رواية غرغريــــــــــــنة
للكاتبة وميض
رواية من واقــــــــــــ؏ ليبي
الحلقة الرابعة و العشــــــــــــرون
علي خوك مايصير لوم
حتي ان كان عايب
مرات إيرخّصك في السوم
وانتا الراس شايب
إيبرمن ليام إيحوم
بعدها إيجيك طايب
رومها ياعقل روم
زمان حذاف العجايب
ولا عمركم تكونو اخصوم
غير حشرتْ مصايب
اهناك من هو سلوم
يجلب عليك الجلايب
القلب فيه مفحوم
وما هوش حتى الرايب
#ميلادالجحاوي
..
..
فاتو ثلاث ايام وعبد المعز ماروحش وماعرفناش وينه !
حتى كلمني وليد قال كلم اصحابه لكن ماحد جابله خبر كلهم مايعرفوش وينه!!
حاولو حتى خواتي يمشو لمرته ويفهمو منها لكن هي ماتبيش تشوفهم وامها قالت الموضوع شخصي ولو ولدكم ماقالش بنتنا مانغصبوهاش ..
اما خوتها وقت مشيت نشوف ف عمي ونقله يهدي الاوضاع لكن هما مازادوها غير نار وشرار ويهددو كان معز ماطلقش مرته ف المحكمه ويجيبلها ورقتها لما يوروه ويصير فيه الدم ؟؟
مافهمتش شن هالموضوع الكبير يلي يخليهم يهددو !!
شن صار مافهمتش ؟؟ ولا حد من العيلة قدر يفهم
وامي وقت غاب معز زادت حالتها سوء والا تخمم وتبكي والليل كله سهرانه وتطلع البرى تشوف سيارته لو رجعت وتخش ترقى لحوشه اطق عليه وتنادي ..
وعلما فهمناها انه مهناش طالع مزرد وهي شي ماتبيش تهدى وتقول تو دار ف روحه حاجه بعد طلقها وهو كان يبيها ودار المستحيل باش قدر يقنع خوتها يعطوهاله وكان يحبها ومدللها كيف قدر بسهولة يطلقها ويهج..؟؟؟
كانت بتكون هالكلمه صعبه عليا لو انقالت قبل شهور لكن حاليا معش ثاثر فيا لانه مشاعري اتجاهها اختفت من بعد ماروحت باقل من شهر .. لاني قنعت نفسي ان هي مرت خوي وبس ووردة يلي كنت نحبها ماتت مع موت معاذ القديم
وحال بوي مش احسن من حال امي وهو قاعد يخمم كيف يحلها وماتكبرش المشاكل اكثر بينه وبين خوه بدات بعد جاته بنته مضروبة وقريب ماتت بين ايدين ولده
وانا كان حالي الاسوء بيناتهم مش قادر ندير حل مش قادر حتى نصبرهم ونواسيهم ع هالمصايب .. هارب منهم وخلاص ديما مقعمز البرى ولا ف الجامع ولا عند فتحي ..
.
.
درست السيارة ونزلت ورقيت الدروج وانا رافع صفرة الغداء ووصلت لشقه فتحي وطقيت الباب برجلي
فتحي:، فتح الباب : طقتك هذه المزعجه مرة اخرى اديرها نعزقك من الدروج
معاذ: وقبل تعزقني نعزق الغداء ع راسك .. مالا هي سلامتك " درت وجيت ماشي"
