مازلت صاحب صاحبي ورفيقه
تبع طريقي محت شور طريقه
ماهيش كلمة عابرة
كلمة رفيقي لكسورك جابرة
بين الرفق لامجاملة لامكابرة
عنوانها رفقة متاع حقيقة
كان ضقت نمشي انصارحه وانخابره
هو دون كل الناس كل خليقة
انروّح ونفسي من قداهم صابرة
أني صاحبي زيتي اختلط فدقيقه
اخبر حالتي وانا رفيقي خابره
نفهم زفيره وكتّه وشهيقه
ونفهم حديثه وكتمته ومنابره
هذاك ليش خطواتي مشوا فطريقه
..
وقفت وقربت من فتحي يلي مزال يبتسم ومازلت نحس بوجع ف قلبي من يلي صار
فتحي " رفع الاكياس يلي ف ايده:اليوم مش متعبكم جبتلكم عشاكم واتي
ابتسمت بحب : لاش متعب روحك ياراجل
فتحي: والله ديما متعبكم معايا لين متحشم وهاهو كيف البوم خلسوني قلت اقل شي نعشيهم ع حسابي مدلي الاكياس يلي ف ايده لايمين : هدم حسبت لعويلة
: غير لاش ياراجل ساد غير حسبتني معاك
فتحي: صكرفمك عيلتي هدم شن براني والحق جيتك المغرب نحساب بنلقاك قالولي مهناش قبل بنقلهم ما اطيبوش عشاء لكن ماقدرتش ومشيتلك ف الجامع قالو كيف طالع قلت بينهم حتى يسحرو بيه ويصيمو غدوة هههه
ابتسمت وحمدت ربي ان جا بعد ماتمت الدوشه كان هدا كيف بنبررله موقفنا منه وهو مسكين جاي باش يقول ما اطيبوش
فتحي: تي خيرك مبلم تشوفلي ارفع العشاء للعويلة وبري جيبلنا امية
ابتسمت: الله يبارك فيك ويزيد من مالك يارب " لفيت ومشيت انا نحمد ف ربي عدت المشكلة كلها ع خير .. خشيت ولقيت رنا ف الكوجبنه ادير ف طاسه حلبة : شن حال امي وبويا تو
رنا: رعشتوهم الله يسامحكم والله بويا هبطله السكر كيف تو تعدل وامي لين عطيتها منوم وهي مبكري مشغولة ع وليد تقول اشبح شن دار ف روحه والسلاح مزال ف ايده
" تنهدت: ان شاء الله مايصير شي " حطيت الاكياس ع الرخامه: هدا عشاء جابه صاحبي
رنا : هو ماشي بيجيب عشاء وانتم قريب درتو رقبه ف رقبتكم " سكتت وهي مشت فتحت الاكياس : شوف جايب حتى الحلو " شافتلي: هو ماشي يشريلكم ف عشاكم وانتم هنا قريب قتلتو اختكم وقتلتوه لما يجي
" تنهدت : الحمد لله يلي سترنا ربي
رنا: الحمد لله .. لكن بالله شد وليد فهمه يسيب احته ف حالها مسكينه من يوم اطلقت وهو ف جرتها مقيدها ف حياتها ماتطلعيش ماتمشيش ماتعليش صوتك ومش محترمها بكل ومرات كان ناقشاته ف شي يرفع ف ايده عليها
معاذ: لا حول ولا قوة الا بالله .. هما الشباب ف هالعمر يحبو يتحكمو
رنا: اي وهو مزودها الحق بدات اعصابه بكل هالفترة بعد مرض بويا هو زاد وهي سلامتها ماتسكتش
