سيوره زهاك ايجيك
الوقت مش ديما ظالمك
بالك بالك
يدور الزمان وتحققي امالك
ياعين روقي
بالك يصير نصيب
وبالك بعد فترة يكون حبيب
وبالك وبالك بنظرتك مايغيب
وبالك بعد طول الشقاء بحالك
بالك تصير مودة
وبالك بعد طولة غياب ومدة
يجي يقربك ياعين ويتجدة
ويسرح مجاله في مجال مجالك
وبالك بالك
..
..
فاتو خمس ايام
معاذ" واقف ع سيارة نسيبي عبدالله : غير تفضل تو تعبان من مشوار الطريق
عبدالله : صحيت والله دابها نسقدو ونوصلو غادي يأذن لعشاء
معاذ: خليك تعشى وانزل الدنيا امان ولا حتى بات هنا
عبدالله : والله مايساعد ان شاء الله مرة اخرى غير استعجل اختك نعرفها تعز عليها الهدرزه الا وقت المرواح
معاذ: هههه النسون كل هكا هي تو نضبح عليها " مشيت للحوش وخشيت لقيتها واقفه وتهدرز: هي انت الراجل مستعجل وانت ماتحلالك الهدرزه الا ف اوقات غير مناسبة
رنا: واك الخو العافن شن تلز فيا
معاذ: ساد مقعمزة اسبوعين هنا نوضي اسقدي وفكينا نبو نرتاحو من دوشتك
رنا: به به تو مزال نجيكم
مريم: اي زي كل مرة اسبوعين وتولي
رنا: اصلا ماتقدروش بلايا نعرفكم ههه
معاذ: سقدي هي حتى صغارك قلقو م السيارة
رنا" سلمت ع امي ومريم وجت جيهتي: تعال نبيك شوي
معاذ"طلعت ولحقتها: واك الراجل قريب ينزل يخنقك راه
رنا: ههه خلي يخنق وانا شن منظرك هنا ماهو اطلع حز
معاذ: كان ماخنقتكش قبله باه
رنا: المهم شن بتعطيني
معاذ: تو قلت بنعطيك شي انا
رنا: هههه لا لكن هاهو لينتلك راسها اليابس نبي هدية
معاذ" باستغراب: من مريم؟؟
رنا" هزت راسها وهي مبتسمه"
معاذ" فرحت:، وافقت ؟؟
رنا: هههه يعني تقدر تقول بدت متردده
معاذ: وهدا شن يقولوله؟
رنا:، ههه مدامها متردده معناها قريب توافق تبي من يزيد يكلمها ويقنعها
معاذ: ايح عاد
رنا: ههه اطمن قالت صلت استخارة ومرتاحه وزيد انت كلمها بالك توافق طول
معاذ: تو نشوفها يلا انت اسقدي
