိုးသွားသည်။
"မှူးက မောင်နဲ့ချစ်သူဖြစ်ရတာရှက်လို့လား၊ မောင်က ယောက်ျားအစစ်မဟုတ်လို့လား"
"မောင်က အခုချိန်ထိ မှူးစိတ်ကို နားမလည်သေးဘူးပဲ"
မှူး ကော်ဖီဘူးယူကာ ရုံးထဲဝင်လာတော့ ဝန်ထမ်းများမှာ တီးတိုးတီးတိုးလုပ်နေရာမှ ကိုယ့်နေရာကိုယ်ပြန်ထိုင်နေကြသည်။ မှူး မန်နေဂျာထိုင်နေရာ၌ ဝင်ထိုင်ပြီး ကော်ဖီဘူးကို ချကာ ဖိုင်တွဲကို စားပွဲပေါ်တင်လိုက်သည်။ မန်နေဂျာထိုင်နေရာနှင့် ရုံးစာရေးဝန်ထမ်းတွေနေရာမှာ သိပ်အဝေးကြီးမဟုတ်သည်မို့ သူတို့ မှူးကို ကြည့်ပြီး တီးတိုးတီးတိုးလုပ်နေကြောင်း မှူးသတိထားမိသည်။
YOU ARE READING
ရင်ထဲက မှူး/ရင္ထဲက မႉး
Randomမှူးကို လှည့်စားဖို့ မကြိုးစားနဲ့ မောင် နောင်တအကြီးကြီးရစေရမယ် မႉးကို လွည့္စားဖို႔ မႀကိဳးစားနဲ႕ ေမာင္ ေနာင္တအႀကီးႀကီးရေစရမယ္
