سلالة العنفوان ..(ذنب عيناك)

الذنب السادس و العشرون

الذنب 26

الذنب السادس والعشرون
رواية...ذنب عينيك ..سلالة العنفوان
منقوله للكاتبه...نور سمو العراق

💔💔💔💔💔💔💔💔💔💔

ما أصعب ان تعيش داخل نفسك وحيد
بلا صديق بلا رفيق بلا حبيب
تشعر أن الفرح بعيد
تعانى من جرح.. لا يطيب
جرح عميق.. جرح عنيد
جرح لا يداويه طبيب
ما أصعب أن ترى النور ظلام
ما أصعب أن ترى السعادة أوهام
وأنت في غربتك وحيد "

.............................................
و

كعت فريسه لشيطان حرك كل ذكرياتي واستمتع بدخان المصايب الي صارت..
حسيت من اخذني من بيت جدي اخذني مثل الجثه ورماها بتابوت
روحي صارت مثل المومياء محنطه لا اتحرك ولا انطف وحتئ روح ما بية...
جسمي مثل الي اخذ جرعة كيمياوي ضد الحياة مدا اكدر اتنفس والوجع هد حيلي...
دموعي تنزل بصمت وبيبي تبجي علية وخالي واكف لا حول ولا قوة...والبنات يباوعلي بخوف...
اول ما صعدت السيارة واشوف شرهان كاعد بالصدر من شافني ضحك بضحكه شامته زرفت گلبي
كأن يكولي بضحكتة وهاي غصبا عنج رجعتي النه...
صعد عمي فياض بالصدر وشرهان يسوق داى وجهه علية كال...هلا ببنت الخال واخيرا رجعتي النه
صرخت بي بصوت مفجع وعالي ...ما رجعتتت ما ارجع اني انتم جبرتوني انتم اخذتوني هسه صرتو زلم من اجيتكم مجروحه داواني...
دار وجهه عليه فياض وجهه يخوف اكرع وابيض وجهه سمييين وكرعته تلمع وعيونه ناطه مثل عيون الضفدع كال...بله عيدي شگلتي؟
ركزت بعيونه بثبات رغم خوفي ورديت عليه...ايي ماكو بيكم الزلمه الي نصفني اجيتكم وجرحتوني وطردتوني خايفين علئ نفسكم وكان بابا مو منكم وبيكم
كال ببرود...اني طردتج؟ يعني لساني نطق ان اني ما اريدج وطلعي من حياتنا
جاوبته بانهيار....ام بثينة هي كالت وكالت ما نريدج وعمج بس ترجعين يذبحج وشرهان طردني وهو وامه واتهموني بشرفي...
رد بانزعاج...لا تحجيلي شرهان وعمتج وام بثينه احجيلي انيييي شفتج ؟ طردتج ؟
مسحت دموعي واني ارجف...اني ما شفتك بس انت مثلهم...
ضحك بسخرية...عذرج اقبح من فعلج وعقابج عسير عندي البنيه الي تطلع من دون علمي وتتزوج بدون علم اهلها الذبح مصيرها نوصل للبيت ويصير خير
عار علئ عشيرتنه انتي شارده من اهلج وسمعتج بالطين خريجة سجون انوب رايحه مدري جم واحد متزوجه بسر خوش تشتغل بت اخوي والله...
انتي ذبحج حلال احطج علئ علوه ونصه واكسر ضهرج...
جانت صدمتي اكبر من كل شئ الأحرف كلها تلاشت عندي شنو من ملة ذول جذبو الجذبه وصدكوها ...
هم الي طردوني وما رادوني خلوني،بذله وتالي يحملوني السبب...وكسروا حضي بهل دنيا..
اشوف روحي مقيده بسلالة عنفهم...وضحكاتهم المستهزئة مثل طنين الذبان فوك راسي
لحضات من صمت عندي ما نطقت الكلام ويه الحمير صعب ..لذلك فضلت السكوت
هم لعبوها ضدي صح وكذبو الكذبة وصدكوها...
يجتاحني الحزن ، يعصر قلبي واحشائي لحد الوجع الى متى  ابقى مصلوبة على مسامير الالم ، مسجونة بعتمة  الظلم والطغيان..
مشت بينا السيارة ، واني حسيت راح افقد السمع وحتى النظر ، عيوني احسها رجعت تغوش أكثر وأكثر وعدمت عندي الرؤية
أسمعهم يحجون بس مايوصلني كلامهم واضح ، اريد افسر شنو يحجون أريد اعرف مصيري شنو ماجاي أعرف اريد بس أقوي نفسي ماكدر احسن نفسي ضعيفة حيل ..
امتزج كلامهم ويه صوت محرك السيارة العالي واصوات باقي االسيارات الي تمشي قريب منه على نفس الشارع
حسيت بشرهان التفت عليه بعد ماضحك ضحكة عالية ماعرفت شنو سببها
شفت ايده يلوح بيها قريب من وجهي ويحاجيني بس مو كلش زين اشوف وبس اسمع اسمي بلسانه
قربى عيونج حمر ؟ كافي ترفكين بيهن قربى كافي ...
خزرته ودرت وجهي على الجامة وصرت اباوع للطريق تمنيت عندي جناحات افتح الباب وأطير للسما واخلص منهم يمكن هاي الطريقة الوحيدة الي بيها اخلص منهم .
مسوي نفسه مهتم بيه الحقير مدري منووو طردني وطعني بشرفي وتخلى عني اني احمد الله واشكره انوو ابد ماحبيته ولا گلبي مال اله وهسه اكرها كره العمى
الله ينتقم منهم اثنينهم ياربي خلصني منهم
ذيب وينك تعال شوف اسروني واخذووني والله يعلم شنو ناوين وشراح يسوون بيه
ماحسيت على نفسي من غفيت دقايق وكعدت على اثر طبة قوية بالسيارة .. فزيت واني كلي امل بلكي ذيب عرف واجه ولحكنه
بس سمعت شرهان يكول لفياض هذا باب الصندوك الورى انفتح انزل اسده ..
خاب أملي من عرفت هالشي
بقوا واكفين ونزل شرهان يتأكد من السيارة ..
اتضحت الرؤية شوي شوي عندي ،  قريت لافتة البصرة تودعكم .. متتت بجي كضيت ايام حلوة بيها 
وارتبطت بذيب وصرت مرته اتمنى اعرف ردة فعله وشراح يسووي من يعرف خطفوني الي مايخافون من الله
رجع صعد شرهان باوعلي ، درت وجهي بسرعة ع الجهة الثانية من صعد وسد الباب  فياض ساق السيارة بسرعة لان احنه اصلا على الطريق السريع
واني كاعدة ورى لا حول ولا قوة ..
اتمنى املك قوة العالم كلها حتى انقذ نفسي منهم اضربهم انتقم منهم واطلع كل غضبي عليهم بس اني حاليا اشوف نفسي اضعف كائن واني بين اديهم مقيدة ومكبلة ...
دخلنه لبوابة بغداد واني صحى بيه الحنين لديرتي بس هالمرة حنين ويا ألم وحزن وخوف
صارت تمشي السيارة بسرعة والوقت يمشي ويمر
وصلنا لمنطقتنا وشفت بيتنا بعده مكروب
جم اه انزرعت بيه بنفس اللحظة
صحت بيه الذكريات الغالية الحلوة ويه أهلي وأحبابي والا اني متت من زمان واندفنت واندفن وياي كل شي حلو وكل شي غالي على كلبي
اباوع على المكان ودموعي تنزل هنا جنت اكعد يم الباب وبيدي لعابتي واباوع على اخواني يلعبون طوبة بالفرع
لو مرات اكعد هنا واشوف ابويه جاي من بعيد وعلى جتافه الركية شايلها يرفع راسه من يشوفني يبتسم رغم تعبه رغم انحناء ظهره والحمل الي شايله
هنا جنت اكعد والتهي العب توكي ويه بنات عمي او جوارينه ووكت المغربية اسمع صوت ماما تصيح عليه ليهسه صوتها بأذني ماما قربى فووتي صار المغرب
لو من اطلع العصر مسبحتني ماما ومشطتلي وحتى ضفايري بعدهن مبللات مي واكعد هنا يم الباب
هواي ذكريات شنو اريد انسى لحتى انسى منها طفولتي مراهقتي كلها هنا جانت تجري بدمي الذكريات وساكنة بعقلي
اتمنى افقد الذاكرة لان دا اتألم بشكل فضيع واني ما اكدر استرجع ذيج الايام الحلوة ولا اكدر اعرف خبر عن اهلي ولا اككر انسى صوت امي الي يصحي بيه الالم ويرجعني لذاك اليوم المشؤوم الي شفتها بي ممدة لا حس ولا نفس لو من دخلوها علينا بالتابوت
مرت السيارة عبالك داست على روحي ومرت ذكرتني بأيام ذكرياتها تفوت للعقل مباشرة وتخربط كل شي بي
وصلنه لبيت عمي فياض فتح الباب شرهان واني بقيت ساكنة مااتحرك سمعته كال مراح تنزلين ؟ نزلي البيت بيتج عيوني
خزرته ودرت وجهي مد ايده يريد يلزمني وينزلني دفعت ايده ونترت بي لااا تلزمني
هو وخر ايده واني نزلت اول رجل وهو قريب مني ، اريد انزل الثانية كتله وخررر ..
هو ابتعد خطوات ليورى واني نزلت بقيت واكفة يم الباب .. وهم فتحو باب البيت وشفت بثينه وامها
طلعوا من الاستقبال ومدري شلون نازلة عليهم الحنية
استقبلوني يحضنون بيه ويبوسون
قربى شلوونج وولج شخبارج يابه مشتاقين همزين جيتي حتى نشوفج
اني ما ابديت اي رد فعل ابد اباوعلهم بعيوني واخوزر بيهم ما طايقة اشوف اي واحد بيهم ولا اريد اسمع صوتهم مو هم نفسهم الي طردوني وطعنوني شنو سر هالحنية المفاجأة  هاي!
دخلت للاستقبال شفت مرة شرهان وبطنها عالية اجت عيني على بطنها لا إراديا وهيه مخليه ايدها على الحايط ومتخصرة  وتباوعلي من انتبهت على عيني راحت على بطنها عدلت ثوبها وضمت بطنها وسمعتها كالت قل اعوذ برب الفلق
تنهدت وتمنيت بهاي اللحظة اختفي من كدامهم وللابد .. رحت كعدت بالصالة واجت كعدت يمي بثينة تطك بعلجها
ضربتني بخفة  وكالت طلعتي مو هينة  ولج قربى سمعت متزوجة بالسر ومن واحد ضابط عيني عيني احجيلي بالله ولج لا تضمين عليه اخيتج اني
ترفع بحاجبها وتضرب على صدرها
وظلت تسأل شلونه بالله حلو بربج ؟
سمعت صوت شرهان يكول خلولها غده الطريق طويل اكيد هسه جاعت
مرته سمعته هيج كال راح تبعته .. وعمه ام بثينة خلت كدامي صينية اكل جانت مسوية غدا مركة فاصولية وتمن ابيض وزلاطة
كالت اكلي عمه شوفي وجهج اصفر وضعفانة هاي شمسوين بيج اهل الببصرة مضعفينج جنتي هنا شحلاتج ياكل بيج الاسد اسبوع بس بيت جدج فكور اهل امج
باوعتلها بسكوت وبنظرات عدم رضى هاي شدتخربط بالله هو اني من يومي ضعيفة
حتى الحنية منهم تقرفني ولو هيه حنية مزيفة أصلا لان اعرفهم حيايه من جوه ليجوه
راحت ام بثينة  وبثينة مدت ايدها للأكل وظلت تاكل وتكولي وهيه اللكمة بحلكها اكلي ولج قربى شجاج خوش مركة طابخة ماما
هزيت راسي واني اكوللها ماريد اكلي انتي ..
ولج ستوني متغدية بس على واهسج اكل ..
درت وجهي عنها وهيه تحجي ..
لشويه هيه شالت الصينية وراحت .. واجتي وراها مرة شرهان كعدت يمي تتنفس بعصبية
وطختني باصبعها بزندي وظلت تحجي على كيف
سمعي ولج قربى اني اريدج تبتعدين عن شرهان
افتهمتي الحجي الي داكوله الج لو لا ؟
باوعت عليها بصدمة وعصبية شبيهم ذول ولا واحد بي خير
جاوبتها بتعب وانفعال ترى اني متزوجة افتهمتي متززووجة مو بحاله اني ومدام مالج ثقة بزوجج روحي كليله هالحجي مووو اليه
كالت باصرار وحقد لا اني الي ثقة بزوجي بس الج انت ماالي ثقة بيج ولا ضامنتج شسوين هيه الي تفوت للسجن كولشي اتوقع منها لذلك ابتعدي عن زوجي احسلج
وكملت كلامها واني اباوعلها باستهزاء
وازيدج من الشعر بيت اني حامل هسه وشرهان يحبني ديري بالج تفكرين تعيدين امجادج وياه وتدورين ستر براسي
جاوبتها لج بابا اني متزوجة شتحجين انتي ؟؟
ردت اي بس متزوجة بالسر يعني كل اعتبار ما الج هيه الي تتزوج بالسر شنوو قيمتها بالله ؟
صكيت اسناني كلامها ابد مينحمل ولا اني بحالة اكدر ادافع عن نفسي كلش تعبانه مالي خلك حتى ارمش
سكتت عنها علكولتهم الحكران يكطع المصران حكرتها حجت ولا جني اسمعها خلت وراحت ..
اجت بثينه تطك بعلجها وتعدل بكذلتها وكالت كومي قربى كومي حضرتلج مكان تنامين بي ...
كمت وياهه من صدك اريد افوت بغرفة وماريد اشوف واحد منهم ...
.....................
سوزان...
لعبت كوولش من هاي الملابس المرعده وحتئ لونهن رايح اعتقد هاي مال عرس بيبته ..
مهقولة هل سحاويل تلبسهن بيبيته هسه؟
بعدها انصدمت...عزاااا بس لا فاروق كذب عليها وگلها هاي مگديه وانطتني هاي الملابس المسحولة اوووع...
بسيطه بسيطه ونبي يا فاروق اذا ما طبرت راسك مرة اللخ فلا اطلع سوزي...
لعد اني تجيبلي هيج ملابس جرب حتئ ما ينغسلن من كثر ما مرعدات...
للعصر وسمعته فد باب الحوش ودخل ...
لبست حذائي ويه ثوب بيبنه الفضفاض ودلعته القوية لميت شعري و وكفت بباب الغرفه وكتفت أدية
باوعتله من فوك ليجوة جان شايل علاگة ولابس بنطلون اسود وقميص جوزي
كال بغضب...شبيج تباوعين وتخوزين متشمته حضرة جنابج
رفعت حاجب...اكولك عيني هاي الملابس الي جبتهم الي منين جبتهم تلعب ستين نفس وجرب وأي موديل مبيهن...
خله العلاگه علئ الدرج ورد عليه بانزعاج...بلا لغوه اخذي العلاكه وسويلنه شئ نتزقنب بي..
ضليت واكفه بمكاني وما تحركت كعد علئ الدرج كال ...راح احسب من واحد للخمسه اذا ما اجيتي تتحسفين علئ عنادج وتتمنين لو جايه ولا صاير هل شئ...
ضحكت باستهزاء...شنو تسوي مثلا ؟ وهااا لا تنسى راسك بي ست خياطات...
رد عليه...مو اجي اشوهه هل حلك الكاعد يستهزء...وحط بي عشر خياطات...
جاوبته بقرف....اووووووع احجي عدل
رد ببرود وغرور...واحد...ثنين...تلاثه
ضحكت..تهديدك ما يخوف حتئ اجي اخذ العلاكه مكتلي شتسوي...
حجه حجاية صدمني بيها بلعت ريكي خجلانه ومتفاجئة شجعت نفسي كتله...مو مهم
مد ايده للعلاكه وطلع خياره منها مسحها بيده واكلها وسخه باوعلي كال...وهااا اخليج تترسين الحوش زعاطيط ..وغمزلي...
حسيت دخنت وهو رجع كمل كال...اربعه ...خم
ما كمل كلامه واني مشيت متعصبه واطك بكعبي وثوبي الواسع النيلي واخذت العلاكه عتيتها قووية من يمه وعيوني تخزرة بعصبية...
كال ببرود ونظرات سخيفه...سويلنه مرگة بيتنجان مشتهيه
كشرت عن ملامحي ...اوووووع مرگ باذنجان هاي شلون تصير ما اعرف ...
طلع جكارته ويدخن...اي حقج صبيحه وين معلمتج كله علئ المفطح والسمج والدجاج ما مركم حصار مثل حضنه مخلصيها محروك اصبعه...
باوعتله بطرف عيني...عين الحاسود بيها عود
جاوب باستفزاز...وحق ربج ما تنحسدون انتم بيت سبوحا لو مو عيني لو چويح اجيبه هم ما يحسدكم
عقدت حواجبي باستغراب... منو هذا چويح انوب
جر نفس...صديقي حاسود المنطقه ...هسه بله لغوه روحي سويلي غدا...
خليت ورحت للمطبخ وكعبي يطك لكيت بالمطبخ مدفئة حاولت اشغلها معرفت مديت راسي وصحت علية...فاروق
هو جان يدخن وصافن باوعلي كال...نعم
بنظرات متوسله باوعتله...عفية شغلي المدفئة
عقد حواجبه مستغرب...منيلنه مدفئة بس لا قصدج الچولة ؟
رفعت اكتافي بمعنئ ما اعرف..اجه ويايه وكال...تعاي تعلمي مو كل شويه وصحتي تعال فاروق صيري مرة معدلة...
جاوبته واني اعدل الدلعه وهو يباوع للكشفته الدلعه ...تمام
شغله وراح واني غسلت الباذنجان وقطعته قطع صغيره وكذلك البصل هو علمني كال هيج حمستهم حمسه خفيفه وخليت طماطه ومعجون سوه وخليته خمس دقائق...وطفيتها
هو جايب خبز من امه كصصته وخليته بصينيه وخليت عليه من المرگه
هو صاح علية كال جيبي وياج فحل بصل وسوي زلاطه بسرعه متت جوع
كشرت عن ملامحي...عساك ميت وخلصانه منك
حضرت الصينيه وياها بصل انطيتهم اله بس مجان اكو شوكات حتئ خواشيك ماكو
كعد بهمه كال...بسم الله
باوعلي ...تعالي اكلي
هزيت راسي بنفي...لا ما اريد لان ماكو خواشيك
ضحك بقهر...هو تشريب وين اكو تشريب ينوكل بخاشوكه اذا ما بيدي ما احس بيها طعم...
تقربت منه وكعد ياكل واني اباوع عليه طريقتة بالاكل تشهي بصراحه رغم اني احب الاتكيت
ضليت اكل باطراف اصابعي وهو هوووسه هوووشه يكرط خيار وبعدها ياكل تشريب ويضرب راس البصل بيده مرده مرد
اصفن عليه بفهااوه ولازمه الخياره بيدي وهو لا يباوعلي ولا شئ بس ياكل...
صينية ضلت بس المواعين حتئ غسل ميحتاج الهن غسلهن غسل...
جر نفس كال...الحمد لله طبعا ولا اشتهي اكل والله من انضربت لحد الان واني ما اشتهي اكل
فتحت حلكي عرضين مصدومه من كلامه...عزااا لعد منو اكل الصينيه كلها
مسح شفايفه بيده...انتي ما شاء الله ولا يكول صبيحه جانت تنكل عليج سمج ودجاج بس يله بالعافية حابج تسمنين...
تجاهلت كلامه...طيبه المركه عجبتك
جاوب من ورة خشمه...مركتيش ورديه اول مره اشوف مرة ورديه ولج حتئ المعجون ما فاير
ضحكت مقهورة...ههههه اذا مطيبه اشو اكلتها كلها...
جاوب ببرود المهم نحشي المعده لا اكثر ولا اقل..
لزمت ايده بمكر ومسويه روحي حنينه وحزينه اتمسكن...فاروق عفية شوكت تاخذني لاهلي
جر المخده ونام...بعد سنه
ثواني وشخر واني شلت روحي وركعتها بالكاع لا يفكر لا يمهد للنومه كبل شخر...
نومة بلا كعده كوون...
نمت مقابيله واني اباوعله ملامحه الحاده وشكله السمح الي ما يدل علئ سوالفه وخبثه
انصدمت جان يتفزز كل شويه ويحجي وهو نايم يشرح معاناته ويشرح كرهه الامي