صراع عائلة الطوجي

الثاني عشر

هشام ركض إليهم وهو يحاول ان يبعد فهد عن ابنه وقال بغضب: فهد انت بتعمل ايه؟!...سيب ابني ياحيوان انت!!
فهد وهو يمسك طارق من قميصه بقوة ويرفض ان يتركه: والله ماهسيب الحيوان ده الا وهو ميت.
هشام ابعده بقوة وقال بصراخ غاضب: انت اتجننت هو عملك ايه عشان تبهدله بالطريقة المتخلفة دي؟!
فهد بصراخ ارعب من في الغرفة: اسأل ابنك المصون اللي كل من هب ودب ماسلمش من اذيته...وآخرها البنت اللي كنت هتجوزها كمان.
هشام التفت الي طارق الذي كان حالته لا ترثى لها: الكلام ده صحيح ياطارق؟!
طارق بخوف: يا بابا انا.......
هشام بغضب: انطق!!...الكلام اللي بيقوله فهد ده صحيح؟!
لم يستطع طارق التحدث فماذا سيقول له حتى تحدث فهد بسخرية: طبعا البيه مش هيقدر ينطق أصله هيكدب ويقول ايه.
طارق بغضب: اخرس بقا هي اصلا ماكنتش بتحبك ولا بتطيقك والا ماكنتش جرت عليا انا.
كان سيتقدم منه فهد بغضب ليضربه لولا أن التفت له هشام وضربه بالكف على وجهه بقوة حتى ادمت شفتاه وقال: اخرس انت بقا مش كفاية عمايلك اللي مش بتخلص دي اخرتها تعمل كده في ابن عمك انت فعلا محتاج تتربى من اول وجديد لان الظاهر في الفترة اللي فاتت دي امك ماعرفتش تربي كويس.
طارق بسخرية غاضبة: بس ماتقولش امي.
التفت هشام الي فهد وقال باعتذار: انا حقيقي اسف على اللي عمله الحيوان ده واوعدك اني هعوضك عن أي حاجة انت خسرتها.
فهد بسخرية: احنا مش بنتكلم عن عربية ابنك كسرها عشان تقولي اعوضك انا بتكلم في كرامتي اللي انجرحت بسبب الزفت ده.
هشام بتوتر: طب ايه المطلوب مني دلوقتي وانا هنفذه؟!
فهد ببرود: شوف انت بقا لما كرامة فهد شاكر الطوجي تنجرح ايه اللي ممكن يعوضه؟!
هشام لا ينكر انه بدأ يخاف منه الان فقال: انا مش عارف!!
فهد اقترب منه وقال بفحيح غاضب: عمر ابنك مايكفنيش اصلا يا هشام بس انا اللي هعديها المرادي لان خلاص هي مابقتش تلزمني لكن...(ثم ابتعد عنه ونظر الي طارق)...ابنك هيدفع كل تكاليف المستشفى اللي فيها البنت وكمان هيتعاقب على حسب القانون.
طارق بصدمة: ايه؟!...انت بتقول ايه يستحيل اعمل كده؟!
نظر له هشام بغضب: بس اخرس انت مش كفاية اللي هببته كمان ليك عين تعترض؟!
فهد: انت عرفت باللي عمله ابنك في البنت!!
هشام بتذكر: اه جالي البلاغ لغاية البيت.
فهد بتعجب: مين اللي بعت البلاغ؟!
طارق بسخرية: قال يعني حضرتك مش اللي بعت البلاغ؟!
فهد ببرود: وانا هبعت البلاغ وكمان هاجي اضربك ثم انا مش بتاع البوليس والكلام ده انا دايما باخد حقي بدراعي.
هشام باستغراب: انا كنت بحسب انت؟!...طب مين اللي بعته؟!
طارق: ممكن شهد؟!
فهد: لا هي قالت إنها مش هتبلغ.
هشام: اومال مين؟!
فهد: ايا كان...ابنك لازم يسلم نفسه.
طارق: مستحيل قلت.
هشام ببرود: انا موافق.
طارق نظر له بصدمة: بابا انت بتقول ايه؟!
هشام: مش قلت تخرس؟!
طارق بخوف: طب..طب ادفع مصاريف المستشفى واي حاجة هي تحتاجه هعمله.
فهد: فيه حل تاني لو مش عايز تتحبس.
هشام بامل: ايه هو يافهد؟!
فهد بسخرية: يعترف بابنه ويبقى راجل ولو لمرة واحدة في حياته.
طارق بغضب: انت بتقول ايه؟!...ثم انت مالك اصلا بتدخل ليه في موضوع يخصني؟!
فهد ببرود: وانت اتدخلت ليه في موضوع يخصني من الاول؟!...مش انت اللي جريت عليها واخدتها؟!
هشام: خلاص تمام انا موافق على الحل ده.
طارق: يا بابا.....
هشام قاطعه: مش بدل ماتتحبس؟!
طارق: بس انا مش مستعد؟!
هشام: كان المفروض تعرف من الاول قبل ماتهبب اللي هببته ده.
فهد: خلاص اتفقنا اول ما الولد يتولد يسجله باسمه.
هشام: موافق.
طارق ببرود: انتوا ناسيين انا خاطب؟!
فهد بسخرية: وانت ماكنتش فاكر ليه قبل ماتعمل عملتك؟!
طارق نظر له بغيظ في حين قال هشام: انا هتكلم معاهم ونفسخ الخطوبة لو لزم الأمر.
طارق بصدمة: تفسخ الخطوبه؟!
هشام بتعجب: ايه انت مش كان نفسك من بدري في كده؟!
طارق: اه بس انا دلوقتي مش عايز.
هشام: ليه بقا ان شاء الله؟!
طارق ببرود: انا حر يابابا اعمل اللي انا عايزه.
هشام: والله بقا ده مش بمزاجك انت فاهم ان الكون كله هيمشي تحت امرك ولا ايه هي اصلا اول ماتعرف هتطلب من نفسها الفسخ.
طارق: وقتها انا هتصرف معاها لكن انت ماتطلبش الفسخ.
فهد ببرود: طالما احنا بقينا متفقين يبقا انا همشي.
وكان سيذهب لولا أن نداه هشام: فهد ممكن تستنى برا بس عايزك في موضوع.
فهد: طب ياريت بسرعة عشان ما اتاخرش.
هشام: تمام حاضر.
بعد ان خرج فهد من الغرفة قال طارق بسخرية: انت بتعمل لفهد ده حساب اكتر من جدي الله يرحمه وربنا.
هشام بغموض: ده مؤقتا بس لغاية مااخد اللي انا عايزه.
طارق باستغراب: يعني ايه؟!
هشام انتبه له وقال: مالكش دعوة انت خاليك في المصيبة دي وزي ما فهد قال انت هتعترف بيه اول مايتولد فاهم؟!
طارق بغضب: طيب طيب فاهم.
ثم خرج هشام وقال طارق بغضب: يخربيت اهلك ياشهد كان يوم مايعلم بيه الا ربنا يوم ماقابلتك ياريتني ياشيخة كنت سيبتك لفهد...هقول ايه لخطيبتي دي دلوقتي...وليه انا مش عايز افسخ الخطوبة؟!...يمكن عشان جدي؟!...لالا فيه حاجة تانية يارب بقا حلها من عندك.
ثم ذهب لكي ينام قليلا بعد هذا الضرب الذي تعرض له...........