سلالة العنفوان ..(ذنب عيناك)

الذنب 31ج2

البارت 31

رواية...ذنب عينيك ...سلالة العنفوان
منقوله للكاتبه ...نور سمو العراق

💔💔💔💔💔💔💔💔💔

برحيله عم الظلام من حولي
بعد ماكان هو لي نورا و بلادا ، ارضاً وفضاءا
بعده استقر بي الحال جالسة على قارعة طريق لا يمره الفرح ولا تشمله سعادة ..
ترك قلبي اشلاء مدماة من الحزن تركني بحالة موت القلب قبل انتزاع الروح من الجسد في الرحيل الابدي
رحل وترك حكايتي من دون بطلها وأي بطل هو !
رحل وترك ايامي باردة من دونه
فقط لي الحق بأن امارس الحزن من بعده
رحل نصفي الاخر تاركا بي من الرعب اشده ومن الحزن اعظمه
غيابه صار يمزقني ، وهمي اكبر من قلبي ، بدونه انا كمنفية من وطني وانزوى قلبي كيتيم مكسور ...
ترك برحيله فوق اكتافي جبالا من الهم ، جبالا لايستطيع ظهري الضعيف المحني احتمالها ، رحيله جعلني قابلة للكسر بل كأميرة مكسورة تجر اذيال خيبتها ، بعد ان كنت في حضرته أميرة شامخة ، الان انا اتخبط كثيرا وانا بعيدة عن مملكته ،عاجزة على الوقوف ولم تعد قدماي قادرة على حملي احساس مرعب في اعماقي وتساؤول قلبي لي يذبحني ويحز نحري ، هل حكايتي معه انتهت واننا حتما انتهينا و الى الابد؟

المقتبس من ابداع الكاتبه Nora-Naser

.........................
ا

نتزع شظايا روحي من نطق اخر جمله ..اخذو فاروق مكانه!!
يغني لازم يسلم نفسه يعني احنه انتهينا خلص كل شئ ذياب مصيره تحدد ولازم ينسجن وترتب علئ سجنه هوايه امور منها طلاكي منه جزاء موت شرهان
ما اعرف شصار بيه من ذياب كال هيج تزلزل كل كياني جنت انانيه بكل شئ انانيه ان اريد ذياب ما يسلم نفسه متناسيه انسان مضلوم دخل لسجن بسبب ذياب
لزمته من قميصه برجاء،ودموع متناثره..فدوه ذياب فدووه اذا الي خاطر عندك لا تروح اذا تحبني لا تسلم نفسك
تنهد بقلة صبر ورد عليه ...يا قربان ما اكدر اخوي بالسجن وانه السبب من حقو يطلع فاروق ما الو سبب بلي صار انه المذنب وانه الي لازم اسلم نفسي من البدايه ما اريد اكون اناني واخوي مسجون وانه محدر هينا
شهكت بحسرة...واني ذيااااب ؟
احتضن اكتافي وعض شفته باسف كال...لا تخافين انه وصيت عليج وهم كل السندات راح يحولهن فاروق باسمج واسم الويلاد وهم الفلوس كلهن اخذيهن
صرخت بحسره....لاااااا ما اريد لا توصي ولا تسجل شئ شنو الفايده ذياب شنو فايدة الفلوس والسندات اني ما ارييييد لا فلوس ولا سندات ولا اي شئ اني اريدك انت ..انت يا ذياب مو غيرك
تمسكت باديه واعصرهن بيدي بقسوه واحجي بلهفه ودموعي تارسه وجهي ...اني يا ذياب لو اعيش مشرده لو اخلص عمري كله كله وياك نايمه علئ التراب ما راح اشكي بس المهم انت ويايه انت بجانبي بس وجودك بصفي هذا يكفي بس نفسك بالحياة يسوه عندي الدنيا واهلها فدوه ذياب حس بشعوري لا تخليني
احتضني بحب ورد عليه...انه اروح فدوه الج يروحلج فدوه كلبي ودكاتو دكه دكه لاتحيريني ابوس ايدج انه صاير بوسط نارين نارج ونار فاروق
ما اريدو يضل بالسجن وهو ما الو اي ايد بالسالفه ويتعذب بسببي فاروق تعب جثير وهساع يله ارتاح ما اريد يتحمل ذنب مو ذنبو
وانتي الكاسره خاطري وظهري ما اريد اشوفج بهل حال انتي اذا تضلين هيج راح تكسريني وتدمريني ما يهون عليه اشوفج بهذا الحال اريدج تكونين قويه حرمتي الاعرفها الما يهزها موقف ولا اعصار
همست بنحيب...ذياب ما اكدر
باس ايدي بحب كال...لا لا طمنيني وكولي لا تخاف ذياب انه كدها انه حرمتك راح اساعدك وما اتخلئ عنك وراح ادير بالي علئ نفسي وعلئ ويلادي
هزيت راسي بنفي...ما اكدر ذياب من دونك ضعيفه اني انت الحايط الي احط ضهري عليه انت تجوتي
اني اقوئ بيك انت مو بغيرك
همس بحب...صبري حبيبتي اصبري و وعديني
تشنجت وبجيت بصمت مريع....ما اكدر ما اكدر والله يا ذياب ماااا اكدر كلبي يوجعني عليك اخاف عليك اني ...
جر نفس ومسح دموعي...لا تخافين ما بيه شئ هذا اني كدامج
شهكت بصوت مسموع...تدري ذياب لو تضل سنين بالسجن لو يحكمونك مؤبد راح انتظرك العمر كله ولا اجزع المهم الك نفس بالدنيا
بس الي مخوفني اخاف يعدموك او تختفي مثل تميم ومثل ابويه وهنا صدك اموووت لان انت الكشه الخليت امالي عليها وبنيت احلامي بيها
مسح دموعي ورد عليه...ادحكي الي بويه العمر واحد ما ياخذو غير باري واذا الله كاتبلي عمر ما راح اموت ولا اي قوه تكدر توكف بوجه الخالق خليها معلومه الج
بس اذا هذا يومي اصبري واحتسبي وخلي يكون عندج علم ذياااب يموت علئ تراب رجليج ويعشكج عشك المخابيل ولو يرجع بيه الزمن اتزوجج وانقذج واجتل لخاطر شرفج افتهمتي !!
اشرت علئ نفسي بحسره...واني ذياااب واني اليتيمه المكسوره المنبوذه من الكل الي،ما لكت الحنيه ولا لكت الامان الا بحضنك شراح اكول شنو حسوي شلون اتحمل فراكك شلون الي نفس اعيش من دونك
كعدت علئ ركبي واني اباوعله مثل الاسيره والدموع نشفت بوجهي ونزلت غيرها جديده احتضنت اديه الصدري واني اشهك ...ليش ذياب لييييش،ليش خليتني اتعلق بيك ليش خليتني احببك
لك بعمرك كله ما خليت بالگلب لجمه لك بعمرك ما ضربتني بعمرك ما جرحتني بكلمه شذكر من مواقفك الحلوه ويايه وشنسئ
والله لو ضاربني لو سابني لو مدمرني ولا مسوي،بيه هيج انت ما خليت الك نقطه اكرهك بيها شلون راح اتحمل افراكك وانت روحي من الدنيا انت الدنيا كلها
ما خليت بداخلي جرح يمكن يبرر غيابك عني ما اكدر اشوفك مو بخير واسكت ما اكدر روحي هايمه بيك وما تحب ولا تهوئ غيرك ولا احد يداويها غيرك انت
كعد ركبه ونص كدامي وسحبني الصدره باس راسي ورفعه باس دموعي وخدي كال...لو ما فاروق جان حبست روحي هينا بروحج ولا تحركت خطوه بس اخوي ما اكدر اتركو مسجون وانه هينا متنعم وساكت عنو
احتضنته بحب واشم بصدره ونحره ...احببه والله احببه احبه اكثر من بزر بطني احبه اكثر من روحي ينافس اهلي بمحبتي اله
ضحك عليه وبعدني شويه رجعت نفسي الحضنه واتمسكت بي اكثر ضحك بصوت واحتضني كال...عجل هساع شوكت ارجع
همست...لا ترجع
باس كتفي ورد عليه...راح ازعل منج يوول اهدي واخلي الامور طبيعيه ولا تضوجيني يروحي انتي هيج اذا ضليتي راح اعيش بالسجن وانه مهموم طمنيني عنج وكولي ذياب روح ويبرالك علي مثل كل مره من تودعيني
رفعت عيوني الدامعه اله همست ...روح ويبرالك ابو الحسنين وربي يحفظك ويسر خاطرك وكلبي وعقلي وروحي كلها اخذتها وياك وكلها متمسكه بيك وما تهوئ غيرك روح مودع بس الله والله ما يضيع ودائعه
جر نفس وباسني كال...خلي اشوف علي وغدير اودعهم
دخل الغرفة بيبي وغدير جانت نايمه هي وعلي هو شالها وباسها فزت بسرعه وباوعتله مثل المخلوسه وصرخت بوجهه
هزها بين اديه وهو يضحك الها بحسره و يبوس بيها...باباتي يعمري عليش تبجين ول ول منو وياج بنت ذياب تبجي وانه راسي يشم الهوا ول اليوم اهل البصره ما يصبحون ببيوتهم
ابتسمت علئ كلامه وحطيت ايدي علئ جتفه دار وجهه علية وابتسم
ضل يلعب بيها ويبوسها وهي هدئت كعد علي وتشبث برجلين ابوه ويحجي وياه يتذمر يغار من اخته
انطاني غدير وشال علاوي باسه بحب واحتضنه ويحجي وياه كله..دير بالك علئ امك يحلو انت ما اوصيك بامك واختك
احتضنته من وره وحطيت راسي علئ ضهره واني انتحب
حسيت بي يتنفس بعمق وحسره وسكون من حس بيه حتئ عضلات ضهره تقلصت...
همس...قربان اذا جبتي بنيه سميها هدير واذا ولد سمي عمر خوش ؟
جاوبته بعذاب...مثل ما تريد بس اريدك انت موجود بوقت ولادتي وتدعيلي الله يخفف عني الوجع
رد عليه بحب...بعد تسع شهور اذا طالع من السجن اترك كل شئ واكون بجابنج واذا بالسجن اخلص ليلي اناجي ربي بكل يوم وانتي بشهر التاسع تا يخفف عنج الم الولاده ويكومج بالسلامه انتي والطفل واذا ميت فيكولون الميت قريب من رب العالمين اكيد روحي مثل الطير تحوم عليج
شددت من قبضتي عليه وحتضنته اكثر همست...لا تحجي هيج تعذبني وتوجع روحي
نزل علاوي علئ الارض ورد عليه...احببج والله لو بيدي اضمج بصدري واخفيج عن العالم ادللج اكثر ابنيلج قصر بروحي بس الحظ مشه عكسي
بسته بشفايفه حيييل وحضنته...احبببك ما اريد اي شئ بس انت والله
ابتسم الي...وانه احبج يله لازم اروح ما اوصيج علئ نفسي يا نفسي
ضليت متمسكه بي وابجي ما اريده يروح وبعدها راح مجبور .واني مجبوره اتركه راح عني ذيبي تركني وحيده اعاني بهذا العالم المظلم انوح علئ ايامه انوح علئ سعاده نحرمت منها وايام تعيسه جايتني بغيابه اني منو الي من بعد ربي وبعده
راح ذياب اني وكأن نزع روحي من جسمي واخذه وياه تركني لليالي سوده ومعتمه ما تنور الا بوجوده
راح ذياب اواجهه هذا العالم الكئيب الوحدي...
................................
فاروق
من بعد ما ذياب كتل شرهان وحالتنه حاله لا ليلنه ليل ولا نهارنه نهار جنه علئ اهب الإستعداد مستعدين لكل حركه من عمها فياض
الشامخ اجتمع بشيوخ الغربيه كلهم وحجه الهم عن الموضوع الصار وكلهم جانو ويه ذياب وكالو هذا شرف ومن حقه يكتله بس شلون يتزوج وحده من المعارضين للدوله هاي نقطه علئ ذياب
الشامخ برر لذياب لان يحبه وكال هي البنيه مو معارضه ولا اهلها تهمه باطله عليهم بسبب عمها الحاقد علئ اهلها
كالو احنه مستعدين وياكم واحنه اخوه والي يوكع عليكم يوكع علينه وان شاء اللة نوكع كدامكم وذياب ما نتركه لو شما صار
لأول مره اشوف الشامخ هيج بموقف ضعيف ومحتار شنو يسوي حتئ جدي قاسم اجه من البصره وكال انه وياكم شتردون كدامكم انه وعشيرتي فده لذياب وتردونه نسوي
تشكر منه الشامخ ونزل راسه باسف موقف جدي قاسم كسر الشامخ بي وبين اصل اهل البصره وبين اصل الغريبه الي رفض الشامخ الحمد لله الناس معادن واحنه بين معدنه ومعدن بيت قاسم وبيت جميلة المطلكه...
جان عندي دوام بالجامعه رحت كلت اخذ اجازه حتى اتفرغ الموضوع ذياب لان بعد حتى نفس ما النه بالكلية
اول ما دخلت للجامعه ورحت للقسم اخذت اجازه وبعدها للعماده قدمت اسبابي وقبلو الطلب
اول ما طلعت وما اشوف الا الامن طوقوا الكليه واعتقلوني،من وصلت هناك كالو انت مكان ذياب يسلم نفسه يله نتركك
عادي تقبلت الوضع روحي فده ذياب واذا انسجنت مو مهم المهم عندي ذياب يكون بخير وما ينسجن
كعدت ويه السجناء ضليت تقريبا اسبوع كامل اجه الشامخ زارني كال...ان شاء اللة اطلعك انت ما عندك ذنب حتئ تنسجن
جاوبته...ماكو داعي المهم ذياب بخير اني ما يكدرون يعدموني لان مو انه الشخص المعني بس المهم ذياب ما ينلزم ويروح بيها
رد عليه...بس انت شنو ذنبك ما الك ذنب صح ذياب اخوك بس لازم يسلم نفسه وانت ما قصرت وياه
جريت نفس...ترا ما مسوي فضل عليه انه هذا اخوي ثلثيني الروح ترخص اله وانه لو بهذا الموقف ما راح يتركني صدكني
حط ايده علئ جتفي،باسف كال...الله يكثر من امثالك ويخلي خوتكم ولا يفرقكم
هزيت راسي باسئ...اكيد ما نفترق ان شاء اللة
لزم ايدي وعصرها حييل كال...جدي فاروق شسوي وترضئ عني
ابتسم ببرود...ما اريد منك شئ بس شئ واحد وهل شئ يخليني انسئ كل شئ
استغرب...شنووو رگبتي هاي فدوه الك
جريت نفس وزفرته كتله...لا تضلم قربئ من بعد ذياب صيرلها ذياب يالشامخ وانه مستعد انسئ كل شئ
ابتسم باسف ورد عليه...تتدلل قربان بعيوني وانه ذيبها من بعد ذياب بس بشرط تنسئ كل شئ وتخليني اعوضك
جاوبته...اذا رضيت قربى معناها انه رضيت واريد افعالك التشهد وانت كل شئ تكدر تسوي
دك صدره بحزم ...ذيبها الشامخ من بعد ذياب وهذا شاربي ازينه اذا واحد ضرها بوجودي
ارتاحيت الكلامه ما عندي اي مصلحه ويه الشامخ بالعكس انه مقاول وعندي قالب بناء وعندي عمال يشتغلون عندي بالبصره وادرس بالجامعة وجاي اكون بنفسي ابد مو بحاجة الشامخ وحتئ لو بحاجتة مستحيل اخذ منه شئ
جان طلبي هو قربى ما اريد قربى تتشتت من بعد ذياب لازم ترجع البيتها وتلم عائلتها والشامخ يكون الدرع الها الي يصد كل حاقد ويكون شوكة بعين الكل
لان عرفت ذياب بس يعرف اني مسجون بمكانه راح يسلم نفسه لو يعرف يقدم روحه علئ،طبق من ذهب وفعلا فرجو عني بخلال كم يوم
وهذا الشئ علمني ان ذياب مو اناني سلم روحه الخاطري وما رادلي البهذله رغم والله رفضت اطلع وكلتلهم اني مكان الذيب
كالو الرائد ذياب الشامخ سلم نفسه ولازم نفرج عنك
جنت بدوامه وبحالة ذهول ليش يا ذياب ليش ما تخاف علئ روحك ليش تسلم نفسك انه ما يعدموني بس انت شلون...
جنت اتمنئ يسافر بالبواخر تهريب ويطلع جنت احسب دقيقه دقيقه يوم يوم لحظه لحظه بس للاسف ما جنت اضن ان يساومون ذياب بيه ويخلونه يسلم نفسه احس اجرمت بحق ذياب
طلعت من السجن وانه محتار وكلبي طاير من بين ضلوعي طلبت اشوفه بس هم منعو عن الزياره ما اعرف ليش
رجعت بسرعه للشامخ وانه وحتقن وروحي ذايبه شفته كاعد و وجهه صاير نااار من غضبه وصله الخبر من سلم نفسه نابت عصاته بالارض وكل شويه ودكها وحفرها بارضية الاستقبال
من شافني وكف كال...سلم نفسو ذياب!!
جريت نفس...سلمها
كعد بائف علئ القنفه كال وهو يحجي ويه نفسه...لا تخاف يذيبي لا تخاف يا جدك ما اخليك صدكني ولا اخلي حرمتك حرمتك امانتي يا ذيب يا جدي
.............................
قربى
جنت مثل المالكة الدنيا بوجوده ، وهسه ماكو غير وحشة عارمة تجتاح اعماقي بغيابه ..
جانت الدمعة معلكة بطرف رمشي مثل يومية على هالحال ..
دخلت عليه بيبي رفعت راسي بس باوعتلها وكعت دموعي ..
كعدت يمي بحيل مهدود العمر اله حوبة وبيبي اخذ منها كلش هواي مثل ما اخذ مني
كالت وهي تتنهد وتتوسل : يمه غروبه كولي يا الله مو حتى عيونج راح يرحن على هالبجي
لزمت ثوبي من فوك وحجيت بحركة بيبي كليلي كليلي
شسووي ومايعدمونه شسوووي
ردت استهدي برحمانج بنيتي ليش مفاولة عليه يوز(يجوز) مايعدمونه
جاوبتها بمرارة : لعد شيسووله هاا شيسووله مو انت تدرين بالحكومة شنو
خلت ايدها على رجلي وكالت ماعلمتي ربج شضاملج ييمه ديري بالج على عويناتج لايرحن
جاوبت بيأس شنو بيدي يابيبي ؟
ردت : لخاطير فريخاتج ييمه
جاوبت شسوي بيبي اكو شي اسوي وماسويته
كالت بعد عيني ابو خيمة الزركة مايردج وهسه وكت صفار الشمس(الغروب) الله يسمع منج كوومي توضي وويهج على الجبلة (القبلة) روحج ترتاح ماعندج قير الدعا يا يمه
فركت عيووني