ريت ضحكتي هاذيك يوم حكينا ؟!
وريت وقفتي هاذيك فارد طولي ؟!
..
وريت يومها ؟! مش بعضنا واسينا ؟!.
وقتلك الكاس المُرّ خلّيهولي ؟!
..
وقتلك الدنيا قد ماهي شينة ؟!
تبي صبر ماتَابيش حد ملولي
..
تنهدت راني في قفاك غبينه
وجت على اركابي طيحتي ونزولي
..
وفجّرت عبرة من اوجاع دفينة
وسلمت لهمومي وصار حصولي
..
وناجيت مولايا طلبت العينة
وقلت ياالله الريق المر حلّيهولي
.
.
#فن_جان
(الشاعر علي ابورقيقه)
راكب ف السيارة ونشوف لطريق من الروشن وسارح بعيد
علاش هكا يصير معانا كنا ف الحبس وطلعنا لحبس احرف منا
حياة تغيرت
النفوس تغيرت
الفقد ف كل مكان
القتل بدا ع سبلة
توقعت لما نطلع نلقى الحياة نفسها والناس نفسهم لكن للاسف انصدمت م الواقع
امي مريضه نفسيا
بوي مريض سرطان
خوي توفى
خوي الثاني تزوج يلي ف يوم تمنيتها
فتحي مش احسن مني حال
امه توفت هالسنه قبل ماتعرف انه حي
خو تزوجت زوجته يلي خلاها عروس وماعندهاش منه صغار
محمد ماعرفناش من هو ومن اي مدينه ؟ واندرى نعرفو ولا يقعد مجهول الهوية
منير اااه يامنير كيف صار واتهموك بالمخدرات والقتل؟
لو تندري ع اميمتك وشن صار فيها وخوتك يلي اشبح شن مدايرين لين متبرية منهم كيف ادير ! وبوك يلي مات حتى هو بدون مايدري انك حي
وفرج؟؟ زعمه شن صار فيك يافرج ان شاء الله بس تطلع عايش وكل شي بعدها يهون
ساد سالم توفى قبل يشم ريحه الحرية
..
..
كملنا طريقنا واحنا ساكين ااا من بعض الكلمات البسيطه يلي كان يقولها ايوب ويلي مالقالهاش اي رد
اكيد حال فتحي من حالي ويخمم ف منير وف محمد
اما محمد ف معروف عنه الهدوء وكانه مش ف نفس العالم يلي عايشين فيه هايم وخلاص ربي يفرج عليه ويلقوه عويلته بالك يولي طبيعي
.
.
طريقنا م مصراته للخمس تقريبا اكثر من ساعتين بسبب الزحمه
كان ايوب يحكي ان البلاد الحمد لله بدت متهنية والطرق بين المدن امان .. قال ان زمان كان الواحد يخاف يطلع برى من حوشه ف الليل وحتى يخاف يطلع برى من مدينته بدون سلاحه لان الخطف والقتل بدا بلا حساب
وقال ان بعد كورونا خفت الحروب وممكن ربي جابها نعمه لينا باش نفتكو من الدم .. وقتل بعض .. والناس لهت ف الحجر وف ارواحها وسيبت الحروب
الحروب يلي كانت ع السلطه وماكاسبها كان اصحاب المناصب
وراح ضحيتها الشباب !
كان هو يحكي وكنا نسمعو بدون اي تعليقات
ايوب: شن رايكم قبل نزورو صاحبكم نمشو لاثار لبدة
فتحي: اوو ياريت والله من قبل خاطري نمشيلها
ايوب: ها معاذ خيرك الا ساكت
معاذ" بهدوء: هي برى لينا نغيرو جونا
ايوب: اثار لبدة شي جمييل بكل اثار رومانية " واستمر يحكيلنا عن تاريخ الاثار وامتى تأسست..."
