(Unicode)
"အဆိပ်ပြင်းသော ရန်ဝမ်ဖေး"
ယီကွမ်း၏ ခန္ဓာကိုယ်အခြေအနေပုံမှန်ပြန်ဖြစ်သွားသည်နှင့်အတူ
သူ၏နေ့ရက်များသည်လည်း
သမာရိုးကျနေ့ရက်များသာဖြစ်နေခဲ့သည်။ ယီတိုင်းပြည်မှာအစ်ကိုတော်များ၏
စာများကိုလက်မလည်အောင်
စာပြန်ပေးနေရသည့်အပြင်
နျဥ်ကွေ့ဖေး၏စဲ့ဖေးရွေးချယ်ရန်
တိုက်တွန်းမှု၊မိန်းမပျိုစာရင်းများနှင့်သာအလုပ်ရှုပ်နေခဲ့ပေ၏။
ထို့နောက် စစ်တန်းလျား၌သာအလုပ်ရှုပ်နေတတ်သော လီဝူရှင်းက ယနေ့မှရှားရှားပါးပါးအိမ်ပြန်လာသည်မို့ နေ့လည်စာအတူစားရန်အကြောင်းဖန်လာသည့်အတွက် နှစ်ဦးသားမှာ လင်းဟွေ့အဆောင်၌ တိတ်ဆိတ်စွာနေ့လည်စာသုံးဆောင်လျက်ရှိကြသည်။
တူနှင့်ပန်းကန်ထိခတ်မိသံ
တုိးသဲ့သဲ့မှလွဲ၍
တိတ်ဆိတ်မှုလွှမ်းခြုံနေသော
ပတ်ဝန်းကျင်အား လီဝူရှင်းမှစတင်ဖြိုခွဲလာ၏။
"ဝေ့မျန့်ကို ဒီနေ့ပဲ
အရှင်မင်းကြီးက မင်းသားရာထူးရုတ်သိမ်းပြီး သာမာန်အရပ်သားအနေနဲ့
နယ်နှင်ဒဏ်ပေးလိုက်ပြီ။"
ထိုစကားကိုအကြားယီကွမ်း၏မျက်ဝန်းမှာ မျက်တောင်တခတ်မျှအရောင်လဲ့သွားကာ ခဏတွင်းချင်း၌ပုံမှန်ပြန်ဖြစ်သွားခဲ့သည်။ သူကခေါင်းအသာငြိမ့်ရင်း
ဟင်းရွက်ကြော်တဖတ်အားပန်းကန်တွင်းအသာထည့်ကာ
ဆိုလိုက်၏။
"အင်း... အရှင်မင်းကြီးက ကျွန်တော့်အတွက်အများကြီးလုပ်ပေးခဲ့တာပဲ။"
လီဝူရှင်းက စိတ်လှုပ်ရှားမှုအနည်းငယ်ပင်မရှိသော ယီကွမ်းထံသို့ကြည့်လျက်ပင်....
"မင်း...ဒီအပြစ်ကိုကျေနပ််ရဲ့လား?"
ယီကွမ်းမှာ လီဝူရှင်း
မည်သည်ကိုဆိုလိုချင်မှန်းသိနေသည်မို့ ဟန်ဆောင်အပြုံးတစ်ပွင့်နှင့် အေးအေးလူလူပင်ပြောဆိုလိုက်ပေ၏။
"ကျွန်တော်မှမကျေနပ်ရင် ယီနဲ့တာ့လီကအဆင်ပြေနိုင်ပါ့မလား။ သေချာပေါက်ကျေနပ်ရမှာပေါ့"
'ငါကငါ့အတွက်ပဲငါလုပ်နေတာ မင်းအလွယ်တကူနန်းတက်နိုင်ဖို့အတွက်နဲ့တော့ မင်းပြိုင်ဘက်တွေကိုမရှင်းပေးနိုင်ဘူးမလား'
YOU ARE READING
||Lost Love|| (矢恋 ) (Completed)
Historical FictionWarning:This is not a translation!!! Characters and plot are all mine. It's my Own Creation. ယီကွမ်းသည် ထိုစဥ်က အလွန်ငယ်ရွယ်ခဲ့သည်။ သူသည် မစဥ်းစားပဲ အမြဲတစေ လီတိုင်းပြည်မှ ရန်ချင်းဝမ်ကိုသာ အလိုရှိခဲ့ပြီး တိုင်းပြည်ပျက်သုဥ်းခဲ့ရသည့်တိုင် သူ့ကိုချစ်...
