صراع عائلة الطوجي

السادس

بعد يومين من آخر احداث حصلت........كان فهد يجلس في مكتبه في شركته الخاصة ينتظر موعد الاجتماع مع أصحاب الشركة التي سيتشارك معها فدخلت عليه السكرتيرة بكل توتر فهو يجعل اي شخص يخاف منه حتى إذا كان لم يفعل له شيء.......

السكرتيرة: مستر فهد...فيه واحد عايز يقابل حضرتك برا اسمه محمود العمري.
فهد ببرود: خليه يدخل.
السكرتيرة بتوتر: حاضر يا فندم عن اذنك.

خرجت السكرتيرة وسمحت لمحمود ان يدخل له...وعندما دخل رفع فهد نظره عن الأوراق وقال له باحترام وهدوء: اهلا وسهلا يا حج محمود اتفضل.
محمود جلس امام المكتب بابتسامة: اهلا بيك يابني...اتمنى ما اكنش ازعجتك ولا حاجة؟!
فهد: لا لا خالص انا اصلا مش مشغول حاليا لغاية ما اروح الاجتماع الساعة ٤ العصر.
محمود: طب الحمد لله...ربنا معاك يابني ويقويك.
فهد بابتسامة: امين يارب ياحج.
محمود: طيب يابني انا جيت النهاردة عشان اقولك على قراري.
فهد ترك ما بيده وانتبه له جيدا: قول ياحج اتمنى تكون وافقت بس.
محمود بتنهيدة: انا وافقت يا فهد بس بشرط.
فهد باستغراب: شرط؟!
محمود: معلش يابني بس انا مش همسك اي حاجة الا بالشرط ده الاول.
فهد: تمام ياحج اتفضل قول؟!
محمود: المطعم يتكتب باسم محمد ابني.
فهد نظر له بصدمة: ابنك؟!
محمود: انا عارف انها ممكن بجاحة مني بس ده طلبي الوحيد اكتر مايكون شرط.
فهد: وليه ابنك بالذات مع ان كده كده جدي الله يرحمه كاتبه ليك اصلا؟!
محمود: ماهو عشان كاتبه ليا ده اللي خلاني اتشجع واجي اطلب الطلب ده لان الصراحة انا ماعرفش ايامي اد ايه عشان كده عايز عيلتي تعيش مرتاحة من بعدي...وبما ان مروة بنتي لسة صغيرة ومش هتعرف تدير حاجة فقلت اكتبه باسم ابني محمد وهو هيعرف يتصرف من بعدي ان شاء الله.
فهد: ربنا يديك طول العمر ياحج ان شاء الله...عموما تمام انا موافق...نقدر نروح في اي وقت تحبه ونغير الأوراق وتبقى الملكية لابنك محمد.
محمود بابتسامة شكر: شكرا ليك يابني حقيقي صالح كان معاه حق لما قال انك الأصلح في انك تدير الأموال من بعده وانت اللي هتدي كل واحد حقه.
فهد بابتسامة: الحمد لله على كل حال انا بحاول أصلح اي حاجة عيلتي عملتها ياحج وربنا يقدرني على الخير دايما.
محمود: امين يارب.
ثم وقف واكمل: يلا هستاذن انا بقا واسيبك تكمل شغلك.
فهد نظر له: ليه ياحج انت حتى ماطلبتش حاجة لازم تقعد تشرب حاجة.
محمود بابتسامة: معلش يابني انت عارف انا سايب المطعم لوحده وانا مش بتطمن عليه في ايد اي حد غيري حتى لو كان ابني.
ضحك فهد بهدوء: مع انك عايز محمد هو اللي يدير المطعم من بعدك؟!
محمود بمزاح: يديره لكن مش اللي يقدم الطلبات او يطبخ...انا هخليه يديره بس ومروة هي اللي هتمسك فيه الطبخ والإشراف وكله.
فهد بغموض: على كده بقا بنتك انت بتثق فيها اكتر؟!
محمود: مش قصة ثقة...انا الحمد لله بثق في عبالي الاتنين طبعا بس الفكرة انها ذكية اكتر من محمد...محمد ذكي لكن متسرع في قراراته لكن مروة لو بايدها تفكر سنة قبل ماتاخد اي قرار ممكن تعملها عادي هههه...عشان كده انا بحب اخد رأيها اكتر من محمد وخصوصا لو في شغلي...لانها طباخة شاطرة جدا وليها نفسها في الأكل.
فهد: ربنا يخليهملك ياحج ان شاء الله.
محمود: امين يارب ان شاء الله...يلا عن اذنك بقا.
فهد: ماشي ياحج براحتك...خلي بالك من نفسك.
محمود: تسلم يابني سلام عليكم.
فهد: وعليكم السلام.