عيون الريم اللي سحرنــــــــــــي**
وين ايجنــــــــــــي
في عز النوم ايوعنــــــــــــي**
سود اكبار.. وماهننــــــــــــي
عيون رزنــــــــــــي**
في وسط الديموم خذنــــــــــــي..
بخزره في قلبي صابنــــــــــــي*
اسهوم رمنــــــــــــي*
انقول ننجا منهن ماظنــــــــــــي**
... ... ..
.( ..عز العمر ..)
..
..
بعد مرور عشر ايام
ف شقة فتحي
معاذ" مقعمز ع الصالون : مش عارف لتو ماعندي جو للخدمه
فتحي: وقداش بتقعد معتمد ع فلوس كرا المحل هاهو نص الشهر وتقعد مفلس ماشاء الله مش حتى تشد ع روحك شادها عزايم وكرم حاتم الطائي حرام ماتفوته
معاذ:، ههه غير نوض نوض ياقفاص جيبلي حتى حاجه نشربها ليا ساعتين مقعمز وانت تور فوق راسي عطشتني
فتحي" وقف: هو انا يلي نور انت شن دخلك عطشت
معاذ: هههه باه جيبلي نسكافي صدعت روسنا
فتحي: هاه بيبدا يجمل عليا بحفاظه النسكافي يلي جاييها
معاذ: هههه وااك فتحي نوض خيرلك ولا نحلف معش جايبلك
فتحي" مشى للكوجينه: سمعت قالو يبيعو فيه النسكافي واتي تو نشريه بلاش جمايلك
معاذ" كيف بنرد رن نقالي رساله فتحتها وشفت شن مكتوب
[ مو جافيني غير نضرهم ....... عارف روحي في خاطرهم]
رقم غريب ليه ايام يبعتلي تي من هذا شكله حد غالط
رنت رساله اخرى من نفس الرقم فتحتها وانجلطت ودقات قلبي تزيد وتزيد وتزيد نحسه بيطلع من بين ضلوعي
فتحي" طلع م الكوجينة: وهااه هذه طاسه نسكافي لعيون صاحبنا وقولو فتحي مش كريم فتت طرم حاتم الطائي "ضربني من كتفي: هيي خيرك
معاذ" حطيت النقال ع الطاولة: اا شي شن قلتلي حاتم الطائي ايح هو النسكافي منا وجايبينهولك واتي
فتحي: والطاسه مني والحليب مني وانا يلي طيبته ينكتب ف التاريخ راه
معاذ: صبرك يارب
فتحي: قولي خيرك خيره وجعك هك متغير
معاذ" ارتبكت: اا شي شي
فتحي: اسمع لقيتلك حل ف الخدمة شن رايك بما انك خريج حاسوب تشتغل ف شركه ولا مصرف اكيد عندك فكرة ع الخدمه
معاذ: ايح نقولك ماعنديش جو تقولي خدمه ومصرف وهو راسي مشوش باش نرفس حسابات الناس ف بعضها
فتحي: ههه امالا اقعد خير
رن نقالي شفت وقلبي مزال يدق خفت يكون المتصل نفسه صاحب الرساله لقيته هشام رديت : السلام عليكم
هشام: وعليك السلام كيف حالك
معاذ: بخير شن امورك انت يا افندي
