من شقوق الظلام
قصة سجين أكثر ما يؤرق فيها أنها لم تنته بعد
عيطت بقوة وانا نضرب ف سالم : تي نوووووض نوووووض بلا لعب نووووض "قلبي حسيته وقف وانا ليا ساعه نحاول انوض فيه وهو شي شي مايتحركش ونحاول نبعد اي فكرة مش كويسه ! وانا منفصل عن العالم يلي حولي نهائي لين حسيت بايد ع كتفي لفيت وانفجعت لما شفت منير وجهه مايتفسرش والدموع ع اطراف عيونه : قول لا اله الا الله قول انا لله وانا اليه لراجعون
همست بصوت يادوب ينسمع : مـــــــــات !! لا لا " شفت لسالم يلي بين ايديا ليه ساعه ع نفس الحال ! معقوله مات !؟ مات بدون مايتوجع ولا يشكي ولا حتى شي من البارح رقد ومعش ناض!!
فرج" وقف وقرب منهم وبصوت يادوب ينسمع: لاحول ولا قوة الا بالله انا لله وانا اليه راجعون البقاء لله
تغمضت سالم و انهمرت نبكي بالعبره وانا مش مصدق ان سالم فارقنا عشرت عشر سنين مع بعض مش شوي بدينا خوت واعز كيف مااات كيف وهو ماكانش يشكي من شي بالعكس كان صحته كويسه وماعنداش مرض مزمن ولا اي شي !
طبطب ع ظهري منير ويقلي ادعيله بالرحمه الراجل تو محتاج الدعاء
شفت لمنير وقلتله بصوت مهزوز : بالك حي لازم يشوفه دكتور بالك نبضه ضعيف مستحيل يموت بدون سبب
منير" هز راسه باسف : تعددت الاسباب والموت واحد وكل نفس ذائقة الموت وسالم خلاص عند ربه تو نوض صلي وادعيله " اتجه للقبله وكبر يصلي وما استناش لين نقفو وراه وهذه اول مرة بديرها وبدو الشباب كل مرة واحد يوقف يصلي بروحه ويكتمو ف عبرتهم
وعقلي مازال مش مستوعب قلت الصلاة اولى من كل شي مشيت وقفت قدام القبله وبديت نصلي وماندري ع روحي حتى شن نقرا وشن نقول كل شوي ندعي ف خاطري يارب يكون عايش سلمت وشفت لقيتهم مقعمزين بحداه ويشوفله وعيونهم ادمع
وقفت واتجهت للباب وانا نردد: لازم يسعفوه اكيد حي مزال فيه نبض لكن ضعيف ماينعرفش الا بالأجهزه مستحيل يموت وهو راقد وبلا سبب " بديت نقربع ف الباب ونسمع ف الشباب يدعو ويذكرو ف الله ويقولولي خلاص مات ما اتعبش روحك وانا نقربع ونقربع
درتلهم وانا خلاص تفجرت من الغيض ونعارك بصوت عالي : لازم يجو يسعفوه حتى كان ميت المهم يجو ويدفنوه مش معقوول نقعدو نستنو فيهم امتى يجونا مرات حتى باليومين باش يجو تي شن بنقعدو نستنو وهو ميت بحدانااا نسيتووو نسيتوو كيف ماتو هنا كم واحد وقعدو لين خمرو ملوحين زي الجيف تقول مش بنادمية وقبل ع الاقل فيه امل انهم يجو كل يوم باش يطلعونا ونخدمو وانظفو ولا باش يعذبونا لكن تو ماعندهم مايديرو بينا والله مرات اسبوع يفوت وماحد معبرنااا ترضووو يقعد هكاا صاحبنااا
" وليت ونقربع ونقربع وفجاة يميل الباب وبعدت بسرعه عليه وطااااح ودار صوت قويييي تقول قنبله .. فرحت ان الباب طاح درتلهم وقلت لمنير بنجيب حد يسعفه نحس فيه حي .. وهو دموعه مبللات لحيته وقالي ( قلهم يجيبو كفن بنغسله )
كشخت فيه : مامااااتش باااش تفهم " وجيت طالع وجا ورايا فرج "
