ڪـان الـمـواجـع سـم رانـا مـتـنـا
يـامـا مـواجـع حـاره فـوتـنـا
سكت فتحي وانا معش عرفت حتى شن نقوله وب شن نواسيه
تنهد وقالي: تعرف تمنيت قعدت ف الحبوس وماطلعتش
: ربي هكا رايد
فتحي: مش قدر نتقبل نشوفه راه هذا خوي الصغير ربيته انا كنت بوه وقت مات بوي وهو صغير كان هو واختي زي صغاري ربيتهم وكبرتهم واخرها يتزوج مرتي!! ريتها حتى عندها صغار مني يشفع هالشي
: بالك طلعت حامل وقت ومشيت وخليتها وتزوجها باش يربي ولد خوه
ضحك بهزوة: ايح لا حامل لا شب ماهو خطرتلي حتى انا ولكن سالته قالي لا ماعندهاش صغار مني .. وتو هوينها مدايرة عويله معاه
: به شفته انت مشيتلهم ولاشن
فتحي: ياراجل لمن بنمشي ومن نشوف قلتلك امي ماتت وهو تزوج مرتي بالله تو تبيني نمشيله نقلها هاهو حي راه ردهالي ولا شن منظري
: واختك ماشفتهاش؟
فتحي "تنهد: قالي تزوجت ومشت لشرق لان راجلها كان ف حرب 2019 مع حفتر
معاذ: حفتر من هذا!! وحرب شن تاني
فتحي: تي وين ندري انا هي البلاد تخلطت تخليطه شينه شورها .. تو خليني نفهم انا قالولهم مفقود كيف كيف يزوجوهاله كيف ؟
معاذ: سامع فتوى انا لابن عثيمين زمان قال عمر رضي الله عنه ( في امرأة المفقود تربص أربع سنين ثم تعتد أربعة أشهر وعشراً ). أخرجه مالك والشافعي
فتحي: به في حال رجعت انا شن يصير
معاذ:، امم في هذه لازم تسال شيخ لان اختلف الكلام بين الائمة
فتحي: به نوض بلا نكد وجيبولي طاسه نسكافي شن تحسابو بتسكتوني بالصفرة يلي جبتوهالي
معاذ: تي واااك منك انت والله لسانك يبي قص
فتحي: ههه ياراجل نبي نعدل راسي باش نسمع شن صار فيك انت بالزبط
وقفت: بنجيبلك مالقي معبي باش تعدله وتصحصح وتسمع حكايتي " لفيت ومشيت ونسمع فيه يضحك ابتسمت سعوده فتحي رغم يلي صارله مزال عنده روح مرحه ومبتسم ويحاول يبين قوته مش زي حالتي ... لقيت وليد طالع بصفرة النسكافي ومدهالي
همستله: شن مزال اميعدين ف المربوعة
وليد: ميعاد الشيبن عارفه وكان فتحو سيرة السياسه معش يصكروها والله متحشم من صاحبك حاطينه مقعمز برى
: ههه ما ادورش اصلا كرهنا الحيوط وعارفه مستحيل يخش والجو مليح البرى " وليت لفتحي يلي لقيته سرحان حطيت الصفرة قدامه وخديت طاستي وسكتت"
قعمز خدا الكوب الكبير وبدا يشرب بهدوء .. شافلي : زعمه فرج ومنير ومحمد حيين
تنهدت: الا نفكر فيهم الحق .. كان نلقى نمشي لمدنهم ونسال ع اهلهم لكن المذكرة راحت وراحو العناوين معاها
