(Unicode)
"နှောင်းနောင်တ"
ယီကွမ်းတို့လင်းဟွေ့အဆောင်သို့အရောက်အဆင်သင့်စောင့်ကြိုနေဟန်ရှိသော လန်၊ မိအာ၊ပိအာတို့အပြင် သမားတော်ဟုခန့်မှန်းရနိုင်သောလူငယ်တစ်ဦးနှင့်အခြားလူငယ်တစ်ဦးပါရှိနေခဲ့၏။
သမားတော်ဖြစ်ဟန်တူသောအမျိုးသားက ယီကွမ်းထံသို့အပြုံးနုနုနှင့်အတူယဥ်ကျေးစွာနှုတ်ဆက်လာပြီး အပြာရောင်ဝတ်ရုံရှင်အခြားအမျိုးသားကမူ ယီကွမ်းကိုမကျေမနပ်ကြည့်ပြီးမှ မျက်နှာတစ်ဖက်သို့လွှဲသွားပေ၏။မိအာ၊ပိအာတို့ကမူ လီဝူရှင်းပွေ့ချီထားခဲ့သောယီကွမ်းကိုအမြင်စိုးရိမ်တကြီးပြေးလာခဲ့ပြီး လန်သည်ကား လီဝူရှင်း၏ခြေထောက်နား၌အသံပေးကာခေါင်းကိုတိုးဝှေ့ပွတ်သပ်လျက်ရှိပေ၏။
ယီကွမ်းသည်အဆင်ပြေသည်ဟူ၍ပင်ဟန်မဆောင်နိုင်၊ စကားတစ်ခွန်းပြောရန်လုပ်ဆောင်သည်ကပင် နှုတ်ဖျားမှနောက်တစ်ဖန်သွေးယိုစီးလာရသည်မို့လီဝူရှင်းက လင်းဟွေ့အဆောင်၏အိပ်ခန်းဆောင်ရှိရာသို့ခြေလှမ်းကျယ်များဖြင့်သွားရောက်၍ ယီကွမ်းအား အိပ်ရာထက်၌ ညင်သာစွာချပေးလာသည်။ လီဝူရှင်း၏နောက်၌မူ အဖြူရောင်အဝတ်အစားနှင့်သမားတော်ဖြစ်ဟန်ရှိသောအမျိုးသားကရပ်တည်ကာ ယီကွမ်း၏အမူအရာကိုစူးစမ်းနေခဲ့ပါ၏။
လီဝူရှင်းကမူ ထိုသူ၏စူးစမ်းနေမှု၊အပြာရောင်ဝတ်ရုံရှင်၏မကျေမနပ်မျက်နှာထားကိုဂရုစိုက်မနေပဲ အေးစက်စက်မျက်နှာထားနှင့်သာဆိုလာခဲ့သည်။
"သူ့ကိုကြည့်ပေး"
"ကောင်းပြီ။ ဒါဆို ဝမ်ရယ်ကလွဲလို့ကျန်တဲ့သူတွေအကုန်ထွက်ပေးကြပါ။"
"ငါရော? ငါကဘာလို့သွားရမှာလဲ!?"
"ဖန်းလင်!"
"ကောင်းပြီ။ ကောင်းပြီ! ဘယ်သူကရော အဲ့တစ်ယောက်ကိုကြည့်နေချင်မှာလဲ!?"
အပြာရောင်ဝတ်ရုံနှင့်တစ်ယောက်မှာသတင်းဥယျာဥ်၏ပိုင်ရှင်ဖြစ်နေမှန်း ယီကွမ်းမှာမထင်ထားခဲ့ပေ။ အတိတ်ဘဝ၌ဖြစ်စေ၊ယခုဘဝ၌ဖြစ်စေ သူကလီဝူရှင်းအားသတင်းအချက်အလက်ပေးပို့ထောက်ပံ့ပေးသောသူကို ရှာဖွေတွေ့ရှိခြင်းမရှိခဲ့သည်ကြောင့် ဖန်းလင်နှင့်လီဝူရှင်း၏ပတ်သတ်မှုကိုလည်းသိရှိခြင်းမရှိပါချေ။ ဖန်းလင်ကဲ့သို့ အရည်အချင်းရှိသောသတင်းပေးတစ်ဦးအားရထားလျင် မည်သည်လျို့ဝှက်ချက်မဆိုဖော်ထုတ်နိုင်သည်မို့ လီဝူရှင်းကအတိတ်ဘဝ၌ အိမ်ရှေ့စံကိုဖိနှိပ်နိုင်ခဲ့သည်ကမဆန်းပေ။ ယီကွမ်းမှာထွက်ခွာသွားပြီဖြစ်သောဖန်းလင်အကြောင်းအတွေးများနေစဥ်၌ လီဝူရှင်း၏စကားသံကသူ့ကိုပြန်လည်အသိဝင်လာစေခဲ့၏။
YOU ARE READING
||Lost Love|| (矢恋 ) (Completed)
Historical FictionWarning:This is not a translation!!! Characters and plot are all mine. It's my Own Creation. ယီကွမ်းသည် ထိုစဥ်က အလွန်ငယ်ရွယ်ခဲ့သည်။ သူသည် မစဥ်းစားပဲ အမြဲတစေ လီတိုင်းပြည်မှ ရန်ချင်းဝမ်ကိုသာ အလိုရှိခဲ့ပြီး တိုင်းပြည်ပျက်သုဥ်းခဲ့ရသည့်တိုင် သူ့ကိုချစ်...