#حــن_الخوات الله لينــــا ايدومه..
ايجلي علي الخاطر جميع همومه..
#حــن_خواتي..
ننسى معــاه الهم ومعاانـــــااتي..
بلاهن الدنيآآآ امظلمه مغموومه..
غلاهن انشيله دوم في عويناتي..
وهن قدرهن عالي وغالي سومه..
وبفزعتــــي نآ دوم ليهن واااتي..
ولا يوم اختي انسيبها مظلوومه..
وليها انفرغهن جميـــع اوقااااتي..
ونقضيلها لو هي تريد لزووومه..
يارب ديمآآآ اتصونهن وردااتي..
أمي القمر وهن الكون نجوومه..
ويبقن خوواتي امنورات حياتي..
وتبقى حيااتي بحنهن مردوومه.
👌👌
الصبح نضت وقررت نأجل قصه الرواية يلي الليل كله شاغله بالي وكيف نقدر نوقفها
تو لازم نمشي نطمن ع منيرة قبل سادني مشغول عنها خواتي اولى من كل شي يشغلني .. ولعت السيارة واسقدت راقي لجبل ...
وصلت لزنتــــــــــــان مدينتي الغالية يلي ليا اكثر من عشر سنين مازرتهاش .. كل شي تغير فيها المباني الجدد وزحمه السيارات والاسواق والمحلات والعيادات كاني خاش مدينة ثانية غير مدينتي .. اييييه حتى هي سنين وسنين يتغير بنادم يامعاذ لبال مدينه ... ربي يحفظ شبابها ويرحم من مات ... بدل مانمشي لحوش منيرة قعدت ندور ف شوارعها والدمعه ف عيني ياقداش مستاحشها عشت طفولتي كلها فيها ف كل شبر منها ذكرياتي مع اصحابي يلي نصهم توفو ف الحروب يلي صارت يلي كانو هما ضحيتها واصحاب المناصب شادين الكراسي... الله يرحمهم ويحقن داء الليبيين
نزلت لسوق تسوق خيت منه بضاعه وحاجات لصغار وكلمت منيرة قلتلها هاهو جايكم .. قلت مرات عندها حق ولا مش مستعده خلي نعطيها علم مع ان خاطري نديرهالها مفاجئة لكن مانعرفش ضروفها ..
مسافه الطريق ووصلت لحوشنا لقيت صغارها واقفين البرى يستنو فيا واول ماشافو السيارة جوني يجرو وبنتها خشت لامها تجري درست السيارة وقبل مانفتح الباب بدو يتسابقو يبو يفتحوه ومن يسلم عليا قبل سلمت عليهم وانا نضحك فرحت لفرحهم وقعدت نضم فيهم بالواحد بعدها قلتلهم نزلو لبضاعه يلي ف السيارة .. جاني محمد ولدها الكبير سلمعليا واستقبلني استقبال تريس مواليده 2009 يلي بدا راجل الحوش وراد باله من امه وخوته وخواته
جيت خاش وجت اختي ع طول تجري وسلمت عليا سلام حار وترحب بيا وفرحانه هي وصغارها
قداش قلبي وجعنييي عليها كيف اختنا هملناها ومادورناش وضعها .. دخلتني للحوش وكل مرة تنوض تجيب شي علما نحلفلها وهي شي تقول ليه وين ماجيتنيش راه سنين وسنين ...
قعمزو الصغار بحدايا وفرحانين بيا ويهدرزو وانا نهدرز وانشد فيهم بالواحد ... مزال نحس ف روحي مش زابط اسماءهم كويس ونلخبط فيهم هما وصغار خواتي الثانيين تبيلي وقت باش نحفظ ودماغي معش يجمع
شفت لمنيرة يلي باين الهم ع وجهه مابعدها حتى هي تشتغل وتصرف ع الصغار وشاقيا بيهم ..شفت لصغار يلي مقعمزين بحدايا ماحبيتش نحكي ع بوهم قدامهم : محمد ارفع خوتك وهاك مفتاح السيارة افتح الكوفني وشوفو شن فيه "مديتله المفتاح"
